ಸಂಪಾದಕೀಯ್:
ಗೋಮಾತಾ ಉಗ್ತಿ ಮ್ಹಣೊನ್ ಆಂಗ್ಲೆಂ ಶಿಂವಜಾಯ್ ಜಾಲಾಂ
ಹೆ ಕವಿತೆಂತ್ ವಿನ್ಸಿ ಪಿಂಟೊ ಆಂಜೆಲೊರಾನ್ ಸಂಸ್ಕೃತೆಚೆಂ ವೆಗ್ಳೆಂಚ್ ಏಕ್ ವ್ಯಾಖ್ಯಾನ್ ದಿಲಾಂ. ಆಯ್ಲೆವಾರ್ ಜಾಲ್ಲ್ಯಾ ಘಡಿತಾ ಉಪ್ರಾಂತ್ ಸಂಸ್ಕೃತಿಚೆಂ ವಿವರಣ್ ಅಶೇಂಯ್ ಕಿತ್ಯಾಕ್ ಬದ್ಲಿ ಜಾಲೆಂ ಮ್ಹಳ್ಳೆಂ ಸವಾಲ್ ಧೊಸುಂಕ್ ಸುರು ಜಾಲಾಂ. ಹಿಂ ಸವಾಲಾಂ ಕವಿನ್ ಘಾಲ್ಯಾಂತ್. ಆನಿ ಆಮ್ಕಾಂ ಸರ್‍ವಾಂಕ್ ಹಾಕಾ ಜಾಪ್ ಸೊಧ್ಚಿ ಜವಾಬ್ದಾರಿ ಬಾಂದ್ತಾ.
ನಿಮಾಣೊ ಕಡ್ವೊ ಮಾತ್ರ್ ಆಮ್ಕಾಂ ಹಜಾರಾಂನಿ ಚಿಂತುಂಕ್ ಲಾಯ್ತಾ. ಬಳ್ವಂತ್ ಏಕ್ ಪ್ರತಿಮಾ ವಿನ್ಸಿನ್ ಉಬಿ ಕೆಲ್ಯಾ. ಹ್ಯಾ ಖಾತೀರ್ ತಾಚಿ ಕಿತ್ಲಿ ತೋಖ್ಣಾಯ್ ಕೆಲ್ಯಾರಿ ಉಣೆಂಚ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮ್ಚ್ಯಾ ಗಾಂವಾಂತ್
ಆತಾಂ ಆಮ್ಚ್ಯಾ ಗಾಂವಾಂತ್
ನವಿಚ್ ಸಂಸ್ಕೃತಿ ಉದೆಲ್ಯಾ
ಜಲ್ಮಾದಿಸಾ ತಲ್ವಾರಿನ್ ಕೇಕ್ ಕಾತ್ರುನ್,
ತೆಚ್ ತಲ್ವಾರಿನ್ ದಾಢ್ ಘಾಲ್ತೆಲ್ಯಾಂಕ್ ಕಾಪುಂಕ್
ಆತಾಂ ಆಮ್ಚ್ಯಾ ಗಾಂವಾಂತ್
ಜಲ್ಮೊಂಚೆಂ ಪಾಪ್ ನ್ಹಯ್,
ಜಲ್ಮಾದಿಸಾ ಆಧಾರ್‍ಲ್ಯಾರ್ ಪಾಪ್
ಇನಾಮ್ ಜಾವ್ನ್ ಮೆಳ್ತಾ ಮಾರಾಂಚಿ ಥಾಪ್
ಆತಾಂ ಆಮ್ಚ್ಯಾ ಗಾಂವಾಂತ್
ತಾಂಣಿ ಧರ್ಮಾಚ್ಯಾ ನಾಂವಾನ್ ಧಾಂಪ್ಲ್ಯಾರ್ ಕೂಡ್
ಹಾಂಕಾಂ ದೊಳ್ಯಾಂಕ್ ಕಾಳ್ಕಾಯ್ ಜಾತಾ
ದೆಕುನ್ ಹೆ ಹಾಂಚ್ಯಾ ಭಯ್ಣ್ಯಾಂಕ್ ವಿಣ್ಗೆ ಕರ್ನ್
ಟಿ.ವಿ. ಚ್ಯಾನೆಲಾಂನಿ ನಿಸ್ಕಳ್‌ಪಣ್ ಝಳ್ಕೆಕ್ ಘಾಲ್ತಾತ್.
ಆತಾಂ ಆಮ್ಚ್ಯಾ ಗಾಂವಾಂತ್
ರೇವ್ ಪಾರ್ಟೆಂತ್ ಪುಡಾರ್‍ಯಾಂನಿ
ಗೊರ್‍ಯಾಂಕ್ ವಿಣ್ಗೆಂ ನಾಚೊವ್ನ್
ಪ್ರಜೆಚ್ಯಾ ದೊಳ್ಯಾಂಕ್ ರೇಂವ್ ಘಾಲಿ
ಆತಾಂ ಜಲ್ಮಾ ದಿಸಾಕ್ ತಾಂಚ್ಯಾ ಶಿಸಾಂನಿ
ಆಮ್ಚ್ಯಾ ಭಯ್ಣ್ಯಾಂಕ್ ಬಲಾತ್ಕಾರಾನ್ ವಿಣ್ಗೆಂ ಕರ್ನ್
ಸಂಸ್ಕೃತೆಚ್ಯಾ ದೊಳ್ಯಾಂಕ್ ಮಾತಿ ಘಾಲಿ
ಆತಾಂ ಆಮ್ಚ್ಯಾ ಗಾಂವಾಂತ್
ಸ್ಟೇ ಹೋಮಾಂತ್ ಭಯ್ಣ್ಯಾ ಥಾವ್ನ್ ರಾಖಿ ಬಂಧನ್ ಘೆಂವ್ಕ್ ಗೆಲ್ಲೆ
ರಿಮಾಂಡ್ ಹೋಮಾಕ್ ಖಾಕಿಪೊಲಿಸಾಂ ಥಾವ್ನ್
ಖೊಡೆ ನ್ಹೆಸೊನ್ ಬಂಧನ್ ಜಾಲೆ.
ಆತಾಂ ಆಮ್ಚ್ಯಾ ಗಾಂವಾಂತ್
ಆವಯ್ ಸಮಾನ್ ಗೋಮಾತಾ ರಸ್ತ್ಯಾರ್ ಭೊಂವ್ತಾ ಉಗ್ತಿ,
ಪಾಡೆ ತಿಚೆರ್ ಕರ್‍ತಾತ್ ಮಸ್ತಿ ಮ್ಹಣ್
ಸಂಸ್ಕೃತೆಚೆ ನೈತಿಕ್ ಪೊಲಿಸ್
ಗಾಯಾಂಕ್ ಆಂಗ್ಲೆಂ ಶಿಂವೊನ್ ಮಾನ್ ಧಾಂಪುಂಕ್ ಲಾಗ್ಲ್ಯಾತ್
-ವಿನ್ಸಿ ಪಿಂಟೊ, ಆಂಜೆಲೊರ್