ಸಂಪಾದಕೀಯ್:
ಮ್ಹೆಳೆಂ ನಿತಳ್ ಕರುಂಕ್ ವಚೊನ್ ಮ್ಹೆಳ್ಚೆ ಮನೀಸ್.
ನಿತಳ್ ಮ್ಹಳ್ಳೆಂ ಕಿತೇಂಯ್ ಆಸನಾ. ಉದಕ್ ಜಾಂವ್, ಕಾಳೀಜ್ ಜಾಂವ್ - ತೆಂ ಆಪುಟ್ ನಿತಳ್ ಮ್ಹಣೊಂಕ್ ಕೊಣಾಯ್ಕಿ ಸಾಧ್ಯ್ ನಾ. ತರಿಪುಣ್ ಕಿತ್ಲೆಂ ತೆಂ ಮ್ಹೆಳೊನ್ ಗೆಲ್ಯಾರಯ್, ತೆಂ ನಿತಳ್ ದವರ್‍ಚೆ ದಿಶಿಂ ಆಮ್ಚಿಂ ಪ್ರೇತನಾಂ ಚಾಲು ಆಸ್ತಾತ್. ಕೊಣ್ ಮನೀಸ್ ಹ್ಯಾ ಪ್ರೇತನಾಂನಿ ಸಂಪೂರ್ಣ್ ಬುಡೊನ್ ಆಸ್ತಾ. ಥೊಡ್ಯಾಂಕ್ ಅಸಲ್ಯಾ ಕಾಮಾಂನಿ ಬುಡಜಾಯ್ ಮನ್ ಜಾಲ್ಯಾರಯ್, ಕಾಮಾಕ್ ದೆಂವ್ಚೆಂ ಭ್ಯೆಂ ಆಡಾಯ್ತಾ. ಥೊಡ್ಯಾಂಕ್ ಅಸಲೆಂ ಕಾಮ್ ಆಸಾಚ್ ಮ್ಹಳ್ಳಿ ಖಬರ್ ಆಸನಾ. ತೆಂ ಮ್ಹೆಳ್ಯಾಂತಚ್ ಜಿಯೆತಾತ್.
ಹಾಂಗಾಸರ್‍ಚೊ ಕವಿ ಪಯ್ಲ್ಯಾ ವರ್ಗಾಚೊ. ತೊ ಮ್ಹೆಳೆಂ ನಿತಳ್ ಕರುಂಕ್ ಉಡೊನ್ ಜಾಲಾ. ನಿತಳ್ ಕರ್‍ಚ್ಯಾ ಉದ್ದೇಶಾನ್ ಮ್ಹೆಳೆಂ ಪಿಯೆವ್ನ್ ಆಸಾ. ಪಿಯೆವ್ನ್ ಪಿಯೆವ್ನ್ ತೋಯ್ ಉರ್‍ತಲೊ ಸಾಂಗೊಂಕ್ ಜಾಯ್ನಾ. ಪುಣ್ ತಾಚ್ಯಾ ಬರ್‍ಯಾ ಖರ್‍ಯಾ ಶೆವೊಟಾಕ್ ಸಕ್ಡಾಂನಿ ಮೆಚ್ವಜಾಯಿಚ್.
ಗೊಡ್ವಿನ್ ಡಿ'ಸೋಜಾ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ತಾಕಾ ಯೆವ್ಕಾರ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹೆಳೆಂ
ಆಮ್ಚ್ಯಾ ಗಾಂವ್ಚೆ ಪವಿತ್ರ್ ನಂಯ್ತ್
ವ್ಹಾಳೊನ್ ಯೆತಾ ಮ್ಹೆಳೆಂ
ಆನಿ ಹ್ಯಾ ಮ್ಹೆಳ್ಯಾಕ್ ಲಾಗೊನ್
ಶೆತಾಂತ್ ಪಿಕ್ತಾ ಮಿಲಾವಟಿ ಬೆಳೆಂ
ಕೊಣ್ ದೆಂವತ್
ಕೊಣ್ ಬುಡತ್
ಕೊಣಾಕ್ ಧಯ್ರ್ ಪಾವತ್
ಹೆಂ ಮ್ಹೆಳೆಂ ನಿತಳ್ ಕರುಂಕ್
ಶೆತಾಂತ್ ಮ್ಹಜ್ಯಾ
ಭಾಂಗಾರ್ ಪಿಕಂವ್ಕ್?
ದೆಂವ್ಲೆ ಥೊಡೆಚ್...
ವ್ಹಾಳೊನ್ ಗೆಲೆ
ಮ್ಹೆಳ್ಯಾ ಸಂಗಿಂ ಮ್ಹೆಳೆಂ ಜಾವುನ್
ಘಾಣ್ ಚಡವ್ನ್...
ಹಾಂವ್ ಹಾಂಗಾ
ತಡಿರ್ ಉಬೊ...!
ಕಾಳೀಜ್ ಉದ್ಕಾಕ್ ವೊಡ್ತಾಂ
ಮನ್ ತಡಿರ್ ಉರ್‍ತಾ
ಕೊಶೆಡ್ದ್ ಪುರ್ಪುರ್‍ತಾ
ಹಿಜ್ಡೊ ತುಂ!
ಹಿಜ್ಡೊಚ್ ಉರ್‍ತಲೊಯ್...!
ಧಯ್ರ್ ಆರಾವ್ನ್
ಉದ್ಕಾಕ್ ದೆಂವ್ತಾಂ
ವ್ಹಾಳ್ಚ್ಯಾ ವ್ಹಾಳ್ಯಾ
ವಿರೋಧ್ ಉಪ್ಯೆಂವ್ಕ್
ಕಚ್ರೊ ಆರಾವ್ನ್
ಮ್ಹೆಳೆಂ ನಾತ್‌ಲ್ಲಿ
ನಿತಳ್ ಸಮಾಜ್
ಮುಖ್ಲೆ ಪಿಳ್ಗೆಕ್ ದೀಂವ್ಕ್..!
-ಗೊಡ್ವಿನ್ ಡಿ'ಸೋಜಾ