ಕವಿತಾಂಚೊ ವ್ಹಾಳೊ - ಅನ್ಭೊಗಾಚೊ ದಾಳೊ
-ನಾನು ಮರೋಲ್, ತೊಟ್ಟಾಮ್
ಪಾಟ್ಲ್ಯಾ ದಿಸಾಂನಿ ಕವಿತಾ ಕುಳಾರಾಕ್ ಸಜಯಿಲ್ಲ್ಯೊ ಕವಿತಾ ನಾಮ್ಣೆಚ್ಯಾ ಆನಿ ಉಂಚ್ಲ್ಯಾ ವಿಚಾರ್ಧಾರಾಂನಿ ಭರ್ಲ್ಲ್ಯಾ ಚಿಂತ್ಪಾಚ್ಯಾ ಕವಿಂನಿ ಸಜಯಿಲ್ಲ್ಯೊ ಆಸ್ತಾಂ ಎಕಾ ಪಾಟ್ಲ್ಯಾನ್ ಏಕ್ ಮ್ಹಳ್ಳ್ಯಾಬರಿ ವಾಚ್ಪ್ಯಾಂಕ್ ಕವಿತಾಂಚೆಂ ಅಮೃತ್ಚ್ ಸೆಂವ್ಕ್ ಮೆಳ್ಳೆಂ. ನವ್ಯಾ ಕವಿ / ಕವಯಿತ್ರಿಂಚಿ ಝಳಕ್ ನಾತ್ಲ್ಲ್ಯಾಚೆಂ ಉಣೆಪಣ್ ದಿಸ್ತಾಲೆಂ ತರೀ, ಅನುಭವಾಚೆ ಸರ್ತೆನ್ ಪಳಯ್ಲ್ಯಾರ್ ಫಾಯ್ಸ್ ಜಾಲ್ಲ್ಯೊ ಹ್ಯೊ ಸರ್ವ್ ಕವಿತಾ, ಕವಿತಾ ಲಿಖ್ತೆಲ್ಯಾಂಕ್ ಏಕ್ ಉಂಚ್ಲಿ ಮಾರ್ಗದರ್ಶಿ ಜಾತಲಿ ಮ್ಹಣ್ಚ್ಯಾಂತ್ ಕಿತೆಂಚ್ ದುಭಾವ್ ಮ್ಹಜ್ಯಾ ಮನಾಂತ್ ನಾತ್ಲ್ಲ್ಯಾ ವೆಳಾರ್ ವ್ಹಾಳ್ಲ್ಲಿಂ ಮ್ಹಜಿಂ ಚಿಂತ್ನಾಂ......
ಜೊನಿ ಸುರತ್ಕಲ್
ಹರ್ಯೆಕ್ ಕೊಂಕ್ಣಿ ಮೊಗಿಚೆಂ 'ರುದಾನ್' ಕೊಂಕ್ಣೆಂತ್ಲೊ ಮ್ಹಾಲ್ಘಡೊ ವಾವ್ರಾಡಿ ಜೊನಿ ಸುರತ್ಕಲ್ ಹಾಣೆ ಪರ್ತುನ್ ಪರ್ತುನ್ ಕಾಳ್ಜಾಕ್ ಆಪ್ಟಾ ಸಾರ್ಕೆಂ ವಿವರ್ಶಿಲಾಂ. ವಿಂಚ್ಲ್ಲೊ ವಿಶಯ್ ಪರ್ನೊ ತರೀ, ವಿಂಚ್ಲ್ಲಿಂ ಉತ್ರಾಂ ಆಪುರ್ಬಾಯೆಚಿಂ. ಕವಿತಾಂತ್ ವಿಶೇಸ್ ಸಜವ್ಣಿ ನಾ ತರೀ ಮಾಸ್ಳೆ ಕಡಿಯೆ ಸಂಗಿಂ ರುಚಿಕ್ ಪೇಜ್ ಆನಿ ಚೆಟ್ಣಿ, ಪಿಜ್ಜಾ ಆನಿ ಬರ್ಗಾರಾಂಚ್ಯಾಕಿ ಕಿತ್ಲಿ ಆಪುರ್ಬಾಯೆಚಿ ಆನಿ ಉಂಚ್ಲಿ, ತಶೆಂಚ್ ಅಂಕಲ್ ಮ್ಹಣೊನ್ ಉಲೊ ಕರುನ್ ಉಪ್ರಾಂತ್ "ಹೌ ಹಿ ಈಸ್ ಯುವರ್ ಆಂಕಲ್?" ಮ್ಹಳ್ಳೆಂ ಆನ್ಯೇಕ್ ಸವಾಲ್ ಉಬೆಂ ಕರ್ಚ್ಯಾ ಬದ್ಲಾಕ್ "ಬಾಪ್ಪು" ಆನಿ "ಮಾಮಿ" ಮ್ಹಳ್ಳೆ ಎಕಾ ಉತ್ರಾಚೆ ಗೊಡ್ಶೆ ಸಬ್ದ್ ಕಶೆಂ ಆಮ್ಚೆ ಸಂಸ್ಕೃತೆಚೆಂ ಆನಿ ಭಾಶೆಚೆಂ ಮಹತ್ವ್ ಸಾಂಗ್ತಾತ್ ತೆಂ ಕವಿನ್ ಭೋವ್ ನಾಜೂಕ್ ರಿತಿನ್ ವರ್ಣುನ್, ಎಕಾಚ್ ಉತ್ರಾನ್ ಇಂಗ್ಲಿಷ್ ಮರ್ಜಿ ಉಂಚ್ಲಿ ಮ್ಹಣೊನ್ ಭಾಸ್ತಲ್ಯಾಂಕ್, ಉದ್ದೇಶ್ ಸಮ್ಜನಾಸ್ತಾನಾ ಲಿಪಿ ಪಾಟ್ಲ್ಯಾನ್ ಝಗಡ್ತಲ್ಯಾಂಕ್ ಜೊಕ್ತಿ ಜಾಪ್ ದಿಲ್ಯಾ.
ಕ್ಲಾರಾ ಫೆರ್ನಾಂಡಿಸ್
ಕ್ಲಾರಾ ಫೆರ್ನಾಂಡಿಸ್ ಹಿಚೆಂ "ವಿಧವ್", ಪುರುಷ್ ಪ್ರಧಾನ್ ಸಮಾಜೆನ್ ಆಪ್ಲ್ಯಾ ಪಾಯ್ದ್ಯಾಂಖಾತಿರ್ ರುತಾ ಕೆಲ್ಲ್ಯಾ ಸ್ವಾರ್ಥಿ ರಿತಿ ರಿವಾಜೆಂಕ್ ಧರ್ಲ್ಲೊ ಆರ್ಸೊ. ಕವಯಿತ್ರಿ ನ್ಹಯಿಂಚ್ ಬಗರ್ ಏಕ್ ವಿಧವ್ ಸ್ತ್ರೀಯೆಚಿಂ ಆಂತರಿಕ್ ಭೊಗ್ಣಾಂ, ಉದ್ವೇಗ್ ಆನಿ ಕಳ್ವಳೆ ವಾಚ್ಪ್ಯಾಂ ಮುಕಾರ್ ಉಬೆ ಕರ್ಚ್ಯಾಂತ್ ಸಫಲ್ ಜಾಲ್ಯಾ, ಆಕ್ರೇಕ್ ಕಾಜಾರಿ ಸಾಕ್ರಾಮೆಂತಾಂತ್ ಎಕ್ವಟೊಂಕ್ ಆಶೆನಾಂತ್ ಕಿತ್ಯಾಕ್ ಆಪುಣ್ ಏಕ್ ವಿಧವ್ ಮ್ಹಣೊನ್ ಸಾಂಗೊನ್ ಆಮ್ಚೆ ಸಮಾಜೆಂತ್ಲ್ಯಾ ಕುಡ್ಡ್ಯಾ ರಿತಿ ರಿವಾಜಿಂಕ್ ಕಾನ್ಸುಲಾರ್ ವ್ಹಾಜಯಿಲ್ಲ್ಯಾಬರಿ ವ್ಹಾಜಯ್ಲಾಂ.
ಎಚ್ಚೆಮ್ ಪೆರ್ನಾಳ್
ಎಚ್ಚೆಮ್ ಪೆರ್ನಾಳ್ ಹಾಣೆ "ರಾಯಾಚೆಂ ರಡ್ಣೆಂ" ಮಾರಿಫಾತ್, ತಾಚ್ಯಾ ಇತರ್ ಕವಿತಾಂ ಬರಿ ಆನ್ಯೇಕ್ ಗೊಡ್ಶ್ಯಾ ಸಬ್ದಾಂಚೆಂ ಭಂಡಾರ್ಚ್ ಉಗ್ತೆಂ ದವರ್ಲಾಂ. ತ್ಯಾ ತಾಚ್ಯಾ ಸಬ್ಧಾಂನಿ ಸಕಾಳಿಂಚ್ಯಾ ಥಂಡ್ ವಾರ್ಯಾಚಿ ದಾದೊಸ್ಕಾಯ್ ಆಸಾ, ಮ್ಹೊಂವಾಚಿ ಗೊಡ್ಸಾಣ್ ಆಸಾ. ಕೊಂಕ್ಣೆಂತ್ ಕಿತ್ಲೆ ಗ್ರೇಸ್ತ್ ಆನಿ ಉಂಚ್ಲೆ ಸಬ್ದ್ ಆಸಾತ್ ಮ್ಹಣ್ಚ್ಯಾಕ್ ಹಿ ಕವಿತಾ ಏಕ್ ಉದಾಹರಣ್. ಸಬ್ದಾಂಚಿ ಮಾಂಡಾವಳ್ ಕರುಂಕ್ ಪಳೆಂವ್ಚ್ಯಾ ತರ್ನ್ಯಾ ಆನಿ ನವ್ಯಾ ಕವಿಂಕ್ ಬರಿಚ್ ಮಾರ್ಗದರ್ಶಿತ್ ಕವಿತಾ. ಹಿ ಕವಿತಾ ಮೊಗಾಂತ್ ಸಲ್ವೊನ್ ನಿರಾಸ್ಪಣಾಕ್ ವೆಂಗ್ತಾ ತರೀ ಉತ್ರಾಂಚಿ ಸೊಭಾಯ್ ಸರ್ವ್ ಮ್ಹಜ್ಯಾ ಚಿಂತ್ನಾಂಕ್ ಪಯ್ಸ್ ಕಾಡ್ನ್ ಉಡಯ್ತಾ.
ವಿತೊರಿ ಕಾರ್ಕಳ್
ವಿತೊರಿ ಕಾರ್ಕಳ್ಚೆಂ "ಕವಿ ಜಾಂವ್ಚಿ ಶೋರ್ಟ್ ಕಟ್ ವಾಟ್" ಕೊಂಕ್ಣಿ ಸಾಹಿತ್ಯಾಂತ್ ಆಜ್-ಕಾಲ್ ಚಲೊನ್ ಆಸ್ಚ್ಯಾ ಬುರ್ಶ್ಯಾ ರಾಜಕೀಯಾಚೆ ಸಭಾರ್ ಆರ್ಸೆ ಜಾವ್ನಾಸಾತ್. ಪ್ರಶಸ್ತ್ಯಾಂ ಪಾಟ್ಲ್ಯಾನ್ ಚಲೊನ್ ಆಸ್ಚ್ಯಾ ದೊಂಬರಾಟಾಚೆಂ ನೀಜ್ ರೂಪ್ ಕವಿನ್ ವಾಚ್ಪ್ಯಾಂ ಮುಕಾರ್ ಉಬೆಂ ಕೆಲಾಂ. ಪುಣ್ ಕವಿನ್ ಥೊಡ್ಯಾ ಕವಿಂಚ್ಯಾ (ಸ್ವಘೋಷಿತ್ ಮಹಾನ್) ಹಣೆ ಬರ್ಪಾಂಕ್ ಲಾಗೊನ್ ಸರ್ವ್ ಕವಿಂಕ್ ಏಕ್ಚ್ ಸಾಂಗಾತಾ ಉಬೆಂ ಕೆಲ್ಲೆಂ ಪಳೆಯ್ತಾನಾ ಕವಿನ್ ಖಂಯ್ಗಿ ತಾಚ್ಯಾ ಭರ್ಪೂರ್ ವಾವ್ರಾಂತ್ ಬರೊಚ್ ಮಾರ್ ಖಾವ್ನ್ ತೊ ನಿರಾಶೆನ್ ಕಾಂಟಾಳೊನ್ ಗೆಲಾ ತಶೆಂ ಸಮ್ಜತಾ.
ಮನು ಬಾಹ್ರೇನ್
ಮನು ಬಾಹ್ರೇಯ್ನಾಚೊ "ಸಕಾಳಿಂಚೊ ವೇಳ್" ಆನ್ಯೇಕ್ ಸುಂದರ್ ಕವಿತಾ. ಪ್ರಕ್ರತಿ, ರಾನಾಂ-ಬೊಲಿಂ ಮ್ಹಣ್ತಾನಾ ತಾಂಚಿ ಸೊಭಾಯ್ ಮನುಚ್ಯಾಕ್ಯ್ ಉತ್ತೀಮ್ ಕರುನ್ ಕೊಣ್ ವರ್ಣುಂಕ್ ಸಕತ್? ಕೊಂಕ್ಣಿ ಸಂಸಾರಾಂತ್ ಆಜ್ ರಾನ್-ಬೊಲಿಂ ಆನಿ ಪರಿಸರ್ ಮ್ಹಳ್ಯಾರ್ ಮನುಚೆಂ ಕೊಪಿ-ರೈಟ್ ಹಕ್ಕ್ ತಶೆಂ ಜಾವ್ನ್ ಗೆಲಾಂ. ಆನಿ ಹ್ಯಾ ಮ್ಹಜ್ಯಾ ಚಿಂತ್ನಾಂಕ್ ಸತ್ ಕರುಂಕ್ ಮ್ಹಣ್ಚ್ಯಾ ಬರಿ ಪ್ರಸ್ತುತ್ ಕೆಲ್ಲಿ ಕವಿತಾ "ಸಕಾಳಿಂಚೊ ವೇಳ್" ತೊ ಕಿತ್ಲೊ ಸೊಭಿತ್ ಆನಿ ತಾಚೆಂ ಮಹತ್ವ್ ಕಿತ್ಲೆಂ ವಿಶೇಷ್ ತೆಂ ಸುಂದರ್ ರಿತಿನ್ ವರ್ಣಿಲಾಂ ಮಾತ್ರ್ ನ್ಹಯ್, ತರ್ನಾಟ್ಯಾ ಚಲಿಯಾಂಕ್ ಸೊಭಿತ್ ಆನಿ ಸೂಕ್ಷ್ಮ್ ರಿತಿನ್ ಭೊಂವರ್ ಎಕ್ಲೊ ಘುಂವೊನ್ ಅಮೃತ್ ತುಮ್ಚೆಂ ಚಿಂವ್ತಾ, ಸಾಂಜೆಚೊ ವೇಳ್ ಯೆತಾನಾ ಕಿತ್ಯಾಕ್ ಬಾವೊಂಕ್ ಲಾಗ್ಲ್ಯಾತ್ ಮ್ಹಣೊನ್ ಜಾಗ್ರುತ್ಕಾಯ್ ದೀಂವ್ಕ್ ಸಯ್ತ್ ವಿಸ್ರೊಂಕ್ ನಾ.
ಅನಿಲ್ ಪೆರ್ನಾಳ್
ಅನಿಲ್ ಪೆರ್ನಾಳ್ಚೆಂ "ಅಸ್ಮಿತಾಯ್", ಸುರ್ಯಾಕ್ ಪ್ರತಿಮಾ ರುಪಿಂ ಘೆವ್ನ್ ಉಬೆಂ ಕೆಲ್ಲಿ ಕವಿತಾ ಆಮ್ಚ್ಯಾ ಜಿವಿತಾಚೆ ಹರ್ಯೆಕ್ ಪಾಂವ್ಡೆ ವಾಚ್ಪ್ಯಾಂ ಮುಕಾರ್ ಉಬೆ ಕರ್ಚ್ಯಾಂತ್ ಯಶಸ್ವಿ ಜಾಲಾಂ. ಎಕಾ ಮನ್ಶಾಚೆಂ ಖಂಯ್ಚೆಯ್ ರಿತಿನ್ ತುಲನ್ ಕರುಂಕ್ ಕೊಣಾಕಿ ಸಾದ್ಯ್ ನಾ, ಕಿತ್ಯಾಕ್ ಫಾಲ್ಯಾಂ ಆಪ್ಣಾಕ್ ಖಂಯ್ಚೊ ದೀಸ್, ಖಂಯ್ಚೆಂ ನಶೀಬ್ ರಾಕೊನ್ ಆಸಾ ತೆಂ ಕೊಣ್ಚ್ ನೆಣಾ ಮ್ಹಣೊನ್ ಕವಿನ್ ಸುಂದರ್ ರಿತಿನ್ ವರ್ಣಿಲಾಂ.
ಸ್ಟೀವನ್ ಕ್ವಾಡ್ರಸ್, ಪೆರ್ಮುದೆ
ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ ಹಾಚೆಂ "ಪಾಳ್ಣ್ಯಾ ಆಂಗ್ಡಿಂನಿ" ಆಮ್ಚೆ ಸಮಾಜೆಂತ್ಲ್ಯಾ ಧಾರ್ಮಿಕ್ ವರ್ಗಾಕ್ ಧರ್ಲ್ಲೊ ಆರ್ಸೊ. ಆಪ್ಣಾಕ್ ಭೊಗ್ಲ್ಲೆಂ ಖಡಕ್ಕ್ ಆನಿ ಶೀದಾ ಉತ್ರಾಂನಿ ಸಾಂಗ್ಚ್ಯಾ ಸ್ಟೀವನಾಚ್ಯಾ ಹರ್ಶೆಂಚ್ಯಾ ಸ್ವಭಾವಾಕ್ ಹಿ ಕವಿತಾ ಬಿಲ್ಕುಲ್ ಸೊಡ್ನ್ ದೀನಾ. ಆಮ್ಚೆ ಸಮಾಜೆಂತ್ ಧಾರ್ಮಿಕ್ ವರ್ಗಾನ್ ರಚುನ್ ಘಾಲ್ಚ್ಯಾ ತಫಾವತಾಕ್ ತಶೆಂಚ್ ಬುರ್ಶ್ಯಾ ರಾಜಕೀಯಾಕ್ ಯಶಸ್ವಿ ರಿತಿನ್ ಆರ್ಸೊ ಧರುನ್ ತಿಂ ರುಪಾಂ ಸಮಾಜೆಕ್ ದಾಕವ್ನ್ ದಿಲ್ಯಾಂತ್.
ನಾನುಚ್ಯಾ ಸಾಣ್ಯಾರ್ ಕವಿತಾ