ಕವಿತಾ ವಾಚನ್ ಸರ್ತ್: ಪಣಜಿ ಥಾವ್ನ್ ಪಾಂಚ್ ಯುವಜಣಾಂ ಫೈನಲಾಕ್
ರೋಹನ್ ಆನಿ ಲವೀಟಾ ಮೊಂತೇರೊ ಪಾಂಚ್ವಿ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತ್ ಹ್ಯಾಚ್ ಸಪ್ಟೆಂಬರ್ 3 ತಾರಿಕೆರ್ ಪಣಜಿ ಶೆರಾಂತ್ ಸುರು ಜಾಲಿ. ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಹಾಂಚ್ಯಾ ಸಹಕಾರಾನ್ ಚಲಲ್ಲೆ ಹೆ ಸರ್ತೆಂತ್ ತೆವೀಸ್ ಯುವಜಣಾಂನಿ ಭಾಗ್ ಘೆತಲ್ಲೊ ಆಸುನ್ ಪಾಂಚ್ ಜಣಾಂಕ್ 2016 ವರ್ಸಾಚೆ ಜನೆರ್ 10 ತಾರಿಕೆರ್ ಚಲುಂಕ್ ಆಸ್ಚ್ಯಾ ಕವಿತಾ ಫೆಸ್ತಾಂತ್ ಚಲ್ಚ್ಯಾ ಫೈನಲ್ಸಾಕ್ ವಿಂಚುನ್ ಕಾಡ್ಲಿಂ.
ಪಣಜಿಂತ್ ಆಸ್ಚ್ಯಾ ಟಿ. ಬಿ. ಕೂನ್ಹಾ ಸಭಾಸಾಲಾಂತ್ ಚಲಲ್ಲೆ ಹೆ ಸರ್ತೆಚೆ ಸುರ್‍ವೆರ್ ಕೊಂಕಣಿ ಭಾಷಾ ಮಂಡಳಾಚೊ ಅಧ್ಯಕ್ಷ್ ಚೇತನ್ ಆಚಾರ್ಯ ಹಾಂಣಿ ಸ್ವಾಗತ್ ಕೆಲೊ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಕವಿತಾ ಟ್ರಸ್ಟಾಚೊ ವಾವ್ರ್ ತಶೆಂ ಸರ್ತೆಚ್ಯಾ ನೆಮಾಂಚೊ ವಿವರ್ ದಿಲೊ ಆನಿ ಸಹಕಾರ್ ದಿಲ್ಲ್ಯಾ ಕೊಂಕಣಿ ಭಾಷಾ ಮಂಡಳಾಚೊ ಉಪ್ಕಾರ್ ಆಟಯ್ಲೊ.
ಹೆ ಸರ್ತೆಂತ್ ಮಾಪ್ಶಾಂ ಸೈಂಟ್ ಕ್ಸೇವಿಯರ್‍ಸ್ ಕೊಲೆಜ್, ಪಣಜಿ ಪೀಪಲ್ಸ್ ಹೈಯರ್ ಸೆಕೆಂಡರಿ, ಎಸ್.ಎಸ್. ಡೆಂಪೊ ಕೊಲೆಜ್, ಸಾಂಖ್ಳಿ ಸರಕಾರಿ ಕೊಲೆಜ್, ಫಾ. ಆಗ್ನೆಲ್ ಕೊಲೆಜ್ ಪಿಲಾರ್ ಆನಿ ಗೊಂಯ್ ವಿಶ್ವವಿದ್ಯಾಲಯಾಚ್ಯಾ ವಿದ್ಯಾರ್ಥಿಂನಿ ಭಾಗ್ ಘೆತಲ್ಲೊ.
ಸಾಂಖ್ಳಿಚ್ಯಾ ಸರ್ಕಾರಿ ಕೊಲೆಜಿಚೆಂ ಶಾಂಭವಿ ಪಿ. ಸಿನಾಯ್, ಫಾ ಆಗ್ನೆಲ್ ಕೊಲೆಜ್ ಪಿಲಾರ್ ಹಾಂಗಾಚೆಂ ನಿಕಿತಾ ಲೋಟ್ಲಿಕಾರ್ ಆನಿ ಆನಿಷ್ಕಾ ಪ್ರದೀಪ್ ವೆರ್ಣೆಕಾರ್, ತಶೆಂಚ್ ಗೊಂಯ್ ವಿಶ್ವವಿದ್ಯಾಲಯಾಚೆ ವಿಶಾಲ್ ಗಾಂವ್ಕಾರ್ ಆನಿ ಸಿದ್ದೇಶ್ ತಾರಿ ಫೈನಲಾಕ್ ವಿಂಚುನ್ ಆಯ್ಲಿಂ.
ವಿಲಿಯಮ್ ಪಾಯ್ಸ್, ಕಿಶೂ ಬಾರ್ಕೂರ್ ಆನಿ ಎಂಡ್ರ್ಯೂ ಎಲ್. ಡಿಕುನ್ಹಾ ವೊರಯ್ಣಾರ್ ಜಾವ್ನ್ ಆಸಲ್ಲೆ ತರ್, ಎವ್ರೆಲ್ ರೊಡ್ರಿಗಸ್ ಆನಿ ವಿತೊರಿ ಕಾರ್ಕೊಳಾನ್ ಸರ್ತ್ ಚಲೊವ್ನ್ ವ್ಹರ್‍ಚ್ಯಾಂತ್ ಮಜತ್ ಕೆಲಿ. ಭಾಗ್ ಘೆತಲ್ಲ್ಯಾ ಸರ್ವಾಂಕ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ.
कविता वाचन सर्त: पणजी थावन पांच युवजणां फैनलाक
रोहन आनी लवीटा मोंतेरो पांचवी अखिल भारत कोंकणी वाचन सर्त ह्याच सप्टेंबर 3 तारकेर पण्जी शेरांत सुरू जाली. कोंकणी भाषा मंडळ गोंय हांच्या सहकारान चलल्ले हे सर्तेंत तेवीस् युवजणांनी भाग घेतल्लो आसून पांच जणांक 2016 वर्साचे जानेर 10 तारकेर चलूंक आसच्या कविता फेस्तांत चलच्या फैनलाक विंचून काडलीं.
पणजींत आसच्या टी. बी. कून्हा सभा सालांत चलल्ले हे सर्तेचे सुरवेर कोंकणी भाषा मंडळाचो अध्यक्ष चेतन आचार्य हांणी स्वागत् केलो. कविता ट्रस्ट अध्यक्ष मेल्विन रोड्रीगस हांनी कविता ट्रस्टाचो वावर तशें सर्तेच्या नेमांचो विवर दिलो. सहकार दिल्ल्या कोंकणी भाषा मंडळाचो उपकार आटयलो.
हे सर्तेंत मापशां सैंट झेवियर्स कॉलेज, पणजी पीपल्स हैयर सेकेंडरी, एस्.एस्. ड्ँपो कॉलेज, सांखळी सरकारी कॉलेज, फा आग्नेल् कॉलेज पिलार आनि गोंय विश्व विद्यालयाच्या विद्यार्थिंनी भाग घेतल्लो.
सांखळिच्या सरकारी कॉलेजिचें शांभवी पी. सिनाय, फा आग्नेल कॉलेज पिलार हांगाचें निकिता लोटलीकार आनि आनिश्का प्रदीप वेर्णेकार तशेंच् गोंय विश्व विद्यालयाचे विशाल गांवकार् आनी सिद्देश तारी फैनलाक विंचून आयलीं.
विलियम् पायस, किशू बार्कूर आनी एंड्र्यू एल्. डिकून्हा वोरयणार् जावन् आसल्ले तर्, वितोरी कार्कळ आनी एवरेल रोड्रीगस हांणी सर्त चलोवन् व्हरच्यांत् मजत केल्ली. भाग घेतल्ल्या सरवांक मेल्विन रोड्रीगसान प्रमाण पत्रां वांटलीं.