ಸಂಪಾದಕೀಯ್:
ಬಾಪಾಯ್ಚೆಂ ಕಾಳೀಜ್ ತೊ ಮೆಲ್ಯಾ ನಂತರಚ್ ಕಳ್ತಾ
ಸಭಾರ್ ತೆಂಪಾ ಆದಿಂ ಹಾಂವೆಂ ಏಕ್ ಚುಟ್ಕುಲ್ ಬರಯಿಲ್ಲೆಂ: ಆವಯ್ಚೆಂ ಕಾಳೀಜ್ ತಿ ಜೀವಂತ್ ಆಸ್ತಾನಾಂಚ್ ಮೆಳ್ತಾ, ಪುಣ್ ಬಾಪಾಯ್ಚೆಂ ಕಾಳೀಜ್ ತೊ ಮೆಲ್ಯಾ ನಂತರಚ್ ಕಳ್ತಾ. ಹಾಂಗಾಸರ್ ಬಾಪಾಯ್ಚೆಂ ಕಾಳೀಜ್ ಮೆಲ್ಯಾ ನಂತರ್ ಸಮ್ಜೊಂಚೆಂ ಪ್ರೇತನ್ ಚಲ್ಲಾಂ. ಬಾಪಯ್ ಕಿತ್ಲೋಯ್ ಪಿಂವ್ಡೊ ಜಾಂವ್, ಪಾಟಿರ್ ಕಿತ್ಲೀಂಯ್ ರೊತಾಂ ತಾಣೆಂ ವೊಡ್ಲ್ಯಾಂತ್ ಜಾಂವ್, ತಾಚೆ ಭಿತರ್ ಮೊವಾಳ್ ಏಕ್ ಕಾಳೀಜ್ ಆಸ್ಚೆ ದಿಶಿಂ ಆಮ್ಚಿಂ ಸೊಧ್ನಾಂ ಚಲೊಂವ್ಕ್ ಹಿ ಕವಿತಾ ಲಾಯ್ತಾ. ಮಾಗೀರ್ ಇತ್ಲೆಂ ಕರುಂಕ್ ತಾಣೆ ಮರಜೆ ಆಸಲ್ಲೆಂ?
ಕವಿತೆನ್ ಏಕ್ ಸಾಂಗೊಂಕ್ ವಚೊನ್ ವೆಗ್ಳ್ಯಾಚ್ ಥರೆಚ್ಯೊ ಪ್ರತಿಮಾ ಹಾಂಗಾಸರ್ ಉಬ್ಯೊ ಕೆಲ್ಲ್ಯೊ ದಿಸ್ತಾತ್. ತ್ಯೊ ಪುರಾಯ್ ಹೆ ಕವಿತೆಕ್ ಪೂರಕ್ ಆಸಾತ್. ಫೊಂಡಾ ವಯ್ಲ್ಯಾ ಪಾಲ್ವಲ್ಲ್ಯಾ ವಾತಿಂನಿ ಕರ್ಕಟ್ಯಾ ವೊತಾಕ್ ಕರ್ಗೊನ್ ವೆಚಿ ಪ್ರತಿಮಾ ಜಿ ಕವಿನ್ ಉಬಿ ಕೆಲ್ಯಾ, ತ್ಯಾ ಖಾತೀರ್ ಕವಿಚಿ ಕಿತ್ಲಿ ತೋಖ್ಣಾಯ್ ಕೆಲ್ಯಾರಯ್ ಉಣೆಂಚ್.
ವಿಲ್ಸನಾನ್ ಆಪ್ಲ್ಯಾ ಕವಿತಾಂನಿ ವಾಚ್ಪ್ಯಾಂಕ್ ಧರ್ನ್ ದವರ್ಚಿ ಕುಶೆಲತಾ ಬರಿಚ್ ಆಪ್ಣಾಯ್ಲ್ಯಾ. ಹಾಂವ್ ಮಾತ್ರ್ ತಾಚೆ ಹೆ ಅದ್ಭುತ್ ಸಕ್ತೆಕ್ ವಿಜ್ಮಿತ್ ಪಾವ್ತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ
ಪಪ್ಪಾಲಾಗಿಂ
ಫೊಂಡಾವಯ್ಲ್ಯೊ ಪಾಲ್ವಲ್ಲ್ಯೊ ವಾತಿ
ಕರ್ಕಟ್ಯಾ ವೊತಾಕ್ ಕರ್ಗತೇ ಆಸಾತ್.
ಮ್ಹಜೆ ಮತಿಂತ್ ಕೆದಾಳಾಗೀ ಸರಲ್ಲ್ಯಾ
ಪಪ್ಪಾಕ್ ಸಯ್ರ್ಯಾ ಧಯ್ರ್ಯಾಂನಿ
ಕಾಲ್ ಮಾತಿಯೆಕ್ ಪಾಯ್ಲಾಂ
ಪಪ್ಪಾಚಿ ಕೂಡ್ ಕರ್ಗೊನ್
ಸಿಮೆಸ್ತ್ರಿಚೆ ಮಾತಿಯೆಕ್ ಯೆದೊಳ್
ಮಾಸಾಚಿ ಹಿಮ್ಸಾಣ್ ಯೇಂವ್ಕ್ ನಾ.
ಮೂಟ್ ಮಾತಿ ತುಜ್ಯಾ ಫೊಂಡಾರ್
ಗಳಯಿಲ್ಲ್ಯಾ ಮ್ಹಜ್ಯಾ ಹಾತಾಚೊ
ಮಾತಿಯೆಪರ್ಮಳ್ ಪುರ್ತೊ ಮಾಜ್ವೊಂಕ್ ನಾ.
ಬೊಡಾ ಭಿತರ್ಲೊ ಮೆಂದು
ಮಾತಿಯೆಂತ್ ಮಾತಿ ಜಾಂವ್ಚ್ಯಾ ಆದಿಂ,
ಬಿಡಿ ವೊಡಲ್ಲೆ ವೋಂಟ್ ಕರ್ಗೊನ್
ದಾಂತಾನಿಂಚ್ ವಿಕಾರ್ ಹಾಸೊ ಹಾಸ್ಚೆ ಆದಿಂ
ಮ್ಹಜ್ಯಾ ಎಕಾ ಗಂಭೀರ್ ಸವಾಲಾಕ್
ಜಾಪ್ ದೀ ಪಪ್ಪಾ-
ಸೊರ್‍ಯಾಕ್ ಚಡ್ ಉದಕ್ ವೊತ್ಲೆಂ ಮ್ಹಣ್
ಮ್ಹಜೆಂ ಕಾನ್ಸುಲ್ ಸುಜಯಿಲ್ಲಿಂ ಥಾಪ್ಡಾಂ,
ವಾಂಜೆಲಾಂತ್ಲೆಂ ಉತರ್ ಅರ್ಧ್ಯಾರ್ ಮೊಡಲ್ಲ್ಯಾಕ್
ಮಾತ್ಯಾಕ್ ಧುಂಕುಟ್ ಉಬ್ಜಯಿಲ್ಲ್ಯೊ ಕುಟಿ,
ಬಿಡಿ ಪೆಟೊಂಕ್ ಶಿಕಯ್ತಾಂ ಮ್ಹಣ್
ಬೊಟಾಂಕ್ ಲಾಸಯಿಲ್ಲೆಂ ಕೊಲಿತ್,
ನೆಂಟೆ ಚುಕಿಕ್ ದಿಂಬಿಯೆರ್ ಗಳವ್ನ್
ಧೊಂಪ್ರಾರ್ ಪಾಜ್ರಯಿಲ್ಲೆಂ ರಗತ್...
ಹ್ಯಾ ವಿಶಿಂ ಕಿತೆಂಚ್ ವಿಚಾರುಂಕ್ ನಾ
ಪಪ್ಪಾ,
ಮ್ಹಜೆಂ ಸವಾಲ್ ವೆಗ್ಳೆಂಚ್-
ಹಾಂವೆಂ ತುಜೆರ್ ರಾಗ್ ಕೆಲ್ಲ್ಯಾ
ಎಕಾ ದಿಸಾ, ಉಸ್ಕ್ಯಾರ್ ಬಸವ್ನ್
ಸೊರೊ, ಬಿಡಿಯೆಚ್ಯಾ ಪರ್ಮಳಾಂತ್
ಮ್ಹಜ್ಯಾ ಗಾಲಾರ್ ಉಮೊ ದಾಂಬ್ತಾನಾ
ತುಜೆ ವೋಂಟ್
ಕಾಂಪಲ್ಲೆ ಕಿತ್ಯಾಕ್ ಪಪ್ಪಾ?
-ವಿಲ್ಸನ್ ಕಟೀಲ್