ಸಂಪಾದಕೀಯ್:
ಸಾಂಜಾಂವ್ ಫೆಸ್ತಾಕ್ ದುಬ್ಳ್ಯಾಚ್ಯಾ ಘರಾಂತ್ ರಿಗಲ್ಲೊ ಪೊಟಾರಿ
ಚಾಫ್ರಾ ದೆಕೊಸ್ತಾಚ್ಯೊ ಜಾಯ್ತ್ಯೊ ಕವಿತಾ ಆಮಿ ಕವಿತಾ ಕುಳಾರಾಂತ್ ಪರ್ಗಟ್ ಕೆಲ್ಯಾತ್. ತಾಂಕಾಂ ಸಾಹಿತ್ಯ ಅಕಾದೆಮಿಚೊ ಪುರಸ್ಕಾರ್ ಜೋಡ್ನ್ ದಿಲ್ಲಿ ಕೃತಿ ’ಸೊಂಶ್ಯಾಚೆ ಕಾನ್' ಪುಸ್ತಕಾಂತ್ ತಶೆಂಚ್ ನಂದಿನಿನ್ ಪರ್ಗಟ್ ಕೆಲ್ಲ್ಯಾ ’ಪಣ್ತೆಚಿ ಪೆಲಿ' ಪುಸ್ತಕಾಂತ್ ಚಡ್ಶ್ಯೊ ಕವಿತಾ ವಾಚುಂಕ್ ಮೆಳ್ತಾತ್.
ತಾಣೆಂ ಪೊಟಾರ್ಯಾವಿಶಿಂ ಬರಯಿಲ್ಲಿ ಬೋವ್ ಆದ್ಲಿ ಕವಿತಾ, ಜಿ ತೊ 'ಪಯ್ಣಾರಿ’ ನೆಮಾಳ್ಯಾಚೊ ಸಂಪಾದಕ್ ಆಸ್ತಾಂ ಪರ್ಗಟ್ ಜಾಲ್ಲಿ, ತಿ ಆಮ್ಚ್ಯಾ ವಾಚ್ಪ್ಯಾಂ ಖಾತೀರ್ ಹಾಂಗಾಸರ್ ದಿಲ್ಯಾ. ಸಾಂಜಾಂವ್ ಫೆಸ್ತ್ (ಸನಿಯಾಂ ಫೆಸ್ತ್) ಲಾಗ್ಸಾರ್ ಆಸಾ. ಹಿ ಕವಿತಾ ತುಮ್ಕಾಂ ಆಂವಡ್ತಲಿ ಚಿಂತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪೊಟಾರಿ ದಾಧೊಶಿ ಕೆದಳಾ ಜಾತಾ?
ಪೊಟಾರ್ಯಾಚೆಂ ಪೊಟ್ ಕೆದ್ನಾಂ
ಭರ್ತಾ ಮ್ಹಣುನ್ ಕರ್ತಾಯ್ ವಿಚಾರ್
ಆಟೊವ್ ಜಾತಾ ಆದಿಂ ಮಾಗಾ
ಆಸ್ಲೆಂ ಮ್ಹಾಕಾ ದುಬ್ಳೆಂ ಶೆಜಾರ್
ಪಾವ್ಸಾಂತ್ ಎಕಾ ಸನಿಯಾಂ ಫೆಸ್ತಾ*
ತಾಂಗೆರ್ ಕಾಪ್ಲೊ ಪಣಸ್ ಮೊಟೊ
ಅರ್ಧೊ ಪಾವ್ ತಾಂದುಳ್ ಆಸ್ಲೊ
ದುಸ್ರೊ ನಾತ್ಲೊ ತಾಂದ್ಳಾ ಘೊಟೊ
ಪೊಟಾರ್ಯಾಚೆಂ ಯೆಣೆಂ ಜಾಲೆಂ
ಯೆಂವ್ಚೊ ಯೇವ್ನ್ ಜೆವ್ಣಾಕ್ ರಾವ್ಲೊ
ಮೊಟೆಂ ಬೆಜಾರ್ ಜಾಲೆಂ ತಾಂಕಾಂ
ಘರ್ಚೊ ಧನಿ ಸಾಂಗ್ತಾ ಆಪ್ಲೊ
’ಊಟ್ ಬಾಬಾ ಉದಕ್ ಆಸಾ
ಪಾಂಯ್ ಧು ನಾತ್ಲ್ಯಾರ್ ನ್ಹಾ
ಜೆವ್ತಾಯ್ ಜಾಲ್ಯಾರ್ ಜೇವ್ ಬಾಬಾ
ನಾತ್ಲ್ಯಾರ್ ಥೊಡೆ ಘರೆ ಖಾ.'
ಪೊಟಿಯೊ ಸೈರೊ ತಕ್ಷಣ್ ಮ್ಹಣ್ತಾ
’ಭುಕೆಕ್ ದೋನ್ ಶಿತಾಂ ಖಾತಾಂ
ಆಶೆಕ್ ಥೊಡೆ ಘರೆ ಖಾತಾಂ
ಜಿರ್ಲೆ ಜಾಲ್ಯಾರ್ ಫಾಲ್ಯಾಂ ಯೆತಾಂ.’
(1959 ನವೆಂಬ್ರ್, ’ಪಯ್ಣಾರಿ’ ನೆಮಾಳೆಂ)
*ಸನಿಯಾಂ ಫೆಸ್ತ್=ಸಾಂಜಾಂವ್ ವಾ ಸಾಂ. ಜುವಾಂವ್ಚೆಂ ಫೆಸ್ತ್ ಜೆಂ ಜ್ಯೂನ್ 24 ತಾರಿಕೆರ್ ಯೆತಾ.
- ಚಾ.ಫ್ರಾ. ದೆಕೊಸ್ತಾ
संपादकीय:
सांजांव फेस्ताक दुबळ्याच्या घरांत रिगल्लो पोटारी
चाफ्रा देकोस्ताच्यो जायत्यो कविता आमी कविता कुळारांत पर्गट केल्यात. तांकां साहित्य अकादेमीचो पुरस्कार जोडन दिल्ली कृती 'सोंश्याचे कान' पुस्तकांत तशेंच नंदिनीन पर्गट केल्ल्या 'पणतेची पेली’ पुस्तकांत चडश्यो कविता वाचूंक मेळतात.
ताणें पोटार्याविशीं बरयल्ली बोव आदली कविता, जी तो ’पयणारी’ नेमाळ्याच्यो संपादक आसतां पर्गट जाल्ली, ती आमच्या वाचप्यां खातीर हांगासर दिल्या. सांजांव फेस्त (सनियां फेस्त) लागसार आसा. ही कविता तुमकां आंवडतली चिंतां.
-मेल्विन रोड्रीगस
कविता:
पोटारी दाधोशी केदळा जाता?
पोटार्याचें पोट केदनां
भरता म्हणून करताय विचार
आटोव जाता आदीं मागा
आसलें म्हाका दुबळें शेजार
पावसांत एका सनियां फेस्ता*
तांगेर कापलो पणस मोटो
अर्धो पाव तांदूळ आसलो
दुसरो नातलो तांदळा घोटो
पोटार्रयाचें येणें जालें
येंवचो येवन जेवणाक रावलो
मोटें बेजार जालें तांकां
घरचो धनी सांगता आपलो
’ऊट बाबा उदक आसा
पांय धू नातल्यार न्हा
जेवताय जाल्यार जेव बाबा
नातल्यार थोडे घरे खा.’
पोटियो सैरो तक्षण म्हणता
’भुकेक दोन शितां खातां
आशेक थोडे घरे खातां
जिरले जाल्यार फाल्यां येतां’
(1959, न्होवेंबर,’पयणारी’ नेमाळें)
*सनियां फेस्त=सांजांव वा सां. जुवांवचें फेस्त जें ज्यून 24 तारकेर येता.
- चा.फ्रा. देकोस्ता