ಸಂಪಾದಕೀಯ್:
ಹಾಂವ್ ದೊರ್‍ಯಾ ಭಿತರ್ ಆಸಾಂ ಯಾ ಭಾಯ್ರ್ ಆಸಾಂ ಮ್ಹಳ್ಳಿ ಗುಸ್ಪಡ್
ಜಾಯ್ತೆ ಪಾವ್ಟಿಂ ವಿಮಾನಾರ್ ಪಯ್ಣ್ ಕರ್‍ತಾನಾ, ಜೈತ್ ಬಾಂದ್ಪಾಂ ಥಾವ್ನ್ ಸಕ್ಲಾ ಪಳೆತಾನಾ ಸಕಯ್ಲ್ ಆಸ್ಚ್ಯಾ ದೊರ್‍ಯಾಂಚಿ ಭಿತರ್‍ಲಿ ಕೂಸ್ ಖಂಯ್ಚಿ ಆನಿ ಭಾಯ್ಲಿ ಕೂಸ್ ಖಂಯ್ಚಿ ಮ್ಹಣ್ ಸಮ್ಜನಾಸ್ತಾಂ ಗುಸ್ಪಡ್ಚೆಂ ಆಸಾ. ಎಕಾ ಕೊನ್ಶಾಥಾವ್ನ್ ಪಳೆತಾನಾ ದೊರ್‍ಯಾಭಿತರ್ ಏಕ್ ಸುವಾತ್ ಅಸಾ ಮ್ಹಣ್ ಭೊಗ್ತಾ ತರ್ ಆನ್ಯೇಕಾ ಕೊನ್ಶಾಥಾವ್ನ್ ಪಳೆಲ್ಯಾರ್ ತಿ ಸುವಾತ್ ದೊರ್‍ಯಾ ಭಾಯ್ರ್ ಅಸಾ ತಶೆಂ ಭೊಗ್ತಾ.
ಜಾತ್-ಕಾತ್, ದೇವ್-ಧರ್ಮ್, ಭಾಸ್-ಪ್ರದೇಸ್, ದುಬ್ಳೊ-ಗ್ರೇಸ್ತ್, ಕಾಳೊ-ಧವೊ ಮ್ಹಣುನ್ ಸಮಾಜಾಂತ್ ಜಾಯ್ತೆ ದೊರೆ ಬಾಂದ್ಪಿ ಅಸಾತ್. ಹೆ ಅಸಮಾನತೆಚೆ ದೊರೆ. ಆಮಿ ಚಿಂತ್ಚೆಂ ಆಮಿ ದೊರೆ ಬಾಂದಲ್ಲ್ಯಾ ಖಿಣಾ ಶಾಬೀತ್ ಜಾಲ್ಯಾಂವ್ ಮ್ಹಣುನ್. ಪುಣ್ ಹೆರಾಂನೀಂಯ್ ತಾಂಚೆ ಭೊಂವಾರಿಂ ದೊರೆ ಘಾಲುನ್ ಆಮ್ಕಾಂ ಭಾಯ್ರ್ ದವರ್‍ಲ್ಯಾತ್ ಮ್ಹಣುನ್ ಕೆದಳಾ ಆಮಿ ಸಮ್ಜುಂಕ್ ಸಕ್ತಾಂವ್?
ಸ್ಟೇನಿನ್ ಎಕಾ ಜಳ್ತ್ಯಾ ವಿಶಯಾರ್ ಕವಿತಾ ಬರಯ್ಲ್ಯಾ. ಮನಾಂಕ್ ಕಾಂತಂವ್ಚಿ, ಕಾಳ್ಜಾಂಕ್ ಪೊಕೊರ್‍ಚಿ ಕವಿತಾ ಹಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೊರೊ
ಹೆಂ ಮ್ಹಜೆಂ..
ಇತ್ಲೆಂ ಮ್ಹಜೆಂ..
ಹೆಂ ಮ್ಹಾಕಾ ಮ್ಹಣುನ್
ಹಿತ್ಲಾ ಭೊಂವಾರಿಂ ಹಾಂವೆಂ ದೊರೊ ಬಾಂದ್ಲೊ.
ಹಾಂಗಾ ದುಸ್ರ್ಯಾಂನಿ ಯೆಂವ್ಚೆಂ ನಾಕಾ
ಹಾಂಗಾಥಾವ್ನ್ ಕಾಂಯ್ ಭಾಯ್ರ್ ವೆಚೇಂಯ್ ನಾಕಾ
ಫಾತ್ರಾವಯ್ರ್ ಫಾತರ್ ದವರ್‍ನ್
ಹಿತ್ಲಾ ಭೊಂವಾರಿಂ ಹಾಂವೆಂ ದೊರೊ ಬಾಂದ್ಲೊ
ಹಾಂವ್ ಹಾಂಗಾ ಶಾಬಿತ್
ಭಾಯ್ಲೆಂ ಕೊಣಾಕ್ ಕಳಿತ್..?
ಸುಡ್ಸುಡಿತ್ ದೆಕುನ್ ಭಾಯ್ಲಿ ಮಜತ್ ನಾಕಾರ್ನ್
ಹಿತ್ಲಾ ಭೊಂವಾರಿ ಹಾಂವೆಂ ದೊರೊ ಬಾಂದ್ಲೊ.
ಉಸ್ವಾಸ್ ಮ್ಹಜೊ ಉಡ್ಲೊ ಏಕ್ ದೀಸ್
ಚುಕವ್ನ್ ಕುಡಿ ಪಾರೊ
ವಾರ್‍ಯಾರ್ ಲೀನ್ ಜಾವ್ನ್ ಉಬುಂಕ್ ಧರ್‍ತಾನಾ
ದಿಸ್ಲೊ ಮ್ಹಜೊಚ್ ಹಿತ್ಲಾ ದೊರೊ…
ದೊರೊ ಮ್ಹಜೊ, ಹಾಂವೆಂ ಬಾಂದಲ್ಲೊ
ಭೊಂವ್ತಣಿ ದೊರೆ ಸಬಾರ್ ಹೆರಾಂನಿ ಬಾಂದಲ್ಲೆ..
ಸಕ್ಲಾ ಪಳೆತಾನಾ ಸಮ್ಜನಾ ಜಾಲೊಂ
ಸುವಾತ್ ಮ್ಹಜಿ ದೊರ್‍ಯಾ ಭಿತರ್ ಯಾ ಭಾಯ್ರ್!!
-ಸ್ಟ್ಯಾನಿ ಬೆಳಾ
संपादकीय:
हांव दोऱ्या भितर आसां या भायर आसां म्हळ्ळी गुस्पड
जायते फावटीं विमानार पयण करताना, जैत बांदपां थावन सकला पळेताना सकयल आसच्या दोऱ्यांची भितरली कूस खंयची आनी भायली कूस खंयची म्हण समजनासतां गुस्पडचें आसा. एका कोनशाथावन पळेताना दोऱ्याभितर एक सुवात असा म्हण भोगता तर आनयेका कोनशाथावन पळेल्यार ती सुवात दोऱ्या भायर असा तशें भोगता.
जात-कात, देव-धर्म, भास-प्रदेस, दुबळो-ग्रेस्त, काळो-धवो म्हणून समाजांत जायते दोरे बांदपी असात. हे असमानतेचे दोरे. आमी चिंतचें आमी दोरे बांदल्ल्या खिणा शाबीत जाल्यांव म्हणून. पुण हेरांनींय तांचे भोंवारीं दोरे घालून आमकां भायर दवरल्यात म्हणून केदळा आमी समजूंक सकतांव?
स्टेनीन एका जळत्या विशयार कविता बरयल्या. मनांक कांतंवची, काळजांक पोकोरची कविता ही.
-मेल्विन रोड्रीगस
कविता:
दोरो
हें म्हजें..
इतलें म्हजें..
हें म्हाका म्हणून
हितला भोंवारीं हांवें दोरो बांदलो.
हांगा दुसऱ्यांनी येंवचें नाका
हांगाथावन कांय भायर वेचेंय नाका
फात्रावयर फातर दवरन
हितला भोंवारीं हांवें दोरो बांदलो
हांव हांगा शाबीत
भायलें कोणाक कळीत..?
सुडसुडीत देकून भायली मजत नाकारन
हितला भोंवारी हांवें दोरो बांदलो.
उस्वास म्हजो उडलो एक दीस
चुकवन कुडी पारो
वाऱ्यार लीन जावन उबूंक धरताना
दिसलो म्हजोच हितला दोरो
दोरो म्हजो, हांवें बांदल्लो
भोंवतणी दोरे सबार हेरांनी बांदल्ले..
सकला पळेताना समजना जालों
सुवात म्हजी दोऱ्या भितर या भायर?
-स्टॅनी बेळा