ಕವಿತಾ:

ಏಕ್ ದೇಂಟ್, ಏಕ್ ಪಾನ್

ಏಕ್ ದೇಂಟ್, ಏಕ್ ಪಾನ್
ಭರೊನ್ ಗೆಲಾಂ ಸಗ್ಳೆಂ ರಾನ್!
ರಚ್ನಾರಾನ್ ದೀವ್ನ್ ಪುರ್ತೆಂ ಧ್ಯಾನ್
ಚರಯ್ಲಾ ಹಾತ್ ಪಾನಾನ್ ಪಾನ್!

ದೆಂಟಾಕ್ ಸೊಭಾಯ್ ದಿತಾ ಪಾನ್:
ಪಾನಾಕ್ ಘಟಾಯ್ ದೆಂಟಾ ಥಾವ್ನ್
ಪಾನ್ ನಾತಲ್ಲೊ ದೇಂಟ್ ನ್ಹಯ್
ದೇಂಟ್ ನಾ ತರ್ ಪಾನ್ ಖಂಯ್?

ದೀಸ್ ಏಕ್ ಆಯ್ಲೊ ಜಿಣ್ಯೆಂತ್ ತಾಂಚ್ಯಾ;
ಉಟ್ಲೆಂ ವಾದಾಳ್ ಖಿಣಾನ್ ಎಕಾ
ಸೊಭಿತ್ ಪಾನಾಕ್ ಗರ್ವಾನ್ ತಾಂಡ್ಲೆಂ
ನಿಂದೆ ತಾಳ್ಯಾನ್ ದೆಂಟಾಕ್ ಖೆಂಡ್ಲೆಂ.

‘ಸೊಭಾಯ್ ಮ್ಹಜಿ ನಾತಲ್ಲಿ ತರ್
ತುಕಾ ಮ್ಹಣ್ಯೆತ್ ಭೆಷ್ಟೊ ಲಾಚಾರ್!
ವೆಗ್ಳಾಚಾರ್ ಹಾಂವ್ ಮಾಗ್ತಾಂ ಆತಾಂ!
ಮಾಗೀರ್ ಪಳೆ ತುಜಿ ಕಥಾ!’

ದೆಂಟಾನ್ ಮ್ಹಳೆಂ ‘ಪಾನಾ ಮ್ಹಜ್ಯಾ
ರಗತ್ ಏಕಚ್ ಶಿರಾಂತ್ ಆಮ್ಚ್ಯಾ!
ಚಿಂತಿನಾಕಾ ವಿಸ್ತಾರ್ನ್ ವಿಶಾಲ್
ದಿತಾಯ್ ಮ್ಹಣೊನ್ ಸಾವ್ಳಿ ಮ್ಹಾಕಾ.

ಫರಕ್ ಕಿತೆಂ ತುಕಾ ಮ್ಹಾಕಾ?
ಆಸಾಂವ್ ಲಾಗೊನ್ ಎಕಾಮೆಕಾ
ಹರ್ಯೆಕ್ ಘಡಿ ಜಾಯ್ ತುಂ ಮ್ಹಾಕಾ:
ಹರ್ಯೆಕ್ ಘಡಿ ಹಾಂವ್ ಜಾಯ್ ತುಕಾ’

ಪಾನಾನ್ ಶಿಮ್ಟಿ ಹಾಲಯ್ಲಿ ನಾ
ಗರ್ವಾ ಮೊಡ್ಕಿ ನಿವಯ್ಲಿ ನಾ
ತುಟೊನ್ ಪಡ್ಲೆಂ ಆಧಾರ್ ನಾಸ್ತಾಂ;
ಧುಳಿಂತ್ ಲೊಳ್ಳೆಂ ಆಶಾ ನಾಸ್ತಾಂ

ಮನೀಸ್ ಗೆಲೊ ಗುಡ್ಡಾವ್ನ್ ತಾಕಾ,
ಧುಳಿನ್ ಆಪ್ಲೊ ಕೆಲೊ ತಾಕಾ,
ದೇಂಟ್ ನಾಸ್ಲಲೆಂ ಪಾನ್ ತುಂ ಬಾಯೆ
ವಿಧೊವ್ ತಶೆಂ ದುಕಾನ್ ಜಿಯೆ

ದೆಂಟಾ ಥಾವ್ನ್ ತುಂ ಜಾಲಾಂಯ್ ವೆಗ್ಳೆಂ
ನಾ ಕೊಣ್ ಆತಾಂ ತುಜೆಂ ಮ್ಹಳ್ಳೆಂ
ಕಳ್ವಳ್ಟಾ ದೇಂಟ್ ತುಜೆವಿಣೆಂ
ಪೊಕೊಳ್ ಆತಾಂ ತುಮ್ಚೆಂ ಜಿಣೆಂ!

ದೇಂಟ್ ಎಕ್ಸುರೊ ವಾರ್ಯಾಂತ್ ಕಾಂಪ್ಲೊ
ಸಾವ್ಳಿ ನಾಸ್ತಾಂ ವೊತಾಂತ್ ತಾಪ್ಲೊ
ಆಸ್ರೊ ನಾಸ್ತಾಂ ಪಾವ್ಸಾಂತ್ ಭಿಜ್ಲೊ
ಎಕ್ಸುರ್ ಝುಜ್ಲೊ; ಚಿವ್ಳೊನ್ ಗೆಲೊ.

ತೋಯಿ ಧರ್ಣಿರ್ ಪಡ್ಲೊ ಕೊಸ್ಳೊನ್
ಧುಳಿನ್ ಮ್ಹಳೆಂ ದುಕಾಂ ಗಳೊವ್ನ್
‘ಭುರ್ಗಿಂ ಮ್ಹಜಿಂ ಜಾತಚ್ ಖೆಳೊನ್
ಆಯ್ಲಿಂ ಪಾಟಿಂ ಮ್ಹಾಕಾ ಮೆಳೊಂಕ್’

-ಜೆ. ಬಿ. ಮೊರಾಯಸ್