ಕವಿತಾ:
ತಾಳ್ಯೆನ್ ತಾಳಿ
ತ್ಯಾಯಿ ದಿಸಾ ವ್ಹಡಾರುಕಾ ಜಯ್ತಿ ಕೂಡ್ ರಡ್ಲಿ
ತಾಳ್ಯೆನ್ ತಾಳಿ ಉಡ್ಲಿ ಚಾನಿ ಮಳ್ಬಾಲಾಗಿಂ ಜೊಡ್ಲಿ
ಪಾವ್ಲಾಂ ಪಾವ್ಲಿಂ ಪಾತಾಳಾ ಹಾಲೊಂಕ್ ಧಲೊಂಕ್ ಜಮ್ಲೆಂ ನಾ
ದಾವ್ಲಾಂ ಧಾಂವ್ಲಿಂ ಅಂತ್ರಳಾ ಆಕಾಸಾಂತ್ ಸೊಂಬ್ಲಿಂ ನಾ
ಬೊಟಾಯೆದಿ ಚಾನಿ ಕಶಿ ಖಾಂದಾರ್ ಮ್ಹಜ್ಯಾ ಚಡ್ಲಿ
ತಾಳ್ಯೆನ್ ತಾಳಿ ಉಡ್ಲಿ ಚಾನಿ ಮಳ್ಬಾಲಾಗಿಂ ಜೊಡ್ಲಿ
ಕೊಡ್ಶಿಂ ದುಕಾಂ ಫಾತ್ರೆಲಿಂ ಪೊಲ್ಯಾಂ ವಯ್ಲ್ಯಾನ್ ಗಳ್ಳಿಂ ನಾ
ಕೆಂಡಾ ಗೊಬ್ರಾಂತ್ ಮುರ್ಮುರ್‍ಚಿಂ ಮೆಕ್ಳಿಂ ಸಕ್ಳಿಂ ಜಳ್ಳಿಂ ನಾ
ಕರುಂ ಕಶೆಂ ರುದಾನ್ ಮ್ಹಜೆಂ ಜಿಬ್ಲಿ ತಾಳ್ಯಾಂತ್ ವೊಡ್ಲಿ
ತಾಳ್ಯೆನ್ ತಾಳಿ ಉಡ್ಲಿ ಚಾನಿ ಮಳ್ಬಾಲಾಗಿಂ ಜೊಡ್ಲಿ
ಸುಕ್ಣಿಂ ಸಾಂದಿ ಸಂದಾಂನಿ ಘೊಂಟೆರ್ ಬಾಂದುನ್ ರಾವ್ಲಿಂ
ತಕ್ಲೆಚೆರಿ ಥಾಪ್ಯಾಂನಿ ಮ್ಹೆಳೊಪ್ ಕರುನ್ ಧಾಂವ್ಲಿಂ
ಸಾಂಗಾತ್ ಮ್ಹಜ್ಯಾ ನಶಿಬಾಚಿ ಮಡ್ಕಿ ಕೊಣೆ ಫೊಡ್ಲಿ
ತಾಳ್ಯೆನ್ ತಾಳಿ ಉಡ್ಲಿ ಚಾನಿ ಮಳ್ಬಾಲಾಗಿಂ ಜೊಡ್ಲಿ
-ಚಾ. ಫ್ರಾ. ದೆಕೊಸ್ತಾ