ಕವಿತಾ ಕುಳಾರಾಂತ್ ದುಖಿ ಆತ್ಮೆ
ನಾನು ಮರೋಲ್, ತೊಟ್ಟಾಮ್
ಪಾಟ್ಲ್ಯಾ ದಿಸಾಂನಿ ಫಾಯ್ಸ್ ಜಾಲ್ಲಿಂ ಥೊಡಿಂ ಕವಿತಾಂ ವಾಚ್ತಾನಾ ಮ್ಹಾಕಾ ಭೊಗ್ತಾ 'ಕವಿತಾ ಕುಳಾರಾ'ಂತ್ ಖಂಯ್ ದುಖಿ ಅತ್ಮೆ ಪ್ರವೇಶ್ ಜಾಲ್ಯಾತ್ಗಾಯ್ ಮ್ಹಣೊನ್. ಆಮ್ಚೆ ಕವಿ ಕಿತ್ಯಾಕ್ ಉಲ್ಲಾಸಾನ್ ಆಸನಾಂತ್ ಮ್ಹಳ್ಳೆಂಚ್ ಯಕ್ಷ್ ಪ್ರಶ್ನ್ ಮ್ಹಜ್ಯಾ ಮುಖಾರ್ ಪರ್ತ್ಯಾನ್ ಪರ್ತೆ ಉಬೆಂ ಜಾತಾ. ದುಖಿಚೆಂ ವಿಧಾನ್ ಮ್ಹಣೊಂಕ್ ಕವಿತಾ ಏಕ್ ಸೊಂಪಿ ವಾಟ್ಗಾಯ್ ಮ್ಹಣೊನ್ ಮ್ಹಾಕಾಚ್ ಸವಾಲ್ ಕರುನ್ ಆಸ್ಲ್ಲ್ಯಾ ಮ್ಹಜ್ಯಾ ಚಿಂತ್ಪಾ ಥಾವ್ನ್ ಭಾಯ್ರ್ ಹಾಡ್ಚೆಂ ಥೊಡೆಂ ಪ್ರಯತ್ನ್ ಹೆರ್ ಕವಿಂನಿ ಕೆಲಾಂ. ಅಶೆಂ ಮ್ಹಜ್ಯಾ ದೊಳ್ಯಾಂಕ್ ಪಡ್ಲ್ಲಿಂ ಥೊಡಿಂ ಕವಿತಾ ತುಮ್ಚೆ ಮುಖಾರ್ ಉಗ್ತಾಯ್ತಾನಾ:
ಚಡ್ ಆವಾಜ್ ಉಟಯ್ನಾಸ್ತಾನಾ ಯಾ ನಾಂವಾಂ ಪಾಟ್ಲ್ಯಾನ್ ಧಾಂವನಾಸ್ತಾನಾ ಉಂಚ್ಲ್ಯಾ ಉತ್ರಾಂನಿ ಸೊಭಿತ್ ಕವಿತಾ ಲಿಖ್ಚೊ, ಆರ್ವಿಲ್ಯಾ ದಿಸಾಂನಿ ಭರ್ವಶ್ಯಾಚಿಂ ಕಿರ್ಣಾಂ ಫಾಂಕವ್ನ್ ವಾದಾಳ್ ಉಟವ್ನ್ ಆಸ್ಲ್ಲೊ ಕವಿ ಮ್ಹಳ್ಯಾರ್ ಪಿ.ಜೆ.ಕರುಗಳ್ನಡೆ, ಬಾರ್ಕೂರ್. ಸೊಭಿತ್ ಉತ್ರಾಂ ಮಧುರ್ ಕರುನ್ ಗುಂತ್ಚೆಂ ವಿಶಿಶ್ಟ್ ದೆಣೆಂ ಹೊ ಕವಿ ತಾಚ್ಯಾ ಹರ್ಯೆಕ್ ಕವನಾಂನಿ ಪ್ರದರ್ಶಿತ್ ಕರ್ತಾ. ಅಸ್ಲೆಂಚ್ ಆನ್ಯೇಕ್ ಪ್ರಯತ್ನ್ ಜಾವ್ನಾಸಾ ತಾಚಿ ಆರ್ವಿಲಿ ಕವಿತಾ "ಘಾಯೆಲ್ಲೆಂ ಲ್ಹಾನ್ಪಣ್".
ಪಿ. ಜೆ. ಕರುಗಳ್ನಡೆ, ಬಾರ್ಕುರ್
ಪುಣ್ ಕವಿತಾಂತ್ಲೊ ಸಂದೇಶ್ ಕಿತ್ಯಾಕ್ಗಿ ಮ್ಹಾಕಾ ಆವ್ಡೊಂಕ್ ನಾ. ಕವಿ ಎಕಾ ರುಕಾಚ್ಯಾ ಸಭಾರ್ ಫಾಂಟ್ಯಾಂಕ್ ಧರುನ್ ಉಮ್ಕಾಳ್ತಾ ತಶೆಂ ಭೊಗ್ತಾ. ತಾಚ್ಯಾ ಹರ್ಯೆಕಾ ಕವಿತಾಂತ್ ದುಬ್ಳೆ ಜಿಣ್ಯೆಚೆ ಪರ್ದೆ ಉಗ್ತಾಂವ್ಚೊ ಕವಿ, ಹಾಂಗಾ ತರಿ ತಾಚ್ಯಾ ತೆ ಜಿಣ್ಯೆ ಥಾವ್ನ್ ಭಾಯ್ರ್ ಯೇಂವ್ಕ್ ನಾ. ದುಬ್ಳಿಕಾಯ್ ಸಾಂಡುಂ ಯಾ ಗ್ರೇಸ್ತ್ಕಾಯ್ ಆಪ್ಣಾಂವ್ ಮ್ಹಳ್ಳ್ಯಾ ದ್ವಂದ್ವಾಂತ್ ಝಗಡ್ತೆ ಆಸಾ.
ಕವಿನ್ "ಮ್ಹಾರಾ ಕೊರ್ಗ್ಯಾ ಜಾತ್ " ಮ್ಹಣೊನ್ ಶೀದಾ ಜಾತಿ ವಯ್ರ್ ಆಕ್ರಮಣ್ ಕೆಲಾಂ ತೆಂ ಸಾರ್ಕೆಂ ನ್ಹಯ್. ತಾಂಚೆ ಜಾತಿಂತ್ ತರೀ ಆಜ್ ಆಜ್ಯಾಪಾಂ ಘಡೊನ್ ಆಸಾತ್. ಜಾತಿ ವಯ್ರ್ ವಚೊನ್ ಥೊಡ್ಯಾ ವರ್ಸಾಂ ಪಯ್ಲೆಂ ಕರ್ನಾಟಕಾಚ್ಯಾ ಬೋವ್ಶ್ಯಾ ಗುಲ್ಬರ್ಗಾಂತ್ ಯಾ ಬಿಜಾಪುರಾಂತ್ ಜಾಲ್ಲೊ ಗಲಾಟೊ ಆನಿಕ್ಯ್ ಮ್ಹಜೆ ಮತಿಂತ್ ಜಿವೊ ಜಿವೊಚ್ ಆಸಾ. ಹಾಂಗಾ ಕವಿ ಮ್ಹಾರಾ ಕೊರ್ಗ್ಯಾ ಜಾತ್ ಜಾಯ್ತ್, ಮರ್ಯಾದ್ವಂತ್ ಕುಟಮ್ ನಾಕಾ ಮ್ಹಣೊನ್ ತೆ ಜಾತಿಚೆಂ iಟಿಜiಡಿeಛಿಣಟಥಿ ನಿಂದನ್ ಕರೀತ್ ಆಸಾ. ಅಸ್ಲಿ ಪ್ರಕ್ರಿಯಾ ಆಮ್ಚ್ಯಾ ಕವಿಂನಿ ಆಡಾಯ್ಲ್ಯಾರ್ ಬರೆಂ ಮ್ಹಳ್ಳೆಂ ಮ್ಹಜೆಂ ಚಿಂತಪ್.
ಸುನಿಲ್ ಫೆರ್ನಾಂಡಿಸ್, ಕೋಟ
ಕೊಂಕ್ಣಿ ಕವಿಂಚ್ಯಾ -ನಿರಾಶೆಂತ್ ಭರ್ಲ್ಲ್ಯಾ ಮೊಗಾಚ್ಯಾ ಕವಿತಾ ಶೆತಾಂತ್ ಆನ್ಯೇಕ್ ಪ್ರವೇಶ್ ಸುನಿಲ್ ಫೆರ್ನಾಂಡಿಸ್ ಕೋಟ ಹಾಚೆಂ "ಭರ್ವಶ್ಯಾಚಿಂ ಕುಪಾಂ". ಮಿರ್ಗಾಜಳಾಚಿ ವಿಶೇಷತಾ ದಾಕಂವ್ಕ್ ಹೆ ಕವಿತೆಂತ್ ಉತ್ರಾಂ ಉತ್ತೀಮ್ ಥರಾನ್ ಸಜವ್ನ್ ವರ್ಣನ್ ಕೆಲ್ಯಾಂತ್ ತರೀ, ತ್ಯಾ ಉತ್ರಾಂ ಪಾಟ್ಲೊ ಸಂದೇಶ್ ಕವಿ ಯಶಸ್ವಿ ಜಾವ್ನ್ ವಾಚ್ಪ್ಯಾಂಕ್ ಪಾವಂವ್ಕ್ ಸಕ್ಲಾ ಮ್ಹಣೊನ್ ಸಾಂಗೊಂಕ್ ಜಾಯ್ನಾ. ಮ್ಹಾಕಾ ಭೊಗ್ತಾ /ತಶೆಂಚ್ ಮ್ಹಜಿ ಅಭಿಪ್ರಾಯ್ ಕಿತೆಂಗಿ ಮ್ಹಳ್ಯಾರ್ ಆಮ್ಚ್ಯಾ ಕವಿಂನಿ ಚಡ್ ಆನಿ ಚಡ್ 'ಪೊಸಿಟಿವ್ ನೇಚರ್' ಆಪ್ಣಾಂವ್ಕ್ ಜಾಯ್. ಜಾಲ್ಲೆಂ ಜಾವ್ನ್ ಗೆಲೆಂ, ತೆಂ ಆಪ್ಲೆಂ ನ್ಹಯ್, ವರ್ತಮಾನ್ ಜಾಣಾ ಜಾವ್ಯಾಂ ಆನಿ ಸಂಸಾರಾಕ್ ಉಪ್ಕಾರಾಕ್ ಪಡ್ಚ್ಯಾ ಕರ್ನ್ಯಾಂನಿ ಆಮಿ ಸಂಸಾರಾಚೆಂ ಮಿರ್ಗಾಜಳ್ ಜಾವ್ಯಾಂ.
ವಿಕ್ಟರ್ ಲೋಬೊ, ಬಜಾಲ್
ಹರ್ಯೆಕೆ ಸಮಾಜೆಂತ್ ಜಾಂವ್ಚೆ ಶೋಷಣೆಕ್ ಧರ್ಲ್ಲೊ ಆರ್ಸೊ ಜಾವ್ನಾಸಾ "ಕೊರ್ಗಾರ್". ಕವಿ ವಿಕ್ಟರ್ ಲೋಬೊ ಹಾಣೆ ಕೊರ್ಗಾರಾಂಚೆಂ ವರ್ಸಾ ಆದ್ಲೆಂ ಚಿತ್ರಣ್ ದೊಳ್ಯಾಂ ಮುಖಾರ್ ಜಿವೆಂ ಜಿವೆಂ ಉಬೆಂ ಕೆಲಾಂ. ಸಮಾಜೆಚ್ಯಾ ತಶೆಂಚ್ ರಾಜಕಿಯ್ ಪುಡಾರ್ಯಾಂಚ್ಯಾ ಅಣ್ವ್ಯಾ ಬುದಿಂಕ್ ನಾಗ್ಡೆಂ ಕೆಲಾಂ. ಪುಣ್ ಕವಿತೆಂತ್ ಕವಿ "ಆಮ್ಕಾಂ ಮೊಗಾನ್ ಪಳೆತಾತ್ ಕ್ರಿಸ್ತಾಂವ್ ನಾಗೆರ್" ಮ್ಹಣೊನ್ ಕ್ರೀಸ್ತಾಚೊ ಖರೊ ಪಾಟ್ಲಾವ್ದಾರ್ ಜಾವ್ನ್ ಕ್ರೀಸ್ತಾಂವ್ ಮ್ಹಳ್ಯಾರ್ ಸರ್ಗಾಚ್ಯಾ ಬಾಗ್ಲಾ ಭಿತರ್ಚ್ ಆಸ್ಚೆಂ ಮ್ಹಳ್ಳೆಂ ರುಜು ಕರ್ಚೆಂ ನಿರ್ಫಳ್ ಪ್ರಯತ್ನ್ ಕೆಲಾಂ. ಕಿತ್ಲ್ಯಾ ಆಮ್ಚ್ಯಾ ಕ್ರೀಸ್ತಾಂವ್ ವಿಂಚ್ಣಾರ್ ಪರ್ಜೆನ್ ಕೊರ್ಗಾರ್ ಭಾವ್ ಭಯ್ಣ್ಯಾಂಕ್ ಸಾಂಗಾತಾ ಬಸಂವ್ಚೆಂ ಉದಾರ್ ಮನ್ ದಾಕಯ್ಲಾಂ ತಾಚಿ ಜಾಪ್ ಬೋವ್ಶಾ ಕವಿ ಎಕ್ಲೊ ಮಾತ್ರ್ ಜಾಣಾ ಆಸೊಂಕ್ ಪುರೊ.
ಸ್ಟೇನ್ರೊ ಆಜೆಕಾರ್
ಸ್ಟೇನ್ರೊ ಆಜೆಕಾರ್ ಹಾಕಾ ಮ್ಹಯ್ನ್ಯಾಚೊ ಕವಿ ಜಾವ್ನ್ ಚುನಾಯಿತ್ ಕೆಲ್ಲೆಂ ಕವಿತಾ "ಹಿಂದ್ಳೊ", ನ್ಹಯ್ಚ್ ಬಗರ್ ಮ್ಹಯ್ನ್ಯಾಚೆಂ ಕವಿತಾ, ಪುಣ್ ವರ್ಸಾಚೆಂ ಕವಿತಾ ಮ್ಹಣೊನ್ ಧೈರ್ಯಾನ್ ಸಾಂಗ್ಯೆತ್. ಮ್ಹಜ್ಯಾ ಕಾಳ್ಜಾಕ್ ಯೇವ್ನ್ ಆಪ್ಟಾಲ್ಲಿ ಕವಿತಾ, ಮನಾಕ್ ಆವಡ್ಲ್ಲಿ ಕವಿತಾ, ಪರ್ತ್ಯಾನ್ ಪರ್ತ್ಯಾನ್ ವಾಚುಂಕ್ ಕೆಲ್ಲಿ ಕವಿತಾ. ವಿಶಿಶ್ಟ್ ರಿತಿನ್ ಭೋವ್ ಮಾರ್ಮಿಕ್ ಕಾಣಿಯೊ ಬರವ್ನ್ ಯಶಸ್ವಿ ಜಾಲ್ಲೊ ಕವಿ, ಹ್ಯಾ ಕವಿತಾ ಮುಖಾಂತ್ರ್ ತಾಚೆಂ ಲಿಪೊನ್ ಆಸ್ಲ್ಲೆಂ ಆಪೂರ್ವ್ ಕವಿತಾ ದೆಣೆಂ ಭೋವ್ ಸುಂದರ್ ರಿತಿನ್ ಉಗ್ತಾಡಾಕ್ ಹಾಡ್ತಾ. ಸಗ್ಳ್ಯಾಂನಿ ವಿಸ್ರೊನ್ ಗೆಲ್ಲ್ಯಾ ಯಾ ಧ್ಯಾನ್ ದೀನಾತ್ಲ್ಲ್ಯಾ ತ್ಯಾ ಸಾದ್ಯಾ ಹಿಂದ್ಳ್ಯಾಕ್ ಪ್ರಧಾನ್ ಪಾಟೊ ಕರುನ್ ಉಬೆಂ ಕೆಲ್ಲ್ಯೊ ತ್ಯೊ ಇಮಾಜ್ಯೊ ಆಪುರ್ಬಾಯೆಚ್ಯೊ. ಹಿಂದ್ಳೊ ಕೊಣೆ ಜಾಂವ್ಕ್ ಆಸೊಂಕ್ ಪುರೊ. ರಾನಾಂತ್ಲೆ ರೂಕ್, ದುಬ್ಳಿಕಾಯೆಂತ್ ಬುಡೊನ್ ತರೀ ಆಪ್ಲ್ಯಾ ಭುರ್ಗ್ಯಾಂಕ್ ಬರೆಂ ಶಿಕಪ್ ದೀವ್ನ್ ಆತಾಂ ಎಕ್ಸುರೆಂ ಯಾ ಆಶ್ರ್ಯಾಂತ್ ಜಿವಿತ್ ಸಾರ್ಚಿ ನಿರ್ಭಾಗಿ ಆವಯ್, ಸಮಾಜೆಚ್ಯಾ ಆಣ್ಕಾಣ್ಯಾಂಕ್ ಬಲಿ ಜಾಲ್ಲಿ ವಿಧವ್ ಸ್ತ್ರೀ... ಅಶೆಂ. ಹಿ ಕವಿತಾ ವಾಚ್ತಾನಾ ಕೊಂಕ್ಣಿ ಸಾಹಿತ್ಯಾಂತ್ಲಿ ಗ್ರೇಸ್ತ್ಕಾಯ್ ಝಳ್ಕತಾ. ಆಮ್ಚ್ಯಾ ಕವಿಂನಿ ಧೃಡ್ ನಿಚೆವ್ ಕೆಲ್ಯಾರ್ ಕೊಂಕ್ಣಿ ಸಾಕಿತ್ಯಾಕ್ ಕಿತ್ಲೆ ಉಂಚಾಯೆರ್ ಪಾವವ್ಯೆತ್ ಮ್ಹಳ್ಳಿ ಭರ್ವಶ್ಯಾಚಿ ಆಂಕ್ರಿ ಕಾಳ್ಜಾಂತ್ ಪಾಲೆಲ್ಲ್ಯಾ ಬರಿ ಕೆಲ್ಲ್ಯಾ ಕವಿಕ್ ಕಾಳ್ಜಾಂತುಲೆ ಉಲ್ಲಾಸ್ ಪಾಟಂವ್ಕ್ ಕಿತೆಂಚ್ ದಾಕ್ಷೆಣ್ ಭೊಗನಾ.
ತುಮ್ಕಾಂ ಸರ್ವಾಂಕಿ ಭಾಗಿ ನತಾಲ್ ಆನಿ ಸುಖ್ ಸಮೃದ್ದೆಚೆಂ ನವೆಂ ವರಸ್. ಯೆಂವ್ಚೆಂ ವರ್ಸ್ ಆನಿಕ್ಯ್ ಉಂಚ್ಲಿಂ ಕವಿತಾ ಘೆವ್ನ್ ಯೇಂವ್ದಿ, ನವಿಂ ನವಿಂ ಕವಿ / ಕವಯಿತ್ರಿ ಜಲ್ಮೊನ್ ಕೊಂಕಣ್ ಮಾಯೆಕ್ ಗ್ರೇಸ್ತ್ ಕರುಂದಿ ಮ್ಹಳ್ಳ್ಯಾ ಉಲ್ಲಾಸಾಂ ಸವೆಂ!
ನಾನುಚ್ಯಾ ಸಾಣ್ಯಾರ್ ಕವಿತಾ