ಸಂಪಾದಕೀಯ್:
ಎಕ್ಸುರ್‌ಪಣಾಚೆ ಖಾವ್ಣೆವಯ್ಲೆಂ ತಾಳ್ಣೆಂ ಘೊಟ್ಚಿಂ ಲಕ್ಷಣಾಂ!
ಕೆದಳಾ ಜಿವಿತಾಚ್ಯಾ ಶೆವೊಟಾಂಕ್ ಸ್ವಾರ್ಥಾಚ್ಯೊ ಸಾಂಕ್ಳಿ ರೆವ್ಡಲ್ಲ್ಯೊ ಆಸ್ತಾತ್, ತವಳ್ ತ್ಯೊ ರುತಾ ಕರುಂಕ್ ಗೆಲ್ಲ್ಯಾ ಗೆಲ್ಲ್ಯಾಕಡೆ ದುರೀಗ್ ಉಬಾರಿಜೆ ಪಡ್ತಾತ್, ವೊಂಯೊಂ ಘಾಲಿಜೆ ಪಡ್ತಾತ್, ದೊರೆ ಬಾಂದಿಜೆ ಪಡ್ತಾತ್. ಮನೀಸ್ ಸಾಮಾಜಿಕ್ ಜಿವಿತಾ ಥಾವ್ನ್ ಪಯ್ಸ್ ವಚೊನ್, ಎಕ್ಸುರ್‌ಪಣಾಚೆ ಖಾವ್ಣೆವಯ್ಲೆ ಮೊರ್ಗೆಂತ್ಲೆಂ ತಾಳ್ಣೆಂ ಘೊಟ್ಚಿಂ ಲಕ್ಷಣಾಂ ಹಿಂ. ಮನೀಸ್ ಅಸೋಯ್ ಕಿತ್ಯಾಕ್ ಜಾಲಾ? ಅಸಲೊ ಆಪ್‌ಸ್ವಾರ್ಥ್ ಪಾಂಗುರ್‍ನ್ ತೊ ಕಿತ್ಯಾಕ್ ಜಿಯೆಂವ್ಕ್ ಆಶೆತಾ? ಹೆಂ ತರೀ ಮಿಸಾಂವ್ ಕಸಲೆಂ?
ಹಾಂಗಾಸರ್ ಪೇಶ್ ಜಾಲ್ಲಿ 'ದೊರೆ' ಕವಿತಾ ಪ್ರಸ್ತುತ್ ಕಾಳಾಚ್ಯಾ ಸಾಮಾಜಿಕ್ ಜಿವಿತಾಚೆರ್‌ಚ್ ಸವಾಲಾಂ ಘಾಲ್ಚೆ ತಸಲಿ. ಹಿ ಕವಿತಾ ಫಕತ್ ಕೊಂಕಣಿಚಿ ನ್ಹಯ್, ಹಿ ಕವಿತಾ ಸಗ್ಳ್ಯಾ ಮನ್ಶಾಕುಳಾಕ್‌ಚ್ ಬೋಟ್ ಜೊಕ್ಚೆ ತಸಲಿ! ಆಮಿ ಹರ್‍ಯೆಕ್ಲೆ ಅಸಲ್ಯಾ ದೊರ್‍ಯಾಂಚೆ ಎಕೇಕ್ ಫಾತರ್ ತರೀ ಜಾವ್ನ್ ಆಸೊಂಕ್ ಪುರೊ, ಯಾ ಹೆ ಫಾತರ್ ಚಾಬೊನ್ ಧರುಂಕ್ ಲಾಂವ್ಚೆ ತಸಲಿ ಶಿಮೆಟ್ ಯಾ ರೇಂವ್ ತರೀ ಜಾವ್ನ್ ಆಸೊಂಕ್ ಪುರೊ. ವ್ಹಯ್ ಯಾ ನ್ಹಯ್?
ಮ್ಯಾಕ್ಸಿಮ್ ಲೋಬೊನ್ ಏಕ್ ಅಂತರ್‌ರಾಷ್ಟ್ರೀಯ್ ವಿಶಯಾಚೆರ್ ಕೊಂಕಣಿ ಕವಿತಾ ಬರವ್ನ್ ಆಮ್ಚೆಂ ಸಾಹಿತ್ಯ್ ಗಿರೇಸ್ತ್ ಕೆಲಾಂ. ಆನಿ 'ಕವಿತಾ ಕುಳಾರ್' ಸೈತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೊರೆ
ಸರ್ವ್ ಹಾಂಗಾ ಆಪ್ಲೆ 'ಶೆವಟ್' ರುತಾ ಕರ್‍ಚ್ಯಾಕ್
ದೊರೆ ಬಾಂದ್ಚ್ಯಾಂತ್ ಮಗ್ನ್.
ಘೊವ್-ಬಾಯ್ಲೆ ಮಧೆಂ, ಬಾಂವ್ಡಾಂ ಮಧೆಂ,
ಶೆಜಾರ್‍ಯಾಂ ಮಧೆಂ, ಗಾಂವ್ಕಾರಾಂ ಮಧೆಂ,
ರಾಜ್ಯಾಂ ಮಧೆಂ, ರಾಷ್ಟ್ರಾಂ ಮಧೆಂ
ದೊರೆ.
ಮೂಟ್ ಮಾತ್ಯೆಕ್, ಥೆಂಬ್ಯಾ ಉದ್ಕಾಕ್.
ದೋನ್ ಭಾಸಾಂ ಮಧೆಂ, ಎಕೆಚ್ ಭಾಶೆಚ್ಯಾ ಬೊಲಿಯಾಂ ಮಧೆಂ
ದೋನ್ ಧರ್ಮಾಂ ಮಧೆಂ, ಎಕಾಚ್ ಧರ್ಮಾಚ್ಯಾ ಪಂಗ್ಡಾಂ ಮಧೆಂ
ದೋನ್ ಜಾತಿಂ ಮಧೆಂ, ಎಕೆಚ್ ಜಾತಿಚ್ಯಾ ಫಾಂಟ್ಯಾಂ ಮಧೆಂ,
ದೋನ್ ಕುಳಿಯಾಂ ಮಧೆಂ, ಎಕೆಚ್ ಕುಳಿಯೆಚೆ ಕುಟ್ಮಾಂ ಮಧೆಂ
ದೋನ್ ರಂಗಾಂ ಮಧೆಂ, ಎಕಾಚ್ ರಂಗಾಚ್ಯಾ ಆಂಗಾಂ ಮಧೆಂ
ದೊರೆ.
ಬೊಂಗ್ಲ್ಯಾಂತ್ಲ್ಯಾ ಆನಿ ಖೊಮ್ಟಾಂತ್ಲ್ಯಾಂ ಮಧೆಂ,
ಬೊರಿಯೆಂತ್ಲ್ಯಾ ಆನಿ ಧುಳಿಂತ್ಲ್ಯಾಂ ಮಧೆಂ
ದೊರೆ.
ಎಕಾ ದೆವಾಖಾತೀರ್, ತಾಚ್ಯಾಚ್ ನಾಂವಾ ಖಾತೀರ್
ಹಜಾರ್ ಹಜಾರ್ ದೊರೆ.
ಭಕ್ತಾಂ ಮಧೆಂ
ಜಾತ್-ಕಾತ್, ಭಾಸ್ ಕುಳಿ ಅಶೆಂ,
ಆನಿ ಕಿತ್ಲೆ ದೊರೆ.
ಭಕ್ತಾಂ ಮುಕೆಲ್ಯಾಥಾವ್ನ್‌ಚ್ ದೊರ್‍ಯಾ ಬುನ್ಯಾದ್!
ಬರ್ಲಿನಾಂತ್ಲೊ ಏಕ್ ದೊರೊ ಕೊಸ್ಳಾತಾನಾ
ಚಿನಾಂತ್ಲೆ ಹಜಾರ್ ದೊರೆ ಉಬೆ.
ಸಕಯ್ಲ್ ಹಾಂಗಾ ಬಾಂದ್ತೆಲ್ಯಾಂಕ್
ಹೆ ಸೊಭ್ತಾತ್ ಕಶೆ ದೊರೆ
ಪುಣ್ ವಯ್ರ್ ಥಾವ್ನ್ ದಿಸ್ತಾ
ಪುರುಂಕ್ ಫೊಂಡ್!
ಮ್ಹಾಕಾ, ತುಕಾ, ಸಕ್ಡಾಂಕ್.
ರಾವಯಾಂ,
ಕೊಸ್ಳಾಯಾಂ,
ಧರ್ಣಿ ಸಮಾ ಕರ್‍ಯಾಂ.
ಪಯ್ಲೆಂ, ತಕ್ಲೆಂತ್ಲೆ ದೊರೆ.
ಉಪ್ರಾಂತ್,
ಎಕೆಕ್‌ಚ್ ಫಾತರ್ ಉಕ್ಲುನ್
ಚ್ಯಾರ್ ದೀಸ್ ಭರ್ತಿ ಜಿಯೆಂವ್ಕ್
ದೋನ್-ಚ್ಯಾರ್ ಘರಾಂ ಬಾಂದ್ಯಾಂ.
-ಮ್ಯಾಕ್ಸಿಮ್ ಲೋಬೊ