ಸಂಪಾದಕೀಯ್:
ಬರ್ತಡೇ ಪಾರ್ಟಿಚೆ ಹಲ್ಲೆಕೋರ್ ಆನಿ ಸಂಸ್ಕೃತಿ ರಾಕೊನ್ ವ್ಹರ್‍ಚೆ ಮನೀಸ್
ಹೆ ಕವಿತೆಚೊ ಕವಿ ಫಕತ್ ಎಕೆ ದಿಕೆನ್ ಪಳೆಯ್ನಾ. ಸಂಸ್ಕೃತೆಚೆಂ ಬದ್ಲಲ್ಲೆಂ ರೂಪ್ ತಾಕಾ ಝಳ್ಕೆಕ್ ಯೆತಾ. ಹ್ಯಾ ಬದ್ಲಲ್ಲ್ಯಾ ರುಪಾಕ್ ಸೊಪ್-ಸಾರೆಂ ಘಾಲ್ಚಿಂ ತಾಕಾ ದಿಸೊಂಕ್ ಲಾಗ್ತಾತ್. ತೊ ರಾಗಾನ್ ಖಡ್ಕಡ್ತಾ. ಆನಿ ಹಾಂಕಾಂ ಸರ್ವಾಂಕ್ ಫಾತ್ರಾಂವ್ಕ್ ಫರ್ಮಾಯ್ತಾ. ಅಶೆಂ ಸಾಂಗ್ತಾನಾ, ತಾಕಾ ಫಕತ್ ಜಲ್ಮಾ ದಿಸಾಚಿ ಪಾರ್ಟಿ ಆನಿ ಥಂಯ್ ಚಲಲ್ಲೊ ಹಲ್ಲೊ ದಿಸನಾ. ಕೊಂಕಣಿ ಸಂಸ್ಕೃತಿ ಸೈತ್ ದಿಷ್ಟಿಕ್ ಪಡ್ತಾ. ಕೊಂಕಣಿ ಸಂಸ್ಕೃತಿ ರಾಕೊನ್ ವ್ಹರೊಂಕ್ ಸಾಂಗ್ಚೆ ಮನೀಸ್ ಸೈತ್, ಹ್ಯಾ ಹಲ್ಲ್ಯಾಕೊರಾಂ ಬರಿಚ್ ದಿಷ್ಟಿಕ್ ಪಡ್ತಾತ್.
ಪಿ. ಜೆ. ಕರುಗಳ್ನಡೆ ಸದ್ದ್ಯಾ ದುಬಾಯ್ ಶೆರಾಂತ್ ವಸ್ತಿ ಕರುನ್ ಆಸಾ. ಥಂಯ್ ರಾವೊನಯ್, ಗಾಂವಾಂತ್ಲ್ಯಾ ಎಕಾ ಘಡಿತಾಕ್ ಸ್ಪಂದನ್ ಜಾಲ್ಲಿ ರೀತ್ ಪಳೆತಾನಾ, ಭಿತರ್‍ಲ್ಯಾ ಭಿತರ್ ತೊ ಕಿತ್ಲೊ ಶಿಜೊನ್ ಆಸಾ ಮ್ಹಳ್ಳೆಂ ಕಳ್ತಾ.
ತುಮಿ ಕಿತೆಂ ವೊಗೆಚ್ ಆಸಾತ್? ತುಮ್ಚ್ಯೋಯ್ ಕವಿತಾ ಯೇಂವ್ದಿತ್. ನ್ಹಯ್ ತರ್ ಹಾಂಗಾಸರ್ ಪರ್ಗಟ್ ಜಾಂವ್ಚ್ಯಾ ಕವಿತಾಂಕ್ ಪ್ರತಿಕ್ರಿಯಾ ತರೀ ದಿಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಂಸ್ಕೃತಿಚೆ ರಾಕೊಣ್ದಾರ್
ಫಾತ್ರಾಯಾರೆ ಫಾತ್ರಾಯಾ
ಹ್ಯಾ ದಳ್ದಿರ್‍ಯಾಂಕ್ ಫಾತ್ರಾಯಾ
ಆಪ್ಲೆ ಆವಯ್ಕ್ ಸೊಡ್ಲಾಂ, ದುಸ್ರೆಕ್ ವೆಂಗ್ಲಾಂ
ಸಂಸ್ಕೃತಿ ಉರೊಂವ್ಕ್ ಸಕ್ಟಾಂಕಿ ಸಾಂಗ್ಲಾಂ
ಕಾಜ್ರಾಚೊ ನವ್ರೊ ಪೇಟಾ ಮಾತ್ಯಾರ್
ಆಯ್ತೊ ಜಾವ್ನ್ ರಾವ್ಲಾ ಸೊಭಿತ್ ಸುಟಾರ್
ಆಹಾ ಕಿತ್ಲಿ ಬರಿ ಹಾಂಚಿ ಸಂಸ್ಕೃತಿ
ಹಾಂವ್ ಸಾಂಗನಾ, ತುಮಿಂಚ್ ಸಾಂಗಾ
ಫಾತ್ರಾಯಾರೆ ಫಾತ್ರಾಯಾ
ಹ್ಯಾ ಪಿಶ್ಯಾಂಕ್ ಫಾತ್ರಾಯಾ
ನಾರ್ಲಾಚ್ಯಾ ರುಕಾಕ್ ಆವಾಳ್ಯಾಚಿ ಕೃಷಿ
ಗೊರ್‍ಯಾಂಕ್ ಜಲ್ಮಲ್ಲಿ ಕುಸ್ಡಿ ಸಂತತ್ ಪಿಶಿ
ಮದಿರೆಚ್ಯಾ ಬದ್ಲಾ ವಿಸ್ಕೆಚಿ ಸಿಸ್ಲಿ
ಸಂಸ್ಕೃತೆಚೆಂ ನಾಂವ್ ಘೆವ್ನ್ ಹಿ ಸಂತತ್ ಕುಸ್ಲಿ
ಆಹಾ ಕಿತ್ಲೆಂ ಬರೆಂ ಹಾಂಚೆಂ ಚಿಂತಪ್
ಮ್ಹಾಕಾ ಸುಸ್ತನಾ, ತುಮಿಂಚ್ ಸಾಂಗಾ
ಫಾತ್ರಾಯಾರೆ ಫಾತ್ರಾಯಾ
ಹ್ಯಾ ಕುಸ್ಡ್ಯಾಂಕ್ ಫಾತ್ರಾಯಾ
ಆಪ್ಲೆಂ ನ್ಹೆಸಣ್ ಸೊಡ್ಲಾಂ
ಫಿಂರ್ಗ್ಯಾಕ್ ಆಂಗಾರ್ ವೊಡ್ಲಾಂ
ತರ್ನ್ಯಾ ಚೆಡ್ವಾಂಕ್ ಟೈಟ್ ಪೆಂಟಾಂ
ಮಾಪ್ ದಾಕೊಂವ್ಚಿಂ ಟೀ ಶರ್ಟಾಂ
ಆಹಾ ಕೊಣಾಕ್ ಪಡಲ್ಲಿ ಹಿ ಸಂತತ್
ಮ್ಹಾಕಾ ಕಳಿತ್ ನಾ, ತುಮಿಂಚ್ ಸಾಂಗಾ
ಫಾತ್ರಾಯಾರೆ ಫಾತ್ರಾಯಾ
ಹ್ಯಾ ಹಡ್ಬ್ಯಾಂಕ್ ಫಾತ್ರಾಯಾ
ಬಾಯ್ಲಾಂಕ್ ಚೆಡ್ವಾಂಕ್ ಮಾನ್ ದಿಂವ್ಚಿ ಜಾತ್
ಉಗ್ತ್ಯಾನ್ ಚೆಡ್ವಾಂ ವಯ್ರ್ ಭೊಂವ್ಡಾಯ್ತಾ ಹಾತ್
ತರ್ನ್ಯಾಂ ಚೆಡ್ವಾಂಕ್ ಹಾತ್ ಲಾಂವ್ಕ್ ಆಡ್ವಾರ್‍ತಾ ಸಂಸ್ಕೃತಿ
ಥಾಪ್ಡಾಂ ವಯ್ರ್ ಥಾಪ್ಡಾಂ ಮಾರ್‍ತಾತ್, ಹ್ಯೊ ಖಂಯ್ಚ್ಯೊ ಮೊನ್ಜಾತಿ
ಆಹಾ ಕಿತ್ಲಿ ಪವಿತ್ರ್ ಹಾಂಚಿ ಸಂಸ್ಕೃತಿ
ಮ್ಹಾಕಾ ದಿಸನಾ, ತುಮಿಂಚ್ ಸಾಂಗಾ
ಫಾತ್ರಾಯಾರೆ ಫಾತ್ರಾಯಾ
ಹ್ಯಾ ವ್ಹಡಿಲಾಂಕ್ ಫಾತ್ರಾಯಾ
ಚೂಕ್ ಕೆಲ್ಲ್ಯಾ ಭುರ್ಗ್ಯಾಂಚಿ ನೀತ್ ಕರ್‍ಚೆಂ ಸೊಡ್ತಾತ್
ತಾಂಣಿ ಕೆಲ್ಲೆಂ ಸಮಾ ಮ್ಹಣ್ ಸುಣ್ಯಾಬರಿಂ ಭೊಂಕ್ತಾತ್
ಹಾಂಚೆ ವರ್‍ವಿಂಚ್ ಸಂಸ್ಕೃತಿ ಮೆಲ್ಯಾ
ಹಾಂಣಿಚ್ ತಿಕಾ ಭಾಜುನ್ ಖೆಲ್ಯಾ
ಆಹಾ ಕಿತ್ಲಿ ಬರಿಂ ಆಯ್ಚಿಂ ವ್ಹಡಿಲಾಂ
ಹಾಂವ್ ಲೆಕಿನಾ, ತುಮಿಂಚ್ ಸಾಂಗಾ
-ಪಿ.ಜೆ. ಕರುಗಳ್ನಡೆ, ಬಾರ್ಕೂರ್