ಮಂಗ್ಳುರ್ ಸಗ್ಳೆಂ ಬೀರಿಂತ್ ನ್ಹಾಣಯ್ಲೆಂ ಜಾಲ್ಯಾರ್ ಕೊಣ್ ಕೊಣಾಕ್ ಆಡಾಯ್ತಲೊ?
ಕಸಲಿ ಏಕ್ ನಾಲಿಸಾಯ್ ಮಂಗ್ಳುರಾಕ್ ತಶೆಂ ಮಂಗ್ಳುರ್ಚ್ಯಾ ಲೊಕಾಕ್! ಸಂಸ್ಕೃತೆಚಿ ರಾಕಣ್ ಕರ‍್ತಾಂ ಮ್ಹಣ್ತಲ್ಯಾಂನಿ ಚಲಿಯಾಂಚ್ಯಾ ಆಂಗಾರ್ ಹಾತ್ ಘಾಲ್ನ್, ವಸ್ತ್ರಾಂ ಫಾಳುನ್, ಥಾಪ್ಡಾಂ ಮಾರುನ್ - ಉಗ್ತ್ಯಾನ್ ಕೆಲ್ಲಿ ಲಾಯ್‌ಲೂಟ್ ಕೊಣಾಯ್ಕಿ ಲಜೆಕ್ ಘಾಲ್ತಾ. ಜಿವಿತಾಂತ್ಲ್ಯಾ ಖಾಸ್ಗಿ ಸಂಗ್ತಿಂನಿ ಭಾಯ್ಲೆ ಹಾತ್ ದಾಯ್ ಘಾಲ್ತಾನಾ, ಹ್ಯಾ ಗಾಂವಾಂತ್ ಜಿಯೆಜಾಯ್ ಜಾಲ್ಯಾರ್ ‘ಪರ್ಮಿಟ್’ ಘೆಂವ್ಚಿ ಗರ್ಜ್ ಆಸಾಗಾಯ್ ಮ್ಹಳ್ಳೆಂ ಸವಾಲ್ ಉದೆತಾ.
ಥಳೀಯ್ ಪತ್ರಾಂನಿ ಧರುನ್ ರಾಷ್ಟ್ರೀಯ್ ಚ್ಯಾನೆಲಾಂನಿ ಸೈತ್, ಹಿಂದು ಜನಜಾಗೃಣ ವೇದಿಕೆನ್, ಜಲ್ಮಾದೀಸ್ ಆಚರ‍್ಸುಂಚ್ಯಾ ಯುವಜಣಾಂಚೆರ್ ಚಲಯಿಲ್ಲ್ಯಾ ಹ್ಯಾ ಹಲ್ಲ್ಯಾವಿಶಿಂ ಖಬರ್ ಪ್ರಸಾರ್ ಜಾಲ್ಯಾ. ವಿದ್ಯಾರ್ಥಿ ಉಚಾಂಬಳ್ ಜಾಲ್ಯಾತ್. ಸಂಘ್-ಸಂಸ್ಥೆ ಜಾಗೃತ್ ಜಾಲ್ಯಾತ್.
ಆಮಿ ಕವಿ. ಕೊಂಕಣಿ ಕವಿ. ಅಸಲಿಂ ಕರ್ತುಬಾಂ ಆಮ್ಚ್ಯಾ ಭೊಂವಾರಾಂತ್ ಘಡ್ತಾನಾ, ಆಮ್ಚ್ಯಾ ಕವಿತಾಂ ಮುಕಾಂತ್ರ್ ತಾಳೊ ಉಬಾರ‍್ಚೊ, ಆಮ್ಚೊ ಧರ್ಮ್ ಬಾಂದ್ತಾ. ತ್ಯಾ ದೆಕುನ್ ಹೆ ವೇದಿ ಮಾರಿಫಾತ್ ಸರ್ವಯ್ ಕವಿಂಕ್ ಹಾಂವ್ ಉಲೊ ದಿತಾಂ, ತಾಂಣಿ ವೊಗೆಚ್ ಬಸ್ಚೆಂ ನ್ಹಯ್, ಹ್ಯಾ ಘಡಿತಾಂ ಸಂಬಂಧಿಂ ತಾಂಣಿ ತಾಳೊ ಉಟಂವ್ಚೊ.
ಆಮಿ ಬೋಳ್ ಬೆಪ್ಪಾ ಮ್ಹಣೊನ್ ಆಮ್ಕಾಂ ನಾಂವ್ ಆಸಾ. ಖಂಯ್ಚೇಯ್ ಸಂಗ್ತಿಂಕ್ ಸ್ಪಂದನ್ ಕರ್‍ಚಿ ತಾಂಕ್ ಆಸೊನಯ್ ಆಮಿ ಮೊನೆ ಮೊನೆ ಮೊನೆ ರಾವ್ತಾಂವ್. ಪುಣ್ ಆಜ್ ಆಮಿ ಜಾಗೆ ಜಾಯ್ಜಾಯಿಚ್!
ಮಂಗ್ಳುರ್ಚ್ಯಾ ಚಲಿಯಾಂಕ್ ಗೊರ್‍ಯಾ ದಾದ್ಲ್ಯಾಂನಿ ಮ್ಹಳ್ಯಾರ್ ಬ್ರಿಟಿಷಾಂನಿ ದವರ್ನ್ ಘೆತಲ್ಲ್ಯಾ ವೆಳಾರ್, ಆಮ್ಚ್ಯಾ ಲೊಕಾನ್ ಕವಿತೆ ಮಾರಿಫಾತ್ ತಾಳೊ ಉಬಾರಲ್ಲೊ. ಆಡ್ಕುಲೊಗೊ ಬುಡ್ಕುಲೊ ತೆಲಾ ತುಪಾಚೊ, ಬಾಯೆಗೇರ್ ಬಾಬು ಜಾಲಾ ಫಿಂರ್ಗಿ ರುಪಾಚೊ, ಮಾಡಾಮುಳಾಂತ್ ಚೆರ್ಕೊ ಜಾಲಾ, ಧಾಂಗ್ರೊ ಫೆರಾಯಾಂ, ಉಟಾಗೊ ಬಾಯಾಂನೊ ಮಾಂದ್ರಿ ಖವ್ಳಿಯಾಂ - ಹ್ಯಾಚ್ ಸಂದರ್ಭಾಂತ್ಲೆಂ.
ತಸಲಿ ಏಕ್ ಜಾಗ್, ಕವಿತೆ ವರ್ವಿಂ ಹಾಡ್ಯೆತ್ ಜಾಲ್ಲಿ ಜಾಗ್ - ಲೊಕಾಮಧೆಂ ಆಮಿ ಹಾಡುಂಕ್ ಜಾಯ್. ಶಿತ್ ವಚೊನ್ ಪೇಜ್ ಯೆದೊಳಚ್ ಜಾಲ್ಯಾ. ಪೇಜ್ ವಚೊನ್ ಮಡ್ಡಿ ಜಾತೇ ಆಸಾ. ಹಿ ಮಡ್ಡಿ ವಚೊನ್ ಖಿರ್ ಜಾಲಿ ತರ್?
ತುಮ್ಚ್ಯೊ ಕವಿತಾ ಸರಾಗ್ ವ್ಹಾಳೊಂದಿತ್. ಕವಿತಾ ನ್ಹಯ್ ತರ್, ಪ್ರತಿಕ್ರಿಯಾ ತರೀ ಬರೊವ್ನ್ ಧಾಡಾ. ಮನಾ ಉಗ್ತಿಂ ಕರಾ!!
-ಮೆಲ್ವಿನ್ ರೊಡ್ರಿಗಸ್
ಕವಿತಾ ವಾಚಾ: