ಸಂಪಾದಕೀಯ್:
ಹಾತ್ ಪಾಯ್ ಬಾಂದುನ್ ಪೊಟ್ಟು ಬಾಂಯ್ಕ್ ಉಡಯಾ ಹ್ಯಾ ಕಾಳ್ಯಾ ಮಾಜ್ರಾಕ್
ಹಾಂಗಾಸರ್ ಕಾಳೆಂ ಮಾಜರ್ ಕವಿತೆದ್ವಾರಿಂ ಸ್ಟೇನಿ ಬೆಳಾನ್ ಮಂಗ್ಳುರಾಂತ್ ಚಲಲ್ಲ್ಯಾ ಹಲ್ಲ್ಯಾಕ್ ಪ್ರತಿಕ್ರಿಯಾ ದಿಲ್ಯಾ.
ಹ್ಯಾ ಕವನಾಂತ್ ಕಾಳೆಂ ಮಾಜರ್ ಮತಾಂದ್ಳ್ಯಾಂಕ್ ಆನಿ ದಿಶ್ಟಾವೊ ನಾತಲ್ಲ್ಯಾ, ದೇಶಿಯ್ ವಾದ್ ಮಾಂಡುನ್ ದೇಶಾಚಿ ವೀದ್ ವಾವ್ಳಿ ಕರ್ಚ್ಯಾ ಸಂಘಟನಾಂಕ್ / ವೆಕ್ತಿಂಕ್ ಪಿಂತ್ರಾಯ್ತಾ. ಕಾಳ್ಯಾ ಮಾಜ್ರಾಜೊ ಸ್ವಭಾವ್, ನಡ್ತೆಂ ಚಡಾವತ್ ಜಾವ್ನ್ ಕೊಣೀ ಪಸಂದ್ ಕರಿನಾಂತ್ ಆನಿ ಹಾಕಾ ವಿವಿಧ್ ಕಾರಣಾಂ ಆಸಾತ್ ಮ್ಹಣೊನ್ ಕವಿತೆಂತ್ಲ್ಯಾ ಮಧ್ಲೆ ವೊಳಿಂನಿ ಸಮಾನ್ ಅಲಂಕಾರಾಂನಿ ಕವಿನ್ ಕಳೊಂವ್ಚೆಂ ಪ್ರೇತನ್ ಕೆಲಾಂ.
ಪನ್ವೊತಿ, ನಿಶ್ಟುರ್, ರಾನ್ವಟಿ ಸಾಮಾನ್ಯ್ ಪರ್ಜೆಚೊ ಕ್ರೋಧ್ ಮ್ಹಣ್ ಮತಿಂತ್ ಧರ‍್ಯೆತ್. ಸಂಸ್ಕ್ರತಿಚೆ ರಕ್ಷಕ್ ಮ್ಹಳ್ಳಿಂ ಭಾಷಣಾಂ, ಕಾರ್ಯಕ್ರಮಾಂ ಸರ್ವ್ ತಾಂಣಿ ಕಾಡ್ಚ್ಯಾ ಪಿಲಾಂಕ್ ಸಮಾನ್ ತರ್ ತಾಂಣಿ ಕರ‍್ಚಿಂ ಸಂಸ್ಕೃತೆ ವಿರೋಧ್ ಕಾಮಾಂ ಮಾಜ್ರಾನ್ ಆಪ್ಲ್ಯಾಚ್ ಪಿಲಾಂಕ್ ಖೆಲ್ಲ್ಯಾಬರಿ ಮ್ಹಣೊನ್ ಕವಿ ಲೆಕ್ತಾ. ಅಸಲ್ಯಾಂಕ್ ಕಠೀಣ್ ಶಿಕ್ಶಾ ಜಾಯ್ಜಾಯ್ ಮ್ಹಳ್ಳ್ಯಾ ಅರ್ಥಾಖಾಲ್ ಆಕ್ರೇಚೆ ವೊಳಿಂತ್ 'ಹಾತ್ ಪಾಂಯ್ ಬಾಂದುನ್ ಪೊಟ್ಟು ಬಾಂಯ್ಕ್ ಉಡಯ್' ಮ್ಹಣೊನ್ ಕವಿ ಲಿಖ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಾಳೆಂ ಮಾಜರ್
ಘರ‍್ಚೆಂ
ಕಾಳೆಂ ಮಾಜರ್ ಮ್ಹಾಕಾ ಲಾಗನಾ
ಪೆಂಪಾರೆಂ ತಾಚೆಂ ಭಿಲ್ಕುಲ್ ರುಚನಾ
ಹರ‍್ಯೆಕ್ ದಿಷ್ಟಿಂತ್ ತಾಚೆ ದೆಖ್ತಾಂ 'ಪನ್ವೊತಿ'
ಹರ್ ಉಡ್ಣೆಂತ್ ಮನ್ ಉದ್ಗಾರ್ತಾ 'ರಾನ್ವಟಿ'
ಉಪ್ಕಾರ್ ಮ್ಹಣೊನ್ ಉಂದಿರ್ ಧರ್ಲ್ಯಾರ್
ಕಾಳೆಂ ದೆಕುನ್ ಕರ‍್ತುಬ್ ಜಾತಾ 'ನಿಶ್ಟುರ್'
ಮೋಗ್ ದಾಕವ್ನ್ ಪಾಂಯ್ ಘಸ್ಟಿತಾನಾ
ಜಾತಾಂ ಭಿತರ್ಲೆ ಭಿತರ್ ದೆದೆಸ್ಪೊರ್
ಕಾಳೊಕಾಂತ್
ಸೆಜಾರ‍್ಚೆ 'ಬಿಲ್ಲಿಕ್' ಅಶೆಲ್ಲೆ ದೊಳೆ ತಾಚೆ ಪರ್ಜಳ್ತಾನಾ
ಕಾಳ್ಜಾ ಗುಂಡಿಯೆಕ್ ಫಾತರ್ ಪಡ್ತಾ
ದೀಸ್ ರಾತ್ ಫರಕ್ ನಾಸ್ತಾಂ ಚೊಟ್ಟ್ಯೊ ಬುದಿ ದೆಖ್ತಾನಾ
ಶಿಂತಿದ್ ಮ್ಹಜೆಂ ಕದ್ವಳ್ತಾ...
ಕೋಣ್ ಎಕ್ಲ್ಯಾನ್ ಮ್ಹಳಾಂ
ಕಾಳೆಂ ತೆಂ ಆಡ್ ಉತರ‍್ಲ್ಯಾರ್ 'ಮಾಟ್'ಮ್ಹಣೊನ್
ಚಲೊಂಕ್ ಲಾಗ್ಲೊಂ ತರ್ ವಾಟ್ ಚುಕೊವ್ನ್
ದಳ್ದಿರ್ ಪಡಲ್ಲೆಂ ಸದಾಂ ದಿಸ್ತಾ ಮ್ಹಜೆ ವಾಟೆನ್
ಘರ‍್ಚ್ಯಾ ಕಾಳ್ಯಾ ಮಾಜ್ರಾನ್ ಕಾಡ್ಲ್ಯಾರ್ ಪಿಲಾಂ
ಖಿಣಾನ್ ಖಾವ್ನ್ ಸೊಡ್ತಾ, ಭರುನ್ ಪೊಟಾಂ ಚಿಲಾಂ
ಹಿ ಕಸಲಿ ಸಂಸ್ಕೃತಿ, ಸವಯ್ ಮ್ಹಣ್ ವಿಚಾರುಂಕ್ ಗೆಲ್ಯಾರ್
ಮಾಂಯ್ ಮ್ಹಣ್ತಾ:
ಶಿರಾಪ್ ಪಡಲ್ಲೆಂ ದೆಕುನ್
ಹಾತ್ ಪಾಂಯ್ ಬಾಂದುನ್ ಪೊಟ್ಟು ಬಾಂಯ್ಕ್ ಉಡಯ್ ಪುತಾ...
-ಸ್ಟೇನಿ ಬೆಳಾ