ಕವಿತಾ:
ಮ್ಹಜೆ ವಾಟ್ಲೆಂತ್ ಫಾತರ್ ಪಡ್ಲಾ
ಮ್ಹಜೆ ವಾಟ್ಲೆಂತ್ ಫಾತರ್ ಪಡ್ಲಾ
ಕೊಣಾಕ್ ತೊ ಮಾರುಂ?
ಕೊಪಾಂತ್ ಉಷ್ಟೆಂ ಸೊಡ್ನ್ ಘಾಲಾಂ
ಖಂಯ್ಚ್ಯಾ ಸುಣ್ಯಾಕ್ ಘಾಲುಂ?
ಸೆಂವ್ಚ್ಯಾ ಖಾಣಾಕ್ ಬಂಧಡ್ ಘಾಲ್ಯಾ
ಪಿಂಜ್ರ್ಯಾಂತ್ಲ್ಯಾ ಸುಕ್ಣ್ಯಾಕ್ ಕೊಣ್ ಸೊಡಿತ್?
ಚಿತ್ತುರ್‍ಲೆ ರಂಗಾನ್ ರಾಜ್ ಕೆಲಾಂ
ಕೊಣ್ ತಾಂಕಾಂ ಆಡಾಯ್ತ್?
ಗಾಯ್ ತಾಂಚೊ ದೇವ್ ಕಂಯ್
ಪಾಡ್ಯಾ, ತುಕಾ ಮಾತ್ರ್ ಜೀವ್?
ಭೊಕ್ರ್ಯಾ, ದುಕ್ರಾ, ಕಾಟಾ ಕೊಂಬ್ಯಾ
ವಿಚಾರ್‍ತಲೊ ತುಕಾ ನಾ, ಪಾಂಯ್ ದವರ್ ಲೋವ್
ಬಿಫಾ ಮಾಸ್ ಖೆಲ್ಲ್ಯಾಂಕ್ ಧರಾ
ಪಾಟ್ಲ್ಯಾನ್ ಆಸ್ಚ್ಯಾ ಮಾಪ್ಳ್ಯಾಕ್ ಪಯ್ಲೆಂ ವ್ಹರಾ
ಮ್ಹಣ್ತಾ ವಯ್ಲೊ ಇಜಾರ್‍ಗಾರ್
ಗಾಯ್ಚ್ಯಾ ನಿಬಾನ್ ಮ್ಹಾಕಾ ತುಕಾ ಲಾಗ್ಲಾ ಗ್ರಾಚ್ಚಾರ್
ಪಾಚ್ವ್ಯಾ ನೊಟಾಕ್ ಮೆಳ್ತಾಲೆಂ ಪೊತೆಂಭರ್ ಮಾಸ್
ರಾಂದ್ವಯೆರ್ ಬಸ್ತಾಲಿ ಮುಸಾಂಚಿ ರಾಸ್
ಮಾಸಾಂ ದುಖಾನಾಂ ವಿಣ್ಗಿಂ ಜಾಲ್ಯಾಂತ್
ಅಂತ್ರಳಾರ್ ಸೊಭ್ತಾ ರಾಂದ್ವಯೆಚೆಂ ರಾಜ್
ನಾಯ್ತ್ಯಾಂಕ್ ತಾಂಣಿ ಪಳೆಲೆಂ
ಬಿಫಾ ಮಾಸ್ ರಾವಯ್ಲೆಂ
ದುಕ್ರಾ ತುಜಿ ಗತ್ ಫಾಲ್ಯಾ
ಹಾಂವ್ ಕ್ರಿಸ್ತಾಂವ್ ಆಸಾಂ-ಮುರೆ
ಫಾಲ್ಯಾಂ ಮ್ಹಾಕಾ ಪಳಯ್ತರೆ
ಶಿಂಕ್ಯಾ ವಯ್ಲ್ಯಾ ದುಧಾಕಿ ತಾಂಣಿ ಪಳಯ್ಲೆಂಮೂ
ಪೊಟಾ ಪೊಡಿಕ್ ಉಕಲ್ನ್ ಘಾಲೊ ದಾಂತ್ಯಾಚೊ ಜಯ್ತ್ ಫಾತರ್
ಮ್ಹಜೆ ವಾಟ್ಲೆಂತ್ ಫಾತರ್ ಪಡ್ಲಾ
ಕೊಣಾಕ್ ತೊ ಮಾರುಂ?
-ನೆಲ್ಸನ್ ಪ್ರಸನ್ನ್ ವಾಸ್