ಬರಿ ಕವಿತಾ ಮನ್ಶಾಲಾಗಿಂ ಉಲಯ್ತಾ - ಚಿದಂಬರ ಬೈಕಂಪಾಡಿ

ಕವಿತಾ ಎಕ್ಸುರಿ ನ್ಹಯ್. ಬರಿ ಕವಿತಾ ಮನ್ಶಾಂಲಾಗಿಂ ಉಲಯ್ತಾ. ಉಲೊಂವ್ಕ್ ಕರ್‍ಚಿ ಕಲಾ, ಕವಿಕ್ ಮಾತ್ರ್ ಸಾಧ್ಯ್ - ಅಶೆಂ ಮ್ಹಣಾಲೊ ಕನ್ನಡ ಲೇಖಕ್ ತಶೆಂ ಕವಿ ಚಿದಂಬರ ಬೈಕಂಪಾಡಿ.  ತೊ ಕಿನ್ನಿಗೋಳಿ ಯುಗಪುರುಷ ಸಭಾಸಾಲಾಂತ್ ಹ್ಯಾಚ್ ಆಗೊಸ್ತಾಚೆ 29 ತಾರಿಕೆರ್ ಆಯ್ತಾರಾ ಕವಿತಾ ಟ್ರಸ್ಟ್ ಹಾಂಣಿ ಚಲೊವ್ನ್ ವೆಲ್ಲ್ಯಾ ಕವಿತಾ ದೀಸ್ ಸಂಭ್ರಮಾ ವೆಳಾ ಮುಕೆಲ್ ಸೈರೊ ಜಾವ್ನ್ ಉಲಯ್ತಾಲೊ. 

ಕೊಂಕಣಿ ಆನಿ ತುಳು, ಕನ್ನಡ ರಥಾಚಿಂ ದೋನ್ ರೊದಾಂ.  ಹ್ಯೊ ಭಾಸೊ ಸುಮಧುರ್. ಕರಾವಳಿಚ್ಯಾ ಕನ್ನಡಾವಿಶಿಂ ಉಲಯ್ತಾನಾ ಕೊಂಕಣಿ ಆನಿ ತುಳು ವಿಂಗಡ್ ಕರುಂಕ್ ಜಾಯ್ನಾ -ಅಶೆಂ ತಾಣೆಂ ಸಾಂಗ್ಲೆಂ. ಮುಕಾರ್ ಉಲೊವ್ನ್ ಖಂಯ್ಚೀಯ್ ಕವಿತಾ ಕವಿನ್ ಆಪ್ಲೆ ಮಾಯ್‍ಭಾಶೆನ್ ಬರಯ್ಜಾಯ್. ಕವಿಂನಿ ನಿರಾಶಾವಾದಿ ಜಾಂವ್ಚೆಂ ನಾಕಾ. ಆಶಾವಾದಿ ಜಾಯ್ಜಾಯ್. ಕವಿತೆಂನಿ ವಾಪರ್‍ಚ್ಯಾ ಸಬ್ದಾಂನಿ ತಾಂಣಿ ಸಂಗೀತ್ ದಿಪ್ಕಾಯ್ಲ್ಯಾರ್ ಭೋವ್ ಬರೆಂ. ಅಶೆಂ ಕೆಲ್ಲ್ಯಾನ್ ರಸಿಕಾಂಕ್ ಅರ್ಥ್ ಜಾಯ್ನ್ಯಾತ್ಲ್ಯೊ ಕವಿತಾ ಸಯ್ತ್ ಭೊಗುಂಕ್ ಜಾತಾತ್ - ಮ್ಹಣೊನ್ ಆಪ್ಲಿ ಅಭಿಪ್ರಾಯ್ ತಾಣೆಂ ಉಚಾರ್‍ಲಿ. 

ಸೊಮಯ್ ಪೆಟೊವ್ನ್ ಕವಿತಾ ದಿಸಾಚೆಂ ಉಗ್ತಾವಣ್ ಕೆಲ್ಲ್ಯಾ ದಾಯ್ಜಿವರ್ಲ್ಡ್ ವೀಕ್ಲಿ ಸಂಪಾದಕ್ ಹೇಮಾಚಾರ್ಯಾನ್ `ಮ್ಹಜ್ಯಾ ಸೈಮಾಂತ್, ಬೈಲಾಂತ್ ಚಲೊನ್ ಘರಾ ಪಾವ್ತಾನಾ ಆಪಾಪಿಂಚ್ ಕವಿತಾ ಉಬ್ಜಾತಾತ್. ಕಿನ್ನಿಗೋಳಿ ಕವಿತೆಚೆಂ ಕಣಸ್ ಜಾವ್ನಾಸಲ್ಲೆಂ. ಆಜ್ ಹಾಂಗಾಸರ್ ಯೆತಾನಾ ತೆಂ ತಶೆಂ ಉರೊಂಕ್ ನಾ ಚಿಂತಾನಾ ಬೆಜಾರ್ ಜಾತಾ. ಆಯ್ಚ್ಯಾ ಹ್ಯಾ ಕವಿತಾ ದಿಸಾವರ್‍ವಿಂ ಹಾಂಗಾಸರ್ ನವೊ ಪರ್ವೊ ಉದೆಲಾ' ಅಶೆಂ ಸಾಂಗ್ಲೆಂ.

ಸಿಂಡಿಕೇಟ್ ಬೆಂಕಾಚೊ ಆದ್ಲೊ ಡೆಪ್ಯುಟಿ ಜನರಲ್ ಮ್ಯಾನೆಜರ್ ಕೆ ಜಿ ಮಲ್ಯ ಉಲೊವ್ನ್ ಯುಗಪುರುಷ ಸಭಾಸಾಲಾಂತ್ ಹಜಾರಾಂನಿ ಸಾಹಿತಿಕ್ ಮೆಳಾವೆ ಚಲ್ಲ್ಯಾತ್. ಕವಿತಾ ಟ್ರಸ್ಟಾನ್ ಹಾಂಗಾಸರ್ ಕವಿತಾ ದೀಸ್ ಮಾಂಡುನ್ ಹಾಡುನ್ ಬಳ್ವಂತ್ ಮೇಟ್ ಕಾಡ್ಲಾಂ - ಸಾಂಗ್ಲೆಂ.  ಕೊಂಕಣಿ ಕುಟಮ್ ಬಾಹ್ರೇನ್ ಹಾಚೊ ಸಂಚಾಲಕ್ ರಿಚರ್ಡ್ ಮೊರಾಸ್ ಉಲೊವ್ನ್ ಅಸಲ್ಯಾ ಕವಿಗೋಷ್ಠಿ ಮುಕಾಂತ್ರ್ ತರ್‍ನ್ಯಾ ಕವಿಂಕ್ ಉಮೆದ್ ಖಂಡಿತ್ ಲಾಭ್ತಲಿ. ತರ್‍ನ್ಯಾಂನಿ ಹೊ ಸಂದರ್ಭ್ ಹೊಗ್ಡಾಂವ್ಕ್ ನಜೊ. ತಾಂಣಿ ಕವಿತಾ ಬರೊಂವ್ಚ್ಯೊ ಮಾತ್ರ್ ನ್ಹಯ್, ಹೆರಾಂಚ್ಯೊ ವಾಚುನ್ ತಾಂತ್ಲೆಂ ಸುಖ್ ಆಪ್ಣಾಂವ್ಕ್ ಶಿಕೊಂಕ್ ಜಾಯ್ ಮ್ಹಣೊನ್ ಉಲೊ ದಿಲೊ.

ದಾಯ್ಜಿ ದುಬಾಯ್ ಎಕ್ತಾರಾಚೊ ಆದ್ಲೊ ಸಂಚಾಲಕ್ ಡಯಾನ್ ಡಿಸೋಜಾ ಉಲೊವ್ನ್ ಅಸಲ್ಯಾ ಕವಿಗೋಷ್ಠಿಂ ವರ್ವಿಂ ಕವಿತೆಚಿ ವಾಡಾವಳ್ ಮಾತ್ರ್ ನ್ಹಯ್, ಮನ್ಶಾಂ ಮಧ್ಲೊ ಸಂಬಂಧ್ ಸಯ್ತ್ ಬರೊ ಜಾತಾ ಮ್ಹಣಾಲೊ.  ಯುಗಪುರುಷ್ ಪತ್ರಾಚೊ ಸಂಪಾದಕ್ ಭುವನಾಭಿರಾಮ ಉಡುಪ ಉಲೊವ್ನ್ ಹಾಂಗಾಸರ್ ಕವಿತಾ ವಾಚಲ್ಲೆ ಕವಿ ರಾಜ್ಯಾಚೆ ಆನಿ ರಾಷ್ಟ್ರ್ ಮಟ್ಟಾಚೆ ಕವಿ ಜಾವ್ನ್ ಪರ್ಜಳೊಂದಿ ಅಶೆಂ ಸಾಂಗ್ಲೆಂ.

ವಿಲ್ಸನ್ ಕಿನ್ನಿಗೋಳಿನ್ ಯುವ ಕವಿಗೋಷ್ಟಿ ಚಲೊವ್ನ್ ವೆಲಿ.  `ಕವಿತಾ ಆಸ್ಚಿ ಮತಿಂತ್. ಕವಿತೆಕ್ ರೆಗ್ರ್ ನಾ. ಕವಿಕಚ್ ಆಪ್ಣಾಚಿ ಕವಿತಾ ಕಾವ್ಯಾಳ್ ದಿಸ್ಲ್ಯಾಶಿವಾಯ್ ತಿ ಕೆದಿಂಕಚ್ ಕಾವ್ಯಾಳ್ ಜಾಂವ್ಕ್ ಸಾಧ್ಯ್ ನಾ'  ಅಶೆಂ ತೊ ಆಪ್ಲ್ಯಾ ಉಲೊವ್ಪಾಂತ್ ಮ್ಹಣಾಲೊ.  ಹೆ ಕವಿಗೋಷ್ಟಿಂತ್ ಮಂಗ್ಳುರ್ ಥಾವ್ನ್ ವೆಂಕಟೇಶ ನಾಯಕ್, ಪ್ರವೀಣ್ ತಾವ್ರೊ ಹಾಂಣಿ, ತಶೆಂಚ್ ಕಟೀಲ್ ಥಾವ್ನ್ ನೆಲ್ಸನ್ ಸಿಕ್ವೇರಾ ಹಾಣೆ ಆನಿ ಕಿನ್ನಿಗೋಳಿ ಥಾವ್ನ್ ಶರೀನಾ ಶ್ವೇತಾ ಡಿಸೋಜಾ, ಪಾವ್ಲ್ ಕ್ರಾಸ್ತಾ, ಡಿಂಪ್ನಾ ನಝರೆತ್, ಲವೀಟಾ ಮಿನೇಜಸ್, ಜೀವನ್ ಆಲ್ವರಿಸ್, ರೆನಿಟಾ ಮಿನೇಜಸ್, ಮರ್‍ವಿನ್ ಕ್ರಾಸ್ತಾ ಹಾಂಣಿ ಭಾಗ್ ಘೆತ್ಲೊ.

ಮ್ಹಾಲ್ಘಡ್ಯಾಂಚೆ ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಜೊಸ್ಸಿ ಪಿಂಟೊ ಕಿನ್ನಿಗೋಳಿನ್ ಘೆತಲ್ಲೆಂ.  ಹೇಮಾಚಾರ್ಯ, ಮೆಲ್ವಿನ್ ರೊಡ್ರಿಗಸ್, ಗ್ಲೇಡಿಸ್ ರೇಗೊ, ಡಿಂಪಲ್ ಫೆರ್ನಾಂಡಿಸ್, ವಿಲ್ಸನ್ ಕಟೀಲ್, ಎಚ್ಚೆಮ್ ಪೆರ್ನಾಲ್, ವಲೇರಿಯನ್ ಸಿಕ್ವೇರಾ, ಕಾರ್ಮಿನ್ ಸಲ್ಡಾನ್ಹಾ, ಕೆ ಜಿ ಮಲ್ಯ ಆನಿ ವೊಲ್ಟರ್ ದಾಂತಿಸ್ ಹಾಂಣಿ ಆಪಾಪ್ಲ್ಯೊ ಕವಿತಾ ಪೇಶ್ ಕೆಲ್ಯೊ.

ಕಾರ್ಯಾಚೆ ಸುರ್‍ವೆರ್ ಆಗೊಸ್ತಾಚೆ 27 ತಾರಿಕೆರ್ ಅಮರ್ ಜಾಲ್ಲ್ಯಾ ಕೊಂಕಣಿ ಸಾಹಿತ್ಯಕಾರ್ ಜ್ಞಾನಪೀಠ್ ಪ್ರಶಸ್ತಿ ವಿಜೇತ್ ರವೀಂದ್ರ ಕೆಳೇಕಾರಾಚ್ಯಾ ಅತ್ಮ್ಯಾಕ್ ಶೃದ್ಧಾಂಜಲಿ ಭೆಟಯ್ಲಿ.

ವಿತೊರಿ ಕಾರ್ಕೊಳಾನ್ ಸಗ್ಳೆಂ ಕಾರ್ಯೆಂ ಚಲೊವ್ನ್ ವೆಲೆಂ. ವೊಲ್ಟರ್ ದಾಂತಿಸಾನ್ ಉಪ್ಕಾರ್ ಆಟಯ್ಲೆ. ಸುರ್‍ವೆರ್ ಆಲ್ಫೊನ್ಸ್ ಆನಿ ಪಂಗ್ಡಾಥಾವ್ನ್ ಗುಮ್ಟಾ ಗಾಣಿಂ ಆಸಲ್ಲಿಂ.

-ಕವಿತಾ ಭಾತ್ಮಿ