ಏಕ್ ಪಯ್ಣಾರಿ : ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಚ್ಯಾ ಪದಾಚೊ ನಿಯಾಳ್
(ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್ ಹ್ಯಾ ಸಂಸಾರಾಕ್ ಅಂತರುನ್ ಹ್ಯಾ ಹಪ್ತ್ಯಾಂತ್ ದೋನ್ ವರ್ಸಾಂ ಸಂಪ್ತಾತ್. ಹ್ಯಾ ಸಂದರ್ಭಾರ್ ತಾಚ್ಯಾ ಎಕಾ ಪದಾಚೊ ನಿಯಾಳ್ ಹಾಂಗಾಸರ್ ಶಿಕೇರಾಮ್ ಸುರತ್ಕಲ್ ಹಾಣೆ ಕೆಲಾ - ಸಂಪಾದಕ್)
ತೊ ಏಕ್ ಪಯ್ಣಾರಿ. ತಾಚೆಂ ಪಯ್ಣ್ ತೊ ಸಂಪವ್ನ್ ಅಪ್ಲ್ಯಾ ಶೆವೊಟಾಕ್ ಪಾವ್ಲೊ. ವೆತಾನಾ ತೊ ಕಿತೆಂಯೀ ವ್ಹರೊನ್ ವಚುಂಕ್ ನಾ. ಕಿತೆಂ ಅಪ್ಣಾಕ್ ಸಾಧ್ಯ್ ತೆಂ ಕರುನ್ ಆಪ್ಣೆಂ ಕೆಲ್ಲೆಂ ಸರ್ವ್ ಆಮ್ಕಾಂ ಸೊಡುನ್ ತೊ ಗೆಲೊ. ಖಂಯ್ಚೋಯ್ ಪಯ್ಣಾರಿ ಹ್ಯಾ ಸಂಸಾರಾಂತ್ ಶಾಶ್ವಿತ್ ನ್ಹಯ್. ತಾಣೆಂ ಕೆಲ್ಲೆಂ ಬರೆಂ ಕಾಮ್ ಮಾತ್ರ್ ಹಾಂಗಾ ಉರ್ಚೆ ತಸಲೆಂ ದಿರ್ವೆಂ. ಹೊ ಅಪ್ಲೆಂ ದಿರ್ವೆಂ ಸೊಡುನ್ ಗೆಲೊ ಮಾತ್ರ ನ್ಹಯ್, ಏಕ್ ಕವಿ, ಏಕ್ ಗಾಯಕ್ ಆನಿ ಏಕ್ ನೇಕ್ ಮನಿಸ್ ಜಾವ್ನ್ , ಸಮಾಜಿಕ್ ಜವಾಬ್ದಾರೆ ಸಂಗಿಂ ಆಪ್ಲಿಂ ಚಿಂತ್ನಾಂ ಸಾಹಿತಿಕ್ ಥರಾನ್ ಲೊಕಾಕ್ ವಾಂಟುನ್, ಲೊಕಾಚ್ಯಾ ಕಾಳ್ಜಾ ಮನಾಂತ್ ತಶೆಂ ರಗ್ತಾಂತ್ ಭಾವನಾತ್ಮಕ್ ರಿತಿನ್ ಮಿಸ್ಳೊನ್ ವೆಳಾಚ್ಯಾ ಖೆಳಾಂತ್ ಆಪ್ಲಿ ಧಾಂವ್ಣಿ ಸಂಪೊವ್ನ್ ಅಮರ್ ಜಾಲೊ.
"ಏ ಪಯ್ಣಾರ್ಯಾ, ಏ ಪಯ್ಣಾರ್ಯಾ, ಪಯ್ಣ್ ತುಜೆಂ ಸಂಪ್ತಾನಾ ಉಸ್ವಾಸ್ ರಾವೊನ್ ವೆತಾ, ಕೆಲ್ಲೆಲಿಂ ಬರಿಂ ಕರ್ತುವಾಂ ಸದಾಂಚ್ ಉಗ್ಡಾಸ್ ಉರ್ತಾತ್, ಏ ಪಯ್ಣಾರ್ಯಾ."
ಏಕ್ ಸಾಮಾಜಿಕ್ ಸಂದೇಶ್ ಹೊ. ಏಕ್ ಕವಿ ಅಪ್ಲ್ಯಾಚ್ ತೃಪ್ತೆ ಖಾತಿರ್ ಗಾಯ್ತಾ ತರ್ ತೆಂ ಏಕ್ ಸುಂದರ್ ಗಾಯಾನ್ ಜಾಂವ್ಕ್ ಪಾವ್ತಾ ಆನಿ ಆಪ್ಲ್ಯಾಂ ಸಂಗಿಂ ಲೊಕಾಚ್ಯಾಯಿ ತೃಪ್ತೆ ಖಾತೀರ್ ಗಾಯ್ತಾ ತರ್ ತೆಂ ಖರೆಂ ಸಂಗೀತ್ ಜಾತಾ ಖಂಯ್.
ಆಮ್ಚ್ಯಾ ಭೊಂವಾರಾಂತ್ ಸಬಾರ್ ಸಾಹಿತಿ, ಕವಿ, ಗಾಯಕ್ ಆನಿ ಸಂಗೀತ್ ಕಾರ್ ಆಮಿ ಪಳೆತಾಂವ್. ಪುಣ್ ಆಪ್ಲ್ಯಾ ಸಾದರ್‌ಪಣಾದ್ವಾರಿಂ ಲೊಕಾಚ್ಯಾ ಕಾಳ್ಜಾಂತ್ ರಾಜ್ ಕರ್ಚೆ ಬೋವ್ ಥೊಡೆ. ಮನ್ಶಾಚಿ ಖಾಸ್ಗಿ ಅಭಿರುಚ್ ಹಾಕಾ ಕಾರಾಣ್ ಜಾವ್ಯೆತ್. ಜೆ ಕೋಣ್ ಆಮ್ಚ್ಯಾ ಕಾಳ್ಜಾಂತ್ ರಾಜ್ ಕರ್ತಾತ್ ತಾಂಣಿ ಕೆಲ್ಲಿಂ ಸರ್ವ್ ಸಾಹಿತಿಕ್ ಕಾಮಾಂ ಸಂದೇಶಾ ರುಪಾರ್ ಯಾ ಆದರ್ಶಾರುಪಾರ್ ಆಮಿ ಘೆತಾಂವ್. ತರ್ ಹೆ ಎಕಾ ಪಯ್ಣಾರ್‍ಯಾನ್ ಆನ್ಯೇಕಾ ಪಯ್ಣಾರ್‍ಯಾಕ್ ದಿಲ್ಲೆ ಜಾಗ್ವಣೆಚೆ ಸಂದೇಶ್ ಆಮಿ ಜಿಣೆಯೆಂತ್ ಏಕ್ ಸ್ಪೂರ್ಥಿದಾಯೆಕ್ ರಿತಿನ್ ಘೆಂವ್ಚೆ ತಸಲೆ ನ್ಹಯಗಿ?
ಮುಕಾರ್ ವೆತಾನಾ ಪರತ್ ಏ ಪಯ್ಣಾರ್ಯಾ...
"
ಜಲ್ಮೊಂಚೆಂ ಜಿಯೆಂವ್ಚೆಂ ಮರ್ಚೆಂ, ಮನ್ಶಾಚಿ ಏಕ್ ಕಾಣಿ, ಕಾಂಯಿ ತರಿ ಹಾಂಗಾಸರ್ ಉರ್ಚೆಂ ಕರ್ ದವರ್ ಹಿ ಸುಫಳ್ ಜಿಣಿ"
ಆಜ್ ಹ್ಯಾ ಸಂಸಾರಾಂತ್ ಉರ್ಚೆಂ ತಸಲೆಂ ಸಬಾರ್ ಆಮಿ ಕರ್ತಾಂವ್. ಆಸ್ತ್ ಬದಿಕ್ ಪಯ್ಶೆ. ನಾಂವ್ ಜೊಡುಂಕ್ ಜಾಯ್ ಜಾಲ್ಲೆಂ ಕರುನ್ ಆಮಿ ತೃಪ್ತಿ ಪಾವ್ತಾಂವ್. ಆಮ್ಚಿ ಜಿಣಿ ಸುಫಳ್ ಜಾತಾ. ಪುಣ್ ಏಕ್ ವಿಸ್ರೊನ್ ಸೊಡ್ತಾಂವ್. ಕಿತ್ಯಾಕ್ ವಿಸರ್ಚೆಂ ಮನ್ಶಾಚೆಂ ಸೈಂಭಿಕ್ ದೆಣೆಂ. ಆನಿ ಮನ್ಶಾಚಿ ಅತಿ ಆಶಾ ಏಕ್ ದೈವಿಕ್ ಉಣೆಪಣ್.
'ಸರ್ವಾಂಕ್ ಜಿಯೆಂವ್ಚಿ ಆಶಾ, ತೆ ಆಶೆಕ್ ಕಾರಣ್ ನಾ. ಜಿಯೆತಾಯಿ ತರ್ ಮರೊನ್ ಜಿಯೆ ತ್ಯಾ ಜಿವಿತಾಕ್ ಮರಣ್ ನಾ. ಬರೆಂಚ್ ಕರ್ಶಿ ಹೆರಾಂಕ್ ಪಾವ್ಶಿ ಲೊಕಾಚ್ಯಾ ಮನಾಂತ್ ಜಿವಂತ್ ಉರ್ಶಿ, ಅನೀತ್ ಭುರ್ಶಿಂ ಕಾಮಾಂ ತುಂ ಕರ್ಶಿ ಆಖ್ರೇಕ್ ಮರ್ತಾನಾ ಕಿತೆಂ ತುಂ ವೊರ್ಶಿ?'
ಮನಿಸ್ ಆಪ್ಲಿ ಜಿಣಿ ಸುಫಳ್ ಮ್ಹಣ್ ಚಿಂತಾನಾ ವಿಸರ್ನ್ ವೆಚೊ ಮುಖ್ಯ ವಿಷಯಿ ಹೋಚ್.
ಆಜ್ ಆಮಿ ಸಬಾರ್ ಜಣ್ ಜಿಣಿಯೆಂತ್ ಮೊರೊನ್ ಆಸಾಂವ್. ಕುಡಿನ್ ಉಸ್ವಾಸ್ ದವರುನ್‌ಯೀ ಆಮಿ ಮೆಲ್ಲ್ಯಾಬರಿ ಜಿಯೆತಾಂವ್. ಹ್ಯಾ ಸಂಸಾರಿ ಪಯ್ಣಾಂತ್ ಆಮ್ಚ್ಯಾ ಜಿವಿತಾಚೊ ಶೆವೊಟ್ ಆಮಿ ವಿಸ್ರಾಲ್ಯಾಂವ್. ದವಾನ್ ದಿಲ್ಲೊ ಹೊ ಏಕ್‌ಚ್ ಅವ್ಕಾಸ್ ಆಮಿ ಹೊಗ್ಡಾವ್ನ್ ಆಸಾಂವ್.
ಆಮ್ಕಾಂ ಹೊಸಂದೇಶ್ ದಿಲ್ಲೊ ಕವಿ ಆಜ್ ಆಮ್ಚೆ ಮತಿಂತ್ ಮೆಲ್ಯಾರೀ ಜಿಯೆತಾ ತರ್ ಹಾಕಾ ತಾಚೊ ಸಂದೇಶ್ ಕಾರಣ್ ಮ್ಹಳ್ಯಾರ್ ಖಂಡಿತ್ ಅತಿಶಯೋಕ್ತಿ ಜಾಂವ್ಚಿನಾ. ಆಮಿ ಸರ್ವ್ ಹ್ಯಾ ಸಂಸಾರಾಂತ್ ಪಯ್ಣಾರಿ ತೆಂ ಮಾನುನ್ ಘೆವುನ್ ದೆವಾನ್ ದಿಲ್ಲಿ ಪ್ರತಿಭಾ ಊರ್ಜಿತ್ ಕರುನ್ ಆಮ್ಚ್ಯಾ ಸಹ ಪಯ್ಣಾರ್ಯಾಂಚ್ಯಾ ಬರೆಪಣಾ ಖಾತಿರ್ ವಾವ್ರುಂ ಜಾಲ್ಯಾರ್ ಆಮಿ ಮೆಲ್ಯಾರೀ ಲೊಕಾಚ್ಯಾ ಮನಾಂತ್ ಜಿಯೆಂವ್ಕ್ ಸಕ್ತಲ್ಯಾಂವ್.
ಸತಾಚಿ ಆನಿ ನಿತಿಚಿ ವಾಟ್ ಆಮಿ ಆಪ್ಣಾಯಾಂ.
ಸತಾಚೆ ವಾಟೆನ್ ನಿತಿನ್ ಚಲ್ಶಿ ಮೆಲ್ಯಾರಿ ಮನ್ಶಾ ಜಿಯೆವ್ನ್ ಉರ್ಶಿ. ನಿತಿಚ್ಯಾ ಜಾಗ್ಯಾರ್ ಅನೀತ್ ಕರ್ಶಿ ಜಿವಂತ್ ಆಸ್ಲ್ಯಾರೀ ಸದಾಂಚ್ ಮರ್ಶಿ. ಏ ಪಯ್ಣಾರ್ಯಾ
ದೋನ್ ವರ್ಸಾಂ ಆದಿಂ ದೆವಾದಿನ್‌ ಜಾಲ್ಯಾರೀ ಅಮರ್ ಜಾಲ್ಲೊ ವಿಲ್ಫಿ ರೆಬಿಂಬಸ್ ಹಾಚೊ ಉಗ್ಡಾಸ್ ಕಾಡುನ್ ತಾಕಾ ಶ್ರದ್ದಾಂಜಲ್ಲಿ ಭೆಟಯ್ತಾನಾ ಹೊ ತಾಚೊ ಸಂದೇಶ್ ಮನಾಂತ್ ಜಾಗೊ ದವರುಯಾಂ.
-ಶಿಕೇರಾಮ್ ಸುರತ್ಕಲ್.