संपादकीय
माधवी कोंकणी पोरसांतलें परमळचें फूल आसलें.
ह्यो कविता माधवीन बारा थावन सतरा वरसां पिरायेर बरयल्ल्यो. 'मिठा कणी' कोंकणी काव्या संसारांतलीच विशिष्ट कविता अशें तिका नांव आसा. जायत्या कवींक, चा.फ्रा. देकोस्ताक धरून, प्रेरणेची सकत ती जाल्या. ह्यो दोनूय कविता बाकीबाबान संपादन केल्ल्या 'कोंकणी काव्यसंग्रह' पुस्तकांत आसात.
दशेंबर 22, 2014 तारकेर माधवी संसार त्याग करून गेली. ह्या दोनूय कविते मुखांत्र आपलें मरण तिणें बोव आदींच पारकिल्ल्याची झळक म्हाका दिसता. पयले कवितेंत आपुण वेगळ्या एका संसारांत - दर्यांत - एक जांवच्याक तिका आसची आतुराय दिसता जाल्यार, दुसरे कवितेंत ती पोरसांत फुलून आसतानांच, तिकाच कळीतनासतां वोत, शेवणें आनी वाऱ्यान तांचीं कामां रावयल्ल्याची खुणां तिका दिष्टीक पडटात. फूल झडून पडलें म्हळ्ळ्या भियान !
नीज जावन माधवी कोंकणी पोरसांतलें परमळचें फूल आसलें.
-मेल्विन रोड्रीगस
कविता:
मिठा - कणी
मिठाची कणी हांव
दर्या भेटेक गेलीं.
दर्याक हात लायना फुडें
दर्या येदीं जालीं.
फूल हांव पोरसांतलें
हांव फूल एक पोरसांतलें
मोगरे ताळयेर फुलिल्लें
वाऱ्या वांगडा धोलतालें
वोता वांगडा हांसतालें,
परमळ पियेवन मातयेंतलो
शेवण्या वांगडा गायतालें
फूल हांव पोरसांतलें...
अकस्मात घडलें कितें
कळणा म्हाका
वोता वांगडा खेळपी वाऱ्यान
आयज ल्हवूच म्हाका विचाल्लें;
..पोरसांत तुज्या भोंवपाक ह्या
कोणाक विचारचें बी पडटलें?..
उडत, नाचत गावपी शेवण्यान
भियेत भियेत निमगिलें,
'मेकळेपणान गावपाक हांगा
कोणाचें परमिशन बी घेवचें पडटलें..?
जालां कितें?
कळणा म्हाका...
मेकळेपणान व्हांवपी वारो
येना कित्याक पोरसाभितर?
शेवणीं कित्याक गायनात गीतां?
वोताक कित्याक हासूंक येना?
फूल हांव पोरसांतलें..
वोत, वारो, शेवण्या वांगडा
खळखळून हांसतालें..
परमळून गायतालें..
पुण..
आयज घडलां कितें कळणा म्हाका...
हांव ताळयेवयलें झडलें?
बावलें?... सुकलें..?
काय,
जड कोणा पांया पोंदा
फुलचे पयलींच चिड्डलें?
-माधवी सरदेसाय
ಸಂಪಾದಕೀಯ್:
ಮಾಧವಿ ಕೊಂಕಣಿ ಪೊರ್ಸಾಂತಲೆಂ ಪರ್ಮಳಚೆಂ ಫುಲ್ ಆಸ್ಲೆಂ.
ಹ್ಯೊ ಕವಿತಾ ಮಾಧವೀನ್ ಬಾರಾ ಥಾವ್ನ್ ಸತ್ರಾ ವರ್ಸಾಂ ಪಿರಾಯೆರ್ ಬರಯಿಲ್ಲ್ಯೊ. 'ಮಿಠಾ ಕಣಿ' ಕೊಂಕ್ಣಿ ಕಾವ್ಯಾ ಸಂಸಾರಾಂತ್ಲೀಚ್ ವಿಶಿಷ್ಟ್ ಕವಿತಾ ಅಶೆಂ ತಿಕಾ ನಾಂವ್ ಆಸಾ. ಜಾಯ್ತ್ಯಾ ಕವೀಂಕ್, ಚಾ.ಫ್ರಾ. ದೆಕೊಸ್ತಾಕ್ ಧರೂನ್‌, ಪ್ರೇರಣೆಚಿ ಸಕತ್ ತಿ ಜಾಲ್ಯಾ. ಹ್ಯೊ ದೊನುಯ್ ಕವಿತಾ ಬಾಕೀಬಾಬಾನ್ ಸಂಪಾದನ್ ಕೆಲ್ಲ್ಯಾ 'ಕೊಂಕ್ಣಿ ಕಾವ್ಯಸಂಗ್ರಹ್' ಪುಸ್ತಕಾಂತ್ ಆಸಾತ್‌.
ದಶೆಂಬರ್ 22, 2014 ತಾರಿಕೆರ್ ಮಾಧವಿ ಸಂಸಾರ್‌ ತ್ಯಾಗ್ ಕರುನ್ ಗೆಲಿ. ಹ್ಯಾ ದೊನುಯ್ ಕವಿತೆ ಮುಖಾಂತ್ರ್ ಆಪ್ಲೆಂ ಮರಣ್ ತಿಣೆಂ ಬೋವ್ ಆದೀಂಚ್ ಪಾರ್ಕಿಲ್ಲ್ಯಾಚಿ ಝಳಕ್ ಮ್ಹಾಕಾ ದಿಸ್ತಾ. ಪಯ್ಲೆ ಕವಿತೆಂತ್ ಆಪುಣ್‌ ವೆಗ್ಳ್ಯಾ ಎಕಾ ಸಂಸಾರಾಂತ್ - ದರ್ಯಾಂತ್ - ಏಕ್ ಜಾಂವ್ಚ್ಯಾಕ್ ತಿಕಾ ಆಸ್ಚಿ ಆತುರಾಯ್ ದಿಸ್ತಾ ಜಾಲ್ಯಾರ್‌, ದುಸ್ರೆ ಕವಿತೆಂತ್ ತಿ ಪೊರ್ಸಾಂತ್ ಫುಲುನ್ ಆಸ್ತಾನಾಂಚ್, ತಿಕಾಚ್ ಕಳೀತ್ ನಾಸತಾಂ ವೊತ್, ಶೆವ್ಣೆಂ ಆನಿ ವಾರ್‍ಯಾನ್ ತಾಂಚಿಂ ಕಾಮಾಂ ರಾವಯಿಲ್ಲ್ಯಾಚಿಂ ಖುಣಾಂ ತಿಕಾ ದಿಷ್ಟೀಕ್ ಪಡ್ಟಾತ್. ಫುಲ್ ಝಡುನ್ ಪಡ್ಲೆಂ ಮ್ಹಳ್ಳ್ಯಾ ಭಿಯಾನ್ !
ನೀಜ್ ಜಾವ್ನ್ ಮಾಧವಿ ಕೊಂಕಣಿ ಪೊರ್ಸಾಂತಲೆಂ ಪರ್ಮಳಚೆಂ ಫುಲ್ ಆಸ್ಲೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಿಠಾ - ಕಣಿ
ಮಿಠಾಚಿ ಕಣಿ ಹಾಂವ್‌
ದರ್ಯಾ ಭೆಟೆಕ್ ಗೆಲಿಂ.
ದರ್ಯಾಕ್ ಹಾತ್‌ ಲಾಯ್ನಾ ಫುಡೆಂ
ದರ್ಯಾ ಯೆದಿಂ ಜಾಲಿಂ.
ಫುಲ್ ಹಾಂವ್‌ ಪೊರ್ಸಾಂತಲೆಂ
ಹಾಂವ್‌ ಫುಲ್ ಏಕ್ ಪೊರ್ಸಾಂತಲೆಂ
ಮೊಗ್ರೆ ತಾಳ್ಯೆರ್ ಫುಲಿಲ್ಲೆಂ
ವಾರ್‍ಯಾ ವಾಂಗ್ಡಾ ಧೊಲ್ತಾಲೆಂ
ವೊತಾ ವಾಂಗ್ಡಾ ಹಾಂಸ್ತಾಲೆಂ,
ಪರ್ಮಳ್ ಪಿಯೆವ್ನ್ ಮಾತ್ಯೆಂತಲೊ
ಶೆವಣ್ಯಾ ವಾಂಗ್ಡಾ ಗಾಯ್ತಾಲೆಂ
ಫುಲ್ ಹಾಂವ್‌ ಪೊರ್ಸಾಂತಲೆಂ...
ಅಕಸ್ಮಾತ್ ಘಡ್ಲೆಂ ಕಿತೆಂ
ಕಳ್ಣಾ ಮ್ಹಾಕಾ
ವೊತಾ ವಾಂಗ್ಡಾ ಖೆಳ್ಪಿ ವಾರ್‍ಯಾನ್
ಆಯ್ಜ್ ಲ್ಹವುಚ್ ಮ್ಹಾಕಾ ವಿಚಾಲ್ಲೆಂ;
..ಪೊರ್ಸಾಂತ್ ತುಜ್ಯಾ ಭೊಂವ್ಪಾಕ್ ಹ್ಯಾ
ಕೊಣಾಕ್‌ ವಿಚಾರ್‍ಚೆಂ ಬಿ ಪಡ್ಟಲೆಂ?..
ಉಡತ್, ನಾಚತ್ ಗಾವ್ಪಿ ಶೆವ್ಣ್ಯಾನ್
ಭಿಯೆತ್ ಭಿಯೆತ್ ನಿಮ್ಗಿಲೆಂ,
'ಮೆಕ್ಳೆಪಣಾನ್ ಗಾವ್ಪಾಕ್ ಹಾಂಗಾ
ಕೊಣಾಚೆಂ ಪರ್ಮಿಶನ್ ಬಿ ಘೆವ್ಚೆಂ ಪಡ್ಟಲೆಂ..?
ಜಾಲಾಂ ಕಿತೆಂ?
ಕಳ್ಣಾ ಮ್ಹಾಕಾ...
ಮೆಕ್ಳೆಪಣಾನ್ ವ್ಹಾಂವ್ಪಿ ವಾರೊ
ಯೆನಾ ಕಿತ್ಯಾಕ್ ಪೊರ್ಸಾಭಿತರ್?
ಶೆವ್ಣಿಂ ಕಿತ್ಯಾಕ್ ಗಾಯ್ನಾತ್ ಗೀತಾಂ?
ವೊತಾಕ್ ಕಿತ್ಯಾಕ್ ಹಾಸುಂಕ್ ಯೆನಾ?
ಫುಲ್ ಹಾಂವ್‌ ಪೊರ್ಸಾಂತಲೆಂ..
ವೊತ್, ವಾರೊ, ಶೆವ್ಣ್ಯಾ ವಾಂಗ್ಡಾ
ಖಳ್ಖಳುನ್ ಹಾಂಸ್ತಾಲೆಂ..
ಪರ್ಮಳುನ್ ಗಾಯ್ತಾಲೆಂ..
ಪುಣ್..
ಆಯ್ಜ್ ಘಡ್ಲಾಂ ಕಿತೆಂ ಕಳ್ಣಾ ಮ್ಹಾಕಾ...
ಹಾಂವ್‌ ತಾಳ್ಯೆವಯ್ಲೆಂ ಝಡ್ಲೆಂ?
ಬಾವ್ಲೆಂ?... ಸುಕ್ಲೆಂ..?
ಕಾಯ್,
ಜಡ್ ಕೊಣಾ ಪಾಂಯಾ ಪೊಂದಾ
ಫುಲ್ಚೆ ಪಯ್ಲೀಂಚ್ ಚಿಡ್ಡಲೆಂ?
-ಮಾಧವಿ ಸರ್ದೆಸಾಯ್