ಸಂಪಾದಕೀಯ್:
ಕೊಂಕಣಿ ಕವಿತಾ ಶೆತಾಕ್ ವ್ಹರ್ತೆಂ ಮೊತಿಂ ಹಿ ಕವಿತಾ!
ಏಕ್ ವೆಗ್ಳ್ಯಾಚ್ ಥರಾಚೊ ಪ್ರಯೋಗ್ ಹೆ ಕವಿತೆದ್ವಾರಿಂ ಕವಿ ಜೆರಿ ರಾಸ್ಕಿಞಾನ್ ಕೆಲಾ. ಪಯ್ಲೆ ಪಾವ್ಟಿಂ ವಾಚ್ತಲ್ಯಾಕ್ ಹಿ ಕವಿತಾ ಸಮ್ಜೊಂಕ್ ಥೊಡಿ ಕಷ್ಟಾಂಚಿ ತರೀ, ಹೆ ಕವಿತೆಂತ್ಲ್ಯೊ ಕುರ್‍ವೊ ಸಮ್ಜೊನ್ ಗೆಲ್ಲ್ಯಾಬರಿ ಹಾಂತ್ಲೊ ರೋಸ್ ವ್ಹಾಳೊಂಕ್ ಲಾಗೊನ್ ತುಜಿ ತಾನ್ ಭಾಗ್ತಲಿ. ಹಾಂಗಾಸರ್ ಬಾರಾ ಸರೊನ್ ತೆರಾ ಲಾಗ್ಚಿ ಪ್ರಾಯ್ ಆಸಾ; ಕಾಳ್ಜಾಚೆ ಸ್ನಾಯು ಅರ್ನತಾನಾ ಜಾಂವ್ಚಿ ದೂಕ್ ಆಸಾ; ತೆ ದುಕಿಕ್ ದೆಂವ್ಚಿಂ ದುಕಾಂ ಆಸಾತ್; ತೆ ದುಕಿಂತ್‌ಯ್ ಉಟ್ಚೆಂ ಸಂಗೀತ್ ಆಸಾ ಆನಿ ಭೋವ್ ಗರ್ಜೆಚೆಂ ನಿಳ್ಶೆಂ ಆನಿ ತಾಂಬ್ಶೆಂ ರಗತ್ ಆಸಾ.
ಮಾಗೀರ್ 'ಪಾರೋ' ಮ್ಹಳ್ಯಾರ್ ದಾದ್ಲೊ ಜಾಂವ್ಕ್ ಸಾಧ್ಯ್ ನಾ ಮ್ಹಣ್ತಾನಾ ಹೆ ಕವಿತೆನ್ ಉಗ್ತೊ ಕರ್‍ಚೊ ಸಂಸಾರ್ ಜಿವೊ ಜಿವೊ ಝಳ್ಕೆಕ್ ಯೆತಾ. ತರ್ನಾಟ್‌ಪಣಾಚಿ ಪ್ರಾಯ್ ಆನಿ ಭುರ್ಗೆಪಣಾಚೆ ಪಾಕಟೆ ಝಡೊನ್ ವೆಚೊ ಪಾಂವ್ಡೊ ಭೋವ್ ಮಾರ್ಮಿಕ್ ರಿತಿನ್ ಕವಿ ಜೆರಿ ರಾಸ್ಕಿಞಾನ್ ಹಾಂಗಾಸರ್ ದಿಲಾ. ತಾಣೆ ವಾಪರ್‌ಲ್ಲ್ಯಾ 'ಎಲೆಗರಿ'ಕ್ ಲಾಗೊನ್ ಹೆ ಕವಿತೆಚೊ ಸಂಸಾರ್ ಮ್ಹಾಕಾ ಭೋವ್ ಪಸಂದ್ ಜಾಲಾ.
ಜೆರಿ ರಾಸ್ಕಿಞಾನ್ ಫುಡಾರಾಂತ್‌ಯ್ ಅಸಲ್ಯೊ ಕವಿತಾ ಬರಯ್ಜಾಯ್ ಮ್ಹಣೊನ್ ಹಾಂವ್ ಆಶೆತಾಂ. ಹಿ ಕವಿತಾ ಖಂಡಿತ್ ಜಾವ್ನ್ ಕೊಂಕಣಿ ಸಾಹಿತ್ಯಾಂತ್ಲೆಂ ವ್ಹರ್ತೆಂ ಮೊತಿಂ ಅಶೆಂ ಹಾಂವ್ ಲೆಕ್ತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಂಡಾಚೆಂ ಗಾಯಾನ್
ಕಾಳ್ಜಾಚ್ಯಾ ಸ್ನಾಯುಂನಿ
ವೊಡ್ಚೆ ದುಖಿಂತ್
ಸೊಲ್ಫಾಂ ಥೊಡಿಂ
ಗುಮಟಾಚ್ಯಾ ಆವಾಜಾಕ್
ನಾಚೊಂಕ್ ಲಾಗ್ಲ್ಯಾಂತ್
ತಾಂಚೆಂ ರುಪ್ಣೆಂ,
ದೊಳ್ಯಾಂಚಿಂ ದುಕಾಂ
ಪೊಲ್ಯಾರ್ ಪಿಂತ್ರಾಯ್ತಾತ್.
ಮಿಟಾ ರೂಚ್
ವೊಂಟಾಕ್ ಚಾಕಯ್ತಾತ್!
ಉಂಡಾಚ್ಯಾ ಶಿರಾಂಚೆ
ಉಡಿಂನಿ
ರಗ್ತಾಚ್ಯಾ ರಂಗಾಂನಿ
ಉಟ್ಲಾಂ ಸಂಗೀತ್
ಆಹಾ!
ನಿಳ್ಶಾ ಆನಿ ತಾಂಬ್ಶಾ
ರಗ್ತಾಚೆಂ
ಸಮ್ಮಿಲನ್
ಗಾಯ್ತಾ ಆನಿ ನಾಚ್ತಾ
ಮೊಗಾಚ್ಯಾ ವೆಗ್ಳಾಚಾರಾಚೆಂ
ಗಾಯಾನ್
ಬಾರಾ ಸರೊನ್
ತೆರಾ ಜಾಲಿಂ
ಇಂದಾ ತಾಳೆ
ಇಂದಾರ್‌ಚ್ ಉರ್‍ಲೆ
ದೆಕೊನ್
ದೀಸ್‌ರಾತ್ ಉಂಡಾಚೆಂ
ಗಾಯಾನ್!
ಹಾ! ಪಾರೋ!
-ಜೆರಿ ರಾಸ್ಕಿಞ್, ಆಂಜೆಲೊರ್