`ಕವಿತಾ ಟ್ರಸ್ಟ್' ನೇತ್ರಾವತಿ ನಂಯ್ತ್ ಕೊಂಕಣಿ ಕವಿತೆಚಿಂ ಲ್ಹಾರಾಂ ವ್ಹಾಳಯ್ತಾ
ಬಂಟ್ವೊಳ್ ಜಾಕ್ರಿಬೆಟ್ಟು ಲಾಗ್ಸಾರ್ ಜಿ ನೇತ್ರಾವತಿ ನಂಯ್ ವ್ಹಾಳ್ತಾ, ತಿಕಾ ಹ್ಯಾಚ್ ಎಪ್ರಿಲ್ 11 ತಾರಿಕೆರ್ ಏಕ್ ನವೊ ರಂಗ್ ಆಯ್ಲೊ. ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲಿ ಕವಿಗೋಷ್ಠಿ ನಂಯ್ಚ್ಯಾ ಮಧೆಗಾತ್ ರುತಾ ಜಾಲ್ಲ್ಯಾ ರೆಂವಾಟ್ ಸುವಾತೆಚೆರ್ ಜಿ ಚಲ್ಲಿ, ತ್ಯಾ ವೆಳಾ ಅಸ್ತಮ್ತೆಚೊ ಸುರ್ಯೊ ಲೆಗುನ್ ಸಂತೊಸಾನ್ ವರ್ಣಾಂನಿ ಘುಂವ್ಚೊ ತೊ ಸರ್ವಾಂನಿ ದೆಖ್ಲೊ.
ಜಾಕ್ರಿಬೆಟ್ಟು ಲಾಗಿಂ ಮೆಳ್ಚೆ ನಂಯ್ತ್ ಥೊಡ್ಯಾ ಜಾಗ್ಯಾಂನಿ ಉದ್ಕಾಂತ್ ಚಲೊನ್, ಎಕಾಕಡೆ ದೊಣಿರ್ ಗೆಲ್ಲೆ ಕವಿ ಆನಿ ರಸಿಕ್, ಪೊಯ್ತಾಜೆ ಲಾಗಿಂ ನಂಯ್ಚ್ಯಾ ಮಧೆಂ ಸಾಂಗಾತಾ ಮೆಳ್ತಾನಾ ವಿಶೇಸ್ ಉಲ್ಲ್ಲಾಸಾನ್ ಭರ್‍‍ಲ್ಲೆ. ಭೊಂವ್ತಣಿ ವ್ಹಾಳ್ಚೆಂ ಉದಕ್, ಪಶ್ಚಿಮ್ ಕುಶಿಂ ಅಸ್ತಮ್ತೆಕ್ ತೆಂಕಲ್ಲೊ ಸುರ್ಯೊ, ಸುಕ್ಣ್ಯಾಂಚೆಂ ಚಿಲಿಪಿಲಿ, ಶೆರಾಂತ್ಲ್ಯಾ ಗರಮ್ ಹವ್ಯಾಂತ್ ಶಿಜಲ್ಲ್ಯಾ ಕುಡಿಂಕ್ ಥಂಡಾಯೆನ್ ನ್ಹಾಣಂವ್ಚೆಂ ವಾರೆಂ, ಲಾಗ್ಶಿಲ್ಯಾನ್ ತಿಳ್ಚಿ ಪಾಚ್ವಿ ಪ್ರಕೃತಿ, ಪಯ್ಸುಲ್ಯಾನ್ ಮೊಸೊರ್ ಪಾಂವ್ಚೆ ದೊಂಗರ್ - ಹಾಚ್ಯಾಕಯ್ ವ್ಹರ್‍ತೊ ಏಕ್ ಜಾಗೊ ಕವಿಗೋಷ್ಠಿಕ್ ಕೊಣೇಂಯ್ ನಿರ್ಮಾಣ್ ಕರುಂಕ್ ಅಸಾಧ್ಯ್.
ಕವಿಗೋಷ್ಟಿಚೆಂ ಸುಂಕಾಣ್ ಗಾಂವ್ಚೊ ಕವಿ ಜಿಯೊ ಆಗ್ರಾರಾನ್ ಘೆತಲ್ಲೆಂ. ತಾಣೆಂ ಹ್ಯಾ ಪರಿಸರಾಂತ್ಲೆ ಆಪ್ಲೆ ಲ್ಹಾನಪಣಾಲೆ ಉಡಾಸ್ ಪರ್‍ತ್ಯಾನ್ ಜಿವೆ ಕೆಲೆ. ‘ಜರ್ ಆಮಿ ಕೊಂಕ್ಣಿ ವಾಚಿನಾಂವ್, ಕೊಂಕ್ಣಿ ಉಲಯ್ನಾಂವ್ ತರ್ ಆಮ್ಚಿ ಸಂಸ್ಕೃತಿ ಪಣ್ಗಿಲ್ ಪಡಲ್ಲ್ಯಾಬರಿ’ ಅಶೆಂ ತಾಣೆಂ ಸಾಂಗ್ಲೆಂ.
ಸ್ಟೀವನ್ ಕ್ವಾಡ್ರಸ್, ಎಮ್. ಪಿ. ರೊಡ್ರಿಗಸ್, ವೆಂಕಟೇಶ್ ನಾಯಕ್, ನೆಲ್ಸನ್ ಪ್ರಸನ್ನ್ ವಾಸ್, ಶಾರೊನ್ ಒಲಿವೇರಾ, ಮೆಲ್ವಿನ್ ರೊಡ್ರಿಗಸ್, ಗ್ಲೇಡಿಸ್ ರೇಗೊ, ಎಚ್ಚೆಮ್ ಪೆರ್ನಾಲ್ ಆನಿ ಜಿಯೊ ಆಗ್ರಾರಾನ್ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ. ಸ್ಟೀವನ್ ಕ್ವಾಡ್ರಸ್, ಜಿಯೊ ಆಗ್ರಾರ್, ಎಚ್ಚೆಮ್ ಪೆರ್ನಾಲ್, ಮೆಲ್ವಿನ್ ರೊಡ್ರಿಗಸ್ ಆನಿ ನೆಲ್ಸನ್ ಪ್ರಸನ್ನ್ ವಾಸ್ ಹಾಂಚ್ಯೊ ಕವಿತಾ `ಗಾಯ್ರಾಂಕ್ ಮಾರ್‍ಚೊ ಆಡ್ವಾರ್ ಕಾಯ್ದೊ' ಹ್ಯಾ ವಿಶಯಾಚೆರ್ ವಿಣಲ್ಲ್ಯೊ.
ಎಚ್ಚೆಮ್ ಪೆರ್ನಾಲಾನ್ ವಾಚಲ್ಲ್ಯಾ ಕವಿತಾಂಚೆರ್ ಆಪ್ಲಿ ಅಭಿಪ್ರಾಯ್ ದಿಲಿ.
ಸುರ್‍ವೆರ್ ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಯೆವ್ಕಾರ್ ಕೆಲ್ಲೊ ತರ್, ನಿಮಾಣೆಂ ತಾಣೆಂಚ್ ಧನ್ಯವಾದ್ ದಿಲೆ. ಹಾಜರ್ ಆಸಲ್ಲ್ಯಾ ಗಾಂವ್ಕಾರಾಂ ತರ್ಫೆನ್ ಥೊಡೆ ಉಲಯ್ಲೆ ತಾಂಕಾಂ ಜಾಲ್ಲ್ಯಾ ಅನ್ಭೊಗಾವಿಶಿಂ ಸಾಂಗಲಾಗ್ಲೆ..
ಹ್ಯಾ ಸಂದರ್ಭಾರ್ ಪಾಟ್ಲ್ಯಾ ಥೊಡ್ಯಾ ದಿಸಾಂನಿ ಅಂತರ್‍ಲಲ್ಯಾ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್, ಗುಮ್ಟಾಂ ರಾಯ್ ಜೊಕಿಮ್ ಪಿರೇರಾ ತಶೆಂ ನಾಟಕ್‌ಕಾರ್ ಗಿರಿ ಚಿಕ್‍ಮಗ್ಳುರ್ ಹಾಂಕಾಂ ಹಾಜರ್ ಆಸ್ಲಲ್ಯಾಂನಿ ಶೃದ್ಧಾಂಜಲಿ ಭೆಟಯ್ಲಿ.