ಸಂಪಾದಕೀಯ್:
ದುಕರಾಂಕ್ ಕಾಪತ್ ಕೆಲ್ಲ್ಯಾಬರಿ ಹ್ಯಾ ಸುಣ್ಯಾಂಕಯ ಕಾಪತ್ ಕರಿಜಾಯ
ಸಗ್ಳೆಂ ಶಾಂತ್ ಆಸತಾನಾ, ಏಕಚ್ ಪಾವಟಿಂ ಪಿಶೆಂ ಸುಣೆಂ ಘೊಂಕುಂಕ ಲಾಗಲ್ಯಾರಿ, ಕಿತೆಂ ಜಾತ್ತಾ? ಹರ್ಯೆಕ್ ಪಂತಾ ಕೊಡಿಯಾಲಾಂತ ಅಶೆಂ ಕಿತ್ಯಾಕ ಘಡತಾ? ವ್ಹಾಳಚ್ಯಾ ಶೀತಳ ವಾರ್‍ಯಾಂತ ಕೊಣ್ ವೀಕ ವೊಂಪತಾ?
ಹ್ಯಾ ಸುಣ್ಯಾಂಕ ಕಶೆಂ ನಾಸ ಕರಚೆಂ? ಏಕಚ ವಾಟ ಉರಲ್ಯಾ. ತಾಂಚೆಂ ನಿರ್ಭೀಜಿಕರಣ್.
ಆಮಚೊ ಕವಿ, ಬೋವ ತರ್ನೊ. ಕೊಡಿಯಾಳಾಚ್ಯಾ ಘಟನಾವರವಿಂ ತಾಚೆಂ ಹೃದಯ ಕಿತಲೆಂ ಜಳೋನ ಆಸ್ಸಾ ಮ್ಹಳ್ಳೆಂ ಹೆ ಕವಿತೆಂತ್ ದಿಸತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊವಾಳ ಕೊಡಿಯಾಲ
ಕಾಂಯ್ ಖಬರ ನಾತಿಲೆ ವಾತಾವರಣ
ಮೊವಾಳ ಕೊಡಿಯಾಲ ಅನಾವರಣ
ಫಕತ ಆವಾಜ ಸಮುದ್ರಾ ಲ್ಹಾರಾಂಚೆ
ಹೊಳೂನ ಯೆತಾ ಥಂಡ ವಾರೆಂ ಬಂದ್ರಾಚೆಂ
ನಿಶ್ಯಬ್ಧಾರ ನಿತ್ಯ ಸುಲಲಿತ
ಕೊಡಿಯಾಲಾಚೆ ಜೀವನ ಸಂಗೀತ ಚಲತಾ
ಪುಣ ತಾತಾವಳಿ ಪಿಶ್ಶೆಂ ಸೂಣೆಂ
ಮಧೇಂತ ಅಪಸ್ವರಾರ ಭೋಂಕತಾ
ಪಿಶ್ಶೆಂ ಚಡ ಜಾವೂನ ಆಂಗಾರ ಉಡತಾ,
ನಾಂಕಟಾನ ಘಾಯ ಘಾಲತಾ.
ಕೊಡಿಯಾಲಾನ ಕಾಂಯ ಕೆಲೆ ನಾ.
ಕಳಸೋ ಉದಕಾಂತ ಬುಡತರೀ,
ಖಾಲಿ ಯೆವೂಂಕ ಸಾಧ್ಯ ನಾ
ಸಬಾರ ಪಂತಾ ಹೆಂ ಘಡಲಾಂ
ಆರತಾಂ ಪಿಶ್ಶೆಂ ಭಯಂಕರ ಮಾತ್ತೇರ ಚಡಲಾಂ
ಕೋಣ ಕಿತೆಂ ಕೆಲ್ಯಾರ
ಮಾಧ್ಯಮ ಘಾಂಟಿತಾ ಕೊಡಿಯಾಲಾಚೆ
ಮೊವಾಳ ಅಂತಃಕರಣ್
ಹಾಕಾ ಫಕತ ಏಕ ವಕ್ಕದ
ಹ್ಯಾ ಸೂಣ್ಯಾಂಗೆಲೆ ನಿರ್ಭೀಜೀಕರಣ್...
-ವೆಂಕಟೇಶ ನಾಯಕ್