ವಂಯ್

ಕವಿತಾ:

ವಂಯ್

ಬಾಗ್ ಹಾಂವ್ ಬಾಂದ್ತಲೊಂಗೊ, ರೊಂಪೊ ಚಾಂಪೊ ಲಾಯ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ಪೊಂತಾಕ್ ಪಾಯ್ತಲೊಂ.

          ಜನೆಲಾಚೆ ಸಾಂದಿರ್ ತುಂ, ಭಿಸ್ಳೆ ಕೇಸ್ ಮಾನೆರ್
          ಮಾನ್ ಉಗ್ತಿ, ಕೇಸ್ ಉಗ್ತೆ, ಜಾಯೆಜುಯೆ ತಾನೆರ್
          ಜಾಯ್‌ಜೂಯ್ ಲಾಯ್ತಲೊಂಗೊ, ಉಗ್ತಿ ಸೊಭಾಯ್ ಚೊಯ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ಪೊಂತಾಕ್ ಪಾಯ್ತಲೊಂ.

          ವೊಳಿ ವೊಳಿ ಮೊಳುನ್ ಜಾಲ್ಯೊ ವೊತ್‍ರಾತ್ ಸೊಸುನ್
          ವೊತ್‌ರಾತ್ ಮೆಲಿಂ ಮಾತ್, ಆಶಾ ಉರ್ಲಿ ಪೊಸುನ್
          ಆಶಾ ಮತಿಂ ಧರ್ತಲೊಂಗೊ, ಚಂದ್ರಾಕ್ ಬಾಗಿಂ ಲಾಯ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ಪೊಂತಾಕ್ ಪಾಯ್ತಲೊಂ.

          ರೊಂಪೊ ಲಾಯ್ಲೊ, ಚಾಂಪೊ ಲಾಯ್ಲೊ, ಜಾಯ್ ಲಾಯ್ಲಿ ಪ್ರಿತೀನ್
          ಸುರ್ಯೊ ಲಿಪ್ಲೊ ಚಂದೀರ್ ಆಯ್ಲೊ ಅರ್ದೆ ರಾತಿಂ ಜಿತೀನ್
          ಘಾಮ್ ಕಾಡ್ಲೊ ಕಶ್ಟ್ ಕೆಲೊ-ಜನೆಲಾರ್ ಆತಾಂ ವಯ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ಪೊಂತಾಕ್ ಪಾಯ್ತಲೊಂ.

          ಉಗ್ತಿ ಮಾನ್ ಚಂಚಲ್ ಭಾನ್ ಜನೆಲಾರಿ ಉಬೆಂ ತುಂ
          ದೊಡ್ಟಾ ಆಂಗ್ ಮೊಡ್ಟಾ ಪಾಂಗ್ ವೋಂಟ್ ಪಿಶೆ ಜಾಲೆಮೂ
          ಉಗ್ತಾಡಾಯ್ ರಾಕ್ತಾ ಮ್ಹಾಕಾ, ಲಜ್ ಕಿತ್ಯಾಕ್ ಪಾವ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ಪೊಂತಾಕ್ ಪಾಯ್ತಲೊಂ.

          ರಾತ್ ಉಬ್ಲಿ ದಿವಸ್ ಧಾಂವ್ಲೆ ಉಗ್ತೆ ಉಡ್ತೆ ಬಾಗೀಂತ್
          ಪಾತ್ ಫುಲ್ಲಿ, ಶಿಂವ್ತ್ಯಾನ್ ಧರ್ಲೆಂ ಗುಲೊಬಾಕ್ ವೆಂಗೆಂತ್
          ಆಜ್ ಪಾತ್ ತೊಡ್ಟಲೊಂಗೊ, ಉಗ್ತ್ಯಾ ಕೆಸಾಂತ್ ಮಾಳ್ಟಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ತರ್‌ಯ್ ಪಾಳ್ಟಲೊಂ.

          ಉಗ್ತಾಡಾಯ್ ಲುಟ್ಲಿ ಹಾಂವೆಂ ಉಗ್ತೆಂ ಆಸ್ಲೆಂ ಚುಂಬುನ್
          ಮಸ್ತಿ ರಾತ್ ಮಟ್ವಿ ಜಾಲಿ ಆಂಗಾಂ ವೆಂಗೆಂತ್ ದಾಂಬುನ್
          ಫಾಂತ್ಯಾರ್ ದಗೊ ಜನೆಲಾರ್ ವೊಗೊ ದೀಷ್ಟ್ ಕಸ್ಲಿ ಚೊಯ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಪೊಂತಾಕ್ ಕಶಿ ಪಾಯ್ತಲೊಂ?

          ತರ್ನೆ ಝಾಡ್ ಆಡ್‍ಪಾಡ್ ಚಂದ್ರಿಮ್ ನಿದೆಂತ್ ಆಸ್ಲಲೊ
          ಮಾಂಕಡ್ ಮಸ್ತೊ ರಿಗ್ಲಾ ಬಾಗೀಂತ್ ದೆಂವ್ಚಾರಾನಚ್ ಪೊಸ್ಲಲೊ
          ವೊಂಟಾನ್ ಕಾಲ್ ಮ್ಹಳ್ಳೆಂ ಜಯ್ಶೆಂ, ತಯ್ಶೆಂ ಬಾಗ್ ಮಳ್ಟಾಲೊ
ಲಗ್ನಾ ದಿಸಾ ದಿಲ್ಲಿ ಭಾಸ್ ಕೊಣ್ ಪೊಂತಾಕ್ ಪಾಯ್ತಲೊ?

          ಕೊಡ್ಶಿಂ ದುಕಾಂ ಗಳಯ್ ಅತ್ಮ್ಯಾ ಸಂಸಾರಾಕ್ ಕಳೊಂದಿ
          ಕೊಡ್ಸಾಣ್ ಆಯ್ಚಿ ವೀಕ್ ಜಾಲ್ಯಾ ಮಾಂಕ್ಡಾ ಸೈತ್ ಜಳೊಂದಿ
          ರಡುನ್ ರಡುನ್ ಚಂದ್ರಿಮಾಚಿ ವಾಟ್ ಹಾಂವ್ ಲಾಯ್ತಲೊಂ
ಲಗ್ನಾ ದಿಸಾ ದಿಲ್ಲ್ಲಿ ಭಾಸ್ ವಾಟೆಕ್ ಜರಯ್ ಪಾಯ್ತಲೊಂ.

          ಪಯ್ಲೆಂ ಬಾಳ್ ಕಿರಣ್ ಪಡ್ಲೆಂ ವೊಗೆಂ ಮನ್ ಜಾಗೆಲೆಂ
          ವಾರ್ಯಾರ್ ಬಸ್ಲೆಂ ಸರ್ಗಾರ್ ಚಡ್ಲೆಂ ಬಾಳೆ ಕೊಣೆ ಭೊಗೆಲೆಂ?
          ಬಾಗ್ ಹಾಂವ್ ಲಾಯ್ತಲೊಂಗೊ ವಂಯ್ ಭೊಂವ್ತಿಂ ಲಾಯ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ಪೊಂತಾಕ್ ಪಾಯ್ತಲೊಂ.

          ವಂಯ್ ಬಾಂದ್ಲಿ ಬಾಗೆ ಭೊಂವ್ತಿಂ, ಕಾಂಟೆಕುಂಟೆ ಸಾಣ್ಶಿಲೆ
          ಸಾಂಜೆನ್ ಧರ್ಣಿಕ್ ಚಿಂವ್ಚೆ ಪಯ್ಲೆಂ ಹಾತ್‍ಪಾಯೆ ದಣ್ಶಿಲೆ
          ಝಾಡಾಂ ಲಾಯ್ಲಿಂ ಘಾಣೆರ್ಯಾಚಿಂ ಬಾವ್ಲೆ ಬಾಗೀಕ್ ರಾಕ್ತಲೊಂ
ಲಗ್ನಾ ದಿಸಾ ದಿಲ್ಲಿ ಭಾಸ್ ಆಜ್ ತರಯ್ ದೆಖ್ತಲೊಂ.

          ನಶಿಬಾಚ್ಯಾ ಗುಪ್ತ್ಯಾ ಉಮ್ಯಾ ತುಜಿ ಕಸಲಿ ಕಾಣಿಂರೆ
          ಉದಕ್ ಸಾರೆಂ ಝಾಡಾಂಕ್ ದಿಲ್ಲೆಂ ವಂಯ್ ಖಾವ್ನ್ ರಾಣಿರೆ
          ಬಾಗ್ ಪಡ್ತಾ ವಂಯ್ ವಾಡ್ಟಾ ಆನಿ ಕೊಣಾಕ್ ರಾಕ್ತಲೊಂ?
ಲಗ್ನಾ ಭಾಸ್ ಪಾಳುನ್ ಕೆದ್ನಾಂ ಮನಾಂತ್ ಖೊಶೀ ಪಾವ್ತಲೊಂ?

-ಚಾ.ಫ್ರಾ. ದೆಕೊಸ್ತಾ