ಓಸ್ಟಿನ್, ಮಾರುತಿ, ಆಶ್ಮಾಕ್ ಕವಿತಾ ಬರೊಂವ್ಚೆ ಸರ್ತೆಂತ್ ಇನಾಮಾಂ
ಕವಿತಾ ಟ್ರಸ್ಟಾನ್ ಚಲೊವ್ನ್ ವೆಲ್ಲ್ಯಾ ದೆ. ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಅಖಿಲ್ ಭಾರತ್ ಕೊಂಕಣಿ ಕವಿತಾ ಬರೊಂವ್ಚೆ ಸರ್ತೆಂತ್ ಮಂಗ್ಳುರ್ ಲೂರ್ಡ್ಸ್ ಸೆಂಟ್ರಲ್ ಇಸ್ಕೊಲಾಂತ್ ಆಟ್ವೆ ಕ್ಲಾಶಿಂತ್ ಶಿಕ್ಚ್ಯಾ ಓಸ್ಟಿನ್ ಡಿಕುನ್ಹಾಕ್ ಪಯ್ಲೆಂ ಸ್ಥಾನ್ ಫಾವೊ ಜಾಲಾಂ. ದುಸ್ರೆಂ ಇನಾಮ್ ಗೊಂಯ್ ಮಾಪ್ಸಾ ಲಾಗ್ಸಾರ್ಚ್ಯಾ ವೆರ್ಲಾ ಪರ್ರಾ ಗಾಂವ್ಚ್ಯಾ ಸೇಕ್ರೆಡ್ ಹಾರ್ಟ್ ಹೈಸ್ಕುಲಾಂತ್ ನವ್ವೆ ಕ್ಲಾಶಿಂತ್ ಶಿಕ್ಚ್ಯಾ ಮಾರುತಿ ಮುತುಗರಾಕ್ ಫಾವೊ ಜಾಲಾಂ ತರ್ ತಿಸ್ರೆಂ ಇನಾಮ್ ಗೊಂಯ್ ಬಿಚೊಲೀಂತ್ ಆಸ್ಚ್ಯಾ ಶ್ರೀ ಶಾಂತಾದುರ್ಗಾ ಹೈಸ್ಕುಲಾಂತ್ ಧಾವೆ ಕ್ಲಾಶಿಂತ್ ಶಿಕ್ಚ್ಯಾ ಅಶ್ಮಾ ಗೋವೆಕಾರ್ ಹಿಕಾ ಫಾವೊ ಜಾಲಾಂ.
Austin D'Cunha, Maruti Mutugur, Ashma Govekar
ಹಿ ಸರ್ತ್ ಆಂವ್ದುಂ ನೊವ್ಯಾ ವರ್ಸಾಂತ್ ಚಲಲ್ಲಿ ಆಸುನ್ ಗೊಂಯ್, ಕೇರಳ ಆನಿ ಕರ್ನಾಟಕಾಚ್ಯಾ 281 ವಿದ್ಯಾರ್ಥಿಂನಿ ಹಾಂತುಂ ಭಾಗ್ ಘೆತಲ್ಲೊ. ವೊರಯ್ಣಾರ್ ಜಾವ್ನ್ ಕೊಂಕಣಿ ಕವಿ ಮಾವ್ರಿಸ್ ಡೆಸಾ ಶಾಂತಿಪುರ ತಶೆಂ ಟಸ್ಟಿ ವಿಕ್ಟರ್ ಮಥಾಯಸ್ ಹಾಂಣಿ ಸಹಕಾರ್ ದಿಲ್ಲೊ.
ಪಯ್ಲೆಂ ಇನಾಮ್ ಜಾವ್ನ್ ರುಪಯ್ 2000, ಯಾದಸ್ತಿಕಾ ತಶೆಂ ಪ್ರಮಾಣ್ ಪತ್ರ್ ಲಾಭ್ತಲೆಂ ಜಾಲ್ಯಾರ್ ದುಸ್ರೆಂ ಇನಾಮ್ ಜೊಡಲ್ಲ್ಯಾಕ್ ರುಪಯ್ 1000 ಆನಿ ತಿಸ್ರೆಂ ಇನಾಮ್ ಜಾವ್ನ್ ರುಪಯ್ 750, ಯಾದಸ್ತಿಕಾ ತಶೆಂ ಪ್ರಮಾಣ್ ಪತ್ರಾ ಸಾಂಗಾತಾ ಕವಿತಾ ಟ್ರಸ್ಟ್ ದಿತಲೆಂ. ಹ್ಯಾ ಬರಾಬರ್ ಮಡ್ಗಾಂವ್ ಸೈಂಟ್ ಅಂತೋನೀಸ್ ಹೈಸ್ಕುಲಾಂತ್ ಸವೆ ಕ್ಲಾಶಿಂತ್ ಶಿಕ್ಚ್ಯಾ ರಾಜಿನಾ ಖಾಜುನ್ ಆನಿ ಸಾಲ್ಸೆಟ್ ಗೊಂಯ್ಚ್ಯಾ ಕುಂಚೊಳಿಂ ಯುನಾಯ್ಟೆಡ್ ಹೈಸ್ಕುಲಾಂತ್ ಪಾಂಚ್ವೆ ಕ್ಲಾಶಿಂತ್ ಶಿಕ್ಚ್ಯಾ ಸಾನಿಯಾ ಸಂಜಯ್ ಬಾಗಿಲ್ಗೆಕಾರಾಕ್ ಸಮಾಧಾನಾಚಿಂ ಇನಾಮಾಂ ಮ್ಹಣುನ್ ರುಪಯ್ 500 ಲಾಭ್ತಲೆ. ಭಾಗ್ ಘೆತಲ್ಲ್ಯಾ ಸರ್ವಯ್ ವಿದ್ಯಾರ್ಥಿಂಕ್ ಪ್ರಮಾಣ್ ಪತ್ರಾಂ ಕವಿತಾ ಟ್ರಸ್ಟ್ ಧಾಡುನ್ ದಿತಲೆಂ.
ಪಯ್ಲೆಂ ಇನಾಮ್ ಜೊಡಲ್ಲ್ಯಾ ಓಸ್ಟಿನಾಚಿ ಕವಿತಾ 'ಪಾರ್ವೊ, ಮಾಜರ್ ಆನಿ ಹಾಂವ್' ಭುರ್ಗ್ಯಾಂನಿ ವಿಜ್ಞಾನ್ ಕ್ಲಾಶಿಂತ್ ಶಿಕ್ಚ್ಯಾ survival of the fittest ಚಿಂತ್ಪಾಥಾವ್ನ್ ಉದೆಲ್ಲಿ ಆಸುನ್, ಎಕಾ ಭುರ್ಗ್ಯಾಚೆ ಮಾನಸಿಕತೆಚೆರ್ ಜಾಂವ್ಚ್ಯಾ ಪರಿಣಾಮಾವಿಶಿಂ ಉಜ್ವಾಡ್ ಘಾಲ್ತಾ. ಮಾರುತಿಚಿ ಕವಿತಾ 'ವೇಳ್ ನಾ' ಮ್ಹಣುನ್ ಸಾಂಗ್ಚ್ಯಾ ವ್ಯಕ್ತಿನ್ ಹೊಗ್ಡಾಂವ್ಚ್ಯಾ ಮೊಲಾಂವಿಶಿಂ ಉಸ್ತಿತಾ ತರ್, ಅಶ್ಮಾಚಿ ಕವಿತಾ 'ಫುಲೊಂಕ್ ದಿಯಾ ಆಮ್ಕಾಂ' ಭುರ್ಗ್ಯಾಂಚೆಂ ರೋದನ್ ಆಟಾಪಿಲ್ಲಿ ಜಾವ್ನಾಸಾ.
ಜನೆರ್ ಧಾ ತಾರಿಕೆರ್ ಮಂಗ್ಳುರ್ ಶಕ್ತಿನಗರಾಂತ್ ಆಸ್ಚ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲ್ಚ್ಯಾ ಧಾವ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಜಿಕ್ಲಲ್ಯಾ ಭುರ್ಗ್ಯಾಂಕ್ ಇನಾಮಾಂ ವಾಂಟ್ತಲೆ.
ऑस्टीन, मारुती, आश्माक कविता बरोंवचे सर्तेंत इनामां
कविता ट्रस्टान चलोवन वेल्ल्या दे. चार्ल्स आनी तेरेझा रोड्रीगस स्मारक अखिल भारत कोंकणी कविता बरोंवचे सर्तेंत मंगळूर लूर्ड्स सेंट्रल स्कूलांत आटवे क्लाशींत शिकच्या ऑस्टीन डिकून्हाक पयलें स्थान फावो जालां. दुसरें इनाम गोंय मापशां लागसारच्या वेरला पर्रा गांवच्या सेक्रेड हार्ट्स हैस्कुलांत नव्वे क्लाशींत शिकच्या मारूती मुतुगराक फावो जालां तर तिसरें इनाम गोंय बिचोलींत आसच्या श्री शांतादुर्गा हैस्कुलांत धावे क्लाशींत शिकच्या आशमा गोवेकार हिका फावो जालां.
ही सर्त आंवदूं नोव्या वरसांत चलल्ली आसून गोंय, केरळ आनी कर्नाटकाच्या 281 विद्यार्थिंनी हांतूं भाग घेतल्लो. वोरयणार जावन कोंकणी कवी माव्रीस डीसा शांतीपुरा तशें ट्स्टी विक्टर मथायस हांणी सहकार दिल्लो.
पयलें इनाम जावन रुपय २०००, यादस्तिका तशें प्रमाण पत्र लाभतलें जाल्यार दुसरें इनाम जोडल्ल्याक रुपय १००० आनी तिसरें इनाम जावन रुपय ७५०, यादस्तिका तशें प्रमाण पत्रा सांगाता कविता ट्रस्ट दितलें. ह्या बराबर मडगांव सैंट आंतोनीस हैस्कुलांत सवे क्लाशींत शिकच्या राजिना खाजुन आनी साल्सेट गोंयच्या कुंचोळीं युनायटेड हैस्कुलांत पांचवे क्लाशींत शिकच्या सानिया संजय बागिल्गेकाराक समाधानाचीं इनामां म्हणून रुपय ५०० लाभतले. भाग घेतल्ल्या सरवय विद्यार्थिंक प्रमाण पत्रां कविता ट्रस्ट धाडून दितलें.
पयलें इनाम जोडल्ल्या ऑस्टीनाची कविता 'पार्वो, माजर आनी हांव', भुरग्यांनी विञान क्लाशींत् शिकच्या survival of the fittest चिंतपा थावन उदेल्ली आसून, एका भुरग्याचे मानसिकतेचेर जांवच्या परिणामाविशीं उजवाड घालता. मारुतीची कविता 'वेळ ना' म्हणूण् सांगच्या व्यक्तीन होगडांवच्या मोलांविशीं उस्तिता तर, आश्माची कविता 'फुलोंक दिया आमकां' भुरग्यांचें रोदन आटापिल्ली जावनासा.
जानेर धा तारकेर मंगळूर शक्ती नगरांत आसच्या विश्व कोंकणी केंद्रांत चलच्या धाव्या कविता फेस्त संदर्भार जिकलल्या भुरग्यांक इनामां वांटतले.