ಬೊಂದುಕೆಂತ್ ಗುಳೊ ಆಪ್ಲೊ, ಖಾಂದ್ ದುಸ್ರ್ಯಾಚೊ ಆನಿ ಫಾರ್ ತಿಸ್ರ್ಯಾಕ್: ಕಿಶೂಚೆ ಕವಿತೆಚೆರ್ ನಾನುಚಿ ಖೊಡ್
-ನಾನು ಮರೋಲ್, ತೊಟ್ಟಾಮ್
ಬಾರ್ಕೂರ್ ತಸಲ್ಯಾ ಐತಿಹಾಸಿಕ್ ಆನಿ ಪೌರಾಣಿಕ್ ಗಾಂವ್ಚೊ ಏಕ್ ಧಾಕ್ಟುಲೊ ಸಾಂಖೊವ್ ಸಗ್ಳ್ಯಾ ಭಾರತ್ ದೇಶಾಂತ್ಲ್ಯಾ ಭೃಷ್ಟ್ ರಾಜ್ಕಾರಣಿಂಚೆಂ ನೀಚ್ ಸುರೂಪ್ ದಾಕಂವ್ಕ್ ಸಕ್ತಾ ಜಾಲ್ಯಾರ್ ಹಿ ಕರಾವಳಿಚೆ ದೆಗೆರ್ ಶೆತಾಂ ಭಾಟಾಂ ಆನಿ ನಂಯಾಂ ಮಧೆಂ ಆವೃತ್ ಜಾವ್ನ್ ಪ್ರಕೃತಿಚೆ ಸೊಭಾಯೆಕ್ ಸಾಕ್ಸ್ ಜಾವ್ನ್ ಆಸ್ಚ್ಯಾ ಧಾಕ್ಟುಲ್ಯಾ ಗಾಂವ್ಚಿ ಮಹಿಮಾ ಮ್ಹಣೊನ್ ಧೈರಾನ್ ಸಾಂಗ್ಯೆತ್. ಆನಿ ಹಿ ಮಹಿಮಾ ತಿತ್ಲ್ಯಾಚ್ ಧೈರಾನ್ ಪಾಚಾರ್ಲ್ಯಾ ಮ್ಹಜೊ ಭೋವ್ ಲಾಗ್ಶಿಲೊ ಆಮಿಗ್ ಕಿಶೂ ಬಾರ್ಕೂರ್ ಹಾಣೆಂ ಆಪ್ಲ್ಯಾ " ಸಾಂಕೊ ಮೊಡ್ಲಾ ಮಾತ್" ಕವಿತಾ ಮುಖಾಂತ್ರ್.
ಕವಿತೆಂತ್ ಮಂತ್ರಿಂಚೊ ಭೃಷ್ಟಾಚಾರ್, ಗ್ರೇಸ್ತಾಂನಿ ದುಬ್ಳ್ಯಾಂ ವಯ್ರ್ ಚಲಂವ್ಚಿ ರಾಜ್ವಟ್ಕಿ ಪರ್ಗಟ್ ಜಾಲ್ಯಾ. ಸಾಂಕೊವ್ ಹ್ಯಾ ದೆಶಾಚ್ಯಾ ದುಬ್ಳ್ಯಾ ವರ್ಗಾಕ್ ಹೆ ಕವಿತೆಚ್ಯಾ ಎಕೆಕಾ ಉಸ್ವಾಸಾಂತ್ ಪ್ರತಿಫಲಿತ್ ಕರ್ತಾ ಜಾಲ್ಲ್ಯಾನ್, ಕವಿತಾ ಥೊಡಿ ಲಾಂಬ್ ಜಾಲ್ಲ್ಯಾಬರಿ ದಿಸ್ತಾ ತರೀ, ಕವಿನ್ ಆಪ್ಲ್ಯಾ ಬಳಾಧಿಕ್ ಚಿಂತ್ನಾಂ ಮಾರಿಫಾತ್ ಹ್ಯಾ ಮ್ಹಜ್ಯಾ ವಾದಾಕ್ ಮಾರ್ನ್ ಉಡಯ್ಲಾಂ. "ಲೊರಿಯೆ ಜಡಾಯ್ ಭೆಷ್ಟೆಂಚ್ ನೀಬ್, ಸಾಂಕ್ಯಾಕ್ ವೊಡ್ಲ್ಯಾರ್ಯ್ ನಾತ್ಲ್ಲಿ ಜೀಬ್" - ದುಬ್ಳೆ ಜಿಣಿಯೆಚೆ ರಂಗ್ ದಾಕಂವ್ಕ್ ಹಾಚ್ಯಾಕಿ ವ್ಹರ್ತೆಂ ವಿವರಣ್ ಗರ್ಜ್ ಆಸಾ? ಸಗ್ಳೆ ಕವಿತೆಂತ್ ಕವಿಕ್ ದುಬ್ಳ್ಯಾಂ ವಯ್ರ್ ಹುಸ್ಕೊ, ಆಪ್ಲ್ಯಾ ಗಾಂವಾ ವಯ್ರ್ ಆಸ್ಚೊ ಮೋಗ್ ದರಬಸ್ತ್ ಝಳ್ಕತಾ. ಕವಿತೆಚೆ ಸುರ್ವೆರ್ ಮಾತ್ರ್ ಗುಸ್ಪಡ್ಲ್ಲ್ಯಾ ಮ್ಹಜ್ಯಾ ಚಿಂತ್ನಾಂಕ್ ಕವಿನ್ ಆನಿಕಿ ಗುಸ್ಪಡಾಯ್ಲಾಂ ಕಾಂಯ್ ತೆಂ ಸ್ಪಷ್ಟ್ ಜಾಯ್ನಾ. ಸಗ್ಳೆ ಕವಿತೆಂತ್ ರಾಜ್ಕಾರಣಿಂ ವಯ್ರ್ / ಗ್ರೇಸ್ತ್ ಪರ್ಜೆ ವಯ್ರ್ ಉಜೊ ವೊಂಕ್ಚೊ ನಾಯಕ್ ಆರಂಭಾರ್ ಮಾತ್ರ್ ಕಿತ್ಯಾಕ್ "ಮಂತ್ರಿ ಸಾಯ್ಬಾ ರಾಕ್" ಮ್ಹಣೊನ್ ಹಾಕ್ ಮಾರ್ತಾ? ಕಾಂಯ್ ಮಂತ್ರಿ ಸಾಯ್ಬಾಂಚ್ಯಾ ಹಾತಾನಿಂಚ್ ಹ್ಯಾ ದೇಶಾಚೆ ಪರ್ಜೆಚೆಂ ಭವಿಷ್ಯ್ ಆಸಾ ಮ್ಹಳ್ಳ್ಯಾ ಫಟ್ಕಿರ್ಯಾ ಚಿಂತ್ನಾಂನಿ ಉಪ್ಯೆವ್ನ್ ಆಸಾಗಾಯ್? ಎಕೆ ಕುಶಿನ್ "ನಿಂವಾರ್ ಸಾಯ್ಬಾ ಸೊಡ್ವೊಣ್ದಾರಾ" ಮ್ಹಣೊನ್ ದೆವಾಲಾಗಿಂ ಪರಾತ್ತಿತಾ ತರ್ ಆನ್ಯೇಕೆ ಕುಶಿಂತ್ಲ್ಯಾನ್ "ದೆವಾಕ್ಚ್ ಜಾಲ್ಲೊ ಘಾತ್" ಮ್ಹಣೊನ್ ಚುರ್ಚುರ್ತಾ.
ಅಶೆಂ ಕವಿತೆಂತ್ ನಾಯಕಾಚಿಂ ದೊಡ್ತಿಂ ಧೋರಣಾಂ ಥಂಯ್ ಥಂಯ್ ಪ್ರತಿಫಲಿತ್ ಜಾಲ್ಯಾಂತ್. ಅಶೆಂ ಪಳೆಂವ್ಕ್ ಗೆಲ್ಯಾರ್ ಸಗ್ಳೆ ಕವಿತೆಂತ್ ಗಾಂವಾಂತ್ ಚಲೊನ್ ಆಸ್ಚ್ಯಾ ಅತ್ತ್ಯಾಚಾರಾಚಿ ಪಟ್ಟಿಚ್ ಆಸಾ ಶಿವಾಯ್ ತ್ಯಾ ಅತ್ತ್ಯಾಚಾರಾಕ್ ಆಕೇರ್ ಕರ್ಚೆಂ ಧೋರಣ್ ಯಾ ಪ್ರಯತ್ನ್ ನಾಯಕಾಲಾಗಿಂ ನಾ. ಕಿತ್ಯಾಕ್ ಮ್ಹಳ್ಯಾರ್ ನಾಯಕಾಕ್ ಕಿತೆಂಚ್ ಪಡೊನ್ ವಚೊಂಕ್ ನಾ. ತ್ಯಾ ದೆಕುನ್ ತೊ "ಭೆಷ್ಟೆಂಚ್ ಚಿಂತುನ್ ಉಬೊ, ಕಾಳೀಜ್ ಘಾಮಾನ್ ಬುಡ್ಲಾಂ" ಅಶೆಂ ಏಕ್ ಬರೆಂ ಕವಿತಾ ಬಳ್ ನಾತ್ಲ್ಲೆಂ ಅಂತ್ಯ್ ಕಾಣ್ಘೆವ್ನ್ ಹೆರ್ ಥೊಡ್ಯಾ ಸ್ವ-ಘೋಷಿತ್ ಮಹಾನ್ ಕವಿಂಚ್ಯಾ ಸಾಂಗ್ಣ್ಯಾಂ ಬರಿ ಕವಿಂಚಿ ಜವಾಬ್ದಾರಿ ಕೇವಲ್ ಅನ್ಯಾಯ್ / ಸಮಸ್ಯಾಂ ದಾಕವ್ನ್ ದಿಂವ್ಚಿ ಮಾತ್ರ್, ತಾಚ್ಯಾ ವಯ್ರ್ ಜೊಕ್ತೆಂ ಮೇಟ್ ಕಾಣ್ಘೆಂವ್ಚಿ ಜವಾಬ್ದಾರಿ ಸಾದ್ಯಾ ನಾಗರಿಕಾಚಿ ಮ್ಹಣೊನ್ ಹಾತ್ ಧುಂವ್ಚೆಂ ಪ್ರಯತ್ನ್ ಕವಿನ್ ಕೆಲಾಂ. ಪರ್ತ್ಯಾನ್ ಹಾಂವ್ ಸಾಂಗ್ತಾಂ - ಕವಿಂಚಿ ಜವಾಬ್ದಾರಿ ಕೇವಲ್ "ಸಾಂಕೊ ಮೊಡ್ಲಾ ಮಾತ್" ಮ್ಹಣೊನ್ ಬೋಟ್ ಜೊಕುನ್ ಯಾ ಫಾರ್ ಮಾರುನ್ ವೊಗೆಚ್ ಬಸ್ಚ್ಯಾ ಪಾಸುನ್ ಮಾತ್ರ್ ನ್ಹಯ್ ಬಗರ್ ಮೊಡ್ಲ್ಲೊ ಸಾಂಕೊ ಬಾಂದ್ಚ್ಯಾಂತ್ ಸಯ್ತ್ ಸಮಾಸಮ್ ವಾಂಟೆಲಿ ಜಾಂವ್ಕ್ ಜಾಯ್.
(ಕಿಶೂಚಿ ಕವಿತಾ "ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ" ವಾಚುಂಕ್ ಹಾಂಗಾ ಚಿಚಾಯಾ)
ವಯ್ರ್ ಹಾಂವೆಂ ಸಾಂಗ್ಲ್ಲೆ ದಾಟಿರ್ಚ್ ವ್ಹಾಳ್ಲ್ಲಿ ಆನ್ಯೇಕ್ ಕವಿತಾ, ಹ್ಯಾಚ್ ಕವಿಚ್ಯಾ ಲಿಖ್ಣೆ ಥಾವ್ನ್ ವ್ಹಾಳ್ಲ್ಲಿ "ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ". ಪಾಯ್ಸ್ ಜಾಲ್ಲಿ 28/11/05 ವೆರ್ ತರೀ, ಕಶಿಗಿ ಮ್ಹಜೆ ಪರ್ವಣ್ಗೆ ವಿಣೆಂ ಮ್ಹಜ್ಯಾ ಸ್ಮೃತಿಪಟಲಾ ಥಾವ್ನ್ ಮಾಯಾಗ್ ಜಾಲ್ಲಿ ತಿ ಹೆ ಪಾವ್ಟಿಂ ಸಾಂಪಡ್ಲಿ. ಸೊಭಾಯೆಚ್ಯಾ ಉತ್ರಾಂಚೊ ಪರ್ಮಳ್, ಪ್ರಾಸಾಂಚೊ ದಾಳೊ ಹಾಂಕಾಂ ಕವಿಚ್ಯಾ ಸಾಹಿತಿಕ್ ಭಂಡಾರಾಂತ್ ಕಿತೆಂಚ್ ಉಣೆಪಣ್ ನಾ. ಉತ್ರಾಂ ಸುವರ್ಣಾ ನಂಯ್ತ್ ಉದಕ್ ವ್ಹಾಳ್ಲ್ಲ್ಯಾಬರಿ ವ್ಹಾಳ್ತಾತ್ ತರ್, ಪ್ರಾಸ್ ಪಯಸ್ವಿನಿ ನಂಯ್ತ್ ಸುಂಕ್ಟಾಂ ನಾಚ್ಲ್ಲ್ಯಾಬರಿ ನಾಚೊನ್ ಆಸಾತ್ ತರೀ ಕವಿತೆಚೊ ತೀರ್ಳ್ ಮಾತ್ರ್ ಸುರ್ಯೆಲ್ಲ್ಯಾ ವಾಶ್ಯಾಬರಿ ಭೊಗ್ತಾ. ಕವಿನ್ ಸಂಸಾರಾಂತ್ ಚಲೊನ್ ಆಸ್ಚ್ಯಾ ಹರ್ಯೆಕಾ ಅತ್ತ್ಯಾಚಾರಾಂಕ್ ದೊಳ್ಯಾಂ ಮುಖಾರ್ ಉಭೆಂ ಕೆಲಾಂ ತರೀ, ನಾಯಕ್ ಮಾತ್ರ್ ಹರ್ಯೆಕಾ ಸಮಸ್ಯಾಂ ಥಾವ್ನ್ ಫೊಳಾಪಳ್ ಘೆತೇ ಆಸಾ.
ಹಾಂಗಾ ಮ್ಹಜೆ ಕವಿ ಮಿತ್ರ್ ಮ್ಹಾಕಾ ಜಾಗಂವ್ಕ್ ಆಸಾತ್ ಮ್ಹಣೊನ್ "ಹಿ ನ್ಹಯ್ ಕವಿಚಿ ಜವಾಬ್ದಾರಿ ಬಗರ್ ಹಿ ಜವಾಬ್ದಾರಿ ಸಮಾಜೆಚಿ". ತರ್ ಚಿಂತ್ಯಾಂ ಹೆ ಕವಿತೆಚೊ ನಾಯಕ್ ಕವಿ ನ್ಹಯ್, ಬಗರ್ ಹೆ ಸಮಾಜೆಂತ್ ಜಿಯೆವ್ನ್ ಆಸ್ಚೊ ಹಾಂವ್, ತುಂ ಯಾ ಕೊಣಿ ಏಕ್ ಬಳ್ವಂತ್ ವಾವ್ರಾಡಿ. ಎಕಾದಾವೆಳಾ ಆಮಿ ಸರ್ವಾಂನಿ ಆಮ್ಚ್ಯೊ ಜವಾಬ್ದಾರ್ಯೊ ವಿಸ್ರೊನ್ ಘೆತ್ಲ್ಯಾರ್ ಹಿ ಸಮಾಜ್ ಚಲ್ಚಿ ಕಶಿ? ತರ್ ಸಮಾಜೆಕ್ / ಸಂಸಾರಾಕ್ ಬರೆಂ ಕರುಂಕ್ ಭಾಯ್ರ್ ಸರ್ಲ್ಲ್ಯಾಂಕ್ ಖಳ್-ನಾಯಕ್ ಮ್ಹಣೊನ್ ವೊಲಾವ್ನ್ ಹ್ಯಾ ಬರೆಪಣಾಕ್ / ಭೊಗ್ಣಾಂಕ್ ಜಾಗಯಿಲ್ಲ್ಯಾ ಕವಿಂಕ್ ನಾಯಕ್ ಮ್ಹಣೊನ್ ಸಾಂಗ್ಚೊ ಖಂಯ್ಚೊ ನ್ಯಾಯ್? ಶತಮಾನಾಂ ಆದಿಂ ಕೊಣ್ ಎಕ್ಲ್ಯಾ ಕವಿಚ್ಯಾ ಪಾಟ್ಲಾವ್ದಾರಾಂನಿ ತ್ಯಾ ಕವಿಚಿ ಕೀರ್ತ್ ಶಿಖರಾಕ್ ಪಾವಂವ್ಕ್ (ಜಶೆಂ ಪ್ರಶಸ್ತ್ಯಾಂಕ್ ಲಾಗೊನ್ ಆಮ್ಚೆ ಕೊಂಕ್ಣೆಂತ್ ಡೊಂಬರಾಟ ಚಲ್ತಾ) ಘಡ್ಲ್ಲೆಂ ಥಳ್ ಘಟ್ ನಾತ್ಲ್ಲೆ ವಾದ್ ಆತಾಂ ತರೀ ಆಮಿ ತೆಚ್ ಜರವ್ನ್ ಬಸ್ಲ್ಯಾರ್ ಆಮ್ಚಿ ಪ್ರಗತಿ ಜಾಂವ್ಚಿ ಕೆದಳಾ? ಆತಾಂ ತರೀ ಆಮಿ ನಕ್ಕಲ್ಚ್ ಕರ್ನ್ ಆಸಾಂವ್. ಆಮ್ಕಾಂ ಆಮ್ಚೆಂ ಮ್ಹಳ್ಳೆಂ ಅಸ್ತಿತ್ವ್ ಖಂಯ್ ಆಸಾ? ಹೆಂ ಸೊಧ್ಚೆಂ ಆಮಿ ಪ್ರಯತ್ನ್ ಕೆದಳಾ ತರೀ ಕೆಲ್ಲೆಂಚ್ ನಾ.
ತ್ಯಾ ದೆಕುನ್ "ಮ್ಹಾಕಾ ಏಕ್ ಘಡಿ ದೆಂವೊಂಕ್ ಸೊಡಾ" ತಸಲಿ ಕವಿತಾ ವಾಚುಂಕ್ ಆಪುರ್ಬಾಯೆಚಿ ಜಾವ್ನ್ ಲಾಗ್ತಾ ತರೀ ನೈಜತೆ ಥಾವ್ನ್ ಭೋವ್ ಪಯ್ಸ್ ಆಸ್ಲ್ಲ್ಯಾಬರಿ ಭೊಗ್ತಾ.