ಸಂಪಾದಕೀಯ್:
ಕಾಳ್ಜಾಚ್ಯಾ ಕಾನ್ಸುಲಾಕ್ ಆಲ್ಪುಲ್ಯಾಂಚ್ಯಾ ಪಾಕ್ಳ್ಯಾಂನಿ ಪೊಶೆಲ್ಲೆಬರಿ!
ಕೊಂಕಣಿಚ್ಯಾ ಬೋವ್ ಉಂಚ್ಲ್ಯಾ ಕವಿತಾಂ ಪಯ್ಕಿ ಹಿ ಏಕ್ ಮ್ಹಣೊನ್ ಗಾಜ್ಲ್ಯಾ. ಹೆ ಕವಿತೆನ್ ಉಬ್ಯೊ ಕರ್‍ಚ್ಯಾ ಪ್ರತಿಮಾಂಕ್ ಲೇಕ್ ನಾ. ಜಿಣ್ಯೆಚೆ ಸಾಂಜೆರ್ ತರ್ನಾಟ್‌ಪಣಾಚ್ಯಾ ಕಾಳಾಚೊ ಏಕ್ ಉಡಾಸ್ ಯೇವ್ನ್ ಅಂತರ್‌ಮಳಾಂನಿ ಜಿಂ ಆಜ್ಯಾಪಾಂ ಘಡ್ತಾತ್ ತಿಂ ಕವಿವರ್ಯ್ ದೆವಾಧೀನ್ ಬಾಕಿಬಾಬ್ ಬೋರ್ಕರಾನ್ ಭೋವ್‌ಚ್ ಸುಂದರ್ ರಿತಿನ್ ಹಾಂಗಾಸರ್ ವರ್ಣಿಲ್ಯಾಂತ್. ಹೆ ಕವಿತೆನ್ ಜಿಕ್ಲಲ್ಯಾ ಕಾಳ್ಜಾಂಕ್, ಸಂತೊಸಾಯಿಲ್ಲ್ಯಾ ಮನಾಂಕ್ ಹಿಸಾಬ್ ನಾ.
ಫಕತ್ ಪಾಂಯ್‌ಜಣಾಂಚ್ಯಾ ಆವಾಜಾಕ್ ರಾನಾನ್ ಮೊನೆಂ ಜಾಂವ್ಚೆಂ, ಪಾನಾಂನಿ ಶಿರ್‍ಶಿರ್‍ಚೆಂ, ಝೆಮೆಂವ್ಚ್ಯಾ ತಣಾಕ್ ಲೆಗುನ್ ಲ್ಹಾನ್ ಜಾಗ್ ಜಾಂವ್ಚಿ, ಸಾವ್ಳ್ಯಾಂನಿ ಪರ್ಮಳ್ ಉಟ್ಚೊ - ಹ್ಯಾ ಸರ್ವಯ್ ಪ್ರತಿಮಾಂಚಿ ಆಪುರ್ಬಾಯ್ ವರ್ಣುಂಕ್ ಮ್ಹಜೆಲಾಗಿಂ ಉತ್ರಾಂ ನಾಂತ್. ಬಾಳ್‌ಕೃಷ್ಣ್ ಭಗವಂತ್ ಬೋರ್ಕರಾಚ್ಯೊ ಕವಿತಾ ಅಶ್ಯೋಚ್. ತ್ಯೊ ಕಾಳ್ಜಾಚ್ಯಾ ಕಾನ್ಸುಲಾಕ್ ಆಲ್ಪುಲ್ಯಾಂಚ್ಯಾ ಪಾಕ್ಳ್ಯಾಂನಿ ಪೊಶೆಲ್ಲ್ಯಾಬರಿ ಪೊಶೆತಾತ್.
ಮೊಗಾಚ್ಯೊ ಕವಿತಾ ಅಶ್ಯೋಯ್ ಬರಂವ್ಕ್ ಜಾತಾತ್. ಪಾಂಯ್‌ಜಣಾಂನಿ ಕರ್‍ಚ್ಯಾ ಸಂಗೀತಾಬರಿ, ಸಗ್ಳೆ ಕವಿತೆಂತ್ ಉತ್ರಾಂಚೆ ಬಾಂದಾವಳಿಕ್ ಎಕಾ ನಮುನ್ಯಾಚೊ ಆವಾಜ್ ಉಟ್ಲಾ ತೊ ಪಾಂಯ್‌ಜಣಾಂಚೊಚ್ ನ್ಹಯ್ ಆಸ್ತಾಂ ಆನಿ ಕೊಣಾಚೊ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಾಂಯ್‌ಜಣಾಂ
ತ್ಯಾ ದಿಸಾ ವಡಾಕಡೆನ್ ಗಡ್ದ್ ತಿನ್‌ಸಾನಾಂ
ಮಂದ್ ಮಂದ್ ವಾಜತ್ ಆಯ್ಲಿಂ ತುಜಿಂಗೊ ಪಾಂಯ್‌ಜಣಾಂ
ಮೌನ್ ಪಡ್ಲೆಂ ಸಗ್ಳ್ಯಾ ರಾನಾಂ
ಶಿರ್‌ಶಿರೊನ್ ಥಾಂಬ್ಲಿಂ ಪಾನಾಂ
ಕಂವ್ಳಿ ಜಾಗ್ ಆಯ್ಲಿ ತಣಾ ಝೆಮ್ತಾ ಝೆಮ್ತಾನಾ
ಪಯ್ಸುಲ್ಯಾನ್ ವಾಜ್ಲಿ ಘಾಂಟ್
ದಾಟ್ಲೊ ನಂಯ್ಚೊ ಕಂಠ್‌ಕಾಂಟ್
ಸಾವ್ಳ್ಯಾಂನಿ ಘಮ್‌ಘಮಾಟ್ ಸುಟ್ಲೊ ತ್ಯಾ ಖಿಣಾ
ಫುಲ್ಲ್ಯೊ ವಯ್ರ್ ಚಂದ್ರ್‌ಜ್ಯೋತಿ
ರಂಧ್ರಾಂನಿ ಲಾಗ್ಲ್ಯೊ ವಾತಿ
ನವಲಾಂಚಿಂ ಜಾಂವ್ಕ್ ಲಾಗ್ಲಿಂ ಶಕುನ್ ಲಕ್ಷಣಾಂ
ಗಳ್ಯಾಂ ಸುಕಾಂ, ದೊಳ್ಯಾಂ ದುಕಾಂ
ಲಕ್‌ಲಕ್ಲಿಂ ಜಾವ್ನ್ ಥಿಕಾಂ
ನಕಳ್ತನಾ ಏಕ್ ಜಾಲಿಂ ಆಮಿ ದೊಗಾಂಯ್ ಜಣಾಂ
ವಡಾಫಳಾಂಚ್ಯಾ ಅಕ್ಷತಾಂತ್
ಕಿತ್ಲೊ ವೇಳ್ ನ್ಹಾಯ್ತ್ ನ್ಹಾಯ್ತ್
ಹುಪ್ಲೆ ಕಿತ್ಲೆ ಚಂದ್ರ್‌ಲೋಕ್ ಇಂದ್ರನಂದನಾ
ತಾಂತ್ಲೆಂ ಕಾಂಯ್ ನುಲ್ಲೆಂ ಆಜ್
ಸಗ್ಳೆ ಜಿಣ್ಯೆಕ್ ಆಯ್ಲ್ಯಾ ಸಾಂಜ್
ತರೀಯ್ ಅಕಸ್ಮಾತ್ ತುಜಿಂ ವಾಜ್ಲಿಂ ಪಾಂಯ್‌ಜಣಾಂ
ಕಾನ್ಸುಲಾಂನಿ ಭೊಂವ್ತಿ ಭೊಂವರ್
ಆಂಗಾರ್ ದಾಟ್ ಫುಲ್ತಾ ಚಂವರ್
ಪಡ್‌ಟಿ ಕೆನ್ನಾ ಸಪ್ಣಾಂ ತಿಂಚ್ ಘಡ್‌ಟಿ ಜಾಗರಣಾ
-ಬಾಕಿಬಾಬ್ ಬೋರ್‍ಕರ್