ವಾಸ್ತವಿಕತೆಚ್ಯಾ ವಿಪರ್‍ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್‍ಚ್ಯೊ ಕವಿತಾ
- ಮ್ಯಾಕ್ಸಿಮ್ ಲೋಬೊ
ಜೆದ್ನಾಂ ಗದ್ಯಾಂನಿ ಆಟಾಪುಂಕ್ ಜಾಯ್ನಾತ್ಲೆಂ ಕವಿತಾಂನಿ ಭುಂಯ್ ಪಡ್ತಾ ತೆದ್ನಾಂ ಕವಿಚೊ ಶೆವೊಟ್ ರುತಾ ಜಾತಾ.
ರಸಿಕಾಂಚ್ಯಾ ಮನಾಂಕ್ ಹಿ ಕವಿತಾ ನಾಟ್ವತಾ, ವಿವರುಂಕ್ ಜಾಯ್ನಾತ್ಲೆಂ ಕವಿಸಂಗಿಂ ಭೊಗುಂಕ್ ಕಾಳ್ಜಾಂಕ್ ಪುಟ್ವತಾ!
ಏಕ್ ಕವಿತಾ ರಸಿಕಾಂಚಿಂ ಕಾಳ್ಜಾಂ ಧಲಯ್ತಾ, ತಾಂಚ್ಯಾ ದಿಸ್ಪಡ್ತ್ಯಾ ಜಿವಿತಾಚೊ ಹುಲೊಪ್ ನಿಂವಯ್ತಾ ಆನ್ ಹೆಳ್ಕೆವಿಣೆಂ ತಾಂಚ್ಯಾ ಶೆವೊಟಾಂಕ್ ಆಂಕ್ರ್ಯೊ ಫುಟಯ್ತಾ. ತೆದ್ನಾಂ ಥಂಯ್ ಜಾಯ್ರ್ ಜಾತಾ, ಮೆಲ್ವಿನ್ ರೊಡ್ರಿಗಸಾನ್ ಉಲ್ಲೇಕ್ ಕರ್‍ಚಿ ’ಪೊಯೆಟ್ರಿ ಥೆರಪಿ’. ತ್ಯಾ ಬರಾಬರ್ ಎಕೆ ಕವಿತೆಂತ್ಲೊ ಧಾಗ್ ಆಪ್ಲೆ ಜವಾಬ್ದಾರಿಂತ್ ಜೆಮ್ತೆಲ್ಯಾಂಕ್ ಧೊಂಕುಳ್ನ್ ಜಾಗಂವ್ಕ್ ಆನಿ ತಾಂತ್ಲೊ ಬಂಡಾಯ್ ಸಮಾಜೆಂತ್ಲೆಂ ಮ್ಹೆಳೆಂ ಉಸ್ತುಂಕ್‌ಯ್ ಸಾಹೆತ್ ಜಾತಾ.
ಆಯ್ಲೆವಾರ್‍ಚ್ಯಾ ದೋನ್ ಕವಿತಾಂನಿ ಮ್ಹಜ್ಯಾ ಕಾಳ್ಜಾ ಮನಾಂತ್ ಉಡ್ಕಾಣಾಂ ಘಾಲ್ಯಾಂತ್. ಕವಿ ಎಡ್ಡಿ ಸಿಕೇರಿಚಿ ’ಮ್ಹಾಕಾ ಸೊಧ್ತಾಂ ಹಾಂವ್’ ಆನಿ ಕವಿ ಮೆಲ್ವಿನ್ ರೊಡ್ರಿಗಸಾಚಿ ’ಹೆ ರೆಂವೆನ್’. ಸರ್ವ್ ರಿತಿಂನಿ ಹ್ಯೊ ಕವಿತಾ ಫುಲೊನ್ ರಾವ್‌ಲ್ಲ್ಯೊ ದಿಸ್ತಾತ್.
’ಮ್ಹಾಕಾ ಸೊಧ್ತಾಂ ಹಾಂವ್’, ವಾಸ್ತವ್ ಜಿಣ್ಯೆಚ್ಯಾ ವಿಪರ್‍ಯಾಸಾಚೆಂ ಏಕ್ ಮುಖ್ ತರ್, ’ಹೆ ರೆಂವೆನ್’ ತೆಚ್ ಜಿಣ್ಯೆಚ್ಯಾ ವಿರೋಧಾಭಾಸಾಚಿ ಆನ್ಯೇಕ್ ಝಳಕ್.
‘ಮ್ಹಾಕಾ ಸೊಧ್ತಾಂ ಹಾಂವ್’ -ಗಾಂವಾಂತ್ ಭಾಂಗರ್ ಪಿಕಂವ್ಕ್, ಪರ್ಗಾಂವಾಂತ್ ಬೆಸೊರ್ ಪಡ್ಚ್ಯಾ ವಾವ್ರಾಕ್ ಹರ್ಧೆಂ ದೀವ್ನ್ ಜಿಣಿಭರ್ ’ಭಾಯ್ಲೊ’ ಜಾಂವ್ಚಿ ಪರಿಗತ್ ಪರ್ಗಟ್ತಾ.. ಪೊಸ್ಕ್ಯಾ ದೆಶಾಂತ್ ಕಶೇಂಯ್ ಪರ್ದೆಸಿ, ಪಾಟಿಂ ಗಾಂವಾಂತ್‌ಯ್ ಪರ್ದೆಶಿ ಜಾಂವ್ಚಿ ಮಾರ್ಮಿಕ್ ವಾಸ್ತವಿಕತಾ! ಕಿತ್ಲೆಶ್ಯಾ ಜಿವಾಂಚಿ ಕರಾಳ್ ಕಾಣಿ ಹಿ! ಅಸಲ್ಯಾ ಕೊಂಡಾಂತ್ ತರೀ ಏಕ್ ಗಾಂವ್ ಉಬೊ ಜಾತಾ ಮ್ಹಳ್ಳಿ ತೃಪ್ತಿ!
ಕಾಂಯ್ ಕವಿಕ್ ’ಆಪ್ಲ್ಯಾ ಗಾಂವ್ಚಿ’ ಖಾತ್ರಿ ಲಾಬ್ಲ್ಯಾ? ಕಾಂಯ್ ತಾಚಿ ದೀಷ್ಟ್ ತ್ಯಾ ಗಾಂವಾಚೆರ್ ಚರ್‍ಲ್ಯಾ?
‘ಹೆ ರೆಂವೆನ್’ -ಬಂಜರ್ ರೆಂವೆಂತ್‌ಯ್ ತೆಲಾಥೆಂಬೆ ಪುಂಜಾವ್ನ್, ಗಾಂವ್ಚೆ ಮಾತ್ಯೆಂತ್ ಗುಲೊಬ್ ಫುಲಂವ್ಚೆಂ ಅಚರ್ಯೆಂ ಜ್ಯಾರಿ ಜಾತಾನಾಂಯ್, ಯೆದೊಳಚ್ ಝರ್‌ಲ್ಲ್ಯಾ ಜಿವಾಕ್ ತೊಪ್ತಾತ್ ಕಾಂಟೆ, ಏಕ್ ನ್ಹಯ್ ದೋನ್ ನ್ಹಯ್! ಕೊಣೇಂಯ್ ಜಿಣ್ಯೆಂತ್ ಯೆದೊಳ್ ಕಾಂಟ್ಯಾಂಚೊ ಮುಕುಟ್ ಪಾಂಗರ್‍ಲ್ಯಾ ಶಿವಾಯ್ ಸುಕಾಂ ಫುಲಯ್ಲ್ಯಾಂತ್? ಸುಕಾಂ ಫುಲ್ಲ್ಯಾಂತ್ ತರ್ ಕೊಣಾಚಿಂ? ಕೊಣಾಚಿಂ ತರಿ ಫುಲ್ಲ್ಯಾಂತ್ ಜಾಯ್ಜಾಯ್. ಆಪ್ಣಾಚಿಂ ಫುಲ್‌ಲ್ಲಿಂ ಖಬರ್ ನಾ. ತರ್ ಆಪ್ಣಾಚಿಂ ಕೆನ್ನಾಂ, ಖಂಯ್ ತರೀ ಫುಲ್ತಲಿಂ?
ವಾಸ್ತವಿಕತೆಚ್ಯಾ ವಿಪರ್‍ಯಾಸಾಂತ್ ಆನಿ ವಿರೋಧಾಭಾಸಾಂತ್ ಸೈತ್ ಜಿಣ್ಯೆ ಶೆವೊಟ್ ಪಾಚಾರ್‍ಚಿಂ, ಮನ್ಶಾಪಣಾಚಿಂ ಮೊಲಾಂ ಉಚಾರ್‍ಚಿಂ ದೋನ್ ಉತ್ತೀಮ್ ಕವಿತಾಂ ಹಿಂ!