ಹುಮಿಣ್

ಸಂಪಾದಕೀಯ್:

ಶೆಳಿಯಾಂಚ್ಯಾ ಗಳ್ಯಾಂನಿ ಚಿಡ್ಡೊನ್ ಗೆಲ್ಲ್ಯಾ ತಾಳ್ಯಾಂಕ್ ತ್ರಾಣ್

ಹ್ಯಾ ಸಂಸಾರಾಂತ್ ಜಾಯ್ತೊ ಲೋಕ್ ಶೆಳಿಯಾಂಬರಿ ಜಿಯೆತಾ. ಕಸಾಯ್ಗಾರ್ ಕಾಂಯ್ ಉಣೆಂ ನಾಂತ್. ತೆ ತಾಂಚೆ ಕೊಯ್ತೆ, ಕುರಾಡಿ, ಬಯ್ತಾಡಾಂ ಪಾಜೊನ್‌ಚ್ ಆಸ್ತಾತ್, ಅಸಲ್ಯಾ ಶೆಳಿಯಾಂಚೆ ಗಳೆ ಕಾತ್ರುಂಕ್. ಪುಣ್ ಶೆಳಿಯಾಂ ಥಾವ್ನ್ ಅಸಲೇಂಯ್ ಶೆಳೆಪಣ್ ಕಿತ್ಯಾಕ್? ಸಂಪೆಂ, ಸಂಪೆಪಣಿಂ ಮಾರ್ನ್ ಉಡಯ್ನಾಸ್ತಾಂ ತಾಂಣಿ ಕಠಿಣ್ ತರೀ ಕಿತ್ಯಾಕ್ ಕರ್‍ಚೆಂ? ತಾಂಚ್ಯಾ ಭಿಂಯಾ ಮುಕಾರ್ ಬುಧ್ವಂತ್ಕಾಯ್ ಕಿತ್ಯಾಕ್ ಪಳೊನ್ ಧಾಂವ್ತಾ?

ಜೆರಿ ರಾಸ್ಕಿಞಾನ್ ಅಥ್ವಿಚ್ ಏಕ್ ಕವಿತಾ ಬರಯ್ಲ್ಯಾ. ಶೆಳಿಯಾಂಕ್ ತೊ ಶಿಟ್ಕಾವ್ಣಿ ಜರೂರ್ ದಿತಾ. ತಾಂಕಾಂ ಹುಮೆದಿನ್ ಭರಯ್ತಾ. ಭಿಂಯಾಂತ್ಲೆಂ ಉಟೊಂಕ್ ತ್ರಾಣ್ ದಿತಾ. ತಿತ್ಲೆಂ ಮಾತ್ರ್ ನ್ಹಯ್, ಹೆ ಕವಿತೆದ್ವಾರಿಂ ಅಸಲ್ಯಾ ಶೆಳಿಯಾಂಚ್ಯಾ ಗಳ್ಯಾಂನಿ ಚಿಡ್ಡೊನ್ ಗೆಲ್ಲ್ಯಾ ತಾಳ್ಯಾಂನಿ ಅತ್ಮೊ ಭರ್‍ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

   ಹುಮಿಣ್

          ಜೆಂ ಸಂಪೆಂ
            ತೆಂ
                ಕಠಿಣ್ ಕಶೆಂ ಜಾಲೆಂ?

    ರಗತ್
        ಪಿಯೆಂವ್ಕ್
            ಕೊಣೆಂ ತುಮ್ಕಾಂ ಶಿಕಯ್ಲೆಂ?

    ದೆಂವ್ಚಾರಾಕ್
        ದುಸ್ಮಾನ್ ನಾ ತೆಂ
            ಕಶೆಂ ಬೆಜ್ಯಾಂತ್
                ಶಿಜನಾ ಜಾಲೆಂ?

    ಸತ್
        ಝಳ್ಕನಾಸ್ತಾಂ ಮೆಲೆಂ?
            ಬುಧ್ವಂತ್ಕಾಯೆಕ್
                ಹಿಜ್ಡ್ಯಾನ್ ವೆಲೆಂ?

    ರಗ್ತಾಂತ್
        `ಹೋಲಿ'ಚೊ ಖೆಳ್!
            ನ್ಹಯ್‌ಗಿ
                ಹೊ ಸಯ್ತಾನಾಚೊ ಮೇಳ್?

    ಹೊ ಗುಟ್
        `ಮಾಂಕ್ಡಾಂಚೊ'
            ಅರ್ಥ್ ಕರಾ
            ವಿಭಾಡ್ನಾಕಾತ್ ವೇಳ್.

    -ಜೆರಿ ರಾಸ್ಕಿಞ್, ಆಂಜೆಲೊರ್