ಸಂಪಾದಕೀಯ್:
ಉತ್ರಾಂಚ್ಯಾ ಮಾಟ್ವಾಭಿತರ್ ಮತಿಕ್ ಸುಶೆಗ್ ಲಾಭ್ತಾ
ಉತ್ರಾಂ ಸಾದಿ ಆಸ್ಲ್ಯಾರ್ ಕಿತೆಂ ಜಾಲೆಂ, ಸಾದಿಂ ತರೀ ಸೊಭಿತ್ ಉತ್ರಾಂ ಘೆವ್ನ್ ಕಾಳ್ಜಾಂ ಗುಂತ್ಚಿ ಕಲಾ ಸಕ್ಡಾಂಕ್ ಕಳಿತ್ ಆಸನಾ. ತ್ಯಾ ಸಾದ್ಯಾ ಉತ್ರಾಂನಿ ಧೊಣ್ವಾಚೆ ರಂಗ್ ಭರ್‍ಚಿ ಕಲಾ ಸಗ್ಳ್ಯಾಂಕ್ ಸಮ್ಜನಾ. ತ್ಯಾ ಸಾದ್ಯಾ ಉತ್ರಾಂನಿ ಮನ್ಶಾಕುಳಾಚ್ಯಾ ಅಂತಸ್ಕರ್ನಾಕ್ ರೆವ್ಡಲ್ಲೆ 'ಸರ್ಪಸುತ್ತು' ಶಿಂದುಂಕ್ ಸಕ್ಡಾಂಕ್ ಮತಿಕ್ ವಚನಾ. ಹ್ಯೊ ಸರ್ವಯ್ ಕಲಾ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾನ್ ಆಪ್ಣಾಯಿಲ್ಲ್ಯಾನ್ ಆಜ್ ತೊ ಕೊಂಕಣಿ ಕುಳಾಚೊ ಕುರೊವ್ ಕಸೊ ಸೊಭೊನ್ ಅಸಾ.
ಗೀತ್‌ಕಾರ್ ಜಾವ್ನ್ ಕೊಂಕಣಿ ಲೊಕಾಚ್ಯಾ ಕಾಳ್ಜಾಂಕ್ ಕನ್ನಾ ಘಾಲ್ಲೊ ವಿಲ್ಫಿ, ಕವಿ ಜಾವ್ನ್ ತಾಚ್ಯಾಕ್‌ಯ್ ವ್ಹರ್ತಿಂ ಆಜ್ಯಾಪಾಂ ಕರುಂಕ್ ಸಕ್ತಾ ಮ್ಹಣ್ ಹಾಂವ್ ಸಾಂಗ್ತಾನಾ, ಯೆದೊಳ್ ತಾಣೆ ಕವಿತಾ ಬರಂವ್ಕ್ ನಾಂತ್ ಮ್ಹಣೊನ್ ಹಾಂವ್ ಸಾಂಗನಾ. ಗೀತ್ ಆನಿ ಕವಿತಾ ಮಧೆಂ ಏಕ್ ಗೀಟ್ ಘಾಲ್ಲ್ಯಾವೆಳಾರ್ ವಿಲ್ಫಿನ್ ಚಡಿತ್ ಕರುನ್ ಗಿತಾಂಚ್ಯಾ ಸಂಸಾರಾಂತ್‌ಚ್ ಪಾಸಾಯೊ ಮಾರ್‌ಲ್ಲೆಂ ಝಳ್ಕತಾ.
ಹಾಂವ್ ತರೀ ಗಿತಾಂನಿ ಮಿಸ್ಳಲ್ಲಿ ತಾಚಿ ಕವಿತಾ ಕುಶೆಲತಾ ದೆಖೊನ್, ವಾಚುನ್ ಪಿಸೊ ಜಾತಾಂ. ಮ್ಹಜ್ಯೊ ಖಂತಿ, ದುಕಿ, ವಿರಾರಾಯೊ ವಿಸ್ರೊನ್ ಘೆತಾಂ. ತಾಚ್ಯಾ ಉತ್ರಾಂಚ್ಯಾ ಮಾಟ್ವಾಭಿತರ್ ಸರಾಗ್ ಸುಶೆಗ್ ಘೆವ್ಯಾಂ ಮ್ಹಣೊನ್ ಚಿಂತಾಂ. ತುಮೀಂಯ್ ಯೆಯಾ! ಆಜ್ ಕವಿತಾ ಕುಳಾರಾಂತ್ ಸಂಭ್ರಮ್‌ಚ್ ಸಂಭ್ರಮ್!
ಆಯ್ಲೆವಾರ್ 'ರಾಕ್ಣೊ' ಪತ್ರಾನ್ ಕೇಂದ್ರ್ ಸಾಹಿತ್ಯ್ ಅಕಾದೆಮಿಚೆ ಮಜತೆನ್ ಚಲಯಿಲ್ಲ್ಯಾ ಕವಿಸಂಧಿ ಕಾರ್ಯಾವೆಳಾರ್ ಕವಿನ್ ವಾಚ್‌ಲ್ಲಿ ಹಿ ಕವಿತಾ ತಾಚೆ ಪರ್ವಣ್ಗೆನ್ ಹಾಂಗಾಸರ್ ತುಮ್ಕಾಂ ದಿಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೇಸ್-ಕಾಸ್, ಲೇಸ್-ಮಾಸ್
ಜೆದ್ನಾಂ ಮಾತ್ಯಾರ್ ಕೇಸ್ ಆಸ್ಲೆ
ತೆದ್ನಾಂ ಹಾತಾಂತ್ ಕಾಸ್ ನಾತ್ಲೆ
ಆತಾಂ ಹಾತಾಂತ್ ಕಾಸ್ ಆಸಾತ್
ಸಗ್ಳ್ಯಾ ಮಾತ್ಯಾರ್ ಕೇಸ್ ನಾಂತ್
ಕೆಸಾಂ ತುದಿಯೆರ್ ಮುದಿಯೊ ವೊಳುನ್
ಎಕೇಕ್ ಮುದಿ ಕಪಲಾರ್ ಗಳವ್ನ್
ಭೊಂವ್ಚಿ ತೆದ್ನಾಂ ಪ್ರಾಯ್ ಆಸ್ಲಿ
ಚೊಂವ್ಚಿಂ ಚೆಡ್ವಾಂಯ್ ಖೂಬ್ ಆಸ್ಲಿಂ
ಆತಾಂ ಆದ್ಲಿ ಪಿರಾಯ್ ನಾ
ಆಯ್ಚೆ ಪ್ರಾಯೆಂತ್ ಖರಾಯ್ ನಾ
ಜೆದ್ನಾಂ ಭೊಗುಂಕ್ ಲಜ್ ಆಸ್ಲಿ
ತೆದ್ನಾಂ ನ್ಹೆಸುಂಕ್ ಲೇಸ್ ನಾತ್ಲೊ
ಆತಾಂ ನ್ಹೆಸುಂಕ್ ರಾಸ್ ಆಸಾ
ಸಾಸ್ವಾತಿತ್ಲೀಯ್ ಲಜ್ ನಾ
ಪರ್ಕಟ್ ಜಾಲ್ಲೆಂ ಇಂಜಿನ್ ಆತಾಂಯ್ ಚಲ್ತಾ
ಉಸ್ವಾಸ್ ಭಾಯ್ರ್ ಭಿತರ್ ವ್ಹಾಳ್ತಾ
ಜೆದ್ನಾಂ ಕಾಳ್ಜಾಂತ್ ಆಸ್ ಆಸ್ಲಿ
ಕುಡಿಂತ್ ಮಾಸಾ ರಾಸ್ ಆಸ್ಲಿ
ಆಯ್ಚೆ ಆಶೆಕ್ ಜೋಸ್ ನಾ
ಮಾಸಾಂತ್ ಆದ್ಲೊ ರೋಸ್ ನಾ
ಜೆದ್ನಾಂ ಮಾತ್ಯಾರ್ ಕೇಸ್ ಆಸ್ಲೆ
ತೆದ್ನಾಂ ಹಾತಾಂತ್ ಕಾಸ್ ನಾತ್ಲೆ
ಆತಾಂ ಹಾತಾಂತ್ ಕಾಸ್ ಆಸಾತ್
ಮಾತ್ಯಾರ್ ಏಕ್‌ಯ್ ಕೇಸ್ ನಾ
-ವಿಲ್ಫಿ ರೆಬಿಂಬಸ್