ಸಂಪಾದಕೀಯ್:
ಕವಿ ಮರತ್, ಕವಿತಾ ಮರನಾ!
ಮನ್ಶಾಜಿವಾಕ್ ಸಾಸಣ್ ಆಸಾ. ಪುಣ್ ಹ್ಯಾ ಜಿವಾನ್ ಆಪ್ಲ್ಯಾ ಜಿವಿತಾಚ್ಯಾ ಕಾಳಾಂತ್ ಸಮಾಜೆಚೆರ್ ಘಾಲ್ಚ್ಯಾ ಪ್ರಭಾವಾಚೆ ಮ್ಹೊರಿಕ್ ಸಾಸಣ್ ನಾ. ಹ್ಯಾ ಸಂಸಾರಾಂತ್ಲೆ ಚಡಾವತ್ ಜೀವ್ -ಮೊಟಿಂ ಪೊಟಾಂ ವಾಡಂವ್ಚ್ಯಾಂತ್; ರಾವ್ಳೆರಾಂ ಬಾಂದ್ಚ್ಯಾಂತ್; ಸೊನ್ಯಾನ್ ಗಳೆ ಸುಂರ್ಗಾರಾಂವ್ಚ್ಯಾಂತ್ ಜರೊನ್ ವೆತಾತ್. ಭೋವ್ ಥೊಡೆ ಸಮಾಜೆಚ್ಯಾ ಅಂತರ್‌ಮಳಾಂನಿ ಘೊಂಟೆರ್ ಬಾಂಧುನ್ ಬಸ್ಚ್ಯಾಂತ್ ಜಿವಿತ್ ಪಾಶಾರ್ ಕರ್‍ತಾತ್. ತ್ಯಾಪಯ್ಕಿ ಕವೀಯ್ ಆಸಾತ್ ಮ್ಹಣ್ ಹಾಂವ್ ಸಾಂಗ್ತಾನಾ ಜಾಯ್ತ್ಯಾ ಜಣಾಂಕ್ ಸುಕಿ ಖೊಂಕ್ಲಿ ಯೆತಲಿಚ್! ಗಿಳೊಂಕ್ ಜಾಯ್ನಾತ್‌ಲ್ಲಿ ಉಂಡಿ ಖೊಂಕ್ಲಿ ಹಾಡಯ್ನಾಸ್ತಾಂ?
ಕವಿ ಮರತ್, ಕವಿತಾ ಮರನಾ! ಕವಿನ್ ಸಂಸಾರಾಕ್ ದಿಲ್ಲಿಂ ಭಾಂಗ್ರಾಳಿಂ ಉತ್ರಾಂ ಫೊಂಡಾಂ ವಯ್ಲ್ಯಾ ಸುಕ್ಯಾ ಚಿವ್ಯಾಂಕ್ ಜೀವ್ ದಿತಾತ್ ಮಾತ್ರ್ ನ್ಹಯ್; ಧಾರುಣ್ ಕಾಳ್ಜಾಂಚಿಂ ಖೊವ್ಳಾಂ ಕಾಡ್ತಾತ್ ಆನಿ ಘಾಯೆಲ್ಲ್ಯಾ ಮನಾಂಚಿಂ ಖಂವ್ಚಾಂ ನಿಕ್ಳಾವ್ನ್ ಶಾಂತೆಚ್ಯೊ ಶಿರೊ ಖಾವಯ್ತಾತ್!
ಚಾ.ಫ್ರಾ. ದೆಕೊಸ್ತಾಚಿ ಕವಿತಾ ಕೊಂಕಣಿಚೆಂ ಖಜಾನ್. ಆಮ್ಕಾಂ ಕವಿಂಕ್ ದಿಸ್ಪಡ್ತೆ ಹುಮೆದಿಚೆಂ ವೊಕತ್. ಆಮ್ಚ್ಯಾ ಹರ್‍ಯೆಕಾ ವಾವ್ರಾಂತ್ ತಾಚೊ ಅತ್ಮೊ ಮಿಸ್ಳಲಾ. ತೊ ಸರೊನ್ ಹ್ಯಾ ಹಪ್ತ್ಯಾಂತ್ ತೆರಾ ವರ್‍ಸಾಂ ಕಾಬಾರ್ ಜಾತಾನಾ ತಾಚೆ ಹೆ ಕವಿತೆದ್ವಾರಿಂ ಆಮಿ ತಾಚೊ ಉಡಾಸ್ ಕಾಡ್ತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಖಂಯ್ ಪುರ್‍ಲಾ ಕವಿಕ್?
ಹ್ಯಾ ಉಬಾರ್ ಥಪ್ಕಟ್ ಪೊಂಡಾಂ ಮಧೆಂ
ಥಂಡ್ ಮರ್‍ಣಾ ಕೊಂಡಾಂ ಮಧೆಂ
ಹ್ಯಾ ಜೀವ್ ನಾಸ್ಲ್ಯಾ ಮುಂಡಾಂ ಮಧೆಂ
ಸಾಂಗ್ ಖಂಯ್ ಪುರ್‍ಲಾ ಕವಿಕ್?
ಹ್ಯಾ ಕಾಂಟೆ ಫಾತ್ರಾಂ ಬಾಂದ್ಪಾ ಸಕ್ಲಾ
ಮೊಟ್ಯಾ ಪೊಟಾ ಗುರ್ಕಾರ್ ನಿದ್ಲಾ
ಹೆ ಕುಶಿನ್ ಧನೇಸ್ತ್ ವಯ್ಜ್ ಕುಸ್ಲಾ
ಪುಣ್, ಖಂಯ್ ಪುರ್‍ಲಾ ಕವಿಕ್?
ಚೋಯ್, ವಕಿಲಾಚೆಂ ಬೊಂದೆರ್ ಉಬ್ತಾ
ವೊತಾಂತ್ ಆರ್ಬಿ ಖುರಿಸ್ ಸೊಭ್ತಾ
ಹ್ಯಾಯಿ ಧಗಿಂತ್ ಹಾಡಾಂ ತಾಪ್ತಾ
ತರೀ, ಖಂಯ್ ಪುರ್‍ಲಾ ಕವಿಕ್?
ತ್ಯಾ ವ್ಯಾಪಾರ್‍ಯಾಚೆ ಬಾಯ್ಲೆಕ್ ವೆಗ್ಳಿ
ಪುರುನ್ ಗುಂತ್ಲ್ಯಾತ್ ರುಪ್ಯಾ ಸಾಂಖ್ಳಿ
ತ್ಯಾಯಿ ವಯ್ಲ್ಯಾನ್ ಫುಲಾಂ ಪಾಕ್ಳಿ
ಹಾಯ್, ಖಂಯ್ ಘಾಲಾ ಕವಿಕ್?
ಥಂಯ್, ಸಗ್ಳ್ಯಾಂ ಜೀವ್ ವಾಂಚುನ್ ಮೆಲೊ
ಕರ್ಮಾ ಭರೊ ಮಾತ್ಯೆಂತ್ ಗೆಲೊ
ತಾಂಚೆರ್ ಕಿತ್ಯಾಕ್ ವೊಡ್ತಾತ್ ಪಾಲೊ
ಆನಿ ಖಂಯ್ ವೆಲಾ ಕವಿಕ್?
ಜೆದ್ವಾಂ ಸಂಧ್ಯಾ ಮಾರುತ್ ಹಳೂ ವೊಳ್ಳೊ
ಕೊನ್ಶಾರ್ ಸುಕೊ ಚಿವೊ ಧಲ್ಲೊ
ಥಂಯ್ ಕಾವ್ಯಜೋಶ್ ಮಾತ್ಯೆಕ್ ಭುಲ್ಲೊ
ಹಾಂ! ಹಾಂಗಾ ಪುರ್‍ಲಾ ಕವಿಕ್!
-ಚಾ.ಫ್ರಾ. ದೆಕೊಸ್ತಾ