ಸಂಪಾದಕೀಯ್:
ವಿಚಿತ್ರಾಯೆಚ್ಯಾ ಸಂಸಾರಾಕ್ ಪಾಸಾಯೊ ಮಾರುಂಕ್ ವೆಚೆಂ
ಕುಪ್ಪೆಪದವು ಮ್ಹಜ್ಯಾ ಇಷ್ಟಾಚೆ ಆವಯ್ಚ್ಯಾ ಮೊರ್ನಾಚ್ಯಾ ವರ್ಸಾ-ಮಿಸಾಕ್ ಗೆಲ್ಲೊಂ. ಕಿತೆಂಕಿ ಎಕಾನೇಕ್ ಮ್ಹಜೆಚ್ ತಳ್ಹಾತ್ ಪಳೆವ್ನ್, ಶೆರ್ಮೆವ್ನ್ ಚಿಂತಪ್ ಸಗ್ಳೆಂ ಕುಡಿಚೆರ್ ಚರ್‍ಲೆಂ. ಕಾಂಯ್ ಹ್ಯಾಚ್ ದಿಸಾಂನಿ ಎಚ್ಚೆಮ್ಮಾನ್ ಫಿಲ್ಮಾಂತ್ಲ್ಯಾ ಹೀರೊ/ಹೀರೊಯಿನಾಂಚೆ ತಶೆಂ ಡ್ಯಾನ್ಸ್ ಬಾರಾಂತ್ಲ್ಯಾ ನಾಚ್ಪಿಣ್ಯಾಂಚೆ ಕುಡಿಂವಿಶಿಂ ಬರಯಿಲ್ಲೆಂ ಲೇಖನ್ ಮ್ಹಜ್ಯಾ ಮತಿಕಾಂದ್ಯಾಂತ್ ಆಸಲ್ಲೆಂ ಜಾವ್ಯೆತ್. ಹ್ಯಾಯಿ ಚಿಂತ್ಪಾಚ್ಯೊ ಶಿರೊ ಮ್ಹಜ್ಯಾ ತಳ್ಹಾತಾಕ್ ಪಳೆತಾನಾ ಜಿವ್ಯೊ ಜಾಲ್ಯೊ ದಿಸ್ತಾ ಆನಿ ತಾಂಣಿ ವೆಗ್ಳೊಚ್ ಏಕ್ ಜೀವ್ ಜೊಡ್ಲೊ ದಿಸ್ತಾ.
ಹಾಂವ್ ವಿರಾರ್ ಜಾಲ್ಲೊಂ. ಪಾಟಿಂ ಆಯಿಲ್ಲೊಂಚ್, ಅರ್ಥಿ ಕವಿತಾ ಬರೊವ್ನ್ ಕಾಡ್ಲಿ. ಉಪ್ರಾಂತ್ ಥೊಡ್ಯಾ ದಿಸಾಂನಿ ಸಂಪೂರ್ಣ್. ಆನಿ ಆತಾಂ ವಿದೇಶಾಂತ್ ಆಸ್ತಾನಾ ತಿಕಾ ಏಕ್ ನಿಮಾಣೆಂ ರೂಪ್.
ಆತಾಂ ಹಾಂವ್ ಪಾಟಿಂ ಸ್ಥಿಮಿತಾಕ್ ಪಾವ್ಲಾಂ. ಮ್ಹಳ್ಯಾರ್ ಸಾದೊ ಮನಿಸ್ ಜಾಲಾಂ. ಕವಿತೆನ್ ದಿಂವ್ಚೊ ಅನ್ಭೋಗ್ ಹೊಚ್ ಕೊಣ್ಣಾ.
ಕವಿತಾ ಬರೊಂವ್ಚಿ ಮ್ಹಳ್ಯಾರ್ ಸಾದ್ಯಾ ಮನ್ಶಾನ್, ಖಿಣಾಕ್ ಯಾ ಲಾಂಬ್ ಕಾಳಾಕ್, ವಿಚಿತ್ರಾಯೆಚ್ಯಾ ಸಂಸಾರಾಂತ್ ಪಾಸಾಯೊ ಮಾರುಂಕ್ ವೆಚೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜಿಂಚ್ ಸೊಧ್ನಾಂ
ಆಜ್ ಪಯ್ಲೆ ಪಾವ್ಟಿಂ ಮ್ಹಾಕಾ
ಮ್ಹಾಕಾಚ್ ಸೊಧ್ಚಿ ಆಶಾ ಜಾಲಿ
ಭುಜಾಂ ವಯ್ಲ್ಯಾನ್ ದೆಂವಲ್ಲೆ ಬಾವ್ಳೆ
ವಯ್ರ್ ಉಕಲ್ತಾನಾ
ಮ್ಹಾಕಾ ಮ್ಹಜೆಚ್ ತಳ್ಹಾತ್ ದಿಸ್ಲೆ
ಎಕ್ದಮ್ ರೂಂದ್
ಆನಿ ರುಂದಾಯೆಚೆ ತಡಿರ್
ಸುಟಲ್ಲಿಂ ಲಾಂಬೆಟಿಂ ಬೊಟಾಂ
ಸಾಳ್ಕಾಚ್ಯಾ ಪಾಕ್ಳ್ಯಾಂಬರಿ
ಸಗ್ಳಿಂ ಎಕಾಚ್ ಶೆವೊಟಾತೆವ್ಶಿಂ
ದೊಳೆ ಜೊಕುನ್ ಆಸಾತ್...
ಬೊಟಾಂಚೆರ್, ತಳ್ಹಾತಾಚೆರ್
ಅರ್ಥ್ ಸಮ್ಜನಾತಲ್ಲೆ
ವಾಂಕ್ಡೆ, ತಿಂಕ್ಡೆ, ಮೆಜುಂಕ್ ಜಾಯ್ನಾತಲ್ಲೆ
ಗೀಟ್ ತಶಿಂ ಚಾಕಾಂ
ನಾಕ್ಷಾಂಚೆರ್ ಆಮಾಶಕ್ ಲಾಗಿಂ ಜಾಲ್ಲೆ ಚಂದ್ರ್
ಹಾತ್‌ಶಾಸ್ತ್ರಾಚ್ಯಾ ಖೈರೊಚಿ ಯಾದ್ ಜಾವ್ನ್
ಮೌಂಟ್ ಒಫ್ ವೀನಸಾಚೆರ್
ಕಾಳ್ಜಾಚೆ ಅಸ್ಕತ್ಕಾಯೆಚಿಂ ಖುಣಾಂ ದಿಸ್ತಾನಾ
ಕಾಳ್ಜಾಗೀಟ್ ಆನಿ ಮನಾಗೀಟ್
ವೆಗ್ಳಾಚಾರಾಚ್ಯೊ ವಾಟೊ ವಿಂಚ್ಚೆಂ ಜಾಣಾ ಜಾವ್ನ್
ಶಿರೊ ಶಿರ್‍ಶಿರ್‍ತಾನಾ
ತ್ಯಾಚ್ ಹಾತಾಂನಿ ದೊಳೆ ಧಾಂಪ್ತಾಂ..
ಮ್ಹಾಕಾ ಮ್ಹಜೆ ಮ್ಹಳ್ಳೆ
ದೊಳೆ ಆಸಾತ್ ಮ್ಹಣೊನ್
ತ್ಯಾ ಖಿಣಾ ಕಳ್ತಾನಾ
ಆಲ್ಮಾರಿಚೊ ದೀಗ್ ಆರ್ಸೊ
ಹಾತ್ ಭಾಯ್ರ್ ಘಾಲ್ನ್ ಆಪಯ್ತಾ
ಥಂಯ್ಸರ್ ಕುಸ್ಕುಟ್ ರೇಡಿಯಸಾಚ್ಯಾ
ಹ್ಯಾ ದೊಳ್ಯಾಂಚ್ಯೊ ಆಸ್‌ಡ್ಯೊ
ಮನ್ಡಳ್ಯೊ ಆನಿ ಬಿತರ್‍ಲ್ಯೊ ಬೊಂಡುಲ್ಯೊ
ತ್ಯಾ ಬೊಂಡುಲ್ಯಾಂನಿ ಚಿಪ್ಕಲ್ಲೊ
ಸುಕ್ಷೀಮ್ ‘ಇನ್-ಬಿಲ್ಟ್’ ಕೆಮರಾ ದಿಸ್ತಾ..
ಕೆಮರಾನ್, ಮೆಂದ್ವಾಂತ್
ಫಿಛಾರ್ ಕೆಲ್ಲಿಂ ಸಂಸಾರಾಚಿಂ
ಸಾವಿಂ ತಶಿಂ ಮ್ಹೆಳಿಂ
ಚಿತ್ರಾಂ-ವಿಚಿತ್ರಾಂ ‘ರಿವಾಂಯ್ಡ್’
ಜಾಂವ್ಕ್ ಲಾಗ್ತಾತ್...
ಅಸಲ್ಯಾ ಅದ್ಭುತ್ ದೊಳ್ಯಾಂನಿ
ಪನ್ನಾಸ್ ವರ್ಸಾಂ
ಮ್ಹಾಕಾಚ್ ಪಳಯ್ನಾತಲ್ಲ್ಯಾಚಿ ಖಂತ್ ಜಾತಾನಾ
ಎಕೆಕಚ್ ವಸ್ತುರ್ ಕುಡಿವಯ್ಲೆಂ
ಮೆಕ್ಳೆಂ ಜಾತಾ...
ತವಳ್ ಮ್ಹಾಕಾ ದಿಸ್ತಾ
ಪಶ್ಚಿಮ್ ಘಾಟಾವಯ್ಲೆಂ ರಾನ್
ಮ್ಹಜ್ಯಾಚ್ ಮಾತ್ಯಾರ್..
ಘಾಟಾಮುಳಾಂತ್ಲೆಂ ಬಯ್ಲ್
ಮ್ಹಜ್ಯಾಚ್ ಕಪಾಲಾರ್
ಬಯ್ಲಾಂತ್ಲ್ಯೊ ಝರಿ ಮ್ಹಜ್ಯಾ ನಾಕಾಂತ್
ಮಾಗೀರ್ ಮುಳಾಂತ್ಲೆಂ ಇಲ್ಲೆಂ ಥೊಡೆಂ
ವೊಂಟಾಂನಿ, ದಾಂತಾಂನಿ
ಖಾಡ್ಕೆರ್ ಆನಿ ಗೊಮ್ಟೆರ್!
ದೀಷ್ಟ್ ಸಕಯ್ಲ್ ವ್ಹರ್‍ತಾನಾ
ಹರ್ಧ್ಯಾ ಥಾವ್ನ್ ದೆಂವಲ್ಲಿ
ಪಾತಳ್ ಲೊಂವೆಚಿ
ಭಾರೀಕ್ ಮೇರ್
ಮೆರೆಚ್ಯಾ ಪೊಂತಾರ್
ಪೊಟ್ಟು ಬಾಂಯೆಬರಿ ಸೊಭ್ಚಿ
ಕಸಲ್ಯಾಯ್ ಹಾರ್‍ಯಾ-ಹುರ್‍ಯಾಕ್ ನಾತಲ್ಲಿ
ಬೊಂಬ್ಲಿ -
ಮ್ಹಜ್ಯಾಚ್ ಜಲ್ಮಾಚಿ ಸಾಕ್ಸ್ ಜಾವ್ನ್ ನಿದ್ಲ್ಯಾ
ತೆ ಬೊಂಬ್ಲೆಂತ್ ಹಾಂವ್ ತಿಳ್ತಾಂ
ಆನಿ ಮ್ಹಜೆಚ್ ಆವಯ್ಕ್ ಹಾಂವ್ ಮೆಳ್ತಾಂ
ಕಳನಾಸ್ತಾನಾ ಝಡಲ್ಲೆಂ
ದೊಳ್ಯಾಂತ್ಲೆಂ ದೂಕ್
ಪೊಟ್ಕೊಳೆಚ್ಯಾ ಪೊಂತಾರ್ ಥಾವ್ನ್ ನಿಸರ್‍ತಾನಾ
ಭೊಗಲ್ಲೆ ಉಬೆಂತ್
ಅಟ್ಟಾಂಗ್ ರಾನಾಂತ್, ಜಿವ್ದಾಳೆಚೆರ್
ಪಾಂಯ್ ದವರ್‍ತಾನಾ, ಜಾಂವ್ಚೆ ಭಾಶೆನ್
ಆಕ್ಲಾಸ್ತಾಂ, ಉಸ್ಮಡ್ತಾಂ ಆನಿ ಖರ್ಶೆತಾಂ...
ಉಸ್ಮಡ್ತಾಂ, ಆಕ್ಲಾಸ್ತಾಂ ಆನಿ ಖರ್ಶೆತಾಂ
ಖರ್ಶೆತಾಂ, ಉಸ್ಮಡ್ತಾಂ ಆನಿ ಆಕ್ಲಾಸ್ತಾಂ
ಆನಿ
ಮ್ಹಾಕಾ ಸೊಧುಂಕಚ್ ವಿಸ್ರತಾಂ
-ಮೆಲ್ವಿನ್ ರೊಡ್ರಿಗಸ್