ನತಾಲಾಂಚೊ ಸಂದೇಶ್: ಸತಾಚೊ ಬಾವ್ಟೊ ಉಬೊಂ, ಮೊಗಾಚೊ ವ್ಹಾಳೊ ವ್ಹಾಳೊಂ
ಕ್ರೀಸ್ತ್ ಯೆಣ್ಯಾಚೊ ಕಾಳ್ ಮ್ಹಣ್ತಾನಾ ಜೆಜುನ್ ಸಂಸಾರಾಕ್ ದಿಲ್ಲೊ ಸಂದೇಶ್ ಆಮ್ಚ್ಯಾ ಮನಾಂತ್ ಯೆಂವ್ಚೊ ಸಹಜ್. ಸರ್ವ್ ಧರ್ಮಾಂಚೆಂ ಮೂಳ್ ತತ್ವ್ ಏಕ್‌ಚ್ ಸತ್ ಆನಿ ಏಕ್ ದೇವ್ ಮ್ಹಣ್ ಧರ್ಮಾಚೆ ಪರಿಧಿ ಭಾಯ್ರ್ ವಚೊನಯ್ ಲೋಕ್ ಮಾಂದ್ತಾ. ಹರ್ಯೆಕಾ ಧರ್ಮಾಚೊ ಸಂದೇಶ್ ಶಾಂತಿ, ಎಕಾಮೆಕಾಚೊ ಮೋಗ್ ಆನಿ ಎಕ್ವಟ್, ಆನಿ ಆಪ್ಲ್ಯಾ ಸರ್ವೇಶ್ವರಾ ಥಂಯಿ ಅತ್ಮಿಕ್ ಮಿಲನ್. ಕ್ರಿಸ್ತಾಚೊ ಸಂದೇಶ್ ಮನ್ಶಾ-ಕಾಳ್ಜಾಕ್ ಪಾವಜಾಯ್ ಜಾಲ್ಯಾರ್ ವಾಂಜೆಲಚ್ ವಾಚಿಜಾಯ್ ಮ್ಹಣ್ ನಾ. ವಿವಿಧ್ ಥರಾನ್ ತೊ ಮೆಳವ್ಯೆತ್. ಪ್ರಕೃತಿ ದ್ವಾರಿಂ, ಖಂಯ್ಚ್ಯಾಯ್ ಎಕೆ ವ್ಯಕ್ತಿದ್ವಾರಿಂ, ಎಕಾ ಸನ್ನಿವೇಶಾದ್ವಾರಿಂ. ಹೆಂ ಏಕ್ ಉದಾಹರಣ್ ಸಾದರ್ ಕರ್ಚೆಂ ಉಚಿತ್ ತಶೆಂ ಮ್ಹಾಕಾ ಭೊಗ್ತಾ.
1990ಇಸ್ವೆಂತ್ ಮ್ಹಾಕಾ ಏಕ್ ಅವಘಡ್ ಘಡೊನ್ ಮ್ಹಜೊ ಪಾಂಯ್ fracture ಜಾಲ್ಲೊ. ನತಾಲಾಂಚೆ ರಾತಿಕ್ ಮಿಸಾಕ್ ವಚೊಂಕ್ ಅಸಾಧ್ಯ್ ಜಾಲ್ಲ್ಯಾನ್ ಘರ್ಚ್ಯಾಂಕ್ ಸರ್ವ್ ಇಗರ್ಜೆಕ್ ಧಾಡುನ್ ಹಾಂವ್ ಎಕ್ಲೊಂಚ್ ಘರಾ ಆಸ್‌ಲ್ಲೊಂ.
ಮ್ಹಾಕಾ ಪದಾಂ ಆಯ್ಕೊಂಚಿ ಅಭಿರುಚ್ ಚಡ್ ಆಸ್‌ಲ್ಲಿ ಜಾಲ್ಲ್ಯಾನ್ ಹಾಂವೆಂ ಮ್ಹಜೊ ರೇಡಿಯೊ ಚಾಲು ಕೆಲೊ. ಎಕಾಚ್ಚಾಣೆ ಮ್ಹಜ್ಯಾ ತಳ್ಮಟ್ಯಾಕ್ ಮಾರ್‌ಲ್ಲೆಬರಿ ಏಕ್ ಅನ್ಮೋಲ್ ಅನುಭವ್ ಮ್ಹಾಕಾ ಜಾಲೊ. ಹಾಂವೆಂ ಬಾಳ್ಪಣಾರ್ ಆಯ್ಕಲ್ಲೆಂ ಏಕ್ ಹಿಂದಿ ಗೀತ್ ಮ್ಹಜ್ಯಾ ಕಾಳ್ಜಾಂತ್ ಕ್ರಿಸ್ತಾಚೊ ಸಂದೇಶ್ ಪಾಚಾರಿಲಾಗ್ಲೆಂ. ತೆಂ ಅಶೆಂ ಅಸ್ಲೆಂ:
ಜೊತ್ ಸೆ ಜೊತ್ ಜಗಾತೆ ಚಲೊ ಪ್ರೇಮ್ ಕಿ ಗಂಗಾ ಬಹಾತೆ ಚಲೊ
ರಾಹ್ ಮೆಂ ಅಯೆ ಜೊ ದೀನ್ ದುಖಿಃ ಸಬ್ ಕೊ ಗಲೆ ಲಗಾತೆ ಚಲೊ.
(ದಿವ್ಯಾಥಾವುನ್ ದಿವೊ ಪೆಟೊನ್ ಉರೊಂದಿ, ಮೊಗಾಚಿ ನಂಯ್ ವ್ಹಾಳೊನಚ್ ಉರೊಂದಿ
ಕಷ್ಟಾತೆಲ್ಯಾ ಆನಿ ವಜನ್ ಭೊಗ್ತೆಲ್ಯಾ ಸರ್ವ್ ಕಾಳ್ಜಾಂಕ್ ತುಜೆಂ ಕಾಳೀಜ್ ಮೆಳೊವ್ನ್ ರಾವುಂದಿ)
ಕೋನ್ ಹೆ ಊಂಚಾ? ಕೋನ್ ಹೆ ನೀಚಾ? ಸಬ್ ಮೆ ವೋಹಿ ಸಮಾಯಾ
ಭೇದ್ ಭಾವ್‌ಕೇ ಝೂಟೆ ಭರಮ್ ಮೆ ಏ ಮಾನವ್ ಭರ್‌ಮಾಯಾ
ಧರ್ಮ್ ಧ್ವಜಾ ಪೆಹೆರಾತೆ ಚಲೊ ಪ್ರೆಮ್ ಕಿ ಗಂಗಾ ಬಹಾತೆ ಚಲೊ
(ಸಂಸಾರಾಂತ್ ಲಾನ್ ವ ವ್ಹಡ್, ಸರ್ವಾಂಚ್ಯಾ ಕಾಳ್ಜಾಂತ್ ತೊಚ್ ರಾಜ್ ಕರ್ತಾ
ಭೆದ್-ಭಾವಾಚ್ಯಾ ಹ್ಯಾ ಫಟ್ಕಿರ್‍ಯಾ ಸಂಸಾರಾಂತ್ ಮನಿಸ್ ಅಂಧ್ಕಾರಾಂತ್ ಉರ್ತಾ
ಸತಾಚೊ ಬಾವ್ಟೊ ಉಬೊನಚ್ ಉರೊಂದಿ, ಮೊಗಾಚೊ ವ್ಹಾಳೊ ವ್ಹಾಳೊನಚ್ ಉರೊಂದಿ)
ಸಾರೆ ಜಗ್ ಕೆ ಕಣ್ ಕಣ್ ಮೆ ಹೆ ದಿವ್ಯ್ ಅಮರ್ ಏಕ್ ಆತ್ಮಾ
ಏಕ್ ಬ್ರಹ್ಮ್ ಹೆ, ಏಕ್ ಸತ್ಯ್ ಹೆ, ಏಕ್ ಹೀ ಹೆ ಪರಮಾತ್ಮಾ|
ಪ್ರಾಣೋಂ ಸೇ ಪ್ರಾಣ್ ಮಿಲಾತೆ ಚಲೊ. ಪ್ರೇಮ್ ಕೀ ಗಂಗಾ ಬಹಾತೆ ಚಲೊ
(ಹೆ ಧರ್ತಿಚ್ಯಾ ಹರ್ಯೇಕ್ ಕಣಾಂತ್ ಆಸಾ ತೊಚ್ ಅತ್ಮೊ ಅಮರ್
ತೆಂಚ್ ತೆಂ ಸತ್, ತೊಚ್ ಪರಮೋನ್ನತ್, ತೊಚ್ ಸರ್ವೇಶ್ವರ್
ತೆಚ್ ಸಕ್ತೆ ಥಂಯಿ ತುಜೊ ಅತ್ಮೊ ಎಕ್ವಟೊನ್ ರಾವೊಂದಿ
ಮೊಗಾಚೊ ವ್ಹಾಳೊ ವ್ಹಾಳೊನಚ್ ಉರೊಂದಿ)
1964 ಇಸವೆಂತ್ ಭರತ್ ವ್ಯಾಸ್ ಮ್ಹಳ್ಳ್ಯಾ ಹಿಂದಿ ಕವಿನ್ ಸಂತ್ ಜ್ನಾನೇಶ್ವರ್ ಮ್ಹಳ್ಳ್ಯಾ ಹಿಂದಿ ಫಿಲ್ಮಾಕ್ ಬರವ್ನ್ ಮುಖೇಶ್ ನಾಂವಾಚ್ಯಾ ನಾಂವಾಡ್ದಿಕ್ ಗಾವ್ಪ್ಯಾನ್ ಗಾಯ್ಲೆಲ್ಯಾ ಹ್ಯಾ ಗೀತಾಕ್ ಮಾನ್ವಾನಾತಲ್ಲೊ ಮನಿಸ್ ನಾ. ದೀಸ್ ಉತ್ರೊನ್ ಗೆಲ್ಲ್ಯಾ ತೆಕಿತ್ ಆಯ್ಕಾತಾನಾ ಮಧುರ್ ಜಾವುನ್ ಯೆಂವ್ಚಿ ಏಕ್ ಸುಂದರತಾ ಥೊಡ್ಯಾ ಗಾಯಾನಾಂಕ್ ಆಸ್ತಾ. ಹೆಂ ಗೀತ್ ತಸಲೆ ಕಾಲೆತಿಚ್ಯಾ ಗಾಯನಾಕ್ ಏಕ್ ಉದಾಹರಣ್.
ತೆ ಕ್ರಿಸ್ಮಸಾಚ ರಾತಿಂ ಆಯ್ಕಾಲ್ಲೆಂ ಹೆಂ ಗೀತ್ ಆಮ್ಚ್ಯಾ ಕ್ರಿಸ್ತಾಂವಾಂಚೆಂ ಏಕ್ ಕಾಂತಾರ್ ನ್ಹಯ್ ಜಾಂವ್ಕ್ ಪುರೊ. ಪುಣ್ ಮ್ಹಜ್ಯಾ ಕಾಳ್ಜಾಂತ್ ಕ್ರಿಸ್ತಾಚೊ ಸಂದೇಶ್ ಆನಿ ಶಾಂತಿ ಬರ್ಪೂರ್ ಮಾಪಾನ್ ಪಾಚಾರಿಲಾಗ್ಲೆಂ. ಪಾಟ್ಲ್ಯಾ 21 ವರ್ಸಾಂನಿ ಹರ್ಯೇಕಾ ನತಾಲಾಂ ಫೆಸ್ತಾಕ್ ಹಾಂವೆಂ ಉಗ್ಡಾಸಾಕ್ ಹಾಡ್ಚೆಂ ಹೆಂ ಗೀತ್ ಮ್ಹಜ್ಯಾ ಕಾಳ್ಜಾಕ್ ಏಕ್ ಪ್ರಫುಲ್ಲತಾ ಆನಿ ಉಲ್ಲಾಸ್ ದಿತಾ. ಸಬಾರ್ ಕ್ರಿಸ್ತಾಂವ್ ಭಾವಾಂಕ್ ಹೆಂ ರಾಜಾಂವ್ಕ್ ಸಮಾ ದಿಸನಾ ಜಾಂವ್ಕ್ ಪುರೊ. ಪುಣ್ ಮ್ಹಜ್ಯಾ ಚಿಂತ್ಪಾ ಪರ್ಮಾಣೆ ಕ್ರಿಸ್ತಾಚೊ ಸಂದೇಶ್ ಲೊಕಾ ಮನಾಕ್ ಆನಿ ಕಾಳ್ಜಾಂಕ್ ಪಾವಂವ್ಕ್ ಕೇವಲ್ ಧಾರ್ಮಿಕ್ ರಿತಿ ರಿವಾಜಿಚ್ ಜಾಯ್ಜಾಯ್ ಮ್ಹಣೊನ್ ನಾ. ಸದಾಂಚೆ ಜಿಣಿಯೆ ಪಾಲ್ಕಾರ್ ಸಾದರ್ ಜಾಂವ್ಚೊ ಸಂಸಾರಾಂತ್ಲೊ ಖಂಯ್ಚೋಯ್ ವಿಶಯ್, ಜಾಂವ್ ಏಕ್ ಗೀತ್ ಯಾ ಸಂದೇಶ್, ಏಕ್ ಕ್ರಿಯಾ ಯಾ ಪ್ರತಿಕ್ರಿಯಾ. . . . . ಕಿತ್ಯಾಕ್ ಸರ್ವ್ ಧರ್ಮಾಂಚೆಂ ಮೂಳ್ ತತ್ವ್ ತೆಂಚ್, ಏಕ್ ದೇವ್, ಏಕ್ ಸತ್, ತೊಚ್ ಸರ್ಗಾ ಆನಿ ಸಂಸಾರಾಚೊ ರಚ್ನಾರ್, ತೊಚ್ ಶಾಂತಿ ಆನಿ ಸೊಡ್ವಣೆಚೊ ಕುಂವರ್.
- ಶಿಕೇರಾಮ್ ಸುರತ್ಕಲ್