ಕವಿತಾ ವಾಚನ್ ಸರ್ತ್: ಉಡುಪಿ ಥಾವ್ನ್ ಲವೀಟಾ ಪಿಂಟೊ, ನಝೀಫ್ ಮನೆಗಾರ್ ಫೈನಲಾಕ್
ಹ್ಯಾಚ್ ಸಪ್ಟೆಂಬರ್ 21 ತಾರಿಕೆರ್ ಉಡುಪಿ ದುಖಿ ಸಾಯ್ಬಿಣ್ ಇಗರ್ಜೆಚ್ಯಾ ಡೊನ್ ಬೊಸ್ಕೊ ಹೊಲಾಂತ್ ಚಲ್ಲಲ್ಲ್ಯಾ ಕೊಂಕಣಿ ಕವಿತಾ ವಾಚನ್ ಸರ್ತೆಚ್ಯಾ ಮುಳಾವ್ಯಾ ಪಾಂವ್ಡ್ಯಾಂತ್, ಪಂದ್ರಾ ವರ್ಸಾಂ ವಯ್ಲ್ಯಾಂಚ್ಯಾ ವಿಭಾಗಾಂತ್ ಗಂಗೊಳ್ಳಿಚಿ ಲವೀಟಾ ಪಿಂಟೊ ಆನಿ ಭಟ್ಕಳ್ಚೊ ನಝೀಫ್ ಮನೆಗಾರ್ ಫೈನಲಾಕ್ ವಿಂಚುನ್ ಆಯ್ಲ್ಯಾಂತ್. ಕವಿತಾ ಟ್ರಸ್ಟಾನ್ ರೋಹನ್ ಆನಿ ಲವೀಟಾ ಮೊಂತೇರೊ ಹಾಂಚ್ಯಾ ನಾಂವಾರ್ ಚೊವ್ತ್ಯಾ ವರ್ಸಾ ಚಲಂವ್ಚೊ ಹೊ ಸ್ಪರ್ಧೊ, ಉಡುಪಿ ತಶೆಂ ಕಾರ್ಕಳಾಂತ್ 'ಉಜ್ವಾಡ್' ಕೊಂಕಣಿ ನೆಮಾಳ್ಯಾಚ್ಯಾ ಸಹಕಾರಾನ್ ಘಡೊವ್ನ್ ಹಾಡ್ಲಾ.
ಹ್ಯಾ ದೊಗಾಂ ಬರಾಬರ್ ಫ್ರೂ ಮಿನೇಜಸ್ ತಶೆಂ ಅಕೀಫ್ ಮನೆಗಾರ್ ಹಾಂಕಾಂ ರಿಸರ್ವ್ ಮ್ಹಣೊನ್ ವಿಂಚುನ್ ಕಾಡ್ಲಾಂ. ಖಂಯ್ಚ್ಯಾಯ್ ಕಾರಣಾಕ್ ಫೈನಲಾಕ್ ವಿಂಚುನ್ ಆಯಿಲ್ಲಿಂ ಯೇನಾತಲ್ಲ್ಯಾ ಸಂದರ್ಭಾರ್ ಹಾಂಕಾಂ ಆವ್ಕಾಸ್ ಲಾಭ್ತಲೊ.
Lavita Pinto, Nazeef Manegar
ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸರ್ತೆಚಿಂ ನೆಮಾಂ, ಆನಿ ಕವಿತಾ ಟ್ರಸ್ಟಾಚ್ಯಾ ವಾವ್ರಾಚಿ ಮ್ಹಾಯೆತ್ ದಿತಚ್, 'ಉಜ್ವಾಡ್' ಕೊಂಕಣಿ ನೆಮಾಳ್ಯಾಚೊ ಸಂಪಾದಕ್ ಫಾ. ಚೇತನ್ ಕಾಪುಚಿನ್ ಹಾಣೆ ದಿಲ್ಲ್ಯಾ ಸಹಾಕಾರಾ ಖಾತೀರ್ ತಾಂಚೊ ಉಪ್ಕಾರ್ ಭಾವುಡ್ಲೊ. ಭಟ್ಕಳ್ ಥಾವ್ನ್ ಸಹಕಾರ್ ದಿಂವ್ಚ್ಯಾ ಅಬ್ದುಲ್ ರೆಹಮಾನ್ ತಶೆಂ ಸಾದಿಕ್ ಆಸರ್‍ಮಟ್ ಹಾಂಕಾಂಯ್ ತಾಣೆ ಧನ್ಯವಾದ್ ದಿಲೆ.
ಎವ್ರೆಲ್ ರೊಡ್ರಿಗಸ್, ಕಿಶೂ ಬಾರ್ಕೂರ್ ಆನಿ ಎಂಡ್ರ್ಯೂ ಎಲ್ ಡಿಕುನ್ಹಾ ಹಾಂಣಿ ವೊರಯ್ಣಾರ್ ಜಾವ್ನ್ ಸಹಕಾರ್ ದಿಲ್ಲೊ. ಟ್ರಸ್ಟಿ ವಿತೊರಿ ಕಾರ್ಕಳಾನ್ ಕಾರ್ಯೆಂ ಚಲೊವ್ನ್ ವೆಲೆಂ. ಟ್ರಸ್ಟಿ ವಿಲಿಯಮ್ ಪಾಯ್ಸ್, ಕವಿ ಕ್ಲೋಡಿ ಬ್ರಹ್ಮಾವರ್ ಹ್ಯಾ ಸಂದರ್ಭಾರ್ ಹಾಜರ್ ಆಸಲ್ಲೆ. ಹೆ ಸರ್ತೆಂತ್ ಭಟ್ಕಳ್, ಗಂಗೊಳ್ಳಿ, ಪಾಂಗ್ಳಾ, ಮೂಡುಬೆಳ್ಳೆ, ಬಾರ್ಕೂರ್, ಸಾಸ್ತಾನ್ ಥಾವ್ನ್ ಯುವಜಣಾಂನಿ ವಾಂಟೊ ಘೆತಲ್ಲೊ.
कविता वाचन सर्त: उडुपी थावन लवीटा पिंटो, नझीफ मनेगार फैनलाक
ह्याच सपटेंबर २१ तारिकेर उडुपी दुखी सायबीण इगर्जेच्या डोन बोसको होलांत चल्लल्ल्या कोंकणी कविता वाचन सरतेच्या मुळाव्या पांवड्यांत, पंद्रा वर्सां वयल्यांच्या विभागांत गंगोळ्ळिची लवीटा पिंटो आनी भटकळचो नझीफ मनेगार फैनलाक विंचून आयल्यांत. कविता ट्रस्टान रोहन आनी लवीटा मोंतेरो हांच्या नांवार चोवत्या वर्सा चलंवचो हो स्परधो, उडुपी तशें कारकळांत उजवाड कोंकणी नेमाळ्याच्या सहकारान घडोवन हाडला.
ह्या दोगां बराबर फ्रू मिनेजस तशें अकीफ मनेगार हांकां रिसर्व म्हणोन विंचून काडलां. खंयच्याय कारणाक फैनलाक विंचून आयिल्लीं येनातल्ल्या संदरभार हांकां आवकास लाभतलो.
कविता ट्रस्ट अध्यक्ष मेलविन रोडरिगसान सरतेचीं नेमां, आनी कविता ट्रसटाच्या वावराची म्हायेत दितच, उजवाड कोंकणी नेमाळ्याचो संपादक फा. चेतन कापुचिन हाणे दिल्ल्या सहाकारा खातीर तांचो उपकार भावुडलो. भटकळ थावन सहकार दिंवच्या अब्दुल रेहमान तशें सादीक आसर्मट हांकांय ताणे धन्यवाद दिले.
एवरेल रोडरिगस, किशू बारकूर आनी एंडऱ्यू एल डिकुन्हा हांणी वोरयणार जावन सहकार दिल्लो. ट्रसटी वितोरी कारकळान कारयें चलोवन वेलें. ट्रसटी विलियम पायस, कवी क्लोडी ब्रह्मावर ह्या संदरभार हाजर आसल्ले. हे सरतेंत भटकळ, गंगोळ्ळी, पांगळा, मूडुबेळ्ळे, बारकूर, सास्तान थावन युवजणांनी वांटो घेतल्लो.