ಸಂಪಾದಕೀಯ್:
ತ್ಸುನಾಮಿಚೆಂ ಆನ್ಯೇಕ್ ಗೀತ್
ಪೊರ್‍ಚ್ಯಾಪೋಯ್ರ್ ಪರ್‍ಯಾಂತ್ ಪರ್ಕಿ ಜಾವ್ನ್ ಆಸ್‌ಲ್ಲೆಂ ತ್ಸುನಾಮಿ ಆತಾಂ ಮ್ಹಾಲ್ಗಡ್ಯಾಂಕ್ ಧರುನ್ ನೆಂಟ್ಯಾ ಭುರ್ಗ್ಯಾಂಚ್ಯಾ ಜಿಬಾಂನಿ ಪಾಸುನ್ ಸದಾಂನೀತ್ ಘೊಳ್ತಾ ತರ್, ತ್ಸುನಾಮಿಚೆ ಸಕ್ತೆಚಿ ತಾಕತ್ ಕಿತ್ಲಿ ತೆಂ ಕಳ್ತಾ. ಕಸಲೀಯ್ ಪರ್ವಾ ನಾಸ್ತಾಂ 'ಬಿಂದಾಸ್' ಆಸ್‌ಲ್ಲ್ಯಾ ಮನ್ಶಾಕುಳಾಕ್ ತ್ಸುನಾಮಿ ಏಕ್ ಲಿಸಾಂವ್!
ಆದ್ಲ್ಯಾ ಅಂಕ್ಯಾಂತ್ ಕವಿ ಶಬ್ಬೀರ್ ಬಾಯ್‌ದಾನ್ ತ್ಸುನಾಮಿಚಿ ಏಕ್ ಕೂಸ್ ಆಮ್ಕಾಂ ದಾಕಯಿಲ್ಲಿ. ಪುಣ್ ಹಾಂಗಾಸರ್ ಕವಿ ಗೊಡ್‌ಫ್ರಿ ಡಿ'ಸಿಲ್ವಾ ಆಪುರ್ಬಾಯೆಚ್ಯಾ ಪ್ರಾಸಾಂನಿ ಗುಂತ್‌ಲ್ಲೆಂ ಏಕ್ ಸಾದೆಂ ಸೊಂಪೆಂ ಗೀತ್ ಗಾಯ್ತಾ. ಹ್ಯಾ ಗಿತಾಂತ್ ತ್ಸುನಾಮಿಚಿಂ ಕುಸಾಂ ದಾಕವ್ನ್, ಮನ್ಶಾಕುಳಾಚಿ ಬಚಾವಿ ದೆವಾಚ್ಯಾ ಹಾತಾಂತ್ ಆಸಾ ಮ್ಹಳ್ಳೆಂ ಧಾರ್ಮಿಕ್ ರಾಜಾಂವ್ ಕವಿ ಹಾತಾಳ್ತಾ.
ಆಮ್ಚೆ ವಿಗ್ಯಾನಿ ಹೆಂ ಕಿತ್ಲೆಂ ಮಾನ್ತಲೆ ಮ್ಹಜ್ಯಾನ್ ಸಾಂಗೊಂಕ್ ಜಾಯ್ನಾ.
ಗೊಡ್‌ಫ್ರಿ ಡಿ'ಸಿಲ್ವಾ ಆಪ್ಣಾಕ್ ಕವಿ ಮ್ಹಣೊನ್ ಆಪಯ್ನಾ. ವೇಳ್ ಪಾಶಾರ್ ಕರುಂಕ್ ಆಪುಣ್ ಕವಿತಾ ಬರಯ್ತಾಂ ಮ್ಹಣ್ಚ್ಯಾ ತಾಚಿ ಕವಿತಾ, ಬಾಂದಾವಳಿ ದಿಷ್ಟಿನ್ ಬೋಟ್ ಜೊಕುಂಕ್ ಜಾಯ್ನಾ ತಸಲಿ. ಠರಾವಣೆಚೆ ದಿಷ್ಟಿನ್ ತಾಣೆ ಥೊಡಿಂ ಪ್ರೇತನಾಂ ಚಲಯ್ಲಿಂ ಜಾಲ್ಯಾರ್ ಕವಿಂಚೆ ಪಂಗ್ತಿಂತ್ ಉಂಚಾಯೆಕ್ ಚಡೊಂಕ್ ತಾಕಾ ತ್ರಾಸ್ ಜಾಂವ್ಚೆನಾಂತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತ್ಸುನಾಮಿ
ದರ್ಯಾ ಥಳಾ ಧರ್ತಿ ಕಾಂಪ್ಲಿ
ಊಂಚ್ ಉಡ್ಲಿಂ ತಿಂ ಲ್ಹಾರಾಂ
ಮಿರ್‍ವೊನ್ ಗೆಲಿ ದರ್ಯಾ ತಡ್
ಅಕ್ರಮ್ ಕರುನ್ ಶೆರಾಂ
ಕೊಸ್ಳೊನ್ ಪಡ್ಲಿಂ ಬಿಡಾರಾಂ
ವ್ಹಾಳ್ಳಿಂ ವ್ಹಡಾಂ, ಲ್ಹಾನಾಂ
ಅಬ್ಳೆ, ಕಿತೆಂಚ್ ನೆಣಾಂತ್ ತಿಂ
ಸರ್ವ್ ಸಂಪದ್ಲೆಂ ಖಿಣಾ
ಲೋಕ್ ಆಸ್‌ಲ್ಲೊ ಸಂತೊಸಾನ್
ಕರುನ್ ನತಾಲ್ ಫಾಲೆಂ
ಕೊಣೆಂಚ್ ಚಿಂತುಂಕ್ ನಾತ್ಲೆಂ
ಕರಾಳ್ ಸಕಾಳ್ ಅಸ್ಲೆಂ
ವಾಂಚ್‌ಲ್ಲಿಂ ಪಳ್ತಾಲಿಂ ಮಾರ್ನ್ ಬೋಬೊ
ಧಾಂವ್ಯಾಂ, ಧಾಂವ್ಯಾಂ -ಮಿ
ಧಾಂವ್ಡಾಯ್ತಾಲೆಂ ನೆಣ್ತ್ಯಾ ಲೊಕಾಕ್
ಮಾರೆಕಾರ್ ತ್ಸುನಾಮಿ
ತ್ಸುನಾಮಿ, ತ್ಸುನಾಮಿ
ವೊಲಾಂವ್ಕ್ ತುಕಾ ಕಷ್ಟ್
ಪ್ರಕೃತೆಚಿ ದೆಸ್ವಾಟ್ ಜಾಲಿ
ಕೆಲೊಯ್ ಬರ್ಪೂರ್ ನಷ್ಟ್
ತ್ಸುನಾಮಿ, ತ್ಸುನಾಮಿ
ಮಿಸಾಂವ್ ತುಜೆಂ ಸಂಪ್ಲೆಂ
ಚರಿತ್ರೆಚ್ಯಾ ಪಾನಾಂನಿ
ನಾಂವ್ ತುಜೆಂ ಠಿಕ್ಲೆಂ
ಬಲಿ ಜಾಲ್ಲ್ಯಾ ಲೊಕಾಖಾತೀರ್
ಮಾಗ್ಯಾಂ ಸಾಸಣ್ ಶಾಂತಿ
ಉಪ್ಕಾರ್ ಆಮಿ ಆಟವ್ಯಾಂ
ಮಾನುನ್ ರಚ್ನಾರಾಚಿ ಶಾಥಿ
ಮಾಗ್ಯಾಂ ರಾಕೊಂಕ್ ಆಮ್ಕಾಂ ಸರ್ವಾಂಕ್
ಕರ್‍ಯಾಂ ತಾಚಿ ಆರತಿ
ಸಂಸಾರ್ ಸುಭದ್ರ್ ತಾಚೆ ಹಾತಿಂ
ತೊಚ್ ಆಮ್ಚೊ ಸಾರಥಿ!
- ಗೊಡ್‌ಫ್ರಿ ಡಿ'ಸಿಲ್ವಾ