ಸಂಪಾದಕೀಯ್:
ಆಯ್ಚೊ ಆವಾಜ್ ಫಾಲ್ಯಾಂ ತರೀ ಆಯ್ಕೊಂಕ್ ಮೆಳ್ತಲೊ
ಹಿಂ ಘಡಿತಾಂ ಜೀಜಸ್ ಆಸ್ತಾನಾಂಯ್ ಘಡ್ಲ್ಯಾಂತ್. ರಾಮಾಯಾಣಾಂತ್, ಆನಿ ಮಹಾಭಾರತಾಂತಯ್ ಘಡ್ಲ್ಯಾಂತ್. ಹರ್‍ಯೆಕಾ ಕಾಳಾರ್ ಕೊಣ್ ನಾ ಕೊಣ್, ಹಿಂ ಘಡಿತಾಂ ಘಡ್ತಾನಾ ತಿಂ ಫುಡ್ ಕರುಂಕ್ ಹರ್ಧೆಂ ದೀವ್ನ್ ರಾವ್ಲ್ಯಾಂತ್. ಆಜಯ್, ಹೋಮ್ ಸ್ಟೇ ಪ್ರಕರಣ್, ಪಬ್ ಪ್ರಕರಣ್, ಚರ್ಚ್ ಎಟ್ಯಾಕ್ ತಸಲಿಂ ಘಡಿತಾಂ ಘಡ್ತಾನಾ, ಎಕಾ ಮನಾಚೆ ಮನೀಸ್ ಲಾಗಿಂ ಯೆತಾತ್ ಆನಿ ಆವಾಜ್ ಉಟಯ್ತಾತ್. ತೊ ಆವಾಜ್ ಕೊಣ್ ಆಯ್ಕತಾ ಮ್ಹಳ್ಳೆಂ ಗರ್ಜ್ ನ್ಹಯ್. ಆಯ್ಚೊ ಆವಾಜ್, ಫಾಲ್ಯಾಂ ತರೀ ಆಯ್ಕೊಂಕ್ ಮೆಳ್ತಲೊ ಮ್ಹಳ್ಳೊ ಭರ್‍ವಸೊ ಗರ್ಜೆಚೊ.
ಕವಿ ಸೈತ್ ಹೆಚ್ ಪಂಗ್ತಿಂತ್ ಆಸಾತ್. ತುಮಿ ಕಾಂಯ್ ಪಂಚ್ವಿಸಾಂಕ್ ಮಿಕ್ವೊನ್ ಕವಿಂನಿ ಹೊ ಆವಾಜ್ ಉಟಯ್ಲಾ. ಕೊಂಕಣಿ ಕಾವ್ಯಶೆತಾಂತ್ ನವಿ ಏಕ್ ವಾಟ್ ತುಮಿ ರುತಾ ಕೆಲ್ಯಾ. ಎಕಾ ಸಾಮಾಜಿಕ್ ಘಡಿತಾಕ್ ತುಮಿ ಸ್ಪಂದನ್ ಜಾಲ್ಲಿ ರೀತ್ ಶಾಭಾಸ್ಕೆಚಿ. ತುಮ್ಚೆ ಮತಿಂತ್ ಕಿತೆಂ ಶಿಜೊನ್ ಆಸಾ, ತೆಂ ಸಂಸಾರಾಕ್ ತುಮಿ ಕಳಯ್ಲಾಂ.
ತುಮ್ಕಾಂ ಸರ್ವಾಂಕ್ ಮಾನ್ ಬಾಗಾಯ್ತಾನಾ, ಎಂಟನಿ ಬಾರ್ಕೂರಾಚ್ಯಾ ಹ್ಯಾ ಕವಿತಾ ಸಾಂಗಾತಾ ಕವಿತಾ ಕುಳಾರಾಂತ್ಲಿ ಹಿ ಏಕ್ ಚಳುವಳೆಚಿ ಶಿಂಕಳ್ ಸಂಪಯ್ತಾಂವ್. ಸಮಾಜಾಂತ್ ಜಾಯ್ತ್ಯೊ ಗಜಾಲಿ ಘಡ್ಟೇ ಆಸ್ತಾತ್. ತುಮಿ ವೊಗೆಂ ಬಸ್ಚೆಂ ನ್ಹಯ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಾತರ್ ಆನಿ ಗೀಟ್
ಖಣಿಯೆಂತ್ ಪಡ್ಲ್ಯಾರ್, ಜಣಾಕ್ ಏಕ್ ಫಾತರ್
ತಾಂಚೆ ಹಾತಿಂ ಫಾತರ್, ಆಮಿ ದಿಂಬ್ಯೆರ್;
ಮುಸ್ಕರ್ ಫುಟೊನ್ ತೀರ್ ಜಾಂವ್ಚ್ಯಾ ಫುಡೆಂ,
ಕಾತ್ ರಗತ್ ಏಕ್ ಜಾಂವ್ಚ್ಯಾ ಫುಡೆಂ,
ತಾಂಚೆ ಮುಕಾರ್ ಏಕ್ ಗೀಟ್ ವೊಡುಂಕ್, ಸೊಮ್ಯಾ ತುಂ ದೆಂವೊನ್ ಯೆ;
ಧಾಂವೊನ್ ಯೆ.
ಬರಯ್ ಧರ್ಣಿರ್, ತಾಂಚೆಚ್ ಘುಟ್;
ಕಾಳ್ಜಾಕ್ ತೊಪುಂ, ಭಿತರ‍್ಲಿ ಫುಟ್
ಹೆರಾಂಚ್ಯಾ ದೊಳ್ಯಾಂತ್ಲೆಂ ಕಿಸರ್ ಕಾಡ್ಚ್ಯಾ ಫುಡೆಂ,
ಕಾಡುಂಕ್ ಶಿಕಯ್ ಅಪ್ಲ್ಯಾಚ್ ದೊಳ್ಯಾಂತ್ಲೆಂ ಆಡೆಂ.
ಪಾಲಂವ್ ಧರ್ಲ್ಯಾ, ದೊಳೆ ಹರ್ದ್ಯಾರ್,
ಎಕೊಡೆಂ ವಸ್ತುರ್, ಕಾಪಡ್ ವೊಡ್ಚಿ ದಸ್ತುರ್,
ಭೊಂವ್ತಿ ಬಸ್ಲ್ಯಾತ್ ಆಮ್ಚೆ ಪಾಂಡು ಕುಮಾರ್;
ಕಾಪಡ್ ಹೊಗ್ಡಾವ್ನ್ ವಿಣ್ಗೆಂ ಜಾಂವ್ಚ್ಯಾ ಫುಡೆಂ
ಪುರುಷ್ ನದರ್ ಆಂಗಾರ್ ಖೆಳ್ಚ್ಯಾ ಫುಡೆಂ
ಸೊಮ್ಯಾ ಪಾವ್, ತುಜ್ಯಾ ಇಷ್ಟಾ ಕೃಷ್ಣಾಕ್ ಘೆವುನ್ ಯೆ.
ಕಿತ್ಯಾಕ್ ಪಾವ್ಲ್ಯಾಂ ಹ್ಯಾ ಅಶೋಕ ವನಾಕ್?
ಕಸಲಿ ಲಕ್ಷ್ಮಣ್ ರೇಖಾ ದಾಂಟ್ಲಿ ಹಾಂವೆಂ?
ಧಾ ಜಿಬೆ ರಾಕ್ಸಾಂ ಹಾತಿಂ ಫಾಪ್ಸುಂಚ್ಯಾ ಫುಡೆಂ,
ಲಜೆನ್ ಹಾಂವೆಂಚ್ ಧರ್ಣಿಂತ್ ಲಿಪ್ಚ್ಯಾ ಫುಡೆಂ,
ರಾಕುಂಕ್ ಮ್ಹಾಕಾ ತುಂಚ್ ಯೆ ಯಾ ಹನುಮಾಕ್ ತರೀ ಧಾಡ್;
ಮ್ಹಾಕಾ ಮಾತ್ರ್ ಹೆ ಬಂಧಡಿಂತ್ಲೆಂ ಕಾಡ್.
ಹಾತಾ ಫಾತರ್ ಗಳೊನ್ ಪಡೊಂ;
ಪಾಲಂವ್ ಮ್ಹಜೊ ಹರ್ದ್ಯಾರ್ ಉರೊಂ;
ಸನ್ನೆಶಿಂ ದೀಷ್ಟ್ ಭಿಯೆವ್ನ್ ಪೊಳುಂ;
ಉಸ್ವಾಸ್ ಮ್ಹಜೊ ಸುಢಾಳ್ ವ್ಹಾಳುಂ.
-ಎಂಟನಿ ಬಾರ್ಕೂರ್