ಸಂಪಾದಕೀಯ್:
ಸರೊನ್ ಗೆಲ್ಲ್ಯಾ ಜಿವಿತಾಚೊ ಮೋಗ್ ಕರ್‍ಚೊ ಮನೀಸ್
ಮರಣ್ ಕೆದಳಾ ಯೆತಲೆಂ ಮ್ಹಣೊನ್ ಕೊಣಾಯ್ಕಿ ಖಬರ್ ಆಸನಾ. ತರೀ ತಾಚೆಂ ಭ್ಯೆಂ ಮತೀಕ್ ಸದಾಂನೀತ್ ರೆಂವಡ್‌ಲ್ಲೆಂ ಆಸ್ತಾ. ತಸಲೆಂಚ್ ಭ್ಯೆಂ ಹಾಂಗಾಚೆ ವ್ಯಕ್ತಿಕ್ ರೆಂವಡ್ಲಾಂ. ಇತ್ಲೆಂ ಆಸೊನ್‌ಯ್ ತೊ ತಾಚ್ಯಾ ಜಿವಿತಾಚೊ ಮೋಗ್ ಕರ್‍ತಾ. ಯೆದೊಳ್‌ಚ್ ಜಿಯೆವ್ನ್ ಸಂಪ್‌ಲ್ಲೊ ದೀಸ್, ಜಿವಿತ್ ಸಂಪತ್ ಮ್ಹಣ್ ಭಿಯೆವ್ನ್ ತೊ ಪರ್‍ತ್ಯಾನ್ ಪರ್‍ತ್ಯಾನ್ ಜಿಯೆತಾ. ಆನಿ ತಾಣೆಂ ತಶೆಂ ಜಿಯೆಜಾಯ್ ಜಾಲ್ಯಾರ್ ಸರ್‌ಲ್ಲ್ಯಾ ಕಾಳಾಂತ್ ಕಾಂಯ್ ಮಹತ್ವಾಚಿಂ ಘಡಿತಾಂ ಆಸ್ತಲಿಂ, ಕಾಂಯ್ ಮಝೆದಾಯೆಕ್ ಗಜಾಲಿ ಘಡ್ಲ್ಯಾತ್ ಆಸ್ತಲ್ಯೊ - ವಿಸ್ರೊಂಕ್ ನಜೊ ಜಾಲ್ಲ್ಯೊ.
ಜೆಸ್ ಫೆರ್ನಾಂಡಿಸ್ ಗೊಂಯ್ಚ್ಯಾ ಕಾಣ್‌ಕೊಣಾಂತ್ಲೊ. ಸಾತೆಸಾಟ್ ವರ್ಸಾಂ ಆದಿಂ ಸಪ್ಟೆಂಬ್ರಾಚ್ಯಾ ಪಯ್ಲ್ಯಾ ಹಪ್ತ್ಯಾಂತ್ ಜಲ್ಮಲ್ಲೊ. ಸ್ಯಾನಿಟರಿ ಇನ್ಸ್‌ಪೆಕ್ಟರ್ ಕೋರ್ಸ್ ಮಾತ್ರ್ ನ್ಹಯ್ ಬಿ.ಎ. ಶಿಕಪ್ ತಾಣೆ ಜೊಡ್ಲಾಂ. ನಾಟಕ್, ತಿಯಾತ್ರ್, ಕಾದಂಬರಿ, ಕವಿತಾ, ಪ್ರಬಂಧ್ - ಅಶೆಂ ಸಾಹಿತ್ಯಾಚ್ಯಾ ಜಾಯ್ತ್ಯಾ ಪ್ರಕಾರಾಂನಿ ಹಾತ್ ಭೊಂವ್ಡಾಯಿಲ್ಲ್ಯಾ ಜೆಸಾಕ್ ಪ್ರತಿಷ್ಟೆಚೊ ಅಂತೊನಿಯೊ ಪೆರೆರೆ ಪುರಸ್ಕಾರ್ ಲಾಭ್ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಾಲ್ಚೆಂ ಜಿವಿತ್
ಪ್ರತ್ಯೇಕ್ ಫಾಂತ್ಯಾ ಪಾರಾರ್
ಆನೀಕ್ ಏಕ್ ಪಾವ್ಟ್ ಹಾಂವ್
ಕಾಲ್ಚೆಂ ಜಿವಿತ್ ಜಿಯೆತಾಂ
ಆಯ್ಚೊ ದೀಸ್ ಸೊಪ್ಚ್ಯಾ ಆದಿಂ
ಜಿವಿತ್ ಸೊಪತ್ ಮ್ಹಣ್ ಭಿಯೆತಾಂ
ಪ್ರತ್ಯೇಕ್ ದೊನ್ಪಾರಾಚೊ ಧಗ್‌ಧಗ್
ಮೊನ್ಯಾಂನಿ ಸೊಸ್ತಾನಾ
ಸಕಾಳ್ಚ್ಯಾ ಸೂರ್ಯ್ ಕಿರ್ಣಾಂಚಿ ಯಾದ್ ಕರ್‍ತಾ ಕಿ
ದೀಸ್ ಸೊಪ್ಚೆ ಆದಿಂ
ಮ್ಹಜ್ಯಾಂತ್ಲ್ಯಾ ಸುರ್ಯಾಚೊ
ಅಸ್ತ್ ಜಾಯ್ತ್ ಮ್ಹಣ್ ಭಿಯೆತಾಂ
ಪ್ರತ್ಯೇಕ್ ಸಾಂಜ್ ವೆಳಾರ್
ಫಾಲ್ಯಾಂಕ್ ಜಲ್ಮ್ ದಿವ್ಪಾಕ್
ಝರುನ್ ವಯ್ತಾಂ ಮರುನ್ ವಯ್ತಾಂ
ತೊ ದೀಸ್
ರಾಗಾರ್ ಜಾಯ್ತ್ ಮ್ಹಣ್ ಭಿಯೆತಾಂ
ಪ್ರತ್ಯೇಕ್ ಫಾಂತ್ಯಾ ಪಾರಾರ್
ಆನೀಕ್ ಏಕ್ ಪಾವ್ಟ್ ಹಾಂವ್
ಕಾಲ್ಚೆಂ ಉರಿಲ್ಲೆಂ ಜಿವಿತ್ ಜಿಯೆತಾಂ
ತೆಚ್ ಸಾಂಜ್ ವೆಳಾರ್
ಆನೀಕ್ ಏಕ್ ಪಾವ್ಟ್
ಉರಿಲ್ಲೆಂ ಜಿವಿತ್ ಸೊದುಂಕ್ ಭೊಂವ್ತಾಂ
-ಜೆಸ್ ಫೆರ್ನಾಂಡಿಸ್