ಸಂಪಾದಕೀಯ್:
ಜಿವಿತಾಚ್ಯಾ ವಿಪರ್‍ಯಾಸಾಚೆಂ ಏಕ್ ಪಿಂತುರ್
ಹರ್‍ಯೆಕೆ ವೆಕ್ತಿಕ್ ಆಪ್ಲಿಚ್ ಅಸ್ಮಿತಾಯ್ ಆಸ್ತಾ. ಹಿ ಅಸ್ಮಿತಾಯ್ ಚಡ್ ಕರುನ್ ಆಪ್ಲೊ ಗಾಂವ್, ಕಸಬ್, ಭಾಸ್, ಸಂಸ್ಕೃತಿ, ಜಿಣ್ಯೆರೀತ್ - ಹಾಂಚೆ ಭೊಂವ್ತಿಂ ಉಬಿ ಕೆಲ್ಲಿ ಆಸ್ತಾ. ಅಸಲಿ ಏಕ್ ಅಸ್ಮಿತಾಯ್ ಜೊಡ್‌ಲ್ಲೊ ಮನೀಸ್, ಪೊಟಾಚೆ ಪೊಡಿಖಾತೀರ್ ಗಾಂವ್ ಸಾಂಡುನ್ ಪರ್ದೆಶಾಕ್ ವೆಂಗ್ತಾ, ತವಳ್ ತಾಚೆ ಅಸ್ಮಿತಾಯೆಚೆರ್ ಗೀದ್ ಬಸ್ತಾತ್. ಅಸಲ್ಯಾ ಎಕೆ ಕಾಂತವ್ಣೆಂತ್ ಹೆ ಕವಿತೆಚೆಂ ರಚನ್ ಜಾಲಾಂ.
ಎಕಾ ವರ್‍ಸಾಕ್, ದೋನ್ ವರ್‍ಸಾಂಕ್ ಮ್ಹಣೊನ್ ಗಲ್ಫಾಕ್ ಪಾವ್‌ಲ್ಲೆ ಜಾಯ್ತೆ ಜಣ್ ಆಜೂನ್ ಪಂದ್ರಾ-ವೀಸ್ ವರ್ಸಾಂ ಜಾಲಿಂ ಜಾಲ್ಯಾರ್‌ಯ್ ಜಿವಿತಾಚ್ಯಾ ಸುಳಿ-ಗೊಂದೊಳಾಂತ್ಲೆಂ ಭಾಯ್ರ್ ಯೇಂವ್ಕ್ ಸಕನಾಸ್ತಾಂ ಥಯಿಂಚ್ ಉರ್‍ಲ್ಯಾತ್. ಹಾಕಾ ಕವಿಚಿ ಜಿಣಿಚ್ ಗೊವಾಯ್. ಹೆ ಗೊವಾಯೆಚೊ ಏಕ್ ಅಂಕ್ಡೊ ಮ್ಹಳ್ಳೆಬರಿ, ಸ್ವತಾ ಚಿತ್ರ್‌ಕಾರ್ ಜಾವ್ನಾಸ್ಚ್ಯಾ ಕವಿಚ್ಯಾ ತಿಂತೆರಾಥಾವ್ನ್ ಜಿವಿತಾಚ್ಯಾ ವಿಪರ್‍ಯಾಸಾಚೆಂ ಏಕ್ ಚಿತ್ರ್ ಕಶೆಂ ಹಿ ಕವಿತಾ ಉದೆಲ್ಯಾ.
ಹ್ಯಾ ಆದೀಂಯ್ ಕವಿ ಎಡ್ಡಿ ಸಿಕೇರ್ ಕವಿತಾ ಕುಳಾರ್ ನೆಟಂವ್ಕ್ ಆಯಿಲ್ಲೊ. ತಾಚ್ಯಾ ಯೆಣ್ಯಾನ್ ಆಮ್ಚೆ ಮರ್‍ಯಾದೆಚ್ಯಾ ಮುಂಡಾಸಾಕ್ ಆನ್ಯೇಕ್ ಪಾಕ್ ಚಡ್ಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಾಕಾ ಸೊಧ್ತಾಂ ಹಾಂವ್
ಮ್ಹಾಕಾ ಸೊಧ್ತಾಂ ಹಾಂವ್ ಕೊಣ್ ಖಂಯ್ಚೊ ಹಾಂವ್
ಖಂಯ್ಸರ್ ಕಿತ್ಯಾಕ್ ಹಾಂವ್ ಮ್ಹಾಕಾಚ್ ಸೊಧ್ತಾಂ ಹಾಂವ್
ಸಕಾಳಿಂಚಿಂ ಸಾತ್ ತಿಂ ಸಾಂಜೆಚಿಂ ಪಾಂಚ್ ಸ
ಸನ್ವಾರಾ ಥಾವ್ನ್ ಬ್ರೇಸ್ತಾರಾ, ಕೆದ್ನಾಂ ಸುಕ್ರಾರಾ
ಮೆಜಾರ್ ದಾಳ್ಶೆಲ್ಲ್ಯಾ ಫಾಯ್ಲಾಂ ರಾಶಿಂನಿ ಕಂಪ್ಯೂಟರ್ ಜಾಳಾಂನಿ
ಮಲಯಾಳಿ ಬಂಗಾಲಿ ಇಂಗ್ಲಿಶ್ ಅರ್ಭಿ ಜಿಬಾಂ ಭಾಸಾಂನಿ
ಕೆಪ್ಪೊ ಮೊನೊ ಜಾಲಾಂ ಹಾಂವ್, ಮ್ಹಾಕಾಚ್ ಸೊಧ್ತಾಂ ಹಾಂವ್
ದೊನ್ಪಾರಾಂ ಏಕ್ ಮೋಟಾ, ಕೆದ್ನಾಂ ಬಾರಿಕ್ ಜೆವ್ಣಾ ಥಾಲಿ
ರಾತಿಚೆಂ ಖಬೂಸ್ ಭಾಕ್ರಿ ಮಟನ್ ರೋಸ್ಟ್, ಚಿಕನ್ ಚಿಲ್ಲಿ
ಬೀಫ್, ಲಿವರ್, ಬೇಜಾ, ಅಂಡಾ, ರೋಸ್ಟ್, ಕರಿ, ಮಂಚೂರಿ ಫ್ರಾಯ್
ಸುಕ್ರಾರಾ ದೊನ್ಪಾರಾಂ ಪೊಟ್‌ಭರ್ನ್ ಬಿರಿಯಾಣಿ, ಪರ್ಕಿ ಪಕ್ವಾನಾಂ
ಜೇವ್ನ್ ಖಾವ್ನ್ ಉಪಾಶಿಂ ಹಾಂವ್, ಮ್ಹಾಕಾಚ್ ಸೊಧ್ತಾಂ ಹಾಂವ್
ಮ್ಹಾಕಾ ಸೊಧ್ತಾಂ ಹಾಂವ್ ಕೊಣ್ ಖಂಯ್ಚೊ ಹಾಂವ್
ಖಂಯ್ಸರ್ ಕಿತ್ಯಾಕ್ ಹಾಂವ್, ಮ್ಹಾಕಾಚ್ ಸೊಧ್ತಾಂ ಹಾಂವ್
ಟಿವಿಚೆರ್ ಸದಾಂ ರಾತಿಂ ಕೆದ್ನಾಂ ಇಂಗ್ಲಿಷ್ ಫಿಲಮ್
ತ್ಯೊಚ್ ಅರ್ಧ್ಯೊ ವಿಣ್ಗ್ಯೊ ಕುಡಿ, ವಿದ್ರೂಪ್ ವಿಳಾಪ್
ಎಸಿ ವಾರ್‍ಯಾಂತ್ ಶೆಳೆಲ್ಲೆ ಕುಡಿಂತ್ ಮಾತ್ಯಾಸಯ್ತ್ ಕಾಂಬೊಳ್ ಪಾಂಗುರ್ನ್
ಚಡ್ಪಡ್ತಾಂ ಮುರ್‍ಮುರ್‍ತಾಂ ಮನ್ಶಾ ಊಬ್ ಆಶೆವ್ನ್ ನಿದೊಂಕ್ ವೆತಾಂ
ಭೃಮಿದೆಚ್ಯಾ ಸ್ವಪ್ಣಾಂನಿ ಹಾಂವ್, ಮ್ಹಾಕಾಚ್ ಸೊಧ್ತಾಂ ಹಾಂವ್
ರಸ್ಮಾ ಉರ್ಮಾಲ್ ಮಾತ್ಯಾಕ್, ಖಾಂದ್ಯಾರ್ ಶಾಲ್, ಹಾತಿಂ ಕಾಣಿಕ್
ಕೊಂಕ್ಣೆಚೊ ಮಾನಾಯ್ ಮ್ಹಣ್ ಜಣಾಂ ಮ್ಹಾ-ಜಣಾಂಚೊ ಸನ್ಮಾನ್
ಸರ್‍ಲಲ್ಯಾ ಗಾಂವಾಕ್ ಉರ್‍ಲಲೊ ಪಟೆಲ್ ಹಾಂವ್ ಲಜೆನ್ ದೊಡ್ತಾಂ
ಫಾವೊ ನ್ಹಯ್ ಹಾಂವ್ ಪೊಕೊಳ್ ಅಶೆಂ ಸಾಂಗೊನ್ ಸೊಡ್ತಾಂ
ಅರ್ಥ್ ನಾತ್‌ಲ್ಲ್ಯಾ ಉತ್ರಾಂನಿ ಹಾಂವ್ ಮ್ಹಾಕಾಚ್ ಸೊಧ್ತಾಂ ಹಾಂವ್
ಮ್ಹಾಕಾ ಸೊಧ್ತಾಂ ಹಾಂವ್ ಕೊಣ್ ಖಂಯ್ಚೊ ಹಾಂವ್
ಧಾ ವೀಸ್ ವರ್ಸಾಂ ಧಾಂವ್ಲಿಂ ಹ್ಯಾ ಪರ್ದೆಶಾಂತ್ ದುಡು ಭಾಂಗರ್ ಆಶೆವ್ನ್
ಹಾಂಗಾ ಹಾಂವ್ ಆಸಾಂ ಪರ್ದೆಶಿ, ಆಂವ್ಡೆಲ್ಲ್ಯಾ ಗಾಂವಾಕ್ ಪಾವ್ತಾಂ ತರ್ ಥಂಯ್ ಪರ್ದೆಶಿ
ಕೆದ್ನಾಂ ಕಾಗ್ದಾ ಕುಡ್ಕೊ ಮೆಳ್ಳೊ ತರ್ ಉತ್ರಾಂಚಿಂ ಜಾಳಾಂ ಸೊಡಯ್ತಾಂ
ತ್ಯಾ ಜಾಳಾಂನಿ ಹಾಂವ್ ಮ್ಹಾಕಾಚ್ ಸೊಧ್ತಾಂ ಹಾಂವ್
- ಎಡ್ಡಿ ಸಿಕೇರ್