ಕವಿತಾ:
"ಮಾತ್ಶೆಂ ರಾವ್ ಸ್ವಾಸಾ...."
ರಾನಾಂತುಲ್ಯಾ ಕಾಟ್ ಫ಼ುಲಾಂಚೊ
ಪರ್ಮಳ್ ಮಾತ್ಯಾಕ್ ಮಾಳುನ್ ವಾರೆಂ
ಭಾಯ್ರ್ ಪಡ್ತಾನಾ ತರ್ನೆ ವೊತ್
ಆಂಗಾಕ್ ಊಬ್ ದಿತಾ
ಶೆತಾಂತ್ ಘಾಮಾನ್ ಭಿಜ್‌ಲ್ಲ್ಯಾ
ರೈತಾಚ್ಯಾ ವಿಣ್ಗ್ಯಾ ಹರ್ಧ್ಯಾಕ್ ಭುಲೊನ್
ವೇಂಗ್ ಮಾರ್ತಾನಾ, ಘಾಮಾಚೊ ಪರ್ಮಳ್
ವಿಶ್ವ್ಯಾಂಕ್ ಜೀವ್ ಕರ್‍ತಾ
ವೋಂಯ್ತ್ ರೊಯ್‌ಲ್ಲಿ ನಿವಳ್
ದಾಂಟೊನ್ ಧರ್ಣಿಕ್ ಶೆವ್ಟಲ್ಯಾರೀ
ನಿರ್ಮಳ್ ಮಾತಿಯೆಚೊ ಪರ್ಮಳ್
ಪೊಪ್ಸಾಂಕ್ ಸುಖ್ ದಿತಾ
ತಾಂಬ್ಶಿ ಕಿರ್ಗಿ, ಪಾಚ್ವಿ ಬಾಜು
ಉಡ್ತೆ ಚಾಲಿಚ್ಯಾ ತರ್ನ್ಯಾ ಚೆಡ್ವಾಬರಿ
ಬೊಂಬ್ಲಿ ಫ಼ುಲವ್ನ್ ವಾರೆಂ
ಶೆರಾಕ್ ಪಾವ್ತಾ
ಪೂಣ್ ಥಂಯ್ಸರ್...
ಶೆಳೆಲ್ಲ್ಯಾ ನೊಟಾಂಚ್ಯಾ ವಿಚಿತ್ರ್ ವಾಸಾಕ್
ಭುಲ್‌ಲ್ಲಿಂ ನಾಕಾಂ ಮೊಲಾಯ್ತಾನಾ
ಕಾಟ್ ಫ಼ುಲಾಚೊ ಪರ್ಮಳ್
ಲಜೆನ್ ದೊಡ್ತಾ
ಧನಿಯಾಂಗೆಲ್ಯಾ ಖೊಮ್ಸಾ ಖಾಕಿಯೆಕ್
ಫ಼ೊರಿನ್ ಪರ್ಫ್ಯೂಮ್ ಮಾರ್ತಾನಾ
ಸ್ವಸ್ತ್ ಕುಡಿಚೊ ಘಾಮಾ ಪರ್ಮಳ್
ಅಸ್ತಿತ್ವ್ ಹೊಗ್ಡಾಯ್ತಾ
ಕಚ್ರ್ಯಾ ಡಬ್ಬ್ಯಾಚೆಂ ಕುಸ್ಡೆಂ ಪೋಟ್
ಭುಕೆಲ್ಲೆಂ ಸುಣೆಂ ಉಸ್ತಿತಾನಾ
ನಿರ್ಮಳ್ ಮಾತಿಯೆಚೊ ಸ್ವಾದಿಕ್ ಪರ್ಮಳ್
ಪುರೂನ್ ವೆತಾ
ಸಮಾಜೆಕ್ ಕಾಂಟಾಳೊನ್
ಹುಳ್ವುಳ್ಚ್ಯಾ ವಾರ್‍ಯಾಕ್
ಕಿತೆಂಗೀ ಪೆಟೊನ್ ಉಟ್‌ಲ್ಲೊ ಧುಂವೊರ್
ಧವ್ಸಾಣ್ ದಿತಾ
ಖಿಣಾನ್, ಘೊವಾಚೆ ಸಮಾಧೆಕ್
ತಕ್ಲಿ ಧಾಡಾಂವ್ಚೆ ವಿಧ್ವಿಬರಿ
ದೊರ್‍ಯಾ ವಯ್ಲೆ ಬೊತ್ಲೆ ಖೊಂವ್ಚೆರ್
ಹರ್ಧೆಂ ಶಿಂದ್ತಾನಾ
ವಾರ್‍ಯಾಚೊ ಸ್ವಾಸ್ ತುಟ್ತಾ
ತ್ಯಾಯ್ ಅಸ್ಕತ್ ಸ್ವಾಸಾಲಾಗಿಂ
ಗಾಂವ್ ಭರ್
ಊಂಚ್ ಉಬಾರ್ಲೆಲೆ ಬಾವ್ಟೆ
ಪರಾತ್ತಿತಾತ್...
"ಮಾತ್ಶೆಂ ರಾವ್ ಸ್ವಾಸಾ
ಆಜ್ ಎಕಾ ದಿಸಾ
ದೊರಿಯೆ ವಿಣೆಂ ಉಬ್ತಾಂವ್
ದಾಕಯ್ ನವಿ ದಿಶಾ
ಮಾತ್ಶೆಂ ರಾವ್ ಸ್ವಾಸಾ
ಆಜ್ ಎಕಾ ದಿಸಾ
ವ್ಹರೊನ್ ಆಮ್ಕಾಂ ಪಾವಯ್
ಸರ್ಗಾ ಸಾರ್ಕ್ಯಾ ದೆಶಾ".
-ವಿಲ್ಸನ್ ಕಟೀಲ್