ಕೊಂಕಣಿ ನಾಟಕ್ ಸಭೆಚೆ ಕವಿತಾ ವಾಚನ್ ಸರ್ತೆಂತ್ ಅನ್ನಾಲಿಸಾ ಆನಿ ಜೈಸನ್ ಪಯ್ಲಿಂ

ಕೊಂಕಣಿ ನಾಟಕ್ ಸಭೆಚೆ ಕವಿತಾ ವಾಚನ್ ಸರ್ತೆಂತ್ ಅನ್ನಾಲಿಸಾ ಆನಿ ಜೈಸನ್ ಪಯ್ಲಿಂ

ಕೊಂಕಣಿ ನಾಟಕ್ ಸಭೆನ್ ಕವಿತಾ ಟ್ರಸ್ಟ್ ಹಾಂಚೆ ಸಾಂಗಾತಾ ಮೆಳೊನ್ ಹ್ಯಾಚ್ ಸಪ್ಟೆಂಬರ್ 1 ತಾರಿಕೆರ್ ಆಯ್ತಾರಾ ಡೊನ್ ಬೊಸ್ಕೊ ಹೊಲಾಂತ್ ಚಲಯಿಲ್ಲ್ಯಾ ತೆರಾವ್ಯಾ ಕೊಂಕಣಿ ಕವಿತಾ ವಾಚನ್ ಸರ್ತೆಂತ್ ಬೊಂದೆಲ್ಚ್ಯಾ ಆನ್ನಾಲಿಸಾ ಡಿಸಿಲ್ವಾಕ್ ತಶೆಂ ಗುರ್ಪುರ್-ಕೈಕಂಬಚ್ಯಾ ಜೈಸನ್ ಸಿಕ್ವೇರಾಕ್ ಪಯ್ಲಿಂ ಇನಾಮಾಂ ಲಾಭ್ಲ್ಯಾಂತ್.

ಆನ್ನಾಲಿಸಾ ಡಿಸಿಲ್ವಾ, ಮೆರುಲಾ ಪಿಂಟೊ, ಶೈನಾ ಡಿಸಿಲ್ವಾ

ಚಂದ್ರಿಮಾ ಮೊಂತೇರೊ, ಪ್ರಿಥುಮಾ ಮೊಂತೇರೊ, ಓಸ್ಟಿನ್ ಡಿಕುನ್ಹಾ, ಗ್ರೇಶಲ್ ಕ್ವಾಡ್ರಸ್

ಲ್ಹಾನಾಂಚ್ಯಾ ವಿಭಾಗಾಂತ್ಲಿಂ ಸ್ಪರ್ಧಿಕಾಂ, ವ್ಯವಸ್ಥಾಪಕ್ ತಶೆಂ ವೊರಯ್ಣಾರಾಂ ಸಂಗಿಂ

ಹಿ ಸರ್ತ್ ದೋನ್ ವಿಭಾಗಾಂನಿ ಚಲಲ್ಲಿ ಆಸೊನ್ ಆಟ್ರಾ ವರ್ಸಾಂ ಸಕಯ್ಲ್ಯಾಂಚ್ಯಾ ವಿಭಾಗಾಂತ್ ಬೊಂದೆಲ್ಚ್ಯಾ ಇಕ್ರಾ ವರ್ಸಾಂ ಪ್ರಾಯೆಚ್ಯಾ ಆನ್ನಾಲಿಸಾ ಡಿಸಿಲ್ವಾನ್ ಪಯ್ಲೆಂ ಇನಾಮ್ ಜೊಡ್ಲೆಂ ತರ್, ಇಜಯ್ಚ್ಯಾ ಚೊವ್ದಾ ವರ್ಸಾಂ ಪ್ರಾಯೆಚ್ಯಾ ಮೆರುಲಾ ಪಿಂಟೊಕ್ ದುಸ್ರೆಂ ಸ್ಥಾನ್ ಆನಿ ಬೊಂದೆಲ್ಚ್ಯಾ ನೋವ್ ವರ್ಸಾಂ ಪ್ರಾಯೆಚ್ಯಾ ಶೈನಾ ಡಿಸಿಲ್ವಾಕ್ ತಿಸ್ರೆಂ ಸ್ಥಾನ್ ಫಾವೊ ಜಾಲಾಂ. ಪ್ರೋತ್ಸಾಹಕ್ ಇನಾಮಾಂ ಖಾತೀರ್ ವಾಮಂಜೂರ‍್ಚೆಂ ಬಾರಾ ವರ್ಸಾಂ ಪ್ರಾಯೆಚೆಂ ಪ್ರಿಥುಮಾ ಮೊಂತೇರೊ, ಇಜಯ್ಚೊ ಇಕ್ರಾ ವರ್ಸಾಂ ಪ್ರಾಯೆಚೊ ಓಸ್ಟಿನ್ ಡಿಕುನ್ಹಾ, ಗುರ್ಪುರ್ ಕೈಕಂಬಾಚೆಂ ತೆರಾ ವರ್ಸಾಂಚೆಂ ಗ್ರೇಶಲ್ ಕ್ವಾಡ್ರಸ್ ಆನಿ ವಾಮಂಜೂರ‍್ಚೆಂ ನೋವ್ ವರ್ಸಾಂ ಪ್ರಾಯೆಚೆಂ ಚಂದ್ರಿಮಾ ಮೊಂತೇರೊ ವಿಂಚುನ್ ಆಯ್ಲ್ಯಾಂತ್.

ಜೈಸನ್ ಸಿಕ್ವೇರಾ, ಆಮೋರಾ ಮೊಂತೇರೊ, ಎಮ್ಲಿನ್ ಡಿಸೋಜಾ, ಈಡನ್ ಸಿಕ್ವೇರಾ

ವ್ಹಡಾಂಚ್ಯಾ ವಿಭಾಗಾಂತ್ಲಿಂ ಸ್ಪರ್ಧಿಕಾಂ, ವ್ಯವಸ್ಥಾಪಕ್ ತಶೆಂ ವೊರಯ್ಣಾರಾಂ ಸಂಗಿಂ

ಆಟ್ರಾ ವರ್ಸಾಂ ವಯ್ಲ್ಯಾಂಚ್ಯಾ ವ್ಹಡಾಂಚ್ಯಾ ವಿಭಾಗಾಂತ್ ಗುರ್ಪುರ್ ಕೈಕಂಬಾಚ್ಯಾ ಜೈಸನ್ ಸಿಕ್ವೇರಾನ್ ಪಯ್ಲೆಂ ಇನಾಮ್ ಜೊಡ್ಲೆಂ ತರ್ ದುಸ್ರೆಂ ಇನಾಮ್ ವಾಮಂಜೂರ‍್ಚ್ಯಾ ಆಮೋರಾ ಮೊಂತೇರೊನ್ ಆಪ್ಣಾಯ್ಲೆಂ ಆನಿ ತಿಸ್ರೆಂ ಇನಾಮ್ ಮೊಡಂಕಾಪ್ಚ್ಯಾ ಈಡನ್ ಜೆಸ್ಲೀನ್ ಸಿಕ್ವೇರಾ ತಶೆಂ ಆಂಜೆಲೊರ‍್ಚ್ಯಾ ಎಮ್ಲಿನ್ ಜೆ. ಡಿಸೋಜಾಕ್ ವಾಂಟುನ್ ಗೆಲೆಂ.

ಹೊ ಸ್ಪರ್ದೊ ಕವಿತಾ ಟ್ರಸ್ಟಾನ್, ಜನವರಿ ಮ್ಹಯ್ನ್ಯಾಂತ್ ಚಲೊಂವ್ಚ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಚ್ಯಾ ಮಂಗ್ಳುರ್ ವಿಂಚವ್ಣೆಚೊ ಪಾಂವ್ಡೊ ಜಾವ್ನಾಸಲ್ಲೊ. ತ್ಯಾ ದೆಕುನ್ ಲ್ಹಾನಾಂಚ್ಯಾ ತಶೆಂ ವ್ಹಡಾಂಚ್ಯಾ ವಿಭಾಗಾಂನಿ ಅತ್ಯಧಿಕ್ ಅಂಕ್ ಜೊಡಲ್ಲ್ಯಾ, ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಭಿತರ‍್ಲ್ಯಾ ನೋವ್ ಯುವಜಣಾಂಚಿ ವಿಂಚವ್ಣೀಯ್ ಹ್ಯಾ ಸಂದರ್ಭಾರ್ ಚಲ್ಲಿ. ಕವಿತಾ ಟ್ರಸ್ಟಾಚ್ಯಾ ಕೊಂಕಣಿ ಕವಿತಾ ವಾಚನ್ ಸರ್ತೆಕ್ ಮಂಗ್ಳುರ್ ಥಾವ್ನ್ ವಿಂಚುನ್ ಆಯಿಲ್ಲ್ಯಾ ನೋವ್ ಜಣಾಂಚಿ ನಾಂವಾಂ ಹ್ಯಾಪರಿಂ ಆಸಾತ್:

ಅಖಿಲ್ ಭಾರತ್ ಕೊಂಕಣಿ ವಾಚನ್ ಸರ್ತೆಕ್ ವಿಂಚುನ್ ಆಯಿಲ್ಲಿಂ ಸ್ಪರ್ಧಿಕಾಂ

ಜೈಸನ್ ಸಿಕ್ವೇರಾ, ಗುರ್ಪುರ್ ಕೈಕಂಬ; ಆಮೋರಾ ಮೊಂತೇರೊ, ವಾಮಂಜೂರ್; ಜೊಸ್ಲಿನ್ ಸಲ್ಡಾನ್ಹಾ, ಫೆರ್ಮಾಯ್; ಕೆ. ಚಿತ್ರಾ ಶೆಣೈ, ಕೆನರಾ ಕೊಲೆಜ್; ಎಮ್ಲಿನ್ ಜೆ. ಡಿಸೋಜಾ, ಆಂಜೆಲೊರ್; ಈಡನ್ ಜೆಸ್ಲಿನ್ ಸಿಕ್ವೇರಾ, ಮೊಡಂಕಾಪ್; ಜೋಕ್ಷಿತ್ ಡಿಸೋಜಾ, ಸಾಂ ಲುವಿಸ್ ಕೊಲೆಜ್; ಪ್ರೀಮಾ ಪಿಂಟೊ, ಮೊಡಂಕಾಪ್; ಎಮ್. ಶ್ವೇತಾ ಕಾಮತ್, ಕೆನರಾ ಕೊಲೆಜ್.

ಹ್ಯಾ ಕವಿತಾ ವಾಚನ್ ಸರ್ತೆಕ್ ಕವಿ ವೊಲ್ಟರ್ ದಾಂತಿಸ್, ಕವಿತಾ ಟ್ರಸ್ಟಾಚಿಂ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಆನಿ ಎವ್ರೆಲ್ ರೊಡ್ರಿಗಸ್ ವೊರಯ್ಣಾರ್ ಜಾವ್ನ್ ಆಸಲ್ಲಿಂ. ಕವಿ ಎಂಡ್ರ್ಯೂ ಎಲ್ ಡಿಕುನ್ಹಾ, ವಿನ್ಸಿ ಪಿಂಟೊ ಆಂಜೆಲೊರ್ ಹಾಂಣಿ ಸಹಕಾರ್ ದಿಲ್ಲೊ. ಕೊಂಕಣಿ ನಾಟಕ್ ಸಭೆಚ್ಯಾ ಡೊಲ್ಫಿ ಸಲ್ಡಾನ್ಹಾನ್, ಗ್ಲೇಡಿಸ್ ರೇಗೊನ್, ಸುನೀಲ್ ಮಿನೇಜಸಾನ್ ಮಾಂಚಿಯೆರ್ ಸಹಕಾರ್ ದಿಲ್ಲೊ

ಸುರ‍್ವೆರ್ ಕೊಂಕಣಿ ನಾಟಕ್ ಸಭೆಚೊ ಅಧ್ಯಕ್ಷ್ ಫಾ. ಸಿಪ್ರಿಯನ್ ಡಿಸೋಜಾನ್ ಸರ್ವಾಂಕ್ ಯೆವ್ಕಾರ್ ಮಾಗೊನ್ ಬರೆಂ ಮಾಗಲ್ಲೆಂ ತರ್, ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸರ್ತೆಚಿಂ ನೆಮಾಂ ಸಾಂಗ್ಲಿಂ ತಶೆಂಚ್ ಟ್ರಸ್ಟಾಚ್ಯಾ ಕಾರ್ಯಕ್ರಮಾಂಚೊ ವಿವರ್ ದಿಲೊ. ಟ್ರಸ್ಟಿ ಎಂಡ್ರ್ಯೂ ಎಲ್ ಡಿಕುನ್ಹಾನ್ ಆಪ್ಲಿಂ ಭೊಗ್ಣಾಂ ವೆಕ್ತ್ ಕೆಲಿಂ.

- ಚಿತ್ರಾಂ: ಜ್ಯಾಕ್ಸನ್ ಡಿಸೋಜಾ