ಕವಿತಾ:
ಇಜಾಬೆಲಾಚ್ಯಾ ಘೊವಾಗೆರ್
ಇಜಾಬೆಲಾಚ್ಯಾ ಘೊವಾಗೆರ್
ವ್ಹಾಂವ್ತಾತ್ ದುಧಾ ಝರಿಗೋ
ಪಿವುನ್ ಪಿವುನ್ ಇಜಾಬೆಲಾಚ್ಯೊ
ಫುಗೊನ್ ಆಯ್ಲ್ಯೊ ಪೆರಿಗೋ
ಇಜಾಬೆಲಾಚ್ಯಾ ಘೊವಾಗೆರ್
ತವ್ಶಿಣಿಚೆಂ ದಾಲೆಂಗೋ
ಖಾವುನ್ ಖಾವುನ್ ಇಜಾಬೆಲಾಚೆಂ
ಪೊಟ್ ಉಬಾರ್ ಜಾಲೆಂಗೋ
ಇಜಾಬೆಲಾಚೊ ಭರ್ತಾರ್‌‍ಗಾ
ಉತ್ರಾಂಕ್ ಜೊಡೀ ಮೆಳಾಯ್‌ಮೂ
ಪೊಟ್ ಪಳೆವ್ನ್ ಗಾಲ್ ಮೊಳುನ್
ಆಪ್ಲಿ ಮಿಶೀ ವೊಳಾಯ್‍ಮೂ
ಆಗಾ ಮ್ಹಜ್ಯಾ ಭರ್‍ತಾರಾ
ನಾಕಾ ತುಜೆಂ ದರ್ಬಾರ್‌ಮೂ
ತುಜೆಂ ನ್ಹಯ್‍ಗಾ ದಾತಾರಾ
ದುಧ ತವ್ಶಾ ಕಾರ್ಬಾರ್‌ಮೂ
ಉತ್ರಾ ಉಲ್ಯಾಕ್ ಆಯ್ಕನಾ
ಇಜಾಬೆಲ್‍ಗೋ ಬಾವೊಲೆಂ
ಪಣ್ಜೆಂತುಲ್ಯಾ ಸಾಯ್ಬಾಚ್ಯಾ
ಪಾಯಾಂಲಾಗಿಂ ಪಾವೊಲೆಂ
ಸಾಯ್ಬಾ ಭೊಗೊಸ್ ಸಾವೆರಾ
ಮರ್ಯಾದ್ ಮ್ಹಜಿ ಉರಯ್ ತುಂ
ದೆವಾಗೆಲೆಂ ಆಜ್ಯಾಪ್ ಕರುನ್
ಪೊಟ್ ಮ್ಹಜೆಂ ಜಿರಯ್ ತುಂ
-ಚಾ. ಫ್ರಾ. ದೆಕೊಸ್ತಾ