ಸಂಪಾದಕೀಯ್:
ಏಕ್ ಪದ್ ಕವಿತಾ ಜಾತಾನಾ
ಕಾಂಯ್ 1986 ವರ್ಸಾ ’ಮಾಂಡ್ ಸೊಭಾಣ್’ ಸಂಸ್ಥೊ ಜಲ್ಮಾಕ್ ಆಯ್ಲ್ಯಾ ಉಪ್ರಾಂತ್ ಎರಿಕ್ ಒಝೇರಿಯೊ ಆನಿ ಹಾಂವ್ ಚಡಿತ್ ಸಂದರ್ಭಾಂನಿ ಮೆಳಲ್ಲ್ಯಾ ವೆಳಾರ್ ಭಾರತೀಯ್ ಸಂಗೀತ್, ಪದಾಂ ಆಯ್ಕತಲ್ಯಾಂವ್. ಎರಿಕಾಕ್ ಗಝಲ್ ಪ್ರಕಾರ್ ಚಡ್ ಮೊಗಾಚೊ ಮ್ಹಣುನ್ ಹಾಂವ್ ಸಮ್ಜಲ್ಲೊಂ. ತಾಚೆಲಾಗಿಂ ಗಝಲಾಂಚ್ಯೊ ಜಾಯ್ತ್ಯೊ ಕೆಸೆಟಿ ಆಸಲ್ಲ್ಯೊ. ಏಕ್ ಪಾವ್ಟಿಂ ಥೊಡ್ಯೊ ಕೆಸೆಟಿ ದೀವ್ನ್ ಹಾಂತ್ಲೆಂ ಪಂಕಜ್ ಉದಾಸಾಚೆಂ ’ಚಾಂದ್ ಜೈಸಾ’ ಪದ್ ಅನುವಾದ್ ಕರ್, ಆಸಾ ತಶೆಂ ಜಾಯ್ಜಾಯ್ ಮ್ಹಣುನ್ ನಾ - ಮ್ಹಣಾಲೊ. ತಶೆಂ ಹೆಂ ಪದ್ ಉದೆಲೆಂ.
ಹ್ಯಾ ಪದಾಚ್ಯೊ ಸುರ್ವಿಲ್ಯೊ ದೋನ್ ವೊಳಿ ಆಸಾ ತಶ್ಯೊ ಅನುವಾದ್ ತರ್, ಪಯ್ಲೆಂಚ್ಯಾ ಕಡ್ವ್ಯಾಂತ್ ಅನುವಾದಾ ಸಾಂಗಾತಾ ಮ್ಹಜೆಂ ಸ್ವಾತಂತ್ರ್ಯ್ ಸಾಂಬಾಳ್ಳಾಂ. ಉರಲ್ಲೆ ದೋನ್ ಕಡ್ವೆ ಅನುವಾದ್ ನ್ಹಯ್. ಹ್ಯಾ ಪದಾಚೊ ಮೂಳ್ ಬರೊವ್ಪಿ ಕೊಣ್ ಮ್ಹಳ್ಳೆಂ ಮ್ಹಾಕಾ ಕಳಿತ್‌ಚ್ ನಾತ್‌ಲ್ಲೆಂ. ತೆಂ ಪದ್ ’ಖಾತೀಲ್ ಶಿಫಾಯಿ’ ಮ್ಹಣುನ್ ಆತಾಂ ಹಾಂವ್ ಜಾಣಾ ಜಾಲಾಂ. ತಾಕಾ ನಮನ್ ಕರುನ್, ಹೆಂ ಪದ್ ಮ್ಹಣಾ, ಕವಿತಾ ಮ್ಹಣಾ, ಹಾಂಗಾಸರ್ ದಿಲ್ಯಾ.
ಮಾಂಡ್ ಸೊಭಾಣಾನ್ ಆಪ್ಲ್ಯಾ ಸಂಗೀತ್ ಕೊವ್ಳೆಂತ್ ಹೆಂ ಪದ್ ಆಟಾಪ್ಲಾಂ. ಪುಣ್ ಹಾಂವೆಂ ಬರಯಿಲ್ಲೆಂ ಸಂಪೂರ್ಣ್ ಪದ್ ತಾಂತುಂ ನಾ.
-
ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪುನ್ವೆ ಚಾಂದ್ನೆಂ ತುಜ್ಯಾ ಆಂಗಾರ್
ಪುನ್ವೆ ಚಾಂದ್ನೆಂ ತುಜ್ಯಾ ಆಂಗಾರ್, ಭಾಂಗರ್ ತುಜೆ ಕೇಸ್
ಆಮ್ಚೆ ಭುಂಯ್ತ್ ಸಗ್ಳೆ ದುಬ್ಳೆ, ತುಂಚ್ ಮಾತ್ರ್ ಗ್ರೆಸ್ತ್
ಜೆ ವಾಟೆನ್ ತುಂ ಚಲ್ತಾಯ್, ಫುಲುಂ ಥಂಯ್ಸರ್ ಫುಲಾಂ
ದೀಷ್ಟ್ ನಾತ್ಲ್ಯಾಂಕ್ ದೀಷ್ಟ್ ಮೆಳುಂ, ಚೊವುಂಕ್ ತುಜಿ ಪಾವ್ಲಾಂ
ಪಾಯಾಂಕ್ ಉಮೆ ದಿಂವ್ಚೆ ಫಾತರ್, ಜಾಂವ್ದಿತ್ ಭಾಂಗ್ರಾ ಫಳಾಂ
ವಾಟೆರ್ ಕೊಣ್‌ಯ್ ಭೆಟ್ಲ್ಯಾರ್ ದಿ, ಲಾಳ್ ಗಳೊಂವ್ಕ್ ತಸ್ತ್
ಆಮ್ಚೆ ಭುಂಯ್ತ್ ಸಗ್ಳೆ ದುಬ್ಳೆ, ತುಂಚ್ ಮಾತ್ರ್ ಗ್ರೆಸ್ತ್.
ಅಮೃತಾಚಿ ಧಾರ್ ದೊಳ್ಯಾಂತ್, ಸೊರೊ ಕಿತ್ಯಾಕ್ ಪಿಯೆಂವ್
ಸಂಗೀತ್ ವ್ಹಾಳ್ತಾ ತುಜ್ಯಾ ಉಲ್ಯಾಂತ್, ವೀಣೆ ಕಿತ್ಯಾಕ್ ವ್ಹಾಜುಂ
ಖಾಡ್ಕೆರ್ ತುಜ್ಯಾ ರಂಗಾಳ್ ಫುಲಾಂ, ವೊಡ್ತಾಂತ್ ಕಿತೆಂ ಸೊಧುಂ
ಮ್ಹಜೆ ಸಮೊರ್ ರಾವ್ ಸದಾಂ, ದೊಳ್ಯಾಂಕ್ ಜಾಂವ್ದಿ ಫೆಸ್ತ್
ಆಮ್ಚೆ ಭುಂಯ್ತ್ ಸಗ್ಳೆ ದುಬ್ಳೆ, ತುಂಚ್ ಮಾತ್ರ್ ಗ್ರೆಸ್ತ್
ಕಾಳೀಜ್ ತುಜೆಂ ತಶೆಂಚ್ ಆಸುಂ, ಖವಯ್ ಸದಾಂ ಬೀಗ್
ತಾನ್‌ ಲಾಗ್ತಾಂ ವಾಂಟುಂಕ್ ಮೋಗ್, ಕಾಳ್ಜಾಂತ್ ಮ್ಹಜ್ಯಾ ರೀಗ್
ರುಪ್ಣೆಂ ತುಜೆಂ ಸದಾಂಚ್ ಉರುಂ, ಸಂಸ್ರಾಂತ್ ಲಾಂಬ್‌ ದೀಗ್
ಪಿಶ್ಯಾರ್ ಘಾಲ್ ಸರ್ವಯ್ ಲೊಕಾಕ್, ವಾಂಚುನ್ ವರ್ಸಾಂ ಮಸ್ತ್
ಆಮ್ಚೆ ಭುಂಯ್ತ್ ಸಗ್ಳೆಂ ದುಬ್ಳೆ, ತುಂಚ್ ಮಾತ್ರ್ ಗ್ರೆಸ್ತ್
(ಸುರ್ವಿಲ್ಯೊ ದೋನ್ ವೊಳಿ ಆನಿ ಏಕ್ ಕಡ್ವೊ ಖಾತೀಲ್ ಶಿಫಾಯಿಚ್ಯಾ ಗಝಲಾ ಥಾವ್ನ್ ಘೆತ್ಲಾ)
-ಮೆಲ್ವಿನ್ ರೊಡ್ರಿಗಸ್