ಸಂಪಾದಕೀಯ್:
ಭರ್‍ವಸೊ ಸಂಪೂರ್ಣ್ ಮಾಜ್ವೊನ್ ವಚೊಂಕ್ ನಾ
ನಾಚ್ ಸೊಸುಂಕ್ ಜಾಯ್ನಾತಲ್ಲ್ಯಾಂನಿ ಕಸೊ ನಾಚ್ ಕೆಲೊ ಮ್ಹಣೊನ್ ಹೆ ಕವಿತೆಂತ್ ಸಾಂಗ್ಲಾಂ. ನಾಚ್ ಮ್ಹಳ್ಯಾರ್ ಸಂಗೀತ್ ಘಾಲ್ನ್ ಹಾತ್ ಪಾಯ್ ಹಾಲಂವ್ಚೆ ಮ್ಹಣೊನ್ ಆಮಿ ಸಮ್ಜತಲ್ಯಾಂವ್. ಪುಣ್ ಆತಾಂ ಥಾವ್ನ್ ಹೆ ಕವಿತೆಂತ್ ತಾಚೆಂ ವ್ಯಾಖ್ಯಾನ್ ವೆಗ್ಳೆಂ ದಿಲಾಂ.
ಇತ್ಲೆಂ ಜಾಲ್ಯಾ ಉಪ್ರಾಂತಯ್, ಏಕ್ ಪಾವ್ಟಿಂ ತರೀ ದೊಳೆ ಉಗಡಾ, ತುಮ್ಕಾಂ ಭರ್ವಶ್ಯಾಚಿಂ ಕಿರ್ಣಾಂ, ಜಿವಿತ್ ಜಿಯೆಂವ್ಚ್ಯಾಕ್ ಗರ್ಜೆಚಿಂ ಕಿರ್ಣಾಂ ಝಳ್ಕೆಕ್ ಪಡ್ತಲಿಂ ಮ್ಹಳ್ಳೊ ಆಶಾವಾದ್ ಹಿ ಕವಿತಾ ಉಗ್ತಾಯ್ತಾ.
ಡಿಂಪಲ್ ಫೆರ್ನಾಂಡಿಸ್ ಸಭಾರ್ ತೆಂಪಾ ಉಪ್ರಾಂತ್ ಕವಿತಾ ಕುಳಾರಾಕ್ ಆಯ್ಲ್ಯಾ, ತಿಕಾ ಯೆವ್ಕಾರ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಗ್ತೊ ನಾಚ್
ಜಲ್ಮಾ ಸಂಭ್ರಮಾ ಉಮೆದೆರ್
ಶೆಳೆಂ ಉದಕ್ ವೊತುನ್
ತರ್‍ನ್ಯಾ ಸಾಳ್ಕಾಂಚೊ ಜಿಣಿಯೆ ಕೊಚೊರ್ ಕರ್‍ನ್
ಮೋಡ್ನ್, ಥಾಪ್ಡಾವ್ನ್, ಖೊಟಾವ್ನ್
ದಾಢಾವ್ನ್, ಚಿರ್ಡುನ್ ಆನಿ ಕಿಸ್ಪರ್‍ನ್
ಸರ್‍ಸರೀತ್ ಪೊಪಾವ್ನ್
ತಾಂಚಿ ವೀದ್‌ವಾವ್ಳಿ ಕರ್‍ನ್
ನಂಗಾ ನಾಚಾಚ್ಯಾ ನಾಂವಾರ್
ಜಾಲೊ ನ್ಹಯ್‌ರೆ ಕಸಾಪ್ಪ್ಯಾಂಚೊ ಉಗ್ತೊ ನಾಚ್
ಧರ್ಮಾಚೆಂ ವೈಭವೀಕರಣ್ ಕರುಂಕ್
ಭಾಯ್ರ್ ಸರ್‍ಲಲ್ಯಾಂನಿ ಚಿಂತ್ಲೆಂ ಜಾಯ್ಜಾಯ್
ಮೆಳ್ತಿತ್ ಮ್ಹಣ್ ಸಲಾಮ್
ಪೆಟ್ತಿತ್ ಮ್ಹಣ್ ತಾಳಿಯೊ
ಜಾತಲೊ ಮ್ಹಣ್ ಸಮ್ಮಾನ್
ಮತಿಂತ್ ಕೆಳಿಂ ಪಿಕಯ್ತಲ್ಯಾ
ಹಣೆಬರ್ಪಾಕ್ ತಾಂಚ್ಯಾ
ಮಾರ್‍ಲೆಂ ನ್ಹಯ್‌ರೆ ಕಾಡ್ನ್ ಧರ್ಣಿಕ್
ಜಿವ್ಯೊ ಫಟಿ ಆಯ್ಲ್ಯೊ ಸಾಮ್ಕಾರ್
ಘೆವ್ನ್ ಸತಾಚೆಂ ಚಾಬೂಕ್
ಲಿಪ್ತೆಂ ಸತ್ ಲಿಪೊನ್ ಉರ್ಲೆಂನಾ
ಚೊರ್ಪಾಣ್ ಸಯ್ತ್ ಆಯ್ಲೆಂ ಉಗ್ತಾಡಾಕ್
ಆಪ್ಲೆಪಣ್ ವಿಸರ್‍ಲಲ್ಯಾಂನೊ
ಆತಾಂ ತರೀ ಜಾಗೆ ಜಾಯಾ
ಆಜ್ ತಾಕಾ ಫಾಲ್ಯಾಂ ಮ್ಹಾಕಾ
ದೊಳೆ ಉಗಡ್ನ್ ದೀಷ್ಟ್ ಉಬಾರಾ
ಆಸಾಂ ಉಗ್ತೆಂ ಮಳಬ್
ಬದ್ಲಲ್ಲೊ ಜಿನೊಸ್ ತುಮ್ಚೊ
ಖಂಡಿತ್ ಹಾಡಿತ್ ಸಮಾಜೆಂತ್ ಸುಧಾರ್
-ಡಿಂಪಲ್ ಫೆರ್ನಾಂಡಿಸ್