ಸಂಪಾದಕೀಯ್:
ಬದ್ಲೊನ್ ಗೆಲ್ಲೆ ಚರಿತ್ರೆಚಿಂ ಪಾನಾಂ ದಾಕಂವ್ಚೆಂ ಪಿಂತುರ್‌ಚ್ ಕವಿತಾ
ಕೊರ್ಗಾರ್, ಮ್ಹಾರ್ ಮ್ಹಣೊನ್ ಆಮಿ ಲೆಕೊನ್ ಆಸ್‌ಲ್ಲೆ ಸಮಾಜೆಚಿ ಪರಿಗತ್ ವೀಸ್ ವರ್‍ಸಾಂ ಆದಿಂ ಆಸ್‌ಲ್ಲಿ ಆಜ್ ಉರೊಂಕ್ ನಾ ತರೀ, ಆಜೂನ್ ತೆ ಸಮಾಜೆಕ್ ಉಂಚ್ಲ್ಯಾ ವರ್‍ಗಾಚೆ ಸಮಾಜೆ ಮುಕಾರ್ ಸಮಾಸಮ್ ರಾವೊಂಕ್ ಸಾಧ್ಯ್ ಜಾಲ್ಲೆಂ ನಾ. ಆಜೂನ್ ಹಿ ಏಕ್ ಸಮಾಜ್ ಆರ್ಥಿಕ್ ನದ್ರೆನ್ ಸುಟ್ಕಾ ಆಪ್ಣಾಯ್ಲ್ಯಾರಿ, ಖಂಯ್ಚ್ಯಾಕಿ ಎಕಾ ಮಾನಸಿಕ್ ಜೈಲಾಂತ್ ಫಿಛಾರ್ ಜಾವ್ನ್ ಉರ್‍ಲ್ಯಾ.
ಆಮ್ಚ್ಯಾ ಸರ್ಕಾರಾಚಿಂ ಕಾನೂನ್ ನೆಮಾಂ ಹಾಕಾ ಕಾರಣ್ ಲೆಕ್ಯಾಂ? ಆಮ್ಚೆ ಸಮಾಜೆಚಿ ವೆವಸ್ಥಾ ಹಾಕಾ ಕಾರಣ್ ಮ್ಹಣ್ ಬೋಟ್ ಜೊಕ್ಯಾಂ? ಕಾಂಯ್ ಹಿಚ್ ಸಮಾಜ್ ತಾಂಚ್ಯಾ ಗಳ್ಯಾಭೊಂವ್ತಿಂ ಪಾಸ್ ರೆವ್ಡಾವ್ನ್, ಉಸ್ವಾಸ್ ಸೊಡುಂಕ್ ಉಡ್ಡೊನ್ ಆಸಾ?
ಆಯ್ಚೆ ಪಿಳ್ಗೆಕ್ ಹೆ ಕವಿತೆನ್ ಸಾದರ್ ಕರ್‍ಚ್ಯೊ ಇಮಾಜಿ ಅತ್ವ್ಯೊಚ್, ನವ್ಯೊಚ್ ಚಿಂತುಂಕ್ ಜಾಯ್ನಾತ್‌ಲ್ಲ್ಯೊ ಜಾಂವ್ಕ್ ಸಾಧ್ಯ್ ಆಸಾ. ಪುಣ್ ಹೀಯ್ ಏಕ್ ಹಕೀಗತ್ ಜಾವ್ನಾಸ್‌ಲ್ಲಿ ಮ್ಹಣ್ಪಾಚಿ ರುಜ್ವಾತ್ ದಿಂವ್ಚ್ಯಾಂತ್, ಹಿ ಕವಿತಾ ಸಫಲ್ ಜಾಲ್ಯಾ. ವಿಕ್ಟರ್ ಲೋಬೊ ನವ್ಯಾನ್ ಕವಿತಾ ಕುಳಾರಾಕ್ ಆಯ್ಲ್ಯಾ, ನವ್ಯಾಚ್ ವಿಶಯಾಚೆರ್ ಕವಿತಾ ಗುಂತುನ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೊರ್ಗಾರ್
ಆಮಿ ಕೊರ್ಗಾರ್, ಆಮಿ ಕೊರ್ಗಾರ್
ಪಳೆಂವ್ಕ್ ಮೆಳನಾಂವ್ ಆಮಿ ಮಾರ್ಗಾರ್
ಆಮಿ ಕೊರ್ಗಾರ್, ಆಮಿ ಕೊರ್ಗಾರ್
ರಾನಾ ಮೊಲ್ಯಾಂನಿ ಆಮ್ಚೆಂ ಘರ್‌ದಾರ್
ಜಲ್ಮಾಥಾವ್ನ್‌ಚ್ ಆಮ್ಚೆಂ ಜೀವನ್ ಕಷ್ಟಾಂಚೆಂ
ನಿರ್ಮಳ್ ಖಾಣ್ ನಾ, ಆಮ್ಕಾಂ ಜೆವಣ್ ಉಷ್ಟ್ಯಾಚೆಂ
ಮಾತ್ಯಾರ್ ಕಂಡಿ, ಪೆಂಕ್ಟಾಕ್ ಕೊಯ್ತಿ, ನ್ಹೆಸಣ್ ಕಷ್ಟಾಂಚೆಂ
ಸಾತ್ಯಾಕ್ ವೊಡ್ಲಾಂ, ಸೊಗೆಂ ಮೊಡ್ಲಾಂ, ಖೊಮಟ್ ತಟ್ಟ್ಯಾಂಚೆಂ
ಮೆಲ್ಲ್ಯಾ ಗೊರ್ವಾಂಕ್ ಆಪಯ್ತಾಲಿಂ ಆಮ್ಕಾಂ ವ್ಹರೊಂಕ್
ಸೊಲ್ಲ್ಯಾ ಉಪ್ರಾಂತ್ ಥೊಡೆಂ ಖಾಂವ್ಕ್, ಉರ್‌ಲ್ಲೆಂ ಪುರೊಂಕ್
ಖುಂಟ್ಯೊ ಮೊಳುಂಕ್ ಆನಿ ಭಾಟ್ಯೊ ವೊಳುಂಕ್
ದುಸ್ರೆಂ ಕಾಂಯ್ ದೀನಾತ್‌ಲ್ಲಿಂ ಆಮ್ಕಾಂ ಕರುಂಕ್
ಆಮ್ಕಾಂ ಮೊಗಾನ್ ಪಳೆತಾತ್ ಕ್ರಿಸ್ತಾಂವ್ ನಾಗೆರ್
ಉರ್‌ಲ್ಲೆ ಜಾತಿಕ್ ಪಳೆಲ್ಲೆಂಚ್ ಬಸ್ತಾಂವ್ ದೆಗೆರ್
ಆಮ್ಚೆ ಖಾತೀರ್ ಕೆಲ್ಯಾಂತ್ ಖಂಯ್ ಜಾಯ್ತಿಂ ಯೋಜನಾಂ
ಹಾಂಚೆವಿಶಿಂ ಆಮಿ ಆಜೂನಿ ಕಾಯಿಂಚ್ ನೆಣಾಂ
ಬಾಯ್ಲಾಂಕ್ ಫುಟೊಂಕ್ ಪೊಟಾಕ್ ದಿ ಸಂತೊಸ್ಲಿಂ ಮನಾಂ
ದಾದ್ಲ್ಯಾಂಕ್ ಘೊಟುಂಕ್ ತೊಟೆ ದಿಶಿ ಘಾಲ್ತಿತ್ ಉಡ್ಕಾಣಾಂ
ಪಕ್ಕಾ ಶಿಕಪ್ ನಾ ದೆಖುನ್ ಹಕ್ಕಾಂಕ್ ಝುಜೊಂಕ್ ನಾ
ಆಮ್ಕಾಂ ಮೆಳ್ಚೆಂ ಹೆರಾಂನಿ ಗಿಳ್ಚೆಂ ಕೊಣ್‌ಚ್ ವಿಚಾರ್‍ನಾ
ಆಮಿ ಕೊರ್ಗಾರ್ ಆಮಿ ಕೊರ್ಗಾರ್
ವಿಚಾರ್‍ಲ್ಯಾರಿ ದೀನಾ ಆಮ್ಚೊ ಸರ್ಕಾರ್
ಆಮಿ ಕೊರ್ಗಾರ್ ಆಮಿ ಕೊರ್ಗಾರ್
ಮೆಲ್ಯಾರಿ ಜಾಗೊ ನಾ ಕೊಣ್ಣಾ ಸರ್ಗಾರ್
-ವಿಕ್ಟರ್ ಲೋಬೊ, ಬಜಾಲ್