ಸಂಪಾದಕೀಯ್:
ಆವಯ್ಚೆಂ ಕಾಳೀಜ್ ಸಮ್ಜಲ್ಲ್ಯಾ ಅನಾಥಾಚೆಂ ಕಾಳೀಜ್
ಹಾಂಗಾಸರ್ ಆವಯ್ಕ್ ಹೊಗ್ಡಾಯಿಲ್ಲೊ ಅನಾಥ್, ನಿರ್ಗತಿಕ್ ಆಸಾ. ಆವಯ್ಚ್ಯಾ ಮೊಗಾನ್, ತಿಚ್ಯಾ ತ್ಯಾಗಾನ್ ತೊ ಸಗ್ಳೊಚ್ ಖತ್ಕತೊನ್ ಆಸಾ. ತಿಣೆ ತಿಚ್ಯೆ ಕುಡಿಂತ್ಲೆಂ ಏಕ್ ಕುಡ್ತೆಂ ರಗತ್, ಆಪ್ಣಾಕ್ ಪೊಸ್ಚೆ ಖಾತೀರ್, ಅರ್ಧೆಂ ಕುಡ್ತೆಂ ಕಶೆಂ ಕೆಲ್ಲೆಂ ಮ್ಹಣುನ್ ತಾಕಾ ಬರ್ಯಾನ್ ಕಳೀತ್ ಆಸಾ. ತೊ ಮೋಗ್, ಹೆರಾಂವರ್ವಿಂ ದೀಂವ್ಕ್ ಅಸಾಧ್ಯ್ ಮ್ಹಣುನ್ ತೊ ಸಮ್ಜಲಾ.
ತಿಚ್ಯಾ ವೆಗ್ಳಾಚಾರಾಂತ್ ರುತಾ ಜಾಲ್ಲೊ ಖಾಲಿ ಜಾಗೊ ಕೊಣೀ ಭರ್ತಿ ಕರುಂಕ್ ಸಾಧ್ಯ್ ನಾ ತೆಂ ತಾಕಾ ಕಳೀತ್ ಜಾಲಾಂ ದೆಕುನ್ ತಿಕಾ ವ್ಹರ್ತಾನಾ ’ಕಿತ್ಯಾ ದೆವಾ ತುಕಾ ಉಡಾಸ್ ಜಾವ್ನಾ ಆಮ್ಚೊ?’ ಮ್ಹಣ್ಚೆ ಪಾಸುನ್ ತೊ ಪಾವ್ಲಾ.
ಪುಣ್ ಪ್ರಕೃತಿಚೆಂ ನಿಯಮ್ ಕಿತೆಂ? ಜಲ್ಮಲ್ಲ್ಯಾ ಮನ್ಶಾಜಿವಾನ್ ಮರಾಪಾಸುನ್ ವಾಂಚುನ್ ಆವಯ್ಚೆಂ ಋಣ್ ಫಾರೀಕ್ ಕರುಂಕ್ ಜಾಯ್ ನ್ಹಯ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಡಾಸ್ ತಿಚೊ ಕಿತ್ಲೊ ಆಯ್ಲೊ
ಸಕಾಳಿಂಚೆಂ ಘಡ್ಯಾಳ್ ರಾವ್ಲಲೆ ತೆನ್ನಾ
ಉಶ್ಯಾ-ಫೊರಾ ಥಾವ್ನ್ ಮಾತೆಂ ಉಕ್ಲುಂಕ್
ನಿದೆಚ್ಯಾ ಬಳಾನ್ ಜಾವ್ನಾ ತೆನ್ನಾ
ವೋಲ್ ವೊಡುನ್
ನಿದೆಚಿ ಖುನಿ ಕೆಲ್ಲೆ ತೆನ್ನಾ
ಉಡಾಸ್ ತಿಚೊ ಕಿತ್ಲೊ ಆಯ್ಲೊ
ನೊವ್ರ್ಯಾಬರಿಂ ಸಜಯ್ತಾಲಿಂ ತೆನ್ನಾ
ಖಡಕ್ ಇಸ್ತ್ರಿ ಮಾರ್ಲಲ್ಯಾ ಯುನಿಫೊರ್ಮಾಂತ್
ಮಿರಿಯೊ ಪಡನಾಶೆಂ ಚತ್ರಾಯ್ ಘೆತ್ಲಲೆ ತೆನ್ನಾ
ಹುನ್ ಇಸ್ತ್ರೆಚೊ ಮಾರ್ ಖಾವ್ನ್
ಹಾತಾಚಿ ಕಾತ್ ನಿಕ್ಳಾಲ್ಲೆ ತೆನ್ನಾ
ಉಡಾಸ್ ತಿಚೊ ಕಿತ್ಲೊ ಆಯ್ಲೊ
ಬೊತ್ಲೆಂತ್ಲೆಂ ಹುನ್ ಉದಕ್ ಶೆಳೆಲ್ಲ್ಯಾ ತೆನ್ನಾ
'ಘಟಾ ಘಟಾ' ಗಳ್ಯಾ ಥಾವ್ನ್ ದೆಂವುನ್
ಪೊಟಾಂತ್ ನಿರ್ಮಳ್ ಗಳ್ಳಲೆ ತೆನ್ನಾ
ತಾನ್ ತಿ ನಿವ್ರಾವ್ನ್
ಸುಶೆಗ್ ದಿಲ್ಲೆ ತೆನ್ನಾ
ಉಡಾಸ್ ತಿಚೊ ಕಿತ್ಲೊ ಆಯ್ಲೊ
ಪಳ್ಳೆಂತ್ಲೊ ತಾಳೊ ಸುಕ್ಣ್ಯಾ ಗಿತಾಂನಿ ಮಿಸ್ಳಲ್ಲೆ ತೆನ್ನಾ
ಚಪಾತ್ಯಾಂಕ್ ಪೀಟ್ ಮೊಳುನ್, ಸರಾರಾಂ ಲಾಟುನ್
ತಾಂತ್ಯಾಂ ಬುರ್ಜಿಚೊ ಪರ್ಮಳ್ ಆದಳ್ಳೆ ತೆನ್ನಾ
ಪುರಾಸಾಣ್ ಬಗ್ಲೆಕ್ ದವರ್ನ್
ದೀಸ್ ಉಜ್ವಾಡ್ಲಲೆ ತೆನ್ನಾ
ಉಡಾಸ್ ತಿಚೊ ಕಿತ್ಲೊ ಆಯ್ಲೊ
ಹುನ್ ಹುನ್ ಭುತಿಯೆಂತ್ಲೆಂ ಜೆವಣ್ ಜೆವ್ಲಲೆ ತೆನ್ನಾ
ನಿಸ್ತ್ಯಾಂಕ್, ಮಾಸ್-ಮಾಸ್ಳೆಂಕ್ ರಾಂದುನ್
ಉರ್ಲಲೆಂ ದವರ್ನ್, ಪೆಜೆ ನಿಸಾಂತ್ ಜೆವ್ಲಲೆ ತೆನ್ನಾ
ಮಸ್ರಾಕ್, ಹಗ್ಯಾಕ್ ಲೊಟುನ್
ಪೊಟಾಚಿ ಆಶಾ ವಿಸ್ರಲ್ಲೆ ತೆನ್ನಾ
ಉಡಾಸ್ ತಿಚೊ ಕಿತ್ಲೊ ಆಯ್ಲೊ
ರಾವ್ಲಲೆಂ ಘಡ್ಯಾಳ್, ವೊಡ್ಲೆಲಿ ವೋಲ್
ಖಡಕ್ ಇಸ್ತ್ರಿ, ನಿಕ್ಳಾಲ್ಲಿ ಕಾತ್
ಬೊತ್ಲೆಂತ್ಲೆಂ ಉದಕ್, ನಿವ್ರಾಯ್ಲಲಿ ತಾನ್
ಲಾಟ್ಲಲಿ ಚಪಾತಿ, ತಿ ತಾಂತ್ಯಾಂ ಬುರ್ಜಿ
ಭುತಿಯೆಂತ್ಲೆಂ ಜೆವಣ್, ಪೆಜೆಂತ್ಲೊ ನೀಸ್
ಕಾಂಯಿಂಚ್ ಪಾಟಿಂ ಆಶೆನಾತ್ಲಲ್ಯಾ
ಮನ್ಶಾಕ್ ಭುಂಯ್ ಘಾಲ್ಲೆ ಆವಯ್ಕ್
ಜೆನ್ನಾ ವ್ಹರ್ತಾನಾ ಪಾಟಿಂ
ಕಿತ್ಯಾಕ್ ದೆವಾ ತುಕಾ ಉಡಾಸ್ ಜಾವ್ನಾ ಆಮ್ಚೊ?
ಆಸ್ರ್ಯಾಂನಿ ಆವಯಾಂಕ್ ಸಪ್ಣೆಂವ್ಚ್ಯಾ
ಅನಾಥಾಂಚೊ!
-ಗ್ಲ್ಯಾನಿಶ್ ಮಾರ್ಟಿಸ್, ಅಲಂಗಾರ್
संपादकीय:
आवयचें काळीज समजल्ल्या अनाथाचें काळीज
हांगासर आवयक होगडायिल्लो अनाथ, निर्गतीक आसा. आवयच्या मोगान, तिच्या त्यागान तो सगळोच खत्कतोन आसा. तिणे तिच्ये कुडिंतलें एक कुडतें रगत, आपणाक पोसचे खातीर, अर्धें कुडतें कशें केल्लें म्हणून ताका बर्यान कळीत आसा. तो मोग, हेरांवरवीं दीवंक असाध्य म्हणून तो समजला.
तिच्या वेगळाचारांत रुता जाल्लो खाली जागो कोणी भरती करुंक साध्य ना तें ताका कळीत जालां देकून तिका व्हरताना ’कित्या देवा तुका उडास जावना आमचो?’ म्हणचे पासून तो पावला.
पूण प्रकृतीचें नियम कितें? जल्मल्ल्या मनशाजिवान मरापासून वांचून आवयचें ऋण फारीक करुंक जाय न्हय?
-मेल्विन रोड्रीगस
कविता:
उडास तिचो कितलो आयलो
सकाळींचें घड्याळ रावलले तेन्ना
उश्या-फोरा थावन मातें उकलूंक
निदेच्या बळान जावना तेन्ना
वोल वोडून
निदेची खुनी केल्ले तेन्ना
उडास तिचो कितलो आयलो
नोवर्याबरीं सजयतालीं तेन्ना
खडक इस्त्री मारलल्या युनीफोर्मांत
मिरयो पडनाशें चत्राय घेतलले तेन्ना
हुन इस्त्रेचो मार खावन
हाताची कात निकळाल्ले तेन्ना
उडास तिचो कितलो आयलो
बोतलेंतलें हुन उदक शेळेल्ल्या तेन्ना
'घटा घटा' गळ्या थावन देंवून
पोटांत निर्मळ गळ्ळले तेन्ना
तान ती निवरावन
सुशेग दिल्ले तेन्ना
उडास तीचो कितलो आयलो
पळ्ळेंतलो ताळो सुकण्या गितांनी मिसळल्ले तेन्ना
चपात्यांक पीट मोळून, सरारां लाटून
तांत्यां बुर्जिचो पर्मळ आदळ्ळे तेन्ना
पुरासाण बगलेक दवरन
दीस उजवाडलले तेन्ना
उडास तिचो कितलो आयलो
हुन हुन भुतयेंतलें जेवण जेवलले तेन्ना
निसत्यांक, मास-मासळेंक रांदून
उरललें दवरन, पेजे निसांत जेवलले तेन्ना
मस्राक, हग्याक लोटून
पोटाची आशा विसरल्ले तेन्ना
उडास तिचो कितलो आयलो
रावललें घड्याळ, वोडलेली वोल
खडक इस्त्री, निकळाल्ली कात
बोतलेंतलें उदक, निवरायलली तान
लाटलली चपाती, ती तांत्यां बुर्जी
भुतयेंतलें जेवण, पेजेंतलो नीस
कांयींच फाटीं आशेनातलल्या
मनशाक भुंय घाल्ले आवयक
जेन्ना व्हरताना फाटीं
कित्याक देवा तुका उडास जावना आमचो?
आसर्यांनी आवयांक सपणेंवच्या
अनाथांचो!
-ग्लॅनीश मार्टीस, अलंगार