ಕಾಳೊಕಾಂತ್ ಜಿಯೆತಾಯ್ ಮ್ಹಣ್ ಜಾಣಾಸ್ಚೆಂಚ್ ವ್ಹಡ್ ಉಜ್ವಾಡ್
ಹ್ಯಾ ಮ್ಹಯ್ನ್ಯಾಚೆ ಕವಿತೆಂನಿ ಮೊತಿಯಾಂ ಸೊದ್ಚ್ಯಾ ವಾವ್ರಾಕ್ ಲಾಗ್ತಾನಾ, ಥೊಡ್ಯಾ ಕವಿತೆಂಚೆರ್ ದೋನ್ ಉತ್ರಾಂ ಲಿಖಿನಾಸ್ತಾನಾ ರಾವೊಂಕ್ ಮನಾಕ್ ಪುಟ್ವಲೆಂನಾ.
ಆಪ್ಲ್ಯಾ ಗಾಂವ್ಚೊ ಜಿವೊ ಮೋಗ್ ಕರ್‍ಚ್ಯಾ ಥಾವ್ನ್ ಕಸ್ಲಿ ಕವಿತಾ ವ್ಹಾಳತ್ ಮ್ಹಳ್ಳ್ಯಾಕ್ ಶೆಣೈ ಗೊಂಯ್‌ಬಾಬಾನ್ ಗೊಂಯ್ಚಿ ಸೊಭಾಯ್ ವರ್ಣಿಲ್ಲಿ ಸಾಕ್ಸ್. ಹೆವ್ಶಿಲ್ಯಾನ್ ಮ್ಹಜ್ಯಾ ಮಂಗ್ಳುರ್ ಶೆರಾಚೋಯ್ ಸುಗಂಧ್ ಪಸ್ರೊಂಕ್ ಲ್ಯಾನ್ಸಿ ನೊರೊನ್ಹಾನ್ ಫುಡ್ಲದ್ ಪ್ರೇತನ್ ಕರ್‍ತಾನಾ ಕೊಣಾಚ್ಯಾ ಸಂತೊಸಾಕ್ ಏಕ್ ದೋನ್ ಪಾಕಾಂ ಪುಟ್ಚಿಂನಾಂತ್? ಎಚ್ಚೆಮ್ ಪೆರ್ನಾಳ್ ಕೊಂಕ್ಣೆಂತ್ಲೊ ಬಳ್ವಂತ್ ಕವಿ. ತಾಚಿ ಸಾಧ್-ಸುಧ್ ಪುಣ್ ಉತ್ರಾಂಚಿ, ವಾಸ್ತವಾಚಿ ಆನಿ ಸುಡ್ಸುಡಿತ್ ಪಿಂತ್ರಾವ್ಣೆಚಿ ಕವಿತಾ ಮ್ಹಜ್ಯಾ ಪಿಂಜ್ಕರ್ ಚಡ್ಡೆಚಿ ಸಾಫ್ ಉಗ್ಡಾಸ್ ಹಾಡಿಲಾಗ್ಲಿ ಆನಿ ಆತಾಂ ರಿಮೊರ್ಟ್ ಹಾತಾಂತ್ ಘೆತಾಸ್ತಾನಾ ಮ್ಹಜೆರ್ ಸರ್‍ಸರಿ ಅಪ್ರಾಧ್ ಮಾಂಡಿಲಾಗ್ಲಿ! ಸುರ್ವಿಲ್ಯಾ ತೀನ್ ಫಂಕ್ತೆಂನಿ ಆಶಾ ಪಿಂಟೊಚ್ಯಾ `ಪರ್ಮಳ್ ಯಾದಿಂಚೊ...!' ಸುಗಂಧ್, ಮನಾಂ-ಮನಾಂನಿ ರೆವ್ಡೊನ್ ರಾವ್ಲೊ. ಕಸ್ಲಿ ಕಸ್ರತ್ ಹೆ ಕವಯಿತ್ರಿಚಿ! ತರ್ನಿ ಕವಯಿತ್ರಿ ಮೆಲಿಟಾ ಪಿಂಟೊ, ಇಜಯ್ ಹಿಚಿ ಜೂನ್ ಕವಿತಾ `ಮನ್ಶಾ ಜಿವಿತ್' ಜಾಣ್ವಾಯೆಚ್ಯಾ ಥಿಕಾನ್ ಉಜಳ್ತಾನಾ, ಲಾಂಬಾಯ್ ಕವಿತೆಚೆ ಸೊಭಾಯೆಕ್ ಆಯ್ಬ್ ಜಾಲೆಂ ತೆಂ ಪಳೆವ್ನ್ ಬೆಜಾರ್ ಜಾಲೆಂ. ಆಸ್ಮಾ ಮೂಡಬಿದ್ರಿಚಿ ಕಾಲ್ಚಿಂ ಸಪ್ಣಾಂ ಖೊಳಾಕ್ ಘಾಲ್ನ್ ಮಾರ್ಚಿ `ದಾಂವ್ಣಿ' ಭೋವ್ ಸೊಭಿತ್ ರಿತಿನ್ ವಾಳ್ಳ್ಯಾ; ಕೂಡ್ ಆನಿ ಅತ್ಮೊ ವೆವೆಗ್ಳೆ ಮ್ಹಳ್ಳ್ಯಾ ದ್ವಂದ್ವ್ ವಾದಾಂತ್(ಜuಚಿಟism) ಆಸಾ ತರಿ, ಲಬ್ದವ್ಣೆ ಥಾವ್ನ್ ಸ್ವಾತಂತ್ರಾಯೆಕ್ ಮಾರ್ಚಿ `ಧಾಂವ್' ಮ್ಹಳ್ಳೆಂಯ್ ಬರೆಂ ವ್ಯಕ್ತ್ ಜಾಲಾಂ. ಆಂಡ್ರ್ಯೂ ಎಲ್. ಡಿ'ಕುನ್ಹಾನ್ ಜಿಯೆಂವ್ಚ್ಯಾಂಕ್ ಬದ್ಲಾವಣ್ ಹಾಡುಂಕ್ ಕಾಡ್‌ಲ್ಲಿ ವಾಂವ್ಟ್ ಸುಶೆಗಾತ್ ಜಿಯೆಂವ್ಚ್ಯಾಕ್ ಕೊಣಾಯ್ಕಿ ದಿವ್ಟಿ ಜಾಯ್ತ್. ಜಾಯ್ತೆಂ ಮ್ಹಜೆಂ ಧ್ಯಾನ್ ಚೊರ್‌ಲ್ಲಿ ಅನಿಲ್ ಪೆರ್ನಾಲಾಚಿ ಕವಿತಾ `ಅಸ್ಥಿತ್ವ್', ಆಪ್ಲೆಂ ಅಸ್ಥಿತ್ವ್ ದಾಕಂವ್ಚ್ಯಾಕೀ, ಅಸ್ಥಿತ್ವ್ ಜಾವ್ನ್ ಉರ್‍ಚ್ಯಾಕ್ - ಜಾಂವ್ ಕೆಂಡ್ ಜಾಂವ್ನ್ ವ ಕಿಟಾಳ್ ಜಾವ್ನ್ - ರಾಂವ್ಚೆಂ ಅಧಿಕ್ ಗರ್ಜೆಚೆಂ ಮ್ಹಳ್ಳಿ ಬೊಬಾಟ್ ಕವಿತೆಂತ್ ಸಮ್ಮತಿ ದಾಕಯ್ನಾಸ್ತಾಂ ಮ್ಹಜೆ ಥಂಯ್ ಘೊರೊಜ್ ಮಾರಿಲಾಗ್ಲಿ.
ಹ್ಯಾ ಮ್ಹಯ್ನ್ಯಾಂತಿ ಆನ್ಯೇಕ್ ಗೊಂಯ್ಚೊ ಫಾಮಾದ್ ಕವಿ ಪ್ರಕಾಶ್ ಪಡ್‌ಗಾಂವ್ಕಾರ್ ಹಾಚ್ಯಾ "....ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ" ಕವಿತೆಕ್ ಹಾಂವ್ ಖೂಬ್ ಭುಲ್ಲೊಂ. ಕವಿತಾ ವಾಚುನ್ ವಾಚುನ್, ಮೆಲ್ವಿನ್ ರೊಡ್ರಿಗಸಾ ಕರ್‍ನಾ ಥೊಡ್ಯಾ ಸಬ್ದಾಂಚೆ ಅರ್ಥ್ ಸುಟವ್ನ್, ಕವಿತೆಚಿ ರೂಚ್ ಚಾಕೊನ್, ಜಿವಿತಾಕ್ ಹೆ ಕವಿತೆಚ್ಯಾ ತಳ್ಯಾಂತ್ ಬುಡವ್ನ್, ಬುಡವ್ನ್ ಕಾಡ್ಲೆಂ.
ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ: ಪ್ರಕಾಶ್ ಪಡ್‍ಗಾಂವ್ಕರ್
ಕಿತ್ಲೆಶೆ ಪಾವ್ಟಿಂ ಜಿವಿತಾಂತ್ ಅಶೆಂ ಮ್ಹಾಕಾ ಘಡ್‌ಲ್ಲೆಂ ನಾ ಆನಿ ಕಿತ್ಲೆ ಪಾವ್ಟಿಂ ಪುಡಾರಾಂತ್ ಅಶೆಂಚ್ ಘಡ್ಚೆಂ ನಾ? "....ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ" ಘರಾ ಆಸ್ತಾನಾ ದಾತಾರಾಂಚಿಂ, ಇಸ್ಕಾಲಾಂತ್ ಟಿಚೆರಿಂಚಿಂ, ತರ್ಬೆತೆಂತ್ ಆಸ್ತಾನಾ ತರ್ಬೆತಿದಾರಾಂಚಿ ಕುಲ್ಪಾಂ ಕಾಡ್ತಾಲೊಂ, ಪಾಟ್ಲ್ಯಾನ್ ತಾಂಚ್ಯಾ `ಅವಸ್ಥಾಗೀ' ಮ್ಹಣ್ ಥುಕ್ತಾಲೊಂ. ಕೆನ್ನಾ ಪರ್ಯಾಂತ್? ಏಕ್ ಲಾಂಬ್ ಸ್ವಾಸ್ ಸೊಡಿಜಾಯ್ ತರ್ ಶೀ... ಹಾಂವೀ ಹ್ಯಾಚ್ ಕಾಳ್ಕಾಂತ್ ಜಿಯೆತಲೊಂ!
ಏಕ್ ಪಾವ್ಟಿಂಚ್ಯಾಕ್, ಉಜ್ವಾಡಾ ಆನಿ ಕಾಳೊಕಾಚ್ಯಾ ಪ್ರತಿಮಾಂಚಿ ಹಾಂಗಾಸರ್ ಗುಸ್ಪಡ್ ಜಾಲ್ಯಾ, ವೀದ್‌ವಾವ್ಳಿ ಜಾಲ್ಯಾ! ಉಜ್ವಾಡ್ ಜೊ ಹಾಂವೆಂ - ತುಂವೆಂ ವೆಂಗ್ಚೊ, ನ್ಹಂಯ್ ತೊ ಹಾಂಗಾ. ಕಾಳೊಕ್ ಜೊ ಹಾಂವೆಂ - ತುಂವೆ ಖೆಂಡ್ಚೊ, ನ್ಹಂಯ್ ತೊ ಹಾಂಗಾ. ಹೊ ಉಜ್ವಾಡ್, ಕಾಳೊಕ್ ಹಾಂಗಾ; ಆನಿ ಕಾಳೊಕ್, ಉಜ್ವಾಡ್ ಹಾಂಗಾ!" ಕವಿತೆಚಿ ತಾಂಕ್. ಅಸಲ್ಯಾ ಕವಿತೆಂಚ್ಯಾ ಘಡಾವಳಿಂಚೆಂ ಶಿಂದಪ್ ಕರುಂಕ್ ಮ್ಹಾಕಾ ಸಮ್ಜನಾ, ಪುಣ್ ತಾಚಾ ಸತ್ವಾಚಿ ರೂಚ್ ಚಾಕೊನ್, ಪೊಟ್ ಭರುಂಕ್ ಮ್ಹಾಕಾ ಸಲೀಸ್ ಜಾತಾ.
"ಕಾಲ್‌ಪರ್ಯಾನ್ ಹಾಂವೆಂ ಝಗ್‌ಝಗಿತ್ ಉಜ್ವಾಡಾಂತ್ ರಾವೊನ್ ಬೆಳ್ಶೆಲ್ಲ್ಯಾ ಕಾಳ್ಕಾಚಿ ನಿಂದಾ ಕೆಲ್ಲಿ". ಮ್ಹಜೆಂ ಜಿವಿತ್ ಎಕ್ದಮ್ ಉಜ್ವಾಡಾಂತ್ ಆಸೊನ್, ಮ್ಹಣ್ಜೆ, ಬರೆಂ ನಿಟ್‌ಚ್ ಆಸ್ಚೆಂ ಮ್ಹಾಕಾ ಗಮ್ತಾ. ತೆಂಯ್ ಸಾದ್ಯಾ ಉಜ್ವಾಡಾಂತ್ ನ್ಹಂಯ್, ಝಗ್‌ಝಗಿತ್ ಉಜ್ವಾಡಾಂತ್! ಸಾರ್ಕ್ಯಾ ಸುರ್ಯಾಭಾಶೆನ್ ಪರ್ಜಳ್ಚೆಂ ತಸ್ಲೆಂ ಜಿವಿತ್ ಮ್ಹಜೆಂ ಮ್ಹಣ್ ಲೆಕ್ಚೆಂ ಹಾಂವೆಂ. ಮ್ಹಣಾ ಹೆಂ 'ಸುಪಿರಿಯೊರಿಟಿ ಕೊಂಪ್ಲೆಕ್ಸ್' ವ 'ಪಾರಿಜೆಯಿಕ್' ಚಿಂತ್ಪಾರೀತ್. ಪುಣ್ ವಿಷಯ್ ಸ್ಪಷ್ಟ್: ಹಾಂವ್ ಮಾತ್ರ್ ಝಗ್‌ಝಗಿತ್ ಉಜ್ವಾಡಾಂತ್ ಜಿಯೆತ್ ಆಸಾಂ. `ಮ್ಹಜೆಂ' ಮ್ಹಳ್ಳೆ ಪರಿಧೆ ಬಾಯ್ರ್ ಮ್ಹಾಕಾ ದಿಸ್ಚೊ ಸಾಮ್ಕೊ ಕಾಳೊಕ್, ಭೆಶ್ಟೊ ಬೆಳ್ಶೆಲ್ಲೊ ಕಾಳೊಕ್. ಭಾಯ್ರ್ ಸೃಷ್ಟೆರ್, ಮನ್ಶಾರ್ ಆನಿ ಸರ್ವಾರ್ ಕಾಳೊಕ್‌ಚ್ ಕಾಳೊಕ್. `ಸಿನಿಕ್' ಚಿಂತ್ಪಾರೀತ್‌ಯ್ ಕೊಣ್ಣಾ ಹಿ. ಎಕೆ ಘಡಿಯೆಕ್ ಕವಿನ್ ವಾಪರ್‌ಲ್ಲ್ಯಾ ತದ್ವಿರುಧ್ ರುಪಾಂಚಿ ಸೊಭಾಯ್ ಪಳೆಯಾ: ಝಗ್‌ಝಗಿತ್ ಉಜ್ವಾಡ್ - ಬೆಳ್ಶೆಲ್ಲೊ ಕಾಳೊಕ್. ಭೇಶ್!
ದೊನ್ಪಾರಾಂಚ್ಯಾ ಫಾರಾಂಚೊ ಸುರ್ಯೊ ದೆಕುನ್ ಹಾಂವ್, ಹ್ಯಾ ಕೀಳ್, ಲ್ಹಾನ್ಶಾ `ದುಸ್ರ್ಯಾಚಿ' ಕುಲ್ಪಾ ಕಾಡ್ತಾಂ, ಸಾರ್ಕಿ ನಿಂದಾ ಕರ್‍ತಾಂ. ಹಾಂವ್ ಇತ್ಲೋಯ್ ಶ್ರೇಷ್ಟ್ ಮ್ಹಣ್ ಶಿಂಗಾಂ ಮ್ಹಾಕಾ ಪುಟ್ತಾನಾ, ನಿಂದಾಚ್ ಮ್ಹಜೆ ದಿಷ್ಟಿಂನಿ ವ್ಹಾಳಜಾಯ್ ನ್ಹಂಯ್? ಪುಣ್, ಕೆನ್ನಾ ಮ್ಹಣಾಸರ್? ಹೆಂ ಜಾಣ್ವಿಕಾಯೆನ್ ವಾಡ್ಚೆ ವ್ಯಕ್ತಿಚೆಂ ಸವಾಲ್. ಕೆನ್ನಾ ಮ್ಹಣಾಸರ್? ಕಾಲ್ ಮ್ಹಣಾಸರ್, ಆಜ್ ಮ್ಹಣಾಸರ್, ಆತ್ತಾಂ ಮ್ಹಣಾಸರ್! ಜಯ್ತ್ ಪರಿವರ್ತನಾಚಿಂ ಉತ್ರಾಂ ಹಿಂ.
"ಆನಿ ಆಯ್ಜ್ ಹಾಂವ್ ಆಚ್‌ಕಿತ್ ಕಾಳ್ಕಾಂತ್ ಖೊಲ್ ಬುಡೊನ್ ಗೆಲೊ". ಆನಿ ಆಯ್ಜ್ ಕೊಣ್ ಜಾಣಾ ಖಂಯ್ ಥಾವ್ನ್ ಹಿ ಬುದ್ವಂತ್ಕಾಯ್ ಆಯ್ಲಿ ಮ್ಹಣ್, ಹಾಂವ್ ಆವ್ಚಿತ್ ಕಾಳ್ಕಾಂತ್ ಆಖ್ಖೊ ಬುಡೊನ್ ಗೆಲೊಂ ತೆಂ ಮ್ಹಕಾ ಗಮ್ಲೆಂ. ಹೆಂ ಬುಡ್ಣೆಂ ಆಚಾನಕ್ ನ್ಹಂಯ್ ಪುಣ್ ಹೆಂ ಜ್ಞಾನೋದಯ್ ಅವ್ಚಿತ್! ಝಳ್‌ಝಳ್ಚ್ಯಾ ಉಜ್ವಾಡಾಂತ್ ಹೆಂ ಹಾಂವೆಂ ಚಿಂತುಂಕ್ ಸಯ್ತ್ ನಾತ್‌ಲ್ಲೆಂ, ಚಿಂತ್ಚಿ ಗರ್ಜ್‌ಯ್ ನಾತ್‌ಲ್ಲಿ. ಚಿಂತ್ಚಿ ಸಕತ್‌ಚ್ ಭಾಡ್ಡ್ ಜಾಲ್ಲಿ ತರ್! ಸುರ್ಯಾಕ್ ಕೆನ್ನಾಯ್ ಆಮಾಸ್ ಆಯಿಲ್ಲೊ ಆಸಾ? ಆಮಾಸ್ ಆನಿ ಪುನವ್ ಚಂದ್ರಾಕ್, ಝಳ್‌ಝಳ್ಚ್ಯಾ ಸುರ್ಯಾಕ್ ನ್ಹಂಯ್. ಪುಣ್ ಹಾಂಗಾ ಸುರ್ಯಾಚೆಂ ಗ್ರಹಣ್ ಜಾಲ್ಲೆಂ! ಒಟ್ಟಾರೆ ಹಾಂವ್ ಕಾಳ್ಕಾಂತ್ ಖೊಲ್ ಬುಡೊನ್ ಗೆಲೊಂ, ಕಸಲೊ ಕಾಳೊಕ್ ಹೊ? ಬೆಳ್ಶೆಲ್ಲೊಗೀ? ತಾಚಿ ಅಜೂನ್ ಖಬರ್ ನಾ.
"ಯುಗಾನ್‌ಯುಗಾಂ ಮ್ಹಜ್ಯಾ ಆಂಗಾರ್ ದಾಟಿಲ್ಲೊ ಉಜ್ವಾಡಾಚ್ಯಾ ಧುಲ್ಲಾಚೊ ಥರ್ ವಿರ್ಗಳೂನ್ ಆಂಗ್ ಸಾಮ್ಕೆಂ ಲ್ಹವ್ ಜಾಲೆಂ". ಯುಗಾನ್‌ಯುಗಾಂ, ವರ್ಸಾಂ-ವರ್ಸಾಂ ಮ್ಹಜೆರ್, ಶೆಕ್ಡ್ಯಾಂ-ಶೆಕ್ಡ್ಯಾಂ ಮನ್ಶಾ ಜನಾಂಗಾಚ್ಯಾ ಆಂಗಾರ್ ದಾಟಿಲ್ಲ್ಯಾ ಉಜ್ವಾಡಾಚ್ಯಾ ಕಣಾಂಚಿ ಸಕತ್ ವಿರ್ಗಳೊಂಕ್ ಲಾಗ್ಲಿಂ, ಸೊನ್ಯಾಚಿ ವೊಪ್ ಮಾಜ್ವೊಂಕ್ ಲಾಗ್ಲಿ. ಹಾಂವೆ ಸಾಂಗ್‌ಲ್ಲೆಂ ನ್ಹಂಯ್ ಸುರ್ವೆರ್‌ಚ್? ಉಜ್ವಾಡಿ ಉಜ್ವಾಡ್ ನ್ಹಂಯ್ ಹೊ, ಕಪಟಿ ಉಜ್ವಾಡ್ ಹೊ. ಉಜ್ವಾಡಾಚ್ಯಾ ಭವ್ಯ್ ರುಪಾಕ್ ಕಳಂಕ್ ಹಾಡ್ಚೊ ಉಜ್ವಾಡ್ ಹೊ! ಆನಿ ಆತಾಂ ಹೆಂ ಆಚರ್ಯೆಂ ಜಾಚೆ ಖಾತಿರ್ ಹರ್‍ಯೆಕೆ ಜಿವಿನ್ ದಿಮ್ಕುರ್‍ಯಾಂನಿ ವಿನವ್ಣ್ಯೊ ಕರ್‍ಚೆ ತಸಲೆಂ. ಹ್ಯಾ ಕಪಟಿ ಉಜ್ವಾಡಾಚ್ಯಾ ಕಣಾಂಚಿ ಸಕತ್ ವಿರ್ಗಳ್ಳಿ ಆನಿ ಪ್ರಭಾವ್ ಜಾವ್ನ್ ಆಂಗ್ ಸಾಮ್ಕೆಂ ಹಾಳು ಜಾಲೆಂ! ಮ್ಹಳ್ಯಾರ್ ಮ್ಹಜೆಂ ಆಂಗ್, ಮ್ಹಜೆಂ ಆಸ್ಥಿತ್ವ್‌ಚ್ ಬರೆಂ ಜಡ್ ಆಸ್‌ಲ್ಲೆಂ ಮ್ಹಣ್ ಒಪ್ಲೊಂ ಹಾಂವ್. `ಹೆಡ್‌ವೆಯ್ಟ್' ಆಸ್‌ಲ್ಲಿ ತೆಂ ಒಪ್ಲೊಂ ಹಾಂವ್! ದೊಗಾ-ತೆಗಾಂಚ್ಯಾ ಕಾನಾಕ್ ವಾಂಯ್ಗಿಂ ಬಾಂದ್ಚ್ಯಾ ಹ್ಯಾ ಉಜ್ವಾಡಾಚಿ `ಬೆಟ್ರಿ ಡೌನ್' ಜಾಲಿ; ಹಕೀಗತ್, ವಾಸ್ತವ್ ಜೀವ್ ಜಾಲಿ ಆನಿ ಆಂಗ್ ಲ್ಹವ್ ಜಾಲೆಂ. ಹೊ ಮ್ಹಾಕಾ `ಯುರೆಕಾ' ಅನ್ಬೊಗ್, ಹೊ ಮ್ಹಾಕಾ ಮಿಸ್ತಿಕಾತೆಚೊ ಅನ್ಬೋಗ್.
"ಮನಾಚ್ಯಾ ರಿತ್ಯಾ ಮಳ್ಬಾಂತ್ ಲಾಖಾಂನಿ ನೆಕೆತ್ರಾಂ ಪೆಟ್ಲಿಂ ಶೀಮ್-ಮೇರ್ ನಾಶಿಲ್ಲಿಂ ಕಿತ್ಲಿಶಿಂಚ್ ಮಳ್ಬಾಂ ಉಕ್ತಿಂ ಜಾಲಿಂ..." ಹಾಳು ಜಾಲ್ಲ್ಯಾ ಜಿವಾಂತ್, ಬಡಾಯ್ ನಾಸ್ಲ್ಯಾ ಕಾಳ್ಜಾಂತ್, ಲಬ್ದವ್ಣಿ ನಾಸ್‌ಲ್ಲ್ಯಾ ರಿತ್ಯಾ ರಿತ್ಯಾ ಮನಾಚ್ಯಾ ಮಳ್ಬಾಂತ್ ಎಕಚ್ಚಾಣೆ ಏಕ್-ದೋನ್ ನ್ಹಂಯ್, ಲಾಖಾಂನಿ ನೆಕೆತ್ರಾಂ ಪೆಟ್ಲಿಂ. ಪೊಕೊಳ್ ಉಜ್ವಾಡ್ ಪೊಳ್ಳೊ, ಖರೊ ಉಜ್ವಾಡ್ ಪೆಟ್ಲೊ. ಬುದ್ವಂತ್ಕಾಯ್ ಜೀವ್ ಜಾಲಿ, ಜಾಣ್ವಾಯ್ ಫಾಂಕ್ಲಿ. ಶೀಮ್-ಮೇರ್ ನಾಶಿಲ್ಲಿಂ ಕಿತ್ಲಿಶಿಂಚ್ ಮಳ್ಬಾಂ ಉಕ್ತಿಂ ಜಾಲಿಂ... ಸರ್ವ್ ಥರಾಂಚಿ ಬಂದಡ್, ವೊಂಯೊ ಘಾಲ್ಚಿಂ ಕ್ಷುಲ್ಲಕ್ ಮನಾಂ, ಸರ್ವ್ ಗಾಂವಾಂನಿ, ಜಿವಾಂನಿ ಕಾಳೊಕ್‌ಚ್ ದೆಕ್ಚಿಂ ಚಿಂತ್ಚಿಂ ಕಾಳ್ಜಾಂ ರುಂದಾಲಿಂ, ವಿಸ್ತಾರ್ಲಿಂ ಶೀಮ್-ಮೇರ್ ನಾಶಿಲ್ಲ್ಯಾ ಕಿತ್ಲೆಶ್ಯಾ ಮಳ್ಬಾಂ ಭಾಶೆನ್.
ಆನಿ "....ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ", ಹಾಂವ್ ಹ್ಯಾಚ್ ಮಾನುಶಿಕ್ ಸಹಜ್ ಗತಿಂತ್ ಜಿಯೆತಲೊಂ. ಆನಿ ಆತಾಂ ಹಾಂವ್ ವ್ಹಡ್‌ಪಣ್ ಚೆಂಚುನ್, ಖಾಲ್ತ್ಯಾಪಣಾಚ್ಯಾ, ಲ್ಹಾನ್ವಿಕಾಯೆಚ್ಯಾ ಕಾಳೊಕ್ ಮ್ಹಳ್ಳ್ಯಾ ಉಜ್ವಾಡಾನ್ ಜಿಯೆತಲೊಂ! "ತುಂ ಕಿತೆಂಚ್ ನೆಣಾಯ್ ಮ್ಹಣ್ ಜಾಣಾಸ್ಚೆಂಚ್ ವ್ಹರ್ತಿ ಜಾಣ್ವಾಯ್ ಖಂಯ್", ತುಂ ಕಾಳೊಕಾಂತ್‌ಚ್ ಜಿಯೆತಾಯ್ ಮ್ಹಣ್ ಜಾಣಾಸ್ಚೆಂ ವ್ಹಡ್ ಉಜ್ವಾಡ್ ನ್ಹಂಯ್ ತರ್?
ಕವಿ ಪ್ರಕಾಶ್ ಪಡ್‌ಗಾಂವ್ಕರಾಕ್ ಮ್ಹಜೆ ನಮಾನ್.
-ಮ್ಯಾಕ್ಸಿಮ್ ಲೋಬೊ
ಮೊತಿಯಾಂಚಿಂ ಮೊಲಾಂ:
ಏಕ್: ಜಾಯೊ ಜುಯೊ (ಮನೋಹರ್ ಸರ್ದೇಸಾಯಿ)
ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ:
ಕೊಂಕ್ಣಿ ಕಾವ್ಯಾಚ್ಯಾ ಪಕ್ವನಾ ಸಂಗಿಂ ಅಮೃತ್ ಚಾಕ್ತಾನಾ
ಘಟ್ ಧರಾ..! ಮ್ಯಾಕ್ಸಿಮ್ ಲೋಬೊ ಸ್ಪೇಯ್ನಾ ಥಾವ್ನ್ ಬರಯ್ತಾ
ವಾಸ್ತವಿಕತೆಚ್ಯಾ ವಿಪರ್ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್‍ಚ್ಯೊ ಕವಿತಾ
ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:
ಸೊಧ್ನಾಂ
ಡಣಾ ಡಣಾ
ದೊರೆ
ಹಾಂವ್ ಜಾತಾನಾ