ಸಂಪಾದಕೀಯ್:
ಗಾಂವ್ಚೆ ಮಾತಿಯೆಚೆರ್ ತಿಬೊ ಲಾಗ್ತಾನಾ, ಉತ್ರಾಂ ಉಚಾಂಬಳ್ ಜಾತಾತ್
ಗೊಡ್‌ಫ್ರಿ ಡಿ’ಸಿಲ್ವ ಗಾಂವಾನ್ ಪಡೀಲ್ಚೊ. ಪುಣ್ ರಾವ್ತಾ ಕುವೈಟಾಂತ್. ಕುವೈಟಾಂತ್ ಆಸಾ ತರೀ ಆಪ್ಣಾಚ್ಯಾ ಗಾಂವ್ಚೆ ಮಾತಿಯೆಚೆರ್ ತಿಬೊ ಲಾಗ್ತಾನಾ ತೊ ವೊಗೊ ಬಸನಾ. ತಿಂತೇರ್ ಹಾತಿಂ ಧರ‍್ತಾ ಆನಿ ಕಾಳ್ಜಾಂತ್ಲ್ಯಾ, ಮನಾಂತ್ಲ್ಯಾ ಭೊಗ್ಣಾಂಕ್ ಉತ್ರಾಂಚೆಂ ರೂಪ್ ದೀವ್ನ್ ಕವಿತಾ ವಿಣ್ತಾ.
ಎಕೆಕ್ಲ್ಯಾ ವ್ಯಕ್ತಿನ್ ಎಕೆಕ್ ರಿತಿನ್ ಆಪ್ಲಿಂ ಅಭಿವ್ಯಕ್ತಿ ವ್ಯಕ್ತ್ ಕರುಂಕ್ ಜಾತಾ. ಗೊಡ್‌ಫ್ರಿನ್ ಕವಿತಾದ್ವಾರಿಂ ಕೆಲ್ಯಾ. ಅಭಿವ್ಯಕ್ತಿ ಫಾವೊತೆ ರಿತಿನ್ ಪರ್ಗಟ್ ಜಾಲ್ಯಾ ಯಾ ನಾ ಮ್ಹಳ್ಳಿ ಗಜಾಲ್ ಆಸಾ. ತರೀ ಅಭಿವ್ಯಕ್ತಿ ಕರಿನಾತಲ್ಲ್ಯಾಂಚ್ಯಾಕಿ, ಅಭಿವ್ಯಕ್ತಿ ಪರ್ಗಟ್ ಕೆಲ್ಲೆ ಮನೀಸ್ ಮುಕ್ಲೆ ಪಂಗ್ತಿರ್ ಕೆದಳಾಯ್ ಸೊಭೊಂಕ್ ಫಾವೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರೈಟ್ ಪೋಯ್ ಪಡೀಲ್
ಬಿರ್ಬಿರ‍್ಯಾ ಪಾವ್ಸಾನಿಮ್ತಿಂ ತಕ್ಲಿ ಮ್ಹಜಿ ಫಿರ‍್ಲಿ
ಮೊರ್ನಿಂಗ್ ಮಿಸ್ಟ್ ಕರಾಳ್ ಘಡಿತ್ ಚಿಂತ್ನಾಂ ಮನಾಂತ್ ಜಿರ‍್ಲಿಂ
ಚುರುಕ್ ಜಾಲಿ ಮತ್ ಮ್ಹಜಿ, ಉತ್ರಾಂ ಉಮಾಳೊನ್ ಆಯ್ಲಿಂ
ಖಬ್ರೆ ಗಾಂಚ್ ಗುಂತುನ್ ಗುಂತುನ್ ಕವಿತಾ ಹಾಂವೆಂ ರಚ್ಲಿ
ರೈಟ್ ಪೋಯ್ ರೈಟ್ ಪೋಯ್ ಹಂಪನ್‌ಕಟ್ಟಾ ಪಡೀಲ್
ಮೊರ್ನಿಂಗ್ ಮಿಸ್ಟ್ ಹೋಮ್ ಸ್ಟೇ ಬಡ್ಲಾ ಗುಡ್ಡಿ ಪಡೀಲ್
ಬೆಜಾರ್ ಜಾತಾ ಸಾಂಗೊಂಕ್ ಮ್ಹಾಕಾ, ಮ್ಹಜೆ ಬಗ್ಲೆಚೆಂ ಶೆಜಾರ್
ವಿಜ್ಮಿತ್ ಪಾವ್ಲೊಂ ಸಕಾಳಿಂ ಫುಡೆಂ ಆಯ್ಕೊನ್ ತಾಜಾ ಖಬರ್
ಜಾಂವ್ದಿ ತಿ ಬರ್ತ್‌ಡೇ ಪಾರ್ಟಿ ಯಾ ಕಸಲೋಯ್ ಸಂಭ್ರಮ್
ನ್ಹಯ್‌ಗಿ ತೆಂ ಗೂಂಡಾಂಚೆಂ ಅಮಾನುಷ್ ಅಕ್ರಮ್
ಕೊಣೆ ದಿಲಿ ಪರ್ವಣ್ಗಿ ತಾಂಕಾಂ ಕರುಂಕ್ ಹಿ ತನ್ಕಿ
ಕಾನೂನ್ ಖುದ್ದ್ ಹಾತಿಂ ಘೆವ್ನ್ ಪ್ರಜಾಸತ್ತೆಕ್ ಅಣ್ಕಿ
ಜರ್ನಲಿಸ್ಟ್ ಆಯ್ಲೆ ಪೊಲೀಸ್ ಜಮ್ಲೆ ಲೋಕ್ ಜಮ್ಲೊ ಸಭಾರ್
ಪಡೀಲ್ ಗಾಜ್ಲೆಂ ದೇಶಿ ವಿದೇಶಿ ಕರುನ್ ನಾಂವ್ ಅಂತರ್‌ಜಾಳಿರ್
ಪೇಪರಾಂಚೊ ಜಾಲೊ ಭೊರಾನ್ ವಿಕ್ರೊ ಖಬ್ರೊ ಛಾಪುನ್ ಹಜಾರ್
ಲೋಕ್ ಜಾಲೊ, ಎಕ್ದಮ್ ಹುಶ್ಯಾರ್ ಆರಾವ್ನ್ ನೆರಾವ್ನ್ ಖಬರ್
ಫುಡಾರಿ ಆಯ್ಲೆ ಭೆಟ್ ದೀವ್ನ್ ಗೆಲೆ, ದೀವ್ನ್ ಭರ್ವಸೊ ತೀಕ್ಷ್ಣ್
ಅಕ್ರಮ್ಯಾಂಕ್ ಧರುಂಕ್ ಜಾಯ್ ಶಿಕ್ಷಾ ಜಾಂವ್ಕ್ ಜಾಯ್ ಕಠಿಣ್
ಮಂಜುಳಾ ಆಯ್ಲಿ ವರ್ದಿ ದಿಲಿ ಮಾರ್ಲೆಂ ಗುಮಟ್ ಉಳ್ಟೆಂ
ಶ್ಹಾಮಿನಾ ಮ್ಹಣ್ತಾ ಚೂಕ್ ಕಾಂಯ್ ಮೆಳ್ನಾ ಮಂಜುಳಾನ್ ಮ್ಹಳ್ಳೆಂ ಭೆಷ್ಟೆಂ
ಪಾಂಚ್ ಬೊಟಾಂ ಜರ್ತರ್ ಸಾಂಗಾತಾ ಮೆಳ್ಳಿಂ ಜಾತಾ ಬರಿ ಮೂಟ್
ಯೆಂವ್ಚಿನಾ ಕೆದಳಾಯ್ ಆಮ್ಚ್ಯಾ ತ್ಯಾ ಎಕ್ವಟಾಕ್ ಫುಟ್
ಕಮರ್ ಬಾಂಧುನ್ ಉಬಿಂ ಜಾಂವ್ಯಾಂ, ಠರಾವ್ನ್ ಏಕ್ ರೀತ್
ಎಕ್ವಟಾಕ್ ಆಮ್ಚ್ಯಾ ಕಂಗಾಲ್ ಜಾವ್ನ್ ಲಾಬೊಂವ್ದಿ ಸರ್ಕಾರ್ ನೀತ್
-ಗೊಡ್‌ಫ್ರಿ ಡಿ’ಸಿಲ್ವ