ಮಂಗ್ಳುರ್ ಕಲ್ಚರಲ್ ಎಸೋಸಿಯೇಶನ್ ಕವಿತಾ ಸ್ಪರ್ಧೊ: ಗ್ಲ್ಯಾಡ್ಸನ್ ದಾಲ್ಮೇದಾಕ್ ಪಯ್ಲೆಂ ಸ್ಥಾನ್
ಮಂಗ್ಳುರ್ ಕಲ್ಚರಲ್ ಎಸೋಸಿಯೇಶನ್ ದೋಹಾ ಖತಾರ್ ಹಾಂಣಿ ಖತಾರಾಂತ್ ಆಸಾ ಕೆಲ್ಲ್ಯಾ "ಕೊಂಕ್ಣಿ ಕವಿತಾ ಸ್ಪರ್ಧೊ" ಹಾಂತುನ್ ಗ್ಲ್ಯಾಡ್ಸನ್ ದಾಲ್ಮೇದಾ ಹಾಕಾ ದೋನ್ ಹಜಾರ್ ಖತಾರಿ ರಿಯಾಲಾಂಚ್ಯಾ ಇನಾಮಾ ಸಂಗಿಂ ಪಯ್ಲೆ ಸ್ಥಾನ್ ಫಾವೊ ಜಾಲಾಂ.
ನೆವಿಲ್ ಫೆರ್ನಾಂದ್ ಹಾಚೆ ಕವಿತೆಕ್ ದೇಡ್ ಹಜಾರ್ ಖತಾರಿ ರಿಯಾಲಾಂ ಸಂಗಿಂ ದುಸ್ರೆಂ ಸ್ಥಾನ್ ತಶೆಂಚ್ ಬೆಂಜಮಿನ್ ರೆಬೈರೊ ಹಾಚೆ ಕವಿತೆಕ್ ಏಕ್ ಹಜಾರ್ ಖತಾರಿ ರಿಯಾಲಾಂ ಸವೆಂ ತಿಸ್ರೆಂ ಸ್ಥಾನ್ ಫಾವೊ ಜಾಲಾಂ.
ತ್ರಿಭಾಷಾ ಲೇಖಕಿ ಯಂಸಿಎ ಕಲಾಪುರಸ್ಕಾರ್ 2014 ಸನ್ಮಾನಿತ್ ಕ್ಯಾಥರಿನ್ ರೊಡ್ರಿಗಸ್ ಹಿಣೆಂ ದೋಹಾ ಖತಾರಾಂತ್ ಚಲಲ್ಲ್ಯಾ ಎಕಾ ಸಂಭ್ರಮಾ ವೆಳಾರ್ ಬಹುಮಾನಾಂ ವಿತರಣ್ ಕೆಲಿಂ.
ಖತಾರಾಂತ್ ಪಯ್ಲೆ ಪಾವ್ಟಿಂ ಜಾಂವ್ಚ್ಯಾ ಹ್ಯಾ ಸ್ಪರ್ಧ್ಯಾಂತ್ ಇಕ್ರಾ ಜಣಾಂನಿ ಪಾತ್ರ್ ಘೆತಲ್ಲೊ ಆಸ್ತಾಂ, ವಿಶೇಸ್ ಕಿತೆಂಗಿ ಮ್ಹಳ್ಯಾರ್ ಭಾಗ್ ಘೆತಲ್ಲ್ಯಾ ಸಕ್ಡಾಂಕ್ ಪ್ರೊತ್ಸಾಹಾಚಿಂ ಬಹುಮಾನಾಂ ದೀವ್ನ್ ಯಂಸಿಯೆ-ನ್ ಸಾಹಿತ್ಯಾಚೊ ಮಹತ್ವ್ ಉಕಲ್ನ್ ಧರ್ಲೊ ಮಾತ್ರ್ ನ್ಹಯ್ ಫುಡೆಂ ನಿರಂತರಿ ಬರಂವ್ಕ್ ಪ್ರೊತ್ಸಾಹ್ ದಿಲೊ.
ಹ್ಯಾ ವರ್ಸಾ ಥಾವ್ನ್ ವರ್ಸಾವರ್ ಜಾಂವ್ಕ್ ಆಸ್ಚ್ಯಾ ಹ್ಯಾ ಸ್ಪರ್ಧ್ಯಾಕ್ ಸ್ಪರ್ಧಿಕಾಂಚೊ ಸಂಕೊ ಚಡೊನ್ ಯೆಂವ್ಚಿಂ ಖುಣಾಂ -ಥೊಡ್ಯೊ ಅಬಿಪ್ರಾಯೊ ಆಯ್ಕಾತಾನಾ - ಯೆದೊಳಚ್ ದಿಸೊನ್ ಯೆತಾತ್.
ಸ್ಪರ್ಧ್ಯಾಚ್ಯೊ ಕವಿತಾ ಕೇಂದ್ರ್ ಸಾಹಿತ್ಯ ಅಕಾಡೆಮಿ ಪ್ರಸಸ್ತಿ ವಿಜೇತ್ ಕೈವ್ ಶ್ರೀ ಮೆಲ್ವಿನ್ ರೊಡ್ರಿಗಸ್ ಆನಿ ಪ್ರಸಿದ್ಧ್ ಕವಿ ಸಿಜ್ಯೆಸ್ ತಾಕೊಡೆ ಹಾಂಣಿ ವೊರವ್ಣಿ ಕೆಲ್ಲ್ಯೊ.