ಸಂಪಾದಕೀಯ್:
ತುಜಿಂ ಹರ್‍ಯೆಕ್ ಪಾವ್ಲಾಂ ವಿಚಾರ್ನ್ ಕಾಡ್ಚಿ ಗತ್ ಆಯ್ಲ್ಯಾ
ಆಮಿ ಕಿತೆಂ ಜೆವಿಜಾಯ್, ಆಮಿ ಕಿತೆಂ ಪಿಯೆಜಾಯ್, ಆಮಿ ಕಿತೆಂ ನ್ಹೆಸಜಾಯ್ ಆನಿ ಆಮಿ ಕಶೆಂ ಜಿಯೆಜಾಯ್ - ಹೆಂ ಸಗ್ಳೆಂ ತುಂವೆಂ ಆತಾಂ ನಿರ್ಧಾರ್ ಕರ್‍ಚೆ ದೀಸ್ ಗೆಲೆ. ಸರ್ಗಿಂಚ್ಯಾ ಬಾಪಾಕ್ ಜಾಂವ್, ದೇಶಾಂತ್ಲ್ಯಾ ಸರ್ಕಾರಾಕ್ ಜಾಂವ್ ಹ್ಯಾವಿಶಿಂ ನೆಮಾಂ ಕರ್‍ಚೆ ದೀಸ್‌ಯ್ ಗೆಲೆ. ಹೆ ಸಗ್ಳೆಂ ನಿರ್ಧಾರ್ ಕರುಂಕ್ ಅನೈತಿಕ್ ಪೊಲಿಸ್ ಜಲ್ಮಲ್ಯಾತ್. ತಾಂಣಿ ಚಿಂತಲ್ಲೆಂ, ತಾಂಣಿ ಸಾಂಗಲ್ಲೆಂ ಸಗ್ಳ್ಯಾಂನಿ ಪಾಳ್ಚೆ ದೀಸ್ ಆಯ್ಲ್ಯಾತ್.
ಸಿಜ್ಯೆಸ್ ತಾಕೊಡೆಚಿ ಹಿ ಕವಿತಾ ಮಂಗ್ಳುರ್‍ಚಿ ಹಕೀಗತ್ ಆಪ್ಲೆ ಕವಿತೆದ್ವಾರಿಂ ಸಾಂಗೊನ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹೆ೦ ರಾಜ್ ಕೊಣಾಚೆ೦?
ತ್ಯಾ ಚಾರ್ ವಣದಿ೦ ಮದೆ೦
ಘಡ್ಲೆ೦ ಕಿತೆ೦ ಕಳ್ಳೆ೦ ನಾ
ಕೆಮರಾಚ್ಯಾ ದೊಳ್ಯಾ೦ನಿ ಮಾತ್ರ್
ಪಳೆನಾಸ್ತಾ೦ ಸೊಡ್ಲೆ೦ ನಾ!
ಬೊಲ್ಪ್ಯಾ೦ಚ್ಯಾ ತ್ಯಾ ಹಿ೦ಡಾ೦ತ್
ಶೆಳಿಯೊ ಬಾವ್ಡ್ಯೊ ಉರ್‍ಡಾಲ್ಯೊ
ದಾವ್ಲ್ಯಾ೦ಕ್ ಶಿರ್‍ಕಾಲ್ಲ್ಯೊ ಬಾವ್ಲ್ಯೊ
ಚಿರ್‍ಡಾಲ್ಯೊ ಆನಿ ಮಾವ್ನ್ ಜಾಲ್ಯೊ!
ಬೊಲ್ಪ್ಯಾ೦ ಸ೦ಗಿ೦ ಉಡ್ತಾಲೆ
ಆಸ್ವೆಲಾ೦, ವಾಗ್ ಚಿಟ್ಯಾಳೆ
ಚಿತ್ಳಾ೦ಚ್ಯಾ ಆಂಗಾರ್ ಪಡ್ತಾಲೆ
ಭುಕೆಲ್ಲೆ ಕಾಮಿ ಯಮ್ಕುಳೆ!
ಗಾ೦ಧಿ ಬಾಪಾ ತುಜ್ಯಾ ದೇಶಾ೦ತ್
ಕಸ್ಲಿ ಹಿ ಸ೦ಸ್ಕ್ರತಿ
ಸ್ತ್ರೀಯಾ೦ಕ್ ಮಾತೆ ಮ್ಹಣ್ಚ್ಯಾ ಗಾ೦ವಾಕ್
ಕಶಿ ಲಾಗ್ಲಿ ಪನ್ವತಿ?
ತಕ್ಲೆರ್ ಧರ್‍ಮಾಚೆ೦ ಆಮಾಲ್
ಕುಡಿ೦ತ್ ಕಾಮುಕಿ ಕಿಟಾಳ್
ಸ೦ಸ್ಕ್ರತಿಚೆ೦ ರಕ್ಶಣ್ ಕರ್‍ಚ್ಯಾ
ರಾಕ್ಸಾ೦ಚ್ಯಾ ಕಾಳ್ಜಾ೦ತ್ ವಾದಾಳ್!
ಎಕಾ ಕಾಳಾರ್ ಮ್ಹಜೆ೦ ಮ೦ಗ್ಳುರ್
ಶಾ೦ತಿ ಸಮಾಧಾನಾಚೆ೦ ಕುಳಾರ್
ಕೋಮುವಾದಿ ಭುತಾ೦ಕ್ ಲಾಗೊನ್
ಜಾಲೆ೦ ಭೆಸಾ೦ ಪಿಡ್ಡ್ಯಾರ್!
ಆತಾ೦ ಮ್ಹಜ್ಯಾ ಗಾ೦ವಾ೦ತ್
ಬರ್ತಡೇ ಕೇಕ್ ಕಾತ್ರು೦ಕ್ ನಾ
ವಾತಿ ಫು೦ಕುನ್ ಗಾ೦ವ್ಕ್ ನಾ
ಬಿಯರ್ ಪಿಯೆವ್ನ್ ನಾಚೊ೦ಕ್ ನಾ!
ಹಾ೦ಗಾಸರ್ ಚಲಿಯಾ೦ನಿ
ಪಬ್ಬಾಕ್ ಗೆಲ್ಯಾರೀ ದಾಢ್
ಕ್ಲಬ್ಬಾಕ್ ಗೆಲ್ಯಾರೀ ದಾಢ್
ಸಗ್ಳೆ೦ ಜಿವಿತ್ ಚ್ ಪಾಡ್!
ಹ್ಯಾ ಗೂ೦ಡಾ ರಾಜಾ೦ತ್
ಕಿತೆ೦ ಖಾ೦ವ್ಚೆ೦, ಕಿತೆ೦ ಜೆ೦ವ್ಚೆ೦
ಕಿತೆ೦ ನ್ಹೆಸ್ಚೆ೦, ಕಿತೆ೦ ಪಿಯೆ೦ವ್ಚೆ೦
ಅನಯ್ತಿಕ್ ಪೊಲಿಸ್ ಸಾ೦ಗ್ತಲೆ!
ಎಕಾ ಕಾಳಾರ್ ಮ್ಹಜ್ಯಾ ಗಾ೦ವಾ೦ತ್
ಜಿವಿ ಆಸಲ್ಲಿ ಗಾ೦ಧಿಗಿರಿ
ಆತಾ೦ ಸಗ್ಳ್ಯಾನ್ ವಿಸ್ತಾರೊನ್ ಆಯ್ಲ್ಯಾ
ಶಿಪಾಯ್‌ಗಿರಿ, ದಾದಾಗಿರಿ ಆನಿ ಗೂ೦ಡಾಗಿರಿ!
ಈಶ್ವರ್,ಆಲ್ಲಾಹ್, ಸರ್‍ಗಿ೦ಚ್ಯಾ ಬಾಪಾ
ಕೋಮುವಾದಿ೦ಕ್ ಉಜ್ಚಾಡ್ ಫಾ೦ಕಯ್
ನಾ ತರ್ ಆಮ್ಕಾ೦ ಜಿಯೆ೦ವ್ಕ್
ದುಸ್ರಿ ವಾಟ್ ತರೀ ದಾಕಯ್!
-ಸಿಜ್ಯೆಸ್ ತಾಕೊಡೆ