ಸಂಪಾದಕೀಯ್:
ದೋನ್ ಪೊಂತಾಂ ಮಧ್ಲ್ಯಾ ಧಾಗ್ಯಾಚೆರ್ ಉಬತ್ ಘಾಲ್ಲೆ ಸಂಬಂಧ್
ಎಕೆ ವಾಟೆನ್ ಅಸ್ತಮ್ತೆ ಕುಶೀಕ್ ಪಾವ್‌ಲ್ಲೆಂ ಲಗ್ನಾಜಿವಿತ್, ಆನ್ಯೇಕೆ ಕುಶಿನ್ ಪರ್ಗಾಂವಾಕ್ ಪಾವ್‌ಲ್ಲಿಂ ಫಳಾಂ. ಹ್ಯಾ ದೋನ್ ಪೊಂತಾಂ ಮಧೆಗಾತ್ ಜೊ ಧಾಗೊ ಆಸಾ ತಾಂತುಂ ಜಿವಿತಾಚ್ಯಾ ನಿಮ್ಣ್ಯಾ ಮೆಟಾಂಕ್ ಪಾವ್ತಾನಾ ಪೊಟ್ಲುನ್ ರಾವ್‌ಲ್ಲೆಂ ಭಂಯ್, ಆಕ್ಲಾಸ್; ಪರ್ದೆಶಿ ವೊಶ್ಯಾಂತ್ ನಪ್ಪಟ್‌ನಾರ್ ಜಾವ್ನ್ ಗೆಲ್ಲಿ ಸಂಸ್ಕೃತಿ ಆನಿ ಲಾಸೊನ್ ಗೆಲ್ಲೆ ಸಂಬಂಧ್ ಸಗ್ಳೆ ಸೊಭಿತ್ ಕರುನ್ ಕವಿತಾದ್ವಾರಿಂ ಉಬತ್ ಘಾಲ್ಯಾತ್ ಕವಿ ವಿಲ್ಫಿ ರೆಬಿಂಬಸಾನ್.
ಸರಳ್ ಉತ್ರಾಂ, ಸರಳ್ ವಿಷಯ್. ಪುಣ್ ತೊ ವಿಷಯ್ ಸಾಂಗೊಂಕ್ ವಾಪರ್‌ಲ್ಲಿ ಕಲಾ ಮಾತ್ರ್ ವಾಚ್ತಲ್ಯಾಚೆರ್ ಜಾದು ಕರ್‍ತಾ. ಅಸಲೊ ಏಕ್ ಜಾದು ವಿಲ್ಫಿ ರೆಬಿಂಬಸಾಕ್ ಮಾತ್ರ್ ಕಳಿತ್. ಹೊ ಜಾದು ಕಸಲೊ ಕೊಣ್ಣಾ ಮ್ಹಣೊನ್ ಜಾಯ್ತೆ ಪಾವ್ಟಿಂ ಜಾಯ್ತೆ ರಿತಿಂನಿ ಹಾಂವ್ ತಕ್ಲಿ ಆಟವ್ನ್ ಆಸ್ತಾಂ. ಥೊಡೆಪಾವ್ಟಿಂ ತಾಂತ್ಲೆಂ ಸಂಗೀತ್ ಉಟೊನ್ ದಿಸ್ತಾ ಜಾಲ್ಯಾರ್, ಥೊಡೆಪಾವ್ಟಿಂ ಥೊಡಿಂಚ್ ಉತ್ರಾಂ ಘೆವ್ನ್ ಕವಿನ್ ಖೆಳ್ಚೊ ಕವಿತಾಖೆಳ್ ಮ್ಹಾಕಾ ವಿಜ್ಮಿತ್ ಕರಯ್ತಾ. ಕಾಂಯ್ ಸಂದ್ರಾಪ್ ಮೆಳ್ತಾನಾ ಹಾಚೆವಿಶಿಂ ಸುಕ್ಷಿಮಾಯೆಚೆಂ ಅಧ್ಯಯನ್ ಚಲಯ್ಜಾಯ್ ಮ್ಹಣೊನ್ ಭೊಗ್ತಾ.
ವಿಲ್ಫಿ ರೆಬಿಂಬಸಾನ್ ಕವಿತಾ ಕುಳಾರಾಂತ್ ತಾಚ್ಯೊ ಕವಿತಾ ಪರ್ಗಟುಂಕ್ ಆಮ್ಕಾಂ ದಿಲ್ಲಿ ಪರ್ವಣ್ಗಿ ಆಮ್ಚೆಂ ಭಾಗ್ ಮ್ಹಣೊನ್ ಲೆಕ್ತಾಂವ್. ಫುಡಾರಾಂತ್‌ಯ್ ಕವಿತೆಚ್ಯೊ ವೆವೆಗ್ಳ್ಯೊ ಝರಿ ಆಮ್ಕಾಂ ತೊ ಪಿಯೆಂವ್ಕ್ ದಿತಲೊ ಮ್ಹಳ್ಳೊ ಧೃಡ್ ಭರ್‍ವಸೊ ಆಮ್ಕಾಂ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಾಂವ್ ತುಕಾ ಆನಿ ತುಂ ಮ್ಹಾಕಾ
ಹಾತ್ ತುಜೊ ಧರುನ್, ಎಕಾ
ಭಾಗಿ ದಿಸಾ ಮ್ಹಳ್ಳೆಂ ತುಕಾ
ಆಧಾರ್ ಜಾವ್ಯಾಂ ಎಕಾಮೆಕಾ
ಲಗ್ನಾ ಭೆಸಾಕ್ ಪ್ರಾಯ್ ಜಾಲಿ
ಪನ್ನಾಸ್ ಪಾವ್ಸಾಂ ಭಿಜುನ್ ಗೆಲಿಂ
ತಿತ್ಲ್ಯೊಚ್ ಉಬಾಳ್ಯಾಂಚ್ಯೊ ವೊಲಿ
ತರ್ನಾಟ್ಪಣಾಕ್ ಶಿಜವ್ನ್ ಮೆಲಿಂ
ತೀನ್ ಫಳಾಂ ಕುಟ್ಮಾ ರುಕಾರ್
ಫುಲ್ಲಿಂ ತರೀ ಖಂಯ್ಚ್ಯಾ ಸುಖಾಕ್
ಕೊಣಾಯ್‌ವಿಶಿಂ ಶಿಣನಾಕಾ
ತಾಂಕಾಂ ಸೊಡ್ಯಾಂ ತಾಂಚ್ಯಾ ಲೆಕಾ
ಉರ್‍ಲ್ಯಾಂವ್ ಆತಾಂ ಆಮಿಂಚ್ ಆಮ್ಕಾಂ
ಹಾಂವ್ ತುಕಾ ಆನಿ ತುಂ ಮ್ಹಾಕಾ
ದೆವಾನ್ ಪಯ್ಲೆಂ ಮ್ಹಾಕಾ ವೆಲ್ಯಾರ್
ಸರ್ಗಾ ಮೆಟಾರ್ ರಾಕೊನ್ ಬಸ್ತಾಂ
ತುಕಾಚ್ ಪಯ್ಲೆಂ ವೆಲೆಂ ಜಾಲ್ಯಾರ್
ಮ್ಹಾಕಾಯ್ ವ್ಹರೊಂಕ್ ದೆವಾಕ್ ಧೊಸ್ತಾಂ
ವಯ್ಲೆಂ ಸುಖ್‌ಯ್ ವಾಂಟುನ್ ಖಾವ್ಯಾಂ
ಸ್ಪಿರಿತಾನ್‌ಯ್ ಎಕ್ವಟ್ ರಾವ್ಯಾಂ
ಉಡಾಸಾಚಿಂ ಲಾವ್ಯಾಂ ಪಾಕಾಂ
ಭೊಂವುನ್ ಯೆವ್ಯಾಂ ಕಾಲ್ಚ್ಯಾ ಸುಖಾಂತ್
ದೊಳ್ಯಾಂ ಮೆರೆರ್ ನಾಕಾತ್ ದುಖಾಂ
ಪುಸ್ಚಿಂ ಗೆಲ್ಯಾಂತ್ ಆಮೇರಿಕಾ
ಆತಾಂ ಆಮಿಂಚ್ ಆಮ್ಕಾಂ
ಹಾಂವ್ ತುಕಾ ಆನಿ ತುಂ ಮ್ಹಾಕಾ
-ವಿಲ್ಫಿ ರೆಬಿಂಬಸ್