ಸಂಪಾದಕೀಯ್:
ಮೊರ್ನಾ ಕಾಟ್ಯಾಚೆರ್ ಸುಟ್ಕಾ ಲಾಭ್ತಾ!
ಜಾಂವ್ಕ್ ಪುರೊ ತಿಂ ಘರ್ ಕಾಮೆಲಿ. ಜಾವ್ಯೆತ್ ತಿಂ ಬಾಳ್ ಕಾಮೆಲಿ ಯಾ ಶೋಷಣೆಚ್ಯಾ ಅಸ್ತ್ರಾಂ ಪೊಂದಾ ಅಡ್ಚೊನ್ ಆಸ್ಚಿಂ ಅಸ್ಕತ್ ಮನ್ಶಾಂ. ಉಸ್ವಾಸಾಚಿ ಶಿರ್ ಜಿವಿ ದವ್ರುಂಕ್ ಜೆ ಪರಿಸ್ಥಿತಿಂತ್ ತಿಂ ಆಸಾತ್, ತೆ ಪರಿಸ್ಥಿತೆಕ್ ಪೊಟ್ಲುನ್ ಧರುನ್ ಜಿಯೆವ್ನ್ ಆಸಾತ್. ಕೊಣಾಕ್ ಲಾಗೊಂಕ್ ಪುರೊ, ತಿಂ ಸುಖಾನ್ ಆಸಾತ್ ಮ್ಹಣೊನ್. ಪುಣ್ ನಿಜಾಯ್ ತಶಿ ನಾ. ತಾಂಚಿ ಮುಕ್ತಿ ಮ್ಹಳ್ಯಾರ್ ಮೊರ್ನಾ ಕಾಟ್ಯಾಕ್ ವೆಂಗ್ಚೆಂ ಮ್ಹಣೊನ್ ತಿಂ ಬರಿಂ ಜಾಣಾಂತ್.
ಅಸಲ್ಯಾ ಮನ್ಶಾಂಚೆಂ ಪಡ್‌ರೂಪ್ ಮ್ಹಳ್ಳೆಬರಿ ಹಾಂಗಾ ದಿಲ್ಲೆ ಕವಿತೆಂತ್ಲ್ಯೊ ದೋನ್ ಮೊನ್ಜಾತಿ 'ಕಾಲಾ' ಆನಿ 'ಬೊಲ್ಲಾ' ಆಮ್ಚ್ಯಾ ದೊಳ್ಯಾಂನಿ ದುಕಾಂ ಹಾಡಯ್ತಾತ್. ಕಾಂಯ್ ಹಿಂ ಸಂತೊಸಾಚಿಂ ದುಕಾಂ? ತಾಂಚೆ ಕಷ್ಟ್ ಮೊರ್ನಾಂತ್ ಪರ್‍ಯಾರ್ ಜಾಲೆ ಮ್ಹಣ್ಪಾಚಿಂ ದುಕಾಂ?
ಹಿ ಕವಿತಾ ವಾಚ್ತಾನಾ ಲ್ಹಾನ್‌ಪಣಾರ್ ವಾಚ್‌ಲ್ಲ್ಯಾ "ಪುಣ್ಯಕೋಟಿಚಿ" ಯಾದ್ ಯೇಂವ್ಕ್‌ಯ್ ಪುರೊ. ಪುಣ್ ಹೆ ಕವಿತೆನ್ ನಿರ್‌ಮಾಣ್ ಕರ್‍ಚ್ಯೊ ಪ್ರತಿಮಾ ಸಂಪೂರ್ಣ್ ವೆಗ್ಳ್ಯೊ. ಪುಣ್ಯಕೋಟಿ ಕವಿತೆಂತ್ ಕಸಾಯ್ಗಾರಾಚಿ ಕೊಯ್ತಿ ಶೋಷಣೆಚಿ ಕುರು ಜಾವ್ನ್ ಪಿಂತ್ರಾಯ್ಲ್ಯಾ ಜಾಲ್ಯಾರ್, ಹೆ ಕವಿತೆಂತ್ 'ಗೊಟೊ' ಶೋಷಣೆಚಿ ಕುರು ಜಾತಾ ಆನಿ ಕಸಾಯ್ಗಾರಾಚಿ ಕೊಯ್ತಿ ಸ್ವಾತಂತ್ರ್ಯಾಚಿ ಕುರು ಜಾವ್ನ್ ಝಳ್ಕೆಕ್ ಯೆತಾ. ಹೆಂ ಮ್ಹಾಕಾ ಭೊಗ್ತಾ, ತುಮ್ಕಾಂ ಕಿತೆಂ ಭೊಗ್ತಾ ತುಮಿಂಚ್ ಸಾಂಗಜೆ.
ಕವಿ ಜೆ.ಬಿ. ಮೊರಾಯಸಾಕ್ ಯೆದೊಳ್ ಕೊಂಕಣಿಚ್ಯಾ ಮಟ್ಟಾಕ್ ಆಸ್ಚೆ ಸರ್ವ್‌ಯ್ ಪುರಸ್ಕಾರ್ ಲಾಭೊನ್ ಜಾಲ್ಯಾತ್. ಆತಾಂ ಆನ್ಯೇಕ್ ಥಿಕ್ ಮ್ಹಳ್ಳೆಬರಿ ಆಂವ್ದುಂಚೊ ದಾಯ್ಜಿ ಸಾಹಿತ್ಯ್ ಪುರಸ್ಕಾರ್ ಲಾಭ್ಲಾ. 'ನವಿ ವ್ಹಕಲ್', 'ಭಿತರ್‍ಲೆಂ ತುಫಾನ್', 'ಏಕ್ ದೇಂಟ್, ಏಕ್ ಪಾನ್' - ತಾಚಿಂ ಥೊಡಿಂ ಕವಿತಾ ಪುಸ್ತಕಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗೊರ್ವಾಂಚೆಂ ನಿಮಾಣೆಂ ಫೆಸ್ತ್
ಪುರ್ಶಾಂವ್ ಕಿತೆಂ, ಸಂಗೀತ್ ಕಿತೆಂ ಫೆಸ್ತ್‌ರೆ ಆಜ್ ಗೊರ್ವಾಂಚೆಂ
ಹಾಂಬೆವ್ನ್ ಘಾಲ್ತಾತ್ ಉಡ್ಕಾಣಾಂ ತಿಂ ಫೆಸ್ತ್ ತಾಂಚೆಂ ಸರ್‍ವಾಂಚೆಂ
ದಿಸ್ತಾ ಜಶೆಂ ದೀಸ್ ಹೊ ಪರ್‍ತ್ಯಾನ್ ಯೆಂವ್ಚೊನ್ ಕೆದಿಂಕ್‌ಚ್
ರೆಡೆ ಪಾಡೆ ಗೊರ್ವಾಂ ಮ್ಹೊಶಿ ವಿಸರ್‍ಚಿಂ ನಾಂತ್ ಹೊ ದೀಸ್
ಗೊಟ್ಯಾಚ್ಯಾ ಚ್ಯಾರ್ ವೊಣ್ತಿಂ ಭಿತರ್ ವರ್ಸಾಂ ಗೆಲಿಂ ಸರೊನ್
ಸ್ವಾತಂತ್ರ್ಯಾಚಿ ಆಯ್ಲಿ ಆಶಾ ಕಾಳ್ಜಾಂತ್ ಭರೊನ್ ಭರೊನ್
ನಿರಾಶೆಚ್ಯಾ ಖಂದ್ಕಾಂತ್ ಬುಡೊನ್ ಸಲ್ವಲ್ಲೆ ತೆ ಪಾಡೆ
ಆಶಾ ಕಿರ್ಣಾಕ್ ರಾಕೊನ್ ಥಕೊನ್ ಭಾಗೊನ್ ಗೆಲ್ಲೆ ರೆಡೆ
ಸರ್‍ಲ್ಯಾತ್ ಕರುಂಕ್ ಫೆಸ್ತಾ ಸಂಭ್ರಮ್ ಕಾಲಾ ಆನಿ ಬೊಲ್ಲಾ
ಹಾಂಡೊನ್ ಪಡ್ತಾತ್ ಪಾಂವ್ಚ್ಯಾಕ್ ಮುಖಾರ್ ತಾಂಚಿ ಜೀಣ್ ಬದಲ್ಲ್ಯಾ
ಕಾಲಾ ಬೊಲ್ಲಾ ಧಾಂವ್ಯಾ ಮುಖಾರ್ ಪಳೆನಾಸ್ತಾಂ ಪಾಟಿಂ
ತುಮ್ಚ್ಯಾ ನಿಮಾಣ್ಯಾ ಫೆಸ್ತಾಲಾಗಿಂ ಕಸಾಯ್ಗಾರಾಚೆ ಕೊಯ್ತೆಲಾಗಿಂ.
ಗಾಯೊ, ಪಾಡಿಯೊ, ರೆಡ್ಕೆ, ಪಾಡ್ಕೆ, ರೆಡೆ ಆನಿ ಮ್ಹೊಶಿ
ಪಂತಾಟಾಚೆ ಉರ್ಬೆನ್ ಧಾಂವ್ತಾತ್ ಆಜ್‌ರೆ ತಿಂ ಧಾದೊಶಿ
ಶಿಂಗಾಂ ತಾಂಚಿಂ ಸುಂರ್‍ಗಾರಾಯ್ಲ್ಯಾಂತ್ ಪಿತುಳೆಚ್ಯಾ ಕಿಣ್ಕುಳ್ಯಾಂನಿ
ತಕ್ಲಿ ತಾಂಣಿ ಹಾಲಯ್ತಾನಾ ಸಂಗೀತ್ ಜಾತಾ ಗಿಣಿ ಗಿಣಿ
ಹಾಂಬೆತಾತ್ ತಿಂ ತಾಳೊ ಪಿಂದುನ್ ಫೆಸ್ತಾಂ ಸಂಭ್ರಮ್ ತಾಂಕಾಂ
ಮೊಳ್ಬಾವಯ್ಲಿಂ ಸುಕ್ಣಿಂ ದಿತಾತ್ ಮಸ್ತೆ ಉಲ್ಲಾಸ್ ತಾಂಕಾಂ
ಫುಲಾಂ ಫಳಾಂ ಭರ್‍ಲಿಂ ಝಾಡಾಂ ಸ್ವಾಗತ್ ದಿತಾತ್ ರಾನಾಂತ್
ಸ್ವಾತಂತ್ರಾಚೆಂ ಸ್ವಾಧಿಕ್ ವಾರೆಂ ರಿಗ್ಲಾಂ ತಾಂಚ್ಯಾ ಕಾನಾಂತ್
ಕಾಲಾ ಬೊಲ್ಲಾ ಧಾಂವ್ಯಾ ಮುಖಾರ್ ಪಳೆನಾಸ್ತಾಂ ಪಾಟಿಂ
ತುಮ್ಚ್ಯಾ ನಿಮಾಣ್ಯಾ ಫೆಸ್ತಾಲಾಗಿಂ ಕಸಾಯ್ಗಾರಾಚೆ ಕೊಯ್ತೆಲಾಗಿಂ.
ಸಂತೊಸ್ ಕಸೊ ದಾಕಯ್ತೆಲಿಂ ಮೊನಿಂ-ರೆ ತಿಂ ಗೊರ್ವಾಂ
ಹಾಂಬೆವ್ನ್ ಘಾಲ್ಚಿಂ, ಉಡ್ಕಾಣಾಂ ತಿಂ ಫೆಸ್ತಾಕ್ ಆಯ್ಲ್ಯಾಂತ್ ಸರ್ವಾಂ
ಗೊಟ್ಯಾಚ್ಯಾ ತ್ಯಾ ಕಾಳೊಕಾಥಾವ್ನ್ ಉಜ್ವಾಡ್ ಸ್ವಾತಂತ್ರ್ಯಾಚೊ
ಜಾಂವ್ದಿ ತಾಂಕಾಂ ಝಳಕ್ ಪ್ರಜ್ವಲ್ ಸುಟ್ಕೆ ಝುಜಾರ್‍ಯಾಚೊ
ಕಸಾಯ್ಗಾರಾ ಕೊಯ್ತಿ ತಾಂಕಾಂ ರುಪೆಂ ಮೊಡಾ ಪಾಟ್ಲೆಂ
ಎಕಾಚ್ ಮಾರಾನ್ ಅಂತಿಮ್ ಮುಕ್ತಿ ದಿಂವ್ಚೆಂ ಹಾತೆರ್ ವ್ಹಡ್ಲೆಂ
ಗೊರ್ವಾಂಚ್ಯಾ ಹ್ಯಾ ಅಂತಿಮ್ ಫೆಸ್ತಾಕ್ ಆಪಯ್ಲಾಂ ಆಮ್ಕಾಂ ತುಮ್ಕಾಂ
ರಡ್ತಾತ್ ಕೊಣೀ ಫೆಸ್ತಾ ದಿಸಾ? ಗಳಯ್ನಾಕಾತ್ ದುಕಾಂ
ಕಾಲಾ ಬೊಲ್ಲಾ ಮಾರ್‍ತಾತ್ ಪಂತಾಟ್ ಸರನಾಸ್ತಾಂ ಪಾಟಿಂ
ಕಸಾಯ್ಗಾರ್ ರಾಕ್ತಾ ತಾಂಕಾಂ ಘೆವ್ನ್ ದೋನ್ ಧಾರೆಂಚಿ ಕೊಯ್ತಿ.
- ಜೆ. ಬಿ. ಮೊರಾಯಸ್