ಸಂಪಾದಕೀಯ್:
ಅಸ್ವಸ್ಥ್ ಕರ್‍ಚ್ಯೊ ಕಾಶಿನಾಥಾಚ್ಯೊ ಕವಿತಾ
ಕಾಶಿನಾಥ್ ಶಾಂಭಾ ಲೊಲಿಯೆಂಕಾರಾಕ್ ಆಂವ್ದುಂಚೊ ‘ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ - 2010’ ಲಾಭ್ಲಾ. ತಾಚೆಂ ಖರೆಂ ನಾಂವ್ ಎಸ್. ಡಿ, ತೆಂಡುಲ್ಕರ್. ಕಾಶಿನಾಥಾಚ್ಯೊ ಕವಿತಾ ವೆಗ್ಳೆಚ್ ಥರೆಚ್ಯೊ. ತ್ಯೊ ವೆಗ್ಳ್ಯೊ - ಫಕತ್ ಕೊಂಕಣಿಕ್ ನ್ಹಯ್ ತರ್ ಆಖ್ಖ್ಯಾ ಭಾರತೀಯ್ ಸಾಹಿತ್ಯಾಂತ್. ಕಾಂಯ್ ತ್ಯೊ surrealistic ದಿಸ್ತಾತ್ ಮ್ಹಾಕಾ.
ತಾಚಿಂ ಪಾಂಚ್ ಕವಿತೆಚಿಂ ಪುಸ್ತಕಾಂ ಯೆದೊಳ್ ಪರ್ಗಟ್ ಜಾಲ್ಯಾಂತ್. ‘ಕಾಶಿ ಮ್ಹಣ್ಟಾ’ ತಾಚೆಂ ಪಯ್ಲೆಂ ಪುಸ್ತಕ್ ಆನಿ ಆದ್ಲ್ಯಾ ವರ್ಸಾ ಪರ್ಗಟ್ ಜಾಲ್ಲೆಂ ‘ಖಂಡ್ ಕಾವ್ಯ್’ ತಾಚೆಂ ಪಾಂಚ್ವೆಂ ಪುಸ್ತಕ್. ವಿಚಿತ್ರ್ ಸ್ವಭಾವಾಚೊ ಹೊ ಕವಿ, ಅಪ್ಲಿ ತಸ್ವೀರ್ ಕೊಣಾಯ್ಕಿ ದೀನಾ ಮಾತ್ರ್ ನ್ಹಯ್, ತಿ ಕಾಡುಂಕಯ್ ಸೊಡಿನಾ.
ಹಾಂಗಾಸರ್ ದಿಲ್ಲಿ ಕವಿತಾ ವೆಗ್ಳೊಚ್ ಅನ್ಭೋಗ್ ದಿತಾ. ನಿಮಾಣೆ ವೊಳಿ ಪಾಸುನ್ ಏಕ್ ಆಲೋಚೆನ್ ಮತಿಂತ್ ಘಾಲುನ್ ವೆಚೊ ಕವಿ, ನಿಮಾಣೆ ವೊಳಿಕ್ ಪಾವ್ತಾನಾ ವಾಚ್ಪ್ಯಾಕ್ ಗುಸ್ಪಾಗೊಂದೊಳಾಂತ್ ಶಿರ್‍ಕಯ್ತಾ ಆನಿ ತಾಚೆಂ ಮನ್ ಅಸ್ವಸ್ಥ್ ಕರ್‍ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
(ನಾಂವ್ ನಾ)
ಘರಾಂತ್ ಮನ್ಶಾಂಚ್ ನ್ಹೂ
ಮಾಜ್ರಾಂ ಕುತ್ರೀಂಯ್ ಬಿ ಜಾಯ್
ತ್ಯಾ ಬಗರ್ ಘರಾಕ್ ಘರಪಣ್ ಯೆಯ್ನಾ
ಘರಾಂತ್ ಹುಂದಿರ್ ಜಾಯ್
ಘರಾಂತ್ ಜರ್ಲೆ ಜಾಯ್
ಘರಾಂತ್ ಜಾಯೊ ಪಾಲಿ
ಘರಾಂತ್ ಜಾಯಿಂ ಜಳಾರಾಂ
ಘರಾಂತ್ ಆದಿಮದಿಂ ಯೇಂವ್ಕ್ ಜಾಯ್ ಸೊಯ್ರೆ
ಆಯುಶ್ಯಾಂತ್ ಎಕ್ದಾತರೀ
ಘರಾಂತ್ ಯೇಂವ್ಕ್ ಜಾಯ್ ಸೊರೊಪ್
ತ್ಯಾ ಬಗರ್ ಘರಾಕ್ ಘರಪಣ್ ಯೆಯ್ನಾ
ಘರ್ ಫಕತ್ ಮನ್ಶಾಂಚೆಂಚ್ ಆನಿ
ಮನ್ಶಾಂ ಖಾತಿರಚ್ ನ್ಹೂಂ
ಘರ್ ಆಖ್ಖ್ಯಾ ಪ್ರಾಣಿಮಾತ್ರಾಂಚೆಂ
ಹಾಂವ್ ರಾವ್ತಾಂ ತ್ಯಾ ಘರಾಂತ್ ಹೆಂ ಸಗ್ಳೆಂ ಆಸಾ
ಫಕತ್ ಹಾಂವ್ ನಾ
-ಕಾಶಿನಾಥ್ ಶಾಂಬಾ ಲೊಲಿಯೆಂಕಾರ್